N te ririki anne, ao ana botaki Iehova e karaoi bitaki tabeua ake a buoka boutokaan te katiteuanaaki n taromauri irouia Taan Reirei n te Baibara. E moanaki boreetian rongorongo n Te Taua-n-Tantani ni kabwarabwaraa te kibu are a rinanona n aia Botaki n Tataro ao n Nebonebo ni katoa wiki. A boreetia naba te karenta Taan Reirei n te Baibara ae kaotaki iai bwa tera te kibu ae e na maroroakinaki ni katoa wiki n tain te botaki, ao te anene ae a na aneneia ni katoabong n tain aia ukeuke n reirei i bon irouia ke aia taromauri n utu.

N aia taromauri Taan Reirei n te Baibara ao a mamaroroakini baika a rinanoi n aia mwakuri ni minita, a kaoti baika a kakaitau iai nakon Iehova, a anene, ke a tataro naba. E ururing rikaaki Eva Barney are e bwabetitoaki ngke 15 ana ririki n 1923, ni kangai: “Ngkana ko kan anga am taeka, ko na teirake ao n taekina ae ai aron aei, ‘I kani karabwaa te Uea ibukini baika raoiroi ake e karaoi nakoiu.’” Tabeman taari a tatangiria ni kaota nanoia. E reitia n taku Sister Barney: “E rangi ni mwamwaiti baike e karabwaa iai te Uea Brother Godwin. Ma ngkana e noria buuna bwa e a moanna n ebu te tari te mwaane are e kaira te botaki, ao e a katitika naba ana kunnikai buuna, ao e a tekateka naba teuaei.”

Ni katoa namwakaina, ao a kakaraoa aia Botaki n Tataro ao n Nebonebo ekaretia nako. Ni kabwarabwaraan te botaki aei, e korea ae kangai Te Taua-n-Tantani ae bwain Eberi 1, 1923: “E riai ni kabaneaki iteran te botaki n aia taeka aika irekereke ma te mwakuri ni minita ao kaungaakia taani mwakuri. . . . Ti kakoauaa ae a na rikirake ni kaan aia reitaki raao ni koaua ni botaki aika kaungaunga aikai.”

E rangi ni kakabwaiaaki ni botaki aikai Charles Martin, ae te tia uarongorongo ae 19 ana ririki man te ekaretia i Vancouver, i Kanata. E ururing rikaaki imwina ni kangai: “I moan reiakina ikai arou n taetae n te uarongorongo. N angin te tai, e kona temanna n taekina te baere e rinanona ni kawaran te auti teuana ma teuana. A a reke au iango man aei i aoni baika N na taekin ao arou ni kaekai aanga n totoko aika kakaokoro.”

E boutokaa naba te katiteuanaaki n ana botaki Iehova karekeani boong n uarongorongo. E katanoataaki ae kangai n Te Taua-n-Tantani ae bwain Eberi 1, 1923: “Ibukina bwa ti aonga ni katiteuanaaki n te mwakuri ae tii teuana . . . , e a baireaki  te bong ae te Kauabong Mei 1, 1923, bwa te bong n uarongorongo. Imwin anne, ao e a riki te moani Kauabong n te namwakaina bwa te bong n uarongorongo . . . A riai kaain te ekaretia ni kabane n uataboa te mwakuri anne.”

A uataboa naba te mwakuri aei Taan Reirei n te Baibara aika uarereke. E ururing rikaaki Hazel Burford are 16 ana ririki n te tai anne, ni kangai: “E katauraoaki ibukira n te Bulletin aron te maroro ake ti kona ni kamatenikunai. a Ti kakorakoraira ngai ma tibuu te unimwaane n iri mwakuri aikai.” Ma e kaaitara Sister Burford ma te waaki n totoko mairoun te tari te mwaane temanna. E taku neiei: “E kamatoa n tuangai te tari te mwaane ae e a kara bwa I aki riai n taetae nakoia aomata. N te tai anne, ao tabeman a aki ota ae a riai Taan Reirei n te Baibara ni kabane n uataboa karaoiroan te Tia Karikira ae Moan te Kakannato, n ikotaki naba ma ‘rorobuaka n ataei ao ateiaine.’” (TaiAre. 148:12, 13) Ma e bon teimatoa n uarongorongo Sister Burford. E ira te kauoua ni koraki n te Kuura ni Kireata ao e beku bwa te mitinare i Panama. Ni waakinakon te tai, ao a a bita aia iango taari mwaane ibukia rooro n rikirake ake a ira te mwakuri ni minita.

A katiteuanaaki naba taari n taiani bwabwaro. N taiani bwabwaro aika bati aikai, ao iai naba te bong ae baireaki ibukin te uarongorongo. N te katoto, n te bwabwaro are e boo i Winnipeg, i Kanata, ao a kaoaki ni kabane naake a ira te bwabwaro bwa a na uarongorongo n te kaawa anne ni Maati 31. A bati riki aomata ake e reke kawaraia ni boong n nakonako aika okoro aikai. N Aokati 5, e katautauaki bwa 7,000 aomata aika kaea te bwabwaro riki teuana i Winnipeg. N te tai anne, ao bon anne te kabanea ni mwaiti n aomata aika roko n te bwabwaro i Kanata.

E karaoaki te bwabwaro ae rangi ni kakawaki irouia ana aomata Iehova n 1923 n Aokati 18-26, i Los Angeles, i California. Ni wiki ake imwain te bwabwaro, ao a karinaki katanoata ibukin te botaki n taian nuutibeeba, ao Taan Reirei n te Baibara a tibwatibwai beeba ni kakao aika raka i aon 500,000. A katekeaki baana i aoni baao ni mwamwananga ao taiani kaa ni katanoataa iai taekan te botaki.

 N te Kaonobong, Aokati 25, ao e anga te kabwarabwara Brother Rutherford ae atuna “Tiibu ma Kooti,” are e a katerea raoi iai ae “tiibu” a tei ibukia aomata aika tauraoi nanoia ni butimwaea te koaua aika a na maeka n te aonnaba ae bwaretaiti. E anga naba te kabwarabwara ao ni wareka taekan te motinnano ae aranaki bwa “Te Kauring.” E kabuakakaaki iai taekaia Aaro ake aongkoa Kristian ngaiia ao a kaumakaki naake a raoiroi nanoia bwa a na kaokoroia mani “Baburon ae Kakannato.” (TeKao. 18:2, 4) Imwina riki, ao a a katiteuanaaki Taan Reirei n te Baibara ni katobibia te aonnaba n tibwatibwai katoton te motinnano aei aika mirion ma mirion.

Ni kabaneani bongin te bwabwaro, ao a ongora taan roko aika e raka i aon 30,000 n ana kabwarabwara Brother Rutherford ae atuna “A Mwaati Natannaomata Nako Nakon Aremaketon, ma A Nang Aki Manga Mate Mirion ma Mirion Aomata Aika Maiu Ngkai.” Ibukina bwa a kantaningaa mwaitiia aomata aika a na roko, a a kabooa tangoan te tabo ae boou ae te Los Angeles Coliseum, Taan Reirei n te Baibara. A kabonganai taari tibiikan te tabo anne, ae ai tibwa te kukune ae boou n te tai anne, bwa a aonga n ongora raoi aomata. A bati riki aika ongora kanoan te botaki i aon te rerio.

N te ririki 1923, ao e a karababaaki te mwakuri n uarongorongo i Aberika, Eurobe, Inria, ao Amerika Maiaki. I aon Inria, ao e tabeakina boreetiakini booki A. J. Joseph n te taetae n Hindi, Tamil, Telugu, ao Urdu, ao e tabeakina naba buuna ma natina aika onoman.

I aon Sierra Leone, ao a kororeta ni bubutii buokaia Taan Reirei n te Baibara aika Alfred Joseph ao Leonard Blackman nakoni kautun ara botaki i Brooklyn, i New York. N Eberi 14, 1923, ao e a roko kaekaan aia bubutii. E taku Alfred, “N tairikin te Kaonobong teuana, ao e a roko te tareboon ae I aki kantaningaia.” E ongo te bwanaa ae titirakinna ni kangai, “Ngkoe are ko kororeta nakon te Watch Tower Society ni bubutii ibukia taan uarongorongo?” “Eng,” e kaeka Alfred. “Bwa ngaia ae a kanakoai.” Boni bwanaan William R. Brown. E roko n te bong anne man te aba ae te Caribbean ma buuna ae Antonia ao natina aine aika Louise ao Lucy. A aikoa kua n tataninga taari i nanon te tai ae maan bwa a na kaitiboo iai ma Brother Brown ma ana utu.

E reitia n taku Alfred: “N te moaningabong are imwina, ngke ti maroro n te Baibara ngai ma Leonard n aron ae ti kakaraoia ni katoa wiki, ao e a  tei naba te aomata i matan te mataroa. Boni Brother Brown. E rangi n ingainga ibukin te koaua ao e a kan anga naba ana kabwarabwara n te bong are imwina.” E tuai ni koro teuana te namwakaina ao a a bane naba ana boki Brother Brown ake e uotii n tibwaaki nako. A manga reke riki ana boki aika 5,000 tabun, ma e aki maan imwina ao a manga bane naba. Ma bon tiaki te tia kaboonakoi booki Brother Brown. I nanon te tai ae maan are beku iai bwa ana toro Iehova ae ingainga, ao e aki toki ni kakabongana te Baibara n ana kabwarabwara n te aro are e a reke iai arana ae Bible Brown.

E a onrake te aobiti n tararua i Barmen, i Tiaman, ao e nang roko niniakin te kaawa anne irouia kaaini Buranti. A kunea te kateitei teuana i Magdeburg Taan Reirei n te Baibara ae tau raoi ibukin aia mwakuri ni boreeti. N Tun 19, ao e a bane raoi aroni botani bwaai ni mwakuri ibukin te boreeti ao bwaai riki tabeua, ao a a mwaing nakon te Betaera ae boou i Magdeburg. N te bong are imwina ngke a a tia n tuangaki kaain kautun ara botaki bwa e a bane raoi aron te kamwaing, ao e a katanoataaki n taian nuutibeeba bwa e a tauaki te kaawa ae Barmen irouni Buranti. A nora koauan ana kakabwaia ao ana kamanomano Iehova taari n te mwaing aei.

E katea te aobiti n tararua ae boou i Brazil, George Young are e mwamwananga nakon taabo aika raroa ibukini kabutanakoan te rongorongo ae raoiroi, ao ni moana boreetian Te Taua-n-Tantani n te taetae ni Botukare. I nanon tii tabeua namwakaina ao a tibwatibwai katotoni booki aika raka i aon 7,000. E rangi ni kukurei Sarah Ferguson ngke e roko Brother Young ni kawara ana utu neiei. E a kamani wawareka Te Taua-n-Tantani man 1899, ma e tuai mani kaota ana katabu n te bwabetito n te ran. Tabeua te namwakaina imwina, ao a a toua te mwaneka ae rangi ni kakawaki aei Sister Ferguson ma natina aika aman.

N raabanen te ririki anne, ao e mwaneweaki aron rotakia Taan Reirei n te Baibara n aia anga ni katiteuanaaki n taromauri, n Te Taua-n-Tantani ae bwain Ritembwa 15, 1923 ni kangai: “E kona n noraki ae a a korakora aia onimaki . . . kaain ekaretia nako . . . Ti bia kanim raoi ara bwai ni buaka ao ni mwakuri korakora ma te ingaingannano ao te nanomatoa i nanon te ririki ae imwaira aei, ao n teimatoa ni kimwareirei.”

Te ririki are imwina bon te ririki ae kakawaki ibukia Taan Reirei n te Baibara. A a tia ni mwakuri korakora taari ake n te Betaera i nanon iraua te namwakaina ni mwakuria te mwakoro n aba n te Atimwakoro ae Staten, ae uakaan ma kautun ara botaki i Brooklyn. A bobonga raoi kateani kateitei n te tabo anne ni moan 1924, ao a ibuobuoki kateitei aikai ni katiteuanaakia taari ao n tibwaakin te rongorongo ae raoiroi n aanga aika aki kona ni karaoi ngkoa mai mwaina.