E TUOA ana kaombiuta te tia tataraa tauani kanoan te bong ao e a nora te bwai teuana. E nora te angibuaka ae korakora bwa e a kaineta te tabo teuana ae rangi ni bati kaaina. Ibukina bwa e tabeakini mauria aomata, e kabanea ana konaa n angania te kauring imwain ae a oimwi.

N aron anne, e a kauringia ngkai kaain te aonnaba Iehova taekan te angibuaka ae karuanikai riki nakon are a ongongo man tauani kanoan te bong. E kangaa ni karaoa anne? Ao ti kangaa ni kakoauaa bwa e bon angania aomata aia tai ae tau ibukini katauraoaia? Ibukini kaekaan titiraki akanne, ti na nori moa kauring tabeua ake e anga Iehova n taai ake rimoa.

N taai ake a karakinaki n te Baibara, e anganga te kauring Iehova imwain angibuaka, ke ana motikitaeka i aoia naake a bon aki kan ongeaba n ana tua. (TaeRab. 10:25; Ier. 30:23) N taai akanne, e a kamani kaongoia aomata ake a na rotaki iai ao e tuangia bwa a na karaoi bitaki n aron ae boraoi ma nanona. (2Uea 17:​12-15; Neem. 9:​29, 30) Ibukini kaungaaia ana aomata bwa a na karaoi bitaki, e kakabonganaia ana toro aika kakaonimaki i aon te aba bwa a na taekina ana motikitaeka ao ni kaumakiia aomata.​—Amota 3:7.

Noa bon temanna naba ae kabonganaaki iroun Iehova. I nanon ririki aika bati, e ninikoria ni kauringia aomata aika buakaka ao n iowawa ake n ana bong, taekan te Ieka are e na roko. (KBwaai 6:​9-13, 17) E tuangia naba te bae a riai ni karaoia bwa a aonga ni kamaiuaki, ngaia are e a aranaki imwina riki bwa “te tia uarongorongoa taekan te raoiroi.”​—2Bet. 2:5.

Ma n aki ongea ana kakorakora Noa, a bon teimatoa aomata ake imwain te Ieka n aki mutiakina ana rongorongo are mairoun te Atua. A kaotia ae bon akea aia onimaki. Ibukin anne, a boni mate ngke e ‘roko te ieka n uotiia nako ni kabane.’ (Mat. 24:39; Ebera 11:7) A bon aki kona ni bukina te Atua bwa e aki kauringia.

N taai ake tabeua, e anga te kauring Iehova nakoia aomata teutana te tai imwain rokon ana motikitaeka. Ma e ngae n anne, e taraia raoi bwa naake a na rotaki iai e na reke aia tai ni katauraoi. N te katoto, e a kaman anga te kauring imwain Rekenikai Ake Tebwina ake a roko i aoia kaain Aikubita rimoa. Teuana te katoto iai, e kanakoa Mote ma Aron Iehova, bwa a na anga te kauring nakoni Barao ma ana toro ibukin te kaitiua n rekenikai, ae te karau ae te aiti ae urubwai. Kioina ngke e na roko te karau ae te aiti n te bong are imwina, te koaua bwa e angania te Atua aia tai ae tau ibukini kamanoaia mai iai? E taku te Baibara: “A waekoa ana toro Barao ake a maaka ana taeka Iehova, ni karinia aia toro ma aia man n taian auti, ma e katikuia ana toro ma ana man n te tawaana te aomata ae aki kaaki i nanona ana taeka Iehova.” (TeOti. 9:​18-21) E teretere bwa e bon anga te kauring ae tau Iehova, n te aro are a kamaiuaki man ana urubwai te rekenikai anne naake a waekoa ni butimwaeia.

N aron anne, a kauringaki naba Barao ma ana toro ibukin te katebwina n rekenikai. Ma a bon nanobaba n aki butimwaea te kauring. (TeOti. 4:​22, 23) Ibukin anne, a bon nori mateia aia karimoa aika mwaane. Ai kananokawakira anne! (TeOti. 11:​4-10; 12:29) Te koaua bwa e kona n reke aia tai ni mutiakina te kauring anne? Eng! E waekoa Mote ni kauringia tibun Iteraera taekan te katebwina n rekenikai are e nang roko, ao e tuangia aroia ae a kona ni kamaiuaki iai aia utu. (TeOti. 12:​21-28) Iraman aika ongeaba n te kauring anne? Ni kaineti ma katautau tabeua, tao tenua te mirion mwaitiia aomata n ikotaki ma tibun Iteraera ao “aomata aika kakaokoro nako” aika tiaki tibun Iteraera n ikotaki ma I-Aikubita, ake a kamaiuaki  man ana motikitaeka te Atua ao a kitana Aikubita.​—TeOti. 12:38; kbn.

N aron ae kaotaki ni katoto aikai, e aki toki n taraia raoi Iehova bwa e na reke aia tai aomata ni mutiakin ana kauring. (TuaKau. 32:4) Tera bukini karaoan anne irouna? E kabwarabwaraa te abotoro Betero bwa Iehova “e aki tangira kamaunaan temanna ma e tangiriia aomata nako bwa a na rairi nanoia.” (2Bet. 3:9) Eng, e bon tabeakinia ana aomata te Atua. E tangiria bwa a na rairi nanoia ao ni maiuakina ana reirei ni kairiri imwain rokon ana motikitaeka.​—Ita. 48:​17, 18; IRom 2:4.

Ni boong aikai, a riai aomata nako ni butimwaea te kauring ae kakawaki ae e a kabutaki ngkai ni kabutaa te aonnaba. Ni menan Iesu i aon te aba, e anga te kauring bwa e na boni kamaunaaki te waaki ae ngkai i aon te aba n tain “te rawawata ae korakora.” (Mat. 24:21) Ni kaineti ma te motikitaeka anne, e anga te taetae ni burabeti ae kabwarabwaraa raoi iai te bwai ae a kona ni kantaningaia taan rimwina bwa a na noria ao n rinanona ngkana e nang roko te tai anne. E katereterei Iesu baika a na riki aika kakawaki ni kabutaa te aonnaba, aika ti a nori ni boong aikai.​—Mat. 24:​3-12; Ruka 21:​10-13.

Ni kaineti ma te taetae ni burabeti anne, e a kaumakiia ngkai aomata nako Iehova bwa a na aantaeka i aan Ana tautaeka ae kaotiotaki iai te tangira. E tangiriia aomata aika ongeaba bwa a na kukurei riki ni maiuia ngkai, ao ni kantaningai naba kakabwaia n te tai ae imwaia n ana aonnaba ae boou ae mena iai te raoiroi. (2Bet. 3:13) Ibukini karikirakean onimakinan ana berita, e katauraoa Iehova te rongorongo ni kamaiu ae ‘te rongorongo ae raoiroi ae taekan te Tautaeka n Uea,’ are e taetae ni burabetinna Iesu bwa e na “tataekinaki . . . n te aonnaba ni kabutaa bwa te bwai ni kaotioti nakoia botannaomata ni kabane.” (Mat. 24:14) E a tia te Atua ni baireiia taan taromauria ni koaua bwa a na tataekina “te bwai ni kaotioti” aei ke n uarongorongoa ana rongorongo aei, n aaba aika 240 tabun. E tangiriia aomata aika bati Iehova bwa a na butimwaea te kauring aei ao n rawei maiuia ngkana e a roko “te angibuaka” ae taekan ana motikitaeka ae raoiroi.​—Teb. 1:​14, 15; 2:​2, 3.

Ngaia are tiaki te titiraki ae kakawaki aei: E anga Iehova te tai ae tau nakoia aomata ibukini mutiakinan ana kauring ke e aki? E oti raoi n te bwai ni kakoaua bwa e anganga te tai ae tau. Ma aei te titiraki ae kakawaki: A na mutiakina ana kauring te Atua aomata, ngkai e reke aia tai? Ngkai ana tia uarongorongo te Atua ngaira, ti bia teimatoa ni buokiia aomata aika bati n aron ara konaa bwa a aonga n reke maiuia n tokin te waaki ae ngkai.