KO IANGOIKO bwa ko bwabwaina te kakaitau ao te katituaraoi? Ti riai ni bane n iangoa te titiraki anne. E a kaman taekinna te Baibara bwa n ara tai aikai a na bati aomata aika “bangaomata.” (2Tim. 3:2) Ko bae n tia ni kaitiboo ma aomata aika iangoia bwa a riai tabemwaang ni karaoi bwaai ibukia ke n angania bwaai tabeua. A iangoia bwa a aki riai ni kakaitau ibukini baike a karekei. Ko na bae n aki kani memena i rarikia aeka n aomata aikai.

Ni kaitaraan anne, e tuangia ana toro Iehova ni kangai: “Kaotiota ami kakaitau.” Ti riai ni “katituaraoi ibukini bwaai ni kabane.” (IKoro. 3:15; 1Tet. 5:18) Ni koauana, e raoiroi ibukira karikirakean te nano ni kakaitau. A bati bukina ae e raoiroi iai anne.

Teuana bukina ae kakawaki ae ti riai ni karikirakea iai te nano ni kakaitau, bwa e buokira ni karekea te kukurei. Te aomata ae kakaitau e na bae n namakina riki te kukurei, ao ai uana naba ma te aomata are kaitauaki. E aera ngkai bwainan te kakaitau e kona ni kakukureira ma tabemwaang? Iangoa te katoto aei: Ngkana iai aika kani kabanea aia tai ni karaoa te bwai teuana ibukim, a iangoia bwa ko bon tau ni karekea anne. A tabeakiniko. Ngkana ko namakina tabeakinam, ko na boni kukurei iai. Ti kona n iangoia bwa anne naba ana namakin Ruta. E kaotiota te tituaraoi Boati nakon Ruta, ao akea te nanououa bwa e rangi ni kukurei neiei ngkai iai ae e tabeakinna.​—Ruta 2:10-13.

E kakawaki riki te kakaitau nakon te Atua. Ko boni bae n tabetai n iangoi bwaai n taamnei ao bwaai n rabwata aika bati ake e katauraoi, ao aika e bon teimatoa naba ni katauraoi. (TuaKau. 8:17, 18; Mwa. 14:17) Ma n oneani mwin iangoan raoiroin te Atua tii i nanon tabeua te tai, e aera bwa ko aki karekea am tai ni kananoa am iango i aoni kakabwaia aika bati ake e anganiko te Atua ma am utu? Kananoan am iango n tituaraoin am tia Karikiriki, e na karikirakea nanom ni kakaitau nakoina, ao ko na namakina riki iai ae e rangi n tangiriko ao ko kakawaki irouna.​—1Ioa. 4:9.

Ma karaoa ae bati riki nakon tii iangoan tituaraoina ao kananoan am iango i aon ana kakabwaia. Katituaraoa Iehova bwa e raoiroi. (TaiAre. 100:4, 5) E aki toki n taekinaki bwa “kaotan te kakaitau, bon te anga ae kakawaki ibukini karekean te kukurei irouia aomata.”

Bukina riki teuana ae e raoiroi iai ibukim te kakaitau, bwa e kakorakoraa te reitaki. Ti bane n namakina te kani kaitauaki. Ngkana ko kaitaua temanna mai nanom ibukin ana mwakuri n akoi, kam na kaaniaki riki iai. (IRom 16:3, 4) Irarikina, aomata aika kakaitau a kani buokiia riki tabemwaang. A nori mwakuri n akoi aika karaoaki nakoia ao a kairaki iai bwa a na kaotiota naba te akoi. Eng, buokaia tabemwaang e na boni karekea te kukurei, n aron are e taku Iesu: “E kakukurei riki te anga nakon te anganaki.”​—Mwa. 20:35.

E korea aei Robert Emmons ae te kauoman ni mataniwi n te kakaae i aon te kakaitau n te University of California: “Ngkana ti na kakaitau, ti riai n ataia ae ti kainnanoira i marenara. N tabetai ti anga ao n tabetai ti a manga anganaki.” Ni koauana, a kateimatoaaki ao ni boutokaaki maiura irouia  tabemwaang n aanga aika bati. N te katoto, a kona ni katauraoi kanara ke n tabeakinira ngkana ti aoraki. (1Kor. 12:21) Te aomata ae kakaitau a boni kakawaki irouna baike a karaoi tabemwaang ibukina. Ngkana ngaia anne, ko karikia bwa anuam kaotan te kakaitau ni baike a karaoi tabemwaang ibukim?

Bukina riki teuana ae ti riai ni karikirakea iai te kakaitau, bwa e buokira ni kaatuui ara iango i aoni baika raraoi ao tiaki aika bubuaka. Mwamwakurin am iango ai aron te raumea. E buokiko bwa ko na kaatuua am iango i aoni bwaai tabeua ake a otabwaniniko ao n totokoi iangoan ake tabeua. Ko kan nonori riki baika kakukurei ao ko aki kaatuua am iango i aoni kangaanga. Ngkana ko a rangi ni kakaitau, ko a kona n nori riki baika raraoi, ao e na rikirake riki am kakaitau. Kaatuuan am iango i aoni baika ko kona ni kakaitau iai ni maium, e na buokiko ni maiuakina ana kaungaunga te abotoro Bauro aei: “Kimwareirei n taai nako ibukin te Uea.”​—IBir. 4:4.

Ane ko na noria bwa te kakaitau e buokiko bwa ko na aki iangoi baika bubuaka. Tiaki bwa e kangaanga namakinan te kakaitau ngkana ko bakantang, ko nanokawaki, ke ko un? Aomata aika kakaitau, a aki kanibwaibwai naba. A kakaitau ni baike iai irouia, ao a aki kani karekei baika bati riki.​—IBir. 4:12.

Ngkai te Kristian ngkoe, ko ataia ae e tangiria Tatan bwa e na bwara nanom ao ko na rawawata ni kangaanga ake ko kaaitarai ni kabaneani boong aikai. E tangiriko bwa ko na karekea te nano ae aki raoiroi ae te ngurengure. Ngkana e reke iroum te nano anne, e kona n aki uaana am mwakuri ngkai te tia tataekina te rongorongo ae raoiroi ngkoe. Ni koauana, e rangi n irekereke te kakaitau ma uaan taamnein te Atua, n ikotaki ma te kimwareirei ibukini baika raraoi ake e anganiko te Atua, ao onimakinan ana berita nako.​—IKar. 5:22, 23.

Ngkai ana aomata Iehova ngkoe, ko bae ni boraoi n iango ma te bae taekinaki n te kaongora aei ibukin te kakaitau. Ma ko ataia naba ae e aki bebete n taai nako bwainan te kakaitau ao iaiangoani baika raraoi. Ma tai kabwaraa nanom. Ko kona ni karikirakea ao ni kateimatoa te nano ni kakaitau. N te aro raa? Karekea am tai ni katoabong n iaiangoi iterani maium tabeua ake ko kona ni kakaitau iai. Kabatiaan karaoan anne, e na karekea riki iroum namakinan te kani kakaitau. Ane ko na kukurei riki nakoia naake a kaatuui aia iango i aoni kangaanga n te maiu aei. Iaiangoi baika raraoi ake e karaoi te Atua ao tabemwaang ibukim, ake ko unga ao ni kukurei iai. Ko kona naba ni karekea am boki teuana ao ni korei iai uoua ke tenua baika ko namakina iai te kakaitau n te bong teuana ma teuana.

A a tia taani kakaae i aon aei ni kunea bwa ngkana ti katoatai ni kaitauia tabeman, e kona ni bitaki iai mwamwakurin ara kaburoro ao ti na kai namakina riki iai te kukurei ni maiura. Te aomata ae kakaitau e na boni kukurei riki. Ngaia are iaiangoi kakabwaiaam, kakukureiko ni baika raraoi ake a riki nakoim, ao kakaitau n taai nako! N oneani mwin are ko na tarariaoi baika raraoi, “Katituaraoa Iehova bwa e raoiroi.” Eng, “katituaraoi ibukini bwaai ni kabane.”​—1Rong. 16:34; 1Tet. 5:18.