1-2. (a) Tera te iubire? (Nora te bwaoki ae “ Tera te Iubire?”) (b) Tera are e taekinna Iesu n Ruka 4:​16-18?

N AABA tabeua, a kakaraoaki bukamaru aika okoro ibukini kauringaan aia ka-50 n ririki n tautaeka ueea. E ataaki te ka-50 n ririki anne bwa ana iubire te tia tautaeka anne. E kona ni kabaneaki tebongina, teuana te wiki, ke e nako riki, ibukini bukamaruan te iubire, ma n tokin te tai e na bon roko n tokina ao ni mwanuokinaki te kimwareirei iai.

² Ti na nenera taekan te iubire ae tamaroa riki, ao ae tamaroa naba nakon te iubire are teuana te ririki manin bukamaruana are kakaraoaki ni katoa 50 te ririki i Iteraera rimoa. Te Iubire rimoa anne e kainaomataia aomata ake a bukamaruia. E aera bwa ti riai n reiakina taekana? Ibukina bwa e kauringira taekan te babaire ae tamaroa are e karaoia ibukira Iehova, ae karekea inaomatara ae teimatoa n aki toki, ao ti kakabwaiaaki naba iai ngkai. E taekina te inaomata anne Iesu.​—Wareka Ruka 4:16-18.

3. Ni kaineti ma Nakoaia Ibonga 25:​8-12, a kangaa tibun Iteraera ni kakabwaiaaki n te Ririki n Inaomata?

³ Ti kona n ota riki n te bae e nanonna Iesu ni kaineti ma te inaomata, ngkana ti nenera moa taekan te Iubire are e baireia te Atua ibukia ana aomata rimoa. E taku Iehova nakoia tibun Iteraera: “Kam na katabua te ka-50 n ririki ao kam na katanoataa te inaomata i aon te aba nakoia kaaina ni kabane. E na riki bwa ami Ririki n Inaomata, ao kam na okiri abami n tatabemaningkami nako ao kam riai n okiriia ami utu n tatabemaningkami nako.” (Wareka Nakoaia Ibonga 25:8-12.) N te kaongora are mai mwaina, ti nora aroia tibun Iteraera ni  kakabwaiaaki mani kawakinan te bongi n Taabati ni katoa wiki. Ma a kangaa ni kakabwaiaaki man te Ririki n Inaomata? Iangoia bwa iai tibun Iteraera ae bati ana taarau ao e a riai ni kaboonakoa abana bwa bwaran ana taarau. N te ririki n Inaomata, e na kaokaki abana anne nakoina. Ngaia are e a kona teuanne n ‘okira abana’ ao e na aki bua tibwangaia natina nakon taai aika a na roko. Ke tao iai te mwaane temanna ae e a koko n taarau ao e a riai ni kaboonakoa natina temanna ke boni ngaia bwa te toro, ibukini kabwaraan ana taarau. N te ririki n Inaomata ao te toro e na ‘okiriia ana utu.’ Ngaia are akea temanna ae e na riki bwa te toro i nanoni maiuna ni kabane! Ai mwamwannanora Iehova!

4-5. E aera bwa ti riai n reiakina taekan te Ririki n Inaomata rimoa?

⁴ Tera riki te kakabwaia man te Ririki n Inaomata? E kabwarabwaraa Iehova ni kangai: “E riai n akea i buakomi ae e maiu ni kainnano bwa e na boni kakabwaiaingkami Iehova, n te aba ae e a anganingkami Iehova ae Atuami bwa kam na taua bwa abami.” (TuaKau. 15:4) Ai kaokorora anne ma te bwai ae riiriki ni boong aikai, bwa a ririkirake ni kaubwai ake a kaubwai ao a ririkirake ni maiu ni kainnano ake a maiu ni kainnano!

⁵ Ngkai Kristian ngaira, ti a aki mena i aan te Tua Rinanoni Mote. E nanonaki iai bwa ti a aki irii babaire ibukin te Ririki n Inaomata rimoa, n aroni kainaomataaia tooro, kakeaan aia taarau tabemwaang, ao kaokan abaia. (IRom 7:4; 10:4; IEbe. 2:15) E ngae n anne, ti bon riai n reiakina taekan te Ririki n Inaomata aei. Bukin tera? Ibukina bwa ti kona ni karekea te inaomata, ae e kauringira taekan te babaire are e karaoia Iehova ibukia tibun Iteraera.

6. Tera ae a kainnanoia aomata bwa a na kainaomataaki mai iai?

⁶ Ti bane ni kainnanoa kainaomataara ibukina bwa bon ana toro te bure ngaira, ae te bwai ae kananokawaki. Ngkai taani bure ngaira, ti rotaki n te kara, te aoraki, ao te mate. A bati aika nora koauan anne ngkana a tiroiia n te tirotaam ke ngkana a kawara te  taokita ibukini bwainnaorakiaia. Ti bwarannano naba ngkana ti karaoa ae bure. E taekinna te abotoro Bauro bwa e kairaki bwa “te taenikai nakon ana tua te bure ae mena i [rabwatana].” E reitia ni kangai: “Ai kananoangara ngai! Antai ae e na kamaiuai man te rabwata ae kairai nakon te mate aei?”​—IRom 7:23, 24.

7. Tera ana taetae ni burabeti Itaia ibukin te inaomata?

⁷ E kakukurei bwa e bairea te Atua te anga ae ti na kamaiuaki iai ke ni kainaomataaki man te bure. Bon Iesu ae kona ni kainaomataira. N te kawanua n tienture imwain Aia Tai Kristian, e taetae ni burabetina Itaia te kainaomataaki ae kakawaki riki. E na rianako riki te kainaomataaki anne nakon are reke n aia Ririki n Inaomata tibun Iteraera. E korea aei: “E anganai taamneina te Uea ae Moan te Rietata ae Iehova, ibukina bwa e kabirai Iehova bwa N na tataekina te rongorongo ae raoiroi nakoia akana nimamannei. E kanakoai bwa N na bautiia akana uruaki nanoia, ao N na katanoataa te inaomata nakoia akana taenikai.” (Ita. 61:1) E kaineti nakon antai te taetae ni burabeti anne?

8. E kaineti nakon antai ana taetae ni burabeti Itaia ibukin te inaomata?

⁸ E kakoroaki bukin te taetae ni burabeti ane kakawaki anne ni kaineti ma te inaomata, imwini moanakin ana mwakuri ni minita Iesu. Ngke e nakon te tinakoka Iesu n ana kaawa ae Natareta, e wareki ana taeka Itaia akanne nakoia I-Iutaia ake a ikotaki ikanne. E taekinna Iesu bwa a kaineti nakoina taeka aikai: “E anganai taamneina Iehova, ibukina bwa e kabirai bwa N na tataekina te rongorongo ae raoiroi nakoia akana maiu ni kainnano. E kanakoai bwa N na katanoataa te inaomata nakoia taenikai ao te manga noraaba nakoia mataki, ao ni kainaomataia ake a karawawataaki, ao n uarongorongoa taekan ana tai n akoi Iehova.” (Ruka 4:16-19) E kangaa Iesu ni kakoroa bukin te taetae ni burabeti anne?

9. Tera ae a kani kainaomataaki mai iai aomata aika bati n ana tai Iesu?

⁹ E moanaki n te moan tienture te inaomata are e taetae ni burabetinna Itaia ao are e warekia Iesu. E kamatoaa anne Iesu ngke e katanoataa aei: “N te bong aei ao e a kakoroaki bukin . . . kibun te Koroboki ae Tabu aei.” (Ruka 4:21) A bati ake a ongo ana taeka Iesu ake tao a kantaningaa bitakin te waaki n tautaeka bwa a aonga ni kainaomataaki mai aan Rom. Tao titeboo naba aia iango ma mwaane ake uoman ake  a taku: “Ti kantaningaia ngaira bwa bon teuaei ae e na kamaiuia tibun Iteraera.” (Ruka 24:13, 21) Ma ti ataia bwa e aki kaungaia taan rimwina Iesu bwa a na kaitaraa te tautaeka n Rom ae karawawata. Ma e reireinia bwa a na angani “Kaitara akana ana bwai Kaitara.” (Mat. 22:21) Ma e kangaa Iesu ni karekea te inaomata n te tai anne?

10. Tera are e kainaomataia aomata mai iai Iesu?

¹⁰ E roko Natin te Atua bwa e na buokiia aomata ni karekea te inaomata, n aanga aika uoua. Te moan, e kauka te kawai Iesu ae a na kainaomataaki iai aomata man aia reirei aika karawawata mataniwi n Aaro. A bati I-Iutaia n te tai anne ake a tautoronaki n taiani katei ao koaua aika kairua. (Mat. 5:31-37; 15:1-11) Naake a taku bwa a buokiia aomata n aia beku ibukin te Atua, bon ai aroia aomata aika mataki. A rawa nakon te Mesia ma ana angareirei, ngaia are a teimatoa ni mataki ao n aki kabwaraaki aia bure. (Ioa. 9:1, 14-16, 35-41) Ibukina bwa e angareirei Iesu n te koaua ao e katea te katoto ae raoiroi, e a kaota te anga ae a kona iai akana nimamannei ni kainaomataaki man reirei aika kewe.​—Mareko 1:22; 2:23–3:5.

11. Tera te anga ae te kauoua are e kainaomataia iai aomata Iesu?

¹¹ Te kauoua, e kainaomataia aomata Iesu man tautoronakia n rikiaia ae te bure. Ibukina bwa e anga maiuna Iesu bwa te kaboomwi, e a kona te Atua ni kabwarai aia bure naake a kaota onimakinan ao butimwaean te kaboomwi are e katauraoia te Atua. (Ebera 10:12-18) E taku Iesu: “Ngkana e kainaomataingkami te Nati, ao ane kam na bon inaomata raoi.” (Ioa. 8:36) E rianako riki te inaomata anne nakon are reke n aia Ririki n Inaomata tibun Iteraera! N te katoto, te aomata are kainaomataaki n te Ririki n Inaomata e kona ni manga riki bwa te toro, ao e na boni mate n tokin te tai.

12. Antai aika moani kakabwaiaaki n te inaomata are e taekinna Iesu?

¹² Ni Bentekota 33 C.E., e kabiriia abotoro Iehova n te taamnei ae raoiroi n ikotaki ma mwaane ao aine aika kakaonimaki naba. E bon natinia naakai, ngaia are a na kautaki nako karawa bwa a na tautaeka ma Iesu. (IRom 8:2, 15-17) Bon naakai aika moani kakabwaiaaki n te inaomata are e taekinna Iesu n te tinakoka i Natareta. A aikoa tautoronaki te koraki aei n reirei aika kewe ao n aia katei mataniwi n te Aro n Iutaia aika aki boraoi ma Ana Taeka te Atua. E iangoiia naba te Atua bwa a a inaomata man te bure ae kairiia nakon te mate. E moanaki ana babaire Iehova ibukini kaokan te inaomata ngke a kabiraki taan  rimwini Kristo n 33 C.E., ao e na roko n tokina n tokin ana Tautaeka Iesu ae Maanna Tenga te Ririki. Baikara baika tamaroa aika a na riki n te tai anne?

13-14. Irarikia Kristian aika kabiraki, antai riki ae kona ni karekea te inaomata are e taekinna Iesu?

¹³ N taai aikai, mirion ma mirion aika raoiroi nanoia mai buakoia natannaomata nako ake a na riki bwa “tiibu tabemwaang.” (Ioa. 10:16) A aki weteaki iroun te Atua bwa a na tautaeka ma Iesu i karawa. Ma iai aia kantaninga ae boto man te Baibara bwa a na maiu n aki toki i aon te aba. Anne am kantaninga?

¹⁴ Ma a reke naba ngkai iroum kakabwaia tabeua ake a reke irouia naake a na kaaina ana Tautaeka n Uea te Atua i karawa. Ibukina bwa ko onimakina ana karea Iesu, ko kona ni bubutii kabwaraan am bure. Ko a kona iai ni karekea akoam iroun te Atua ao mataniwin nanom ae itiaki i matana. (IEbe. 1:7; TeKao. 7:14, 15) Iangoi naba kakabwaia aika ko karekei ngkai ko a tia ni kainaomataaki man reirei aika kewe. E taku Iesu: “Ane kam na ataa te koaua, ao e na kainaomataingkami te koaua.” (Ioa. 8:32) Ai kakimwareireira te inaomata anne!

15. Tera te inaomata ao kakabwaia aika ti kantaningai n te tai ae e na roko?

¹⁵ Ko kona ni kantaningaa rokon te inaomata ae rianako riki. N te tai ae e a kaan, e  na waekoa Iesu ni kamaunai Aaro aika kewe ao tautaeka aika babakanikawai. E na kamanoia te Atua “te koraki ae uanao” ake a toro irouna, ao e na kariaia bwa a na karekei kakabwaia n te aonnaba ae te bwaretaiti. (TeKao. 7:9, 14) A na rangi ni bati aomata ake a na kautaki ao ni karekea naba kainaomataaia mani mwin nako ana bure Atam.​—Mwa. 24:15.

16. Tera te inaomata ae rianako riki ae mena imwaia aomata?

¹⁶ I aan te Tautaeka ae Maanna Tenga te Ririki, ao Iesu ma raona n tautaeka, a na buokiia aomata ni karokoia n te kororaoi ni kaineti ma marurungia ao aia iraorao ma te Atua. Kaokani bwaai nakon aroia ao te kainaomataaki n te tai aei, bon ai aron te Ririki n Inaomata i Iteraera rimoa. Ngaia are a nangi bane ni kororaoi aomata ake a beku ibukin Iehova ma te kakaonimaki ni koaua, ao a na kainaomataaki man te bure.

17. Tera ae taetae ni burabetinaki n Itaia 65:​21-23 ibukia ana aomata te Atua? (Nora te taamnei ni moan te maekatin.)

¹⁷ Te taetae ni burabeti ibukin aron te maiu i aon te aba e kaotaki n Itaia 65:21-23. (Warekia.) Tiaki nanona bwa e nang boo te aoaori. Ma e kaotaki n te Baibara bwa n te tai anne ao ana aomata te Atua a nang karaoi mwakuri aika manena ao ni karaunano. N tokin Ririki Ake Tenga, ti kona ni koaua raoi bwa “a na manga kainaomataaki baika karikaki man te tautoronaki i aan te mka, ma ni karekea te inaomata ae rianako arona ae reke irouia natin te Atua.”​—IRom 8:21.

18. E aera bwa ti kona ni kakoauaa ae e na kakukurei te tai ae imwaira?

¹⁸ N aron Iehova n taraia raoi bwa e na iai aia tai ni mwakuri ao ni motirawa tibun Iteraera, e na karaoa naba anne nakoia ana aomata n rokon ana Tautaeka Kristo ae Maanna Tenga te Ririki. E na bon iai te tai ibukin taromaurian te Atua. E karekea te kukurei ni boong aikai taromaurian te Atua, ao bon anne naba ae e na riki n te waaki ae boou i aon te aba. Eng, n ana tai n Tautaeka Kristo ae Maanna Tenga te Ririki, a na bane ni kimwareirei aomata aika kakaonimaki, ibukina bwa a na bane ni karaoi mwakuri aika karaunano ao ni beku ibukin te Atua.