1-2. N aron ae kaotaki n rongorongon Angelito, tera ae ti riai ni karaoia n tatabemanira nako?

KO KAIKAWAAKI irouia am karo aika Ana Tia Kakoaua Iehova? Ngkana ngaia, uringnga ae e aki kona n reke am iraorao ma Iehova mairouia. E ngae ngkana a beku iroun te Atua ara karo ke a aki, ma boni ngaira n tatabemanira nako ae ti riai ni karekea ara iraorao ma Iehova.

² Iangoa rongorongon te tari te mwaane ae Angelito. E kaikawaaki n te utu aika Ana Tia Kakoaua Iehova. Ma ngke e ataei riki, e aki namakinna bwa e kaan ma te Atua. E taku: “I beku ibukin Iehova ibukina bwa I kani karaoa naba are a karaoia au utu.” Ma e iangoia Angelito bwa e na kabanea riki ana tai ni wareka Ana Taeka te Atua ao ni kananoa ana iango iai, ao e a moanna n tatataro riki nakon Iehova. Tera mwina? E taku: “I a ataia ae te anga ae I tii kona iai ni kaaniaki ma Tamau ae Iehova, boni mani reiakinan taekana bwa I aonga ni kinaa.” Ni kaineti ma rongorongon Angelito aei, ti kona n iangoi titiraki aika kakawaki aikai: Tera kaokoron ataakin Iehova ma kinaakina raoi? Ao ti na kangaa ni kinaa Iehova?

3. Tera kaokoron ataakin Iehova ma kinaakira raoi?

³ Ti kona n taekinna bwa ti kinaa Iehova ngkana ti ataa arana ao bwaai tabeua ake e taekin ma ni karaoi. Ma e bati riki ae kainnanoaki ni kinaakin raoi Iehova. Ti bon riai ni kabanea ara tai n reiakina taekan Iehova ma aroarona aika tamaroa, ao ti a tibwa kona n ota bwa bukin tera ngkai e taekin ke ni karaoi bwaai tabeua. E na buokira anne n ataia  bwa e kukurei ni baika ti iangoi ao aika ti karaoi, ke e aki. Ngkana ti a ataa te bwai ae e tangiria Iehova bwa ti na karaoia, ti riai ni mwakuria.

4. Ti na kangaa ni buokaki ngkana ti rinanoi katoto man te Baibara?

⁴ A kona tabeman ni kakanikoira ngkai ti kani beku ibukin Iehova, ao a kona ni kakaaitaraira riki ngkana ti a bobotaki ma ana aomata. Ma ngkana ti onimakina Iehova, e na bon aki kaaki taekara. E nang reke ara iraorao ae kaan ma te Atua ae e na teimatoa n aki toki. Ma ti kona ni kinaa raoi Iehova? Ti boni konaa! E kaotaki n aia katoto mwaane aika aki kororaoi n aroni Mote ao te Uea ae Tawita, bwa e boni kona n riki anne. A na kaekaaki titiraki aikai ngkana ti rinanoi baike a karaoi naakai: A kangaa ni karekea kinaakin Iehova? Ao tera reireiara man aia katoto?

5. Tera are e rineia Mote bwa e na karaoia?

⁵ E rineia Mote bwa e na toro iroun te Atua. Ngke tao ai 40 ana ririki Mote, e rineia bwa e na tei n aia itera ana aomata te Atua ake taian Ebera, n oneani mwin are e na kinaaki bwa “natin natini Barao te aine.” (Ebera 11:24) E kaaki nakoana ae kakannato Mote. Ngke e tei n aia itera taian Ebera ake tooro i Aikubita, e a karokoa unin Barao ae te uea ae korakora, ae iangoaki irouia I-Aikubita bwa te atua naba temanna. Ai rianakora te onimaki aei! E onimakina Iehova Mote. Te onimaki anne e a karekea te iraorao ae kaan ae teimatoa i marenani Mote ma Iehova.​—TaeRab. 3:5.

6. Tera reireiara man ana katoto Mote?

⁶ Tera reireiara iai? N aroni Mote, ti riai ni bane ni karaoa ara motinnano: Ti na rineia bwa ti na toro iroun te Atua ao ni bobotaki ma ana aomata? Tao ti na bae ni kakeaira ni bwaai tabeua ngkana ti na beku ibukin Iehova, ao ti kona naba ni kaitaraaki irouia naake a aki kinaa Iehova. Ma ngkana ti onimakina Tamara are i karawa, e na boni boutokaira!

7-8. Tera are e teimatoa n reiakinna Mote?

⁷ E teimatoa Mote n reiakin aroaron Iehova ao ni kakaraoa nanona. N te katoto, ngke e tuangaki Mote bwa e na kairiia tibun Iteraera ni kaotinakoia mai Aikubita, e namakinna bwa e aki kona ni karaoia ao e okioki n tuanga Iehova bwa e aki tau. E kaota raoi te atataiaomata te Atua nakoni Mote, ao e buokia. (TeOti. 4:10-16) Ibukin anne, e a kona Mote ni kaongoa Barao taekan taiani motikitaeka aika matoatoa. E nora Mote aron Iehova ni kamanena mwaakana ngke e kamaiuia tibun Iteraera, ao ni kamauna Barao ma ana taanga ni buaka, n Taari ae Uraura.​—TeOti. 14:26-31; TaiAre. 136:15.

⁸ A teimatoa ni ngurengure tibun Iteraera imwini kaotinakoaia mai Aikubita irouni Mote. Ma e ngae n anne, e nora Mote korakoran ana taotaonakinnano Iehova nakoia aomata aikai, ake e kainaomataia man te tautoronaki. (TaiAre. 78:40-43) E nora naba Mote aron Iehova ni kaota te nanorinano ae rianako, ngke e bita ana iango imwini butiiana irouni Mote.​—TeOti. 32:9-14.

9. Ni kaineti ma Ebera 11:27, tera aroni kaanin ana iraorao Mote ma Iehova?

⁹ Imwin te Otinako mai Aikubita, e a rangi ni kaan ana iraorao Mote ma Iehova n te aro are kaanga e a kona n nora Tamana are i karawa. (Wareka Ebera 11:27.) E kaotaki kaanin te iraorao anne n te Baibara, ni kangai: “E taetae Iehova nakoni  Mote n itaramata ma ngaia, n aron te aomata temanna ae taetae ma raona.”​—TeOti. 33:11.

10. Ngkana ti na kinaa raoi Iehova, tera ae ti riai ni karaoia?

¹⁰ Tera reireiara iai? Ngkana ti na kinaa raoi Iehova, ti aki tii riai n reiakin aroarona ma ti riai naba ni kakaraoa nanona. Ni boong aikai, e kantaningaiia Iehova “aeka n aomata nako bwa a na kamaiuaki, ma ni karekea te atatai ae eti ibukin te koaua.” (1Tim. 2:3, 4) Te anga teuana ae ti karaoa iai nanon te Atua, boni man reiakinaia aomata taekan Iehova.

11. Ti kangaa ni kinaa riki Iehova ngkana ti reireinia aomata taekana?

¹¹ N angiin te tai ngkana ti reiakinia tabemwaang taekan Iehova, ti a kinaa riki naba iai. N te katoto, ti nora koauan ana atataiaomata Iehova ngkana e kairira nakoia aomata aika raoiroi nanoia. (Ioa. 6:44; Mwa. 13:48) Ti nora mwaakan Ana Taeka te Atua ae mwamwakuri ngkana ti noriia naake ti reirei ma ngaiia ni katoki aroaro aika bubuaka, ao ni moanna ni karina te aroaro ae boou. (IKoro. 3:9, 10) Ao ti nora koauan ana taotaonakinnano te Atua, ngkai e angania aomata n ara aono aia tai ae bati bwa a na reiakina taekana ao ni kamaiuaki.​—IRom 10:13-15.

12. Ni kaineti ma Te Otinako 33:​13, tera ana bubutii Mote, ao bukin tera?

¹² E rangi ni kakawaki irouni Mote ana iraorao ma Iehova. E ngae ngke e a tia ni karaoi kakai Mote n aran te Atua, ma e boni bubutii naba ma te karinerine bwa e na kinaa riki Iehova. (Wareka Te Otinako 33:13.) Bon 80 tabun ana ririki Mote ngke e bubutii, ma e ataia ae e bati riki baike e riai n reiakin ibukin Tamana are i karawa ae tatangira.

13. Tera te anga teuana ae ti kaotia iai bwa e kakawaki iroura ara iraorao ma te Atua?

¹³ Tera reireiara iai? N aki ongeia bwa ai maanra ngaira ni beku ibukin Iehova, ma e riai n teimatoa ni kakawaki iroura ara iraorao ma ngaia. Te anga teuana ae ti kona ni kaota iai anne, boni man arora ni mamaroro ma te Atua n te tataro.

14. E aera ngkai te tataro bon te anga ae kakawaki ibukini kinaakin riki te Atua?

¹⁴ Te uaia ni mamaroro bon te anga ae kakawaki ibukini kateimatoaan te iraorao ae kaan. Ngaia are kaania te Atua n arom ni katoatai n tataro, ao n aki maaku ni kaotii am namakin aika raba nakoina. (IEbe. 6:18) E taku Krista ae maeka i Turkey: “E rikirake tangiran ao onimakinan Iehova irou n taai ake I kaotii iai au iango nakoina n te tataro, ao n noran arona ni buokai. Noran aron Iehova ni kaekai au tataro, e buokai bwa N na iangoa Iehova bwa Tamau ao Raoraou.”

15. Tera aron Iehova ni kabwarabwaraa te Uea ae Tawita?

¹⁵ E bungiaki te Uea ae Tawita man te natannaomata ae katabuaki nakon Iehova ae te Atua. Ma e karaoa ae bati riki Tawita nakon are e a tii kakairi naba n aia waaki n taromauri kaain ana utu. E karekea oin ana iraorao ma te Atua ao e rangi n tangiraki iroun Iehova. E kabwarabwaraaki Tawita iroun Iehova bwa “te mwaane ae kakukureia [nanona].” (Mwa. 13:22) E kangaa n rangi ni kaan ana iraorao Tawita ma Iehova?

16. Tera reireian Tawita ibukin Iehova man tataraakin te karikibwai?

¹⁶ E reiakina taekan Iehova Tawita man te karikibwai. Ngke e uarereke Tawita,  e babane ana tai i tinaniku n tararuaiia ana tiibu tamana. Tao n taai akanne, e a moana iai kananoan ana iango i aoni baike e karaoi Iehova. N te katoto, ngkana e tararake nako karawa Tawita n te tairiki, a bati riki baike e nori i rarikin itoi aika nga ma nga. E a kona n atai naba aroaron Teuare karikii baikai. E kairaki Tawita bwa e na korea aei: “E tataekina mimitongin te Atua karawa, ao a kaotiota ana mwakuri baina bwaini karawa.” (TaiAre. 19:1, 2) Ngke e iaiangoa Tawita aroni karaoaia aomata, e a nora iai kamimin wanawanan Iehova. (TaiAre. 139:14) E namakinna bwa e mangori ngke e kataia n iaiangoi ana mwakuri Iehova.​—TaiAre. 139:6.

17. Tera reireiara ae kona n reke ngkana ti kananoi ara iango i aon te karikibwai?

¹⁷ Tera reireiara iai? Mamatakuakina te karikibwai. Karekea am tai n taraa tamaroan te aonnaba ae e karikia Iehova ao nora aroni kamimina! Kananoa am iango ni katoabong n taiani karikibwai aika otabwaniniko n aron aroka, maan, ao aomata, ao karekea reireiam iai ibukin Iehova. Ane e na reke reireiam ae bati ni katoabong ibukin Tamam ae tatangira. (IRom 1:20) Ao ane ko na namakinna ni katoabong bwa e na ririkirake tangirana iroum.

18. N aron ae kaotaki n Taian Areru 18, tera ae e ataia raoi Tawita?

¹⁸ E ataia Tawita bwa e boni buokia Iehova. N te katoto, ngke e kamanoia ana tiibu tamana mairoun te raian ao te bea, e ataia bwa bon Iehova ae buokia n tiringia maan aika korakora aikai. Ngke e kataea ana kai Koria are te tia buaka ae korakora, e ataia raoi Tawita bwa bon Iehova ae kairiria. (1Tam. 17:37) Ao ngke e birinako mairoun te Uea ae Tauro are babakantang, e kakoauaa Tawita bwa bon Iehova ae kamaiua. (TaiAre. 18, atuna) Te aomata ae kamoamoa e kona n iangoi tokanikai akanne bwa a bon reke i bon irouna. Ma e nanorinano Tawita, ngaia are e ataia bwa e boni buokia Iehova.​—TaiAre. 138:6.

19. Tera reireiara man ana katoto Tawita?

¹⁹ Tera reireiara iai? Ti riai ni karaoa ae bati riki nakon tii butiiakin Iehova ana ibuobuoki. Ti riai n ataia bwa n ningai ae e buokira iai ao n te aro raa. Ngkana ti nanorinano ni butimwaea ae iai tian ara konabwai, ti na kai butimwaea riki ae e boni buokira Iehova ni baike ti aki konai. Ao n taai ake ti nora iai ana ibuobuoki Iehova, e na rikirake riki ni kaan ara iraorao ma ngaia. E nora koauan aei te tari te mwaane ae Isaac ae maeka i Biitii, ae e a tia ni beku ibukin Iehova i nanon ririki aika bati. E taku: “Ngkana I ururing rikaaki, I kona n nora aron Iehova ni buokai man te tai are I moana iai au reirei n te Baibara ni karokoa te bong aei. Ibukin anne, I a kaaniaki riki ma Iehova.”

20. Tera reireiara man ana iraorao Tawita ma te Atua?

²⁰ E kakairi Tawita n aroaron Iehova. E karikira Iehova bwa ti na kona ni kakairi n aroarona. (KBwaai 1:26) Ngkana ti kabatiaa reiakinan aroaron Iehova, ti na kona riki iai ni kakairi irouna. E rangi ni kinaa Tamana are i karawa Tawita, ngaia are e a kona ni kakairi irouna ni kaineti ma arona nakoia aomata. Iangoa te katoto teuana. E bure Tawita nakon Iehova ngke e wene ni kimoa ma Batateba ao imwina e tua kamateani buun neiei. (2Tam. 11:1-4, 15) Ma e rineia Iehova bwa e na kaota nanoangaan Tawita, ae te mwaane ae nananoanga naba. Ibukina bwa e rangi ni kaan ana reitaki Tawita ma Iehova, e a  riki bwa temanna i buakoia uean Iteraera aika rangi n tatangiraki, ao e kamanenaaki iroun Iehova bwa te katoto ibukia uean Iteraera ake tabeman.​—1Uea 15:11; 2Uea 14:1-3.

21. Ni kaineti ma I-Ebeto 4:24 ao 5:1, tera ae kona n reke ngkana ti riki bwa “taani katotonga aron te Atua”?

²¹ Tera reireiara iai? Ti riai n riki bwa “taani katotonga aron te Atua.” Ti na aki tii kakabwaiaaki ni karaoan anne, ma e na buokira naba ni kinaa riki. Ngkana ti kakairi n aroaron te Atua, ti kaotia iai bwa bon natina ngaira.​—Wareka I-Ebeto 4:24; 5:1.

22-23. Tera ae e na riki ngkana ti maiuakini baike ti reiakin ibukin Iehova?

²² N aron ae ti a tia n noria, ti kona n reiakina taekan Iehova rinanon te karikibwai ao ana Taeka ae te Baibara. E onrake te boki aei n taekaia ana toro te Atua aika kakaonimaki ake ti kona ni katotongia, n aroni Mote ao Tawita. E a tia ni karaoa tabena Iehova. Ma ai bon tabera ngkanne bwa ti na kauki matara, taningara, ao nanora nakoina.

²³ Ti na bon aki katoka reiakinan taekan Iehova. (TeMin. 3:11) E aki kakawaki bwa mwaitira ara atatai ibukina, ma e kakawaki riki te bwai ae ti karaoia ma ara atatai anne. Ngkana ti maiuakini baike ti reiakin ao ni kataia ni kakairi iroun Tamara ae tatangira, e na bon teimatoa ni kaanira. (Iak. 4:8) E karaui nanora n Ana Taeka bwa e na bon aki kaaki taekaia te koraki ake a ukoukoria.