1-2. (a) Tera ae a na katanoataa natannaomata n te tai ae e a kaan roko? (b) Baikara titiraki aika a na kaekaaki?

IANGOIA bwa a a tibwa tia taani kairiri n te aonnaba ni katanoataa aia katanoata are a a maan ni kariariaa, ae e na “iai te rau ao iai te mweraoi.” A bae ni kamoamoa bwa e a rangi n rau te aonnaba. A tangiria bwa ti na iangoiia bwa a kona ni katoki aia kangaanga te botannaomata. Ma bon akea te bae a kona ni karaoia ibukin te bwai ae nang riki imwina! Bukin tera? E taku te taetae ni burabeti n te Baibara: “E na rina ni bwakariia te kamaunanakoaki . . . ao e na aki reke birinakoia.”​—1Tet. 5:3.

² Ma iai titiraki aika kakawaki aika riai ni kaekaaki: Tera ae e na riki n tain te “rawawata ae korakora”? Tera ae e kantaningaia Iehova bwa ti na karaoia n te tai anne? Ao ti na kangaa ni katauraoira ngkai bwa ti aonga n teimatoa ni kakaonimaki n tain te rawawata ae korakora?​—Mat. 24:21.

3. Ni kaineti ma Te Kaotioti 17:​5, 15-18, e na kangaa te Atua ni kamauna “Baburon ae Kakannato”?

³ Wareka Te Kaotioti 17:​5, 15-18. E na kamaunaaki “Baburon ae Kakannato”! N aron are e a tia n taekinaki, bon akea te bae a kona ni karaoia natannaomata n te tai aei. Bukin tera? Ibukina bwa “e [na] kaaki i nanoia te Atua te kani kakoroa bukin ana iango.” Tera ana iango anne? Boni kamaunaan te botaki n Aro ae kewe ae katobibia te aonnaba n ikotaki ma  Aaro ake aongkoa Kristian ngaiia. * E na karina ana iango te Atua i nanoia “kooro ake tengaun” ake koron te “man ae tiritiri ae uraroo.” Kooro ake tengaun a tei ibukin tautaeka nako ake a boutokaa “te man ae tiritiri” ae taekan Aia Botaki te Botannaomata. (TeKao. 17:​3, 11-13; 18:8) Ngkana a ekaanako te Aro ae kewe tautaeka akanne, anne boni kanikinaeani moanakin te rawawata ae korakora. Bon te bwai ae kakamaaku ae e na karina n riki n te aonnaba.

4. (a) Tao tera ae a na taekinna natannaomata ngkana a ekaanako Baburon ae Kakannato? (b) Tera ae a na bae ni karaoia naake kaaini ngkoa Aaro aikai?

⁴ Ti aki ataia bwa tera ae a na taekinna natannaomata aikai ngkana a ekaanako Baburon ae Kakannato. Tao a na taekinna bwa a tutuka karekean te rau botaki n Aro, ao a rangi n rokoroko n ana waaki te tautaeka. Ke tao a na taekinna bwa botaki n Aro aikai a a rangi ni bati kaubwaia ma aia bwai. (TeKao. 18:​3, 7) Ngkana a kamaunaaki Aaro aika kewe, a na bae n aki kamaunaaki kaaina ni kabane. Ma n taraana ao natannaomata a na kamaunai botaki n Aro. Ngkana a mauna botaki akanne, a nang ataia kaaina bwa a bon aki kona aia tia kairiri ni kakoroi bukin aia berita, ao a nang rawa ni kairekerekeia ma Aaro akanne.

5. Tera ana berita Iehova ibukin te rawawata ae korakora, ao bukin tera?

⁵ E aki kaotia te Baibara bwa e na maanra kamaunaani Baburon ae Kakannato, ma ti ataia ae e na bon aki maan. (TeKao. 18:​10, 21) E berita Iehova bwa e na “kakimototoi boong” n te rawawata ae korakora, bwa a aonga ni kamaiuaki “te koraki ake e rineiia” ao te Aro ae koaua. (Mareko 13:​19, 20) Ma tera ae e kantaninga Iehova bwa ti na karaoia ni moanakin te rawawata ae korakora ni karokoa te buaka ae Aremaketon?

6. Tera riki ae ti riai ni karaoia irarikini katokan te reitaki ma te Aro ae kewe?

⁶ N aron ae taekinaki n te kaongora are mai mwaina, e kantaningaia Iehova bwa a na kaokoroia taan taromauria ma Baburon ae Kakannato. Ma e bati riki ae nanonaki iai nakon tii katokan te reitaki ma te Aro ae kewe. Ti riai ni kamatoaa nanora bwa ti na boutokaa te Aro ae koaua ke te taromauri ae itiaki ibukin Iehova. Iangoi aanga aika uoua aika ti kona ni karaoa iai anne.

7. (a) Ti na kangaa n teimatoa n taui ana kaetieti aika raraoi Iehova ibukin te aroaro ni maiu ae riai? (b) E kangaa Ebera 10:​24, 25 ni katuruturua kakawakin te uaia ni bobotaki, moarara riki ngkai?

⁷ Te moan, ti riai n teimatoa n taui ana kaetieti aika raraoi Iehova ibukin te aroaro ni maiu ae riai. Ti aki kona ni butimwaei aia kaetieti kaain te aonnaba ibukin te aroaro ni maiu ae riai. N te katoto, ti aki butimwaei aeka ni wene ni bure nako, n ikotaki ma te iein i marenaia aika titeboo aroia ni mwaane ao n aine ao aroaroia riki aika kammaira. (Mat. 19:​4, 5; IRom 1:​26, 27) Te kauoua, ti riai n teimatoa ni bobotaki n taromauri ma raora ni Kristian. Ti karaoa aei n taabo nako, tao n ara Tabo n Taromauri, n aia auti taari, ao n taabo naba ake ti karabaira iai. N aki ongeia bwa tera ae riki, ma ti aki kona ni kaaki arora ni bobotaki n taromauri. Ti bon riai ni bobotaki ao “ni kakorakoraira riki iai ngkai ti a nora te bong arei bwa e a kaan.”​—Wareka Ebera 10:​24, 25.

8. Tao tera aron te bitaki n ara rongorongo n te tai ae imwaira?

⁸ N tain te rawawata ae korakora, e na bae ni bitaki te rongorongo ae ti na taekinna. Ti tataekina moa ngkai te rongorongo ae raoiroi ae taekan te Tautaeka n Uea ao ti kakorakoraira ni karekeia taan rimwini Kristo. Ma n te tai arei, tao e nang matoatoa ara rongorongo ae ti taekinna n aron te karau ae te aiti. (TeKao. 16:21) Tao ti na tataekina ae e nang kamaunaaki ana waaki Tatan n te tai ae waekoa. Rimwi riki, ti nang ataia bwa tera ara rongorongo ao tera arora n taekinna. Ma ti na kamanenai aanga ake ti a bon taneiai iai n ara mwakuri ni minita n te maan ae raka i aon tebubua te ririki? Ke ti na kamanenai aanga riki tabeua? Ti a bon noria n taina. N aki ongea bwa tera te anga anne, ma taraan ae ti na boni kakabwaiaaki n tataekina ana motikitaeka Iehova ma te ninikoria!​—Etek. 2:​3-5.

9. E na tera aroia natannaomata nakon ara rongorongo, ma tera ae ti kona ni kakoauaa raoi?

⁹ N taraana, a na bon un natannaomata n ara rongorongo ao a na kataia ni kaini wira bwa ti na aki manga uarongorongo. Ma n aron ae ti onimakina ana boutoka Iehova n ara mwakuri ni minita ngkai, ti na boni kainnanoa naba ana boutoka n te tai arei. Ti kona ni kakoauaa raoi bwa e na boni kaonira n te mwaaka Atuara ibukini kakororaoan nanona.​—Mika 3:8.

10. N aron ae e a kaman taekinaki n Ruka 21:​25-28, tera aroia angia aomata ni kaineti ma te bwai ae e na riki n te rawawata ae korakora?

¹⁰ Wareka Ruka 21:​25-28. N tain te rawawata ae korakora, a na kubanrou aomata ngkana a nori kabwakani bwaai nako ake a iangoi bwa a na teimatoa n nakoraoi. A na taonaki n “te rawawatannano,” ao a na raraomaeakini buani maiuia n te tai ae moan te karawawata ae tuai man riiriki mai mwaina. (Teb. 1:​14, 15) N te tai anne, e na bae naba ni kangaanga riki te maiu irouia ana aomata Iehova. Ti na bae n rotaki ni kangaanga ibukina bwa ti teimatoa n aki arona aroia kaain te aonnaba. A kona n aki reke baika ti kainnanoi ibukini maiura.

11. (a) E aera ngkai a nang mamatanaki Ana Tia Kakoaua Iehova? (b) E aera bwa ti aki riai ni maaka te rawawata ae korakora?

¹¹ N taai akanne, a na bae n un naake a kamaunaaki aia Aro ibukina bwa e aki kamaunaaki  aia Aro Ana Tia Kakoaua Iehova. A na boni kaota aki kukureia nakoia tabemwaang ao i aon naba taabo n reitaki n te Intanete. A na ribaira natannaomata ma aia tia tautaeka ae Tatan, ibukina bwa e aki kamaunaaki ara Aro. E na bon aki koro bukin tiaia are a na kamaunai Aaro ni kabane mai aon te aba. Ngaia are a nang mamatanira. N te tai aei, a nang riki natannaomata bwa Koka mai Makoka. * A na bane n ikotaki ao a na kabanei korakoraia ni buakania ana aomata Iehova. (Etek. 38:​2, 14-16) Ti kona ni moanna n raraoma ngkana ti iaiangoi baika a na riki n te tai anne, moarara riki ngkana ti aki atai bwaai ni kabane. Ma iai te bwai teuana ae ti koaua raoi iai: Ti aki riai ni maaka te rawawata ae korakora. E na bon anganira Iehova kaetieti ibukini kamaiuara. (TaiAre. 34:19) Ti boni kona n ‘teirake ni kaetiira raoi ma n euti atura’ ibukina bwa ti ataia bwa “e a kan roko [kamaiuara].” *

12. E kangaa “te toro ae kakaonimaki ma ni wanawana” ni katauraoira imwaini baika a na riki?

¹² E a kakatauraoira ngkai “te toro ae kakaonimaki ma ni wanawana” bwa ti aonga n teimatoa ni kakaonimaki n tain te rawawata ae korakora. (Mat. 24:45) A bati aanga ake e karaoa iai aei, ma iangoa teuana mai iai: kanoan te bwabwaro ibukin 2016-2018 aika roko raoi n taia. Ti kaungaaki iai bwa ti na karikirakei aroaro ake ti kainnanoi, ngkai e a kaan ana bong Iehova. Ti na rinanoi aroaro akanne n te aro ae kimototo.

13. Ti na kangaa ni karikirakea kakaonimakira ni koaua nakon Iehova, ao e aera bwa ti riai ni karaoia ngkai?

¹³ Te Kakaonimaki ni Koaua: E kangai te boto n iango ibukin te bwabwaro n 2016, “Teimatoa ni Kakaonimaki ni Koaua Nakon Iehova!” Ti reireinaki iai bwa ngkana iai ara iraorao ae kaan ma Iehova, ti na boni kakaonimaki ni koaua. Ti kauringaki bwa ti kona ni kaania Iehova rinanon te tataro ae nako man te nano, ao te kakorakora n ukeuke n reirei n ana Taeka. Karaoan aei e anganira te korakora bwa ti na kona n tokanikai i aon naba kataaki aika rangi ni kangaanga. Ngkai e a kaan tokin ana waaki Tatan, ti kona ni kantaningaia bwa e nang korakora riki kataakini kakaonimakira ni koaua nakon te Atua ma ana Tautaeka n Uea. Ti na bon teimatoa ni bwainingareaki irouia aomata. (2Bet. 3:​3, 4) E na boni bae n riki aei ngkai e a bati riki kataakira ibukin teira i nuka. Ti riai ni karikirakea ngkai kakaonimakira ni koaua bwa ti aonga n teimatoa ni karaoa anne n tain te rawawata ae korakora.

14. (a) Tera te bitaki ae e na riki nakoia taari mwaane ake a kairiri i aon te aba? (b) E aera bwa ti riai ni kakaonimaki ni koaua n te tai anne?

¹⁴ N tain te rawawata ae korakora, e na bon riki te bitaki ni kaineti ma taari mwaane ake a kairiri n te aonnaba. A nang bane n ikotaki nako karawa taani kabiraki ake a tiku i aon te aba, bwa a na ibuobuoki n te buaka are Aremaketon. (Mat. 24:31; TeKao. 2:​26, 27) Nanon anne bwa e nang akea te Rabwata n Tautaeka i aon te aba. Ma a na bon teimatoa ni baireaki raoi te koraki ae uanao. A nang kairiri taari mwaane aika tau aika tiibu tabemwaang. Ti riai ni kaota kakaonimakira ni koaua man arora ni  boutokaiia taari aikai ao man ongeabara n aia kaetieti aika reke mairoun te Atua. E boboto kamaiuara i aon anne!

15. Ti na kangaa ni karikirakea nanomwaakara, ao e aera bwa e kakawaki karaoana ngkai?

¹⁵ Te Nanomwaaka: E kangai te boto n iango ibukin te bwabwaro n 2017, “Tai Kabwaraa Nanom!” Ti buokaki iai ni karikirakea ara konabwai ni kaaitarai kataaki. Ti reireinaki iai bwa e aki boboto nanomwaakara i aoni baika riki aika raraoi. Ma ti kona ni karikirakea nanomwaakara man onimakinan Iehova. (IRom 12:12) Ti bia aki mwaninga ana berita Iesu aei: “Ane e nanomwaaka ni karokoa te toki ao e na kamaiuaki.” (Mat. 24:​13, kbn.) E kaotaki n te berita aei bwa ti riai n teimatoa ni kakaonimaki n aki ongei kataaki. Ngkana ti nanomwaaka ngkai i aani kataakira nako, e na korakora riki ara onimaki imwain rokon te rawawata ae korakora.

16. E boboto i aon tera ninikoriara, ao ti na kangaa ni karikirakea anne ngkai?

¹⁶ Te Ninikoria: E kangai te boto n iango ibukin te bwabwaro n 2018, “Ko na ninikoria!” Ti kauringaki iai bwa e aki boto ninikoriara i aon ara konabwai. E reke te ninikoria ni koaua man onimakinan Iehova, n aron naba te nanomwaaka. Ti na kangaa ni kakorakoraa riki onimakinan Iehova? Mani wawarekan ana Taeka ni katoabong ao kananoan ara iango i aon arona ni kamaiuia ana aomata n taai ake rimoa. (TaiAre. 68:20; 2Bet. 2:9) Ngkana a buakanira natannaomata n tain te rawawata ae korakora, ti bon riai n ninikoria ao n onimakina riki Iehova. (TaiAre. 112:​7, 8; Ebera 13:6) Ngkana ti onimakina Iehova ngkai, e na bon reke ninikoriara ae ti kainnanoia ngkana e a buakanira Koka. *

17. E aera ngkai ti aki riai ni maaka Aremaketon? (Nora te taamnei ni moan te maekatin aei.)

¹⁷ N aron ae taekinaki n te kaongora are mai mwaina, bon angina i buakora aika maiu i nanoni kabaneani boong. Ma ti kantaningaia naba bwa e na reke maiura n tain te rawawata ae korakora. E na riki te buaka are Aremaketon bwa kabanean raoi tokin te waaki ae ngkai i aon te aba. Ma ti bon aki  riai ni maaku. Bukin tera? Ibukina bwa bon ana buaka te Atua. (TaeRab. 1:33; Etek. 38:​18-20; Tek. 14:3) N te tai are e kanakoa iai ana taeka Iehova, e a kaira naba te taanga ni buaka Iesu Kristo. E na raonaki irouia taani kabiraki ake a kautaki ao anera aika mwaitikurikuri. A na uaia ni buakana Tatan ma ana taimonio ao aia taanga ni buaka i aon te aba.​—Tan. 12:1; TeKao. 6:2; 17:14.

18. (a) Tera ae e beritanna Iehova? (b) E kangaa Te Kaotioti 7:​9, 13-17 ni buokiko bwa ko na kakoauaa ae e na bon reke kamaiuam n te tai ae imwaira?

¹⁸ E beritana aei Iehova: “Akea te bwai ni buaka ae karaoaki n ekikonako ae e na tokanikai.” (Ita. 54:17) A na reke maiuia “te koraki ae uanao” ae kaainaki irouia taan taromauria Iehova aika kakaonimaki, ao a na “nako . . . mai buakon te rawawata ae korakora”! Ao a na teimatoa ni beku iroun Iehova. (Wareka Te Kaotioti 7:​9, 13-17.) Ti buokaki n te Baibara bwa ti na kakoauaa ae e na bon reke kamaiuara n te tai ae imwaira! Ti ataia ae “e kawakinia akana kakaonimaki Iehova.” (TaiAre. 31:23) A na bane ni kukurei naake a tangira Iehova ao n neboia, ngkana a noria bwa e a kaitiakaki taekan arana ae tabu​—Etek. 38:23.

19. Tera te kantaninga ae tamaroa n te tai ae e a kaan ae imwaira?

¹⁹ Iangoa taekan 2 Timoteo 3:​2-5 ngkana arona bwa e a kabwarabwarai aroia aomata n te waaki ae boou ae akea iai ana kariri Tatan. (Nora te bwaoki ae “ Aroia Aomata n te Tai Arei.”) E kabwarabwaraa ni kangai Brother George Gangas, * ae kaain te Rabwata n Tautaeka: “E na rangi n tamaroa te aonnaba ngkana a bane aomata n taromauria Iehova! N te tai ae e a kaan, ko na kakabwaiaaki ni maiu n te waaki ae boou i aon te aba. E na abwabwaki maium n aroni maiun Iehova. Ti nangi bane ni maiu n aki toki.” Ai tamaroara te kantaninga anne!