Ko kona ni kaekai titiraki aikai man Te Taua-n-Tantani aika bwain 2019?

Tera nanon ana berita te Atua aei: “Akea te bwai ni buaka ae karaoaki n ekikonako ae e na tokanikai”? (Ita. 54:17)

Ti kona ni kakoauaa raoi bwa e na kamanoira te Atua mani kangaanga aika ai aroni baika urubwai, n aron “unia taani karawawata.” (Ita. 25:4, 5) A na bon aki tokanikai taani kairiribai nakoira ni karawawataira n aki toki.​— w19.01, i. 6-7.

E kangaa ni kaotaki ana kaetitaeka ae riai te Atua man arona nakoia tibuni Kanaan ao tibun Iteraera aika rangi ni buakaka?

E motiki taekaia te Atua naake a karaoi mwakuri ni wene ni bure aika kammaira ke a karawawataia aine ao ataei. E kakabwaiaia aomata aika ongeaba irouna ao aika kakaraoa ae riai i marenaia.​— w19.02, i. 22-23.

Tera ae ti riai ni karaoia ngkana e tataro te aomata ae tiaki kaain te onimaki?

Ti kona n teimatoa ni kainabwabu ao ni bwaina te karinerine, ma ti na aki taekina “amen” ke n taubai ma tabeman n tain te tataro. Ti kona n tataro i nanora.​— w19.03, i. 31.

Tera aroni kakaiakin te mwakuri n tautau nakoia ataei?

Te mwakuri n tautau nakoia ataei bon te bure nakon te teei are karaoaki aei nakoina, te ekaretia, te tautaeka, ao te Atua. N taabo ake tuan te aba iai e riai n ribootinaki te mwakuri anne, a na ongeaba iai unimwaane.​— w19.05, i. 9-10.

Ko na kangaa ni bita ke ni kanakoraoa riki nanom ae ngaia ae kaira am iango?

Mwaneka aika kakawaki: Maroro ma Iehova n te tataro. Kananoa am iango ma tiam ae neneran raoi arom. Rineiia raoraom aika raoiroi.​—w19.06, i. 11.

Tera ae ti kona ni karaoia mangkai bwa ti aonga n tauraoi imwain te bwainikirinaki?

Ti riai ni kakorakoraa reitakira ma Iehova. Kakoauaa raoi bwa e tangirira Iehova ao e na bon aki kitanira. Wareka te Baibara ni katoabong, ao katoatai n tataro. Kakoauaa raoi bwa a na boni koro bukini kakabwaia man te Tautaeka n Uea. Kamatenikunai kiibu ake ko tatangiri ao anene n nebonebo.​—w19.07, i. 2-4.

Tera ae ti kona ni karaoia bwa ti aonga ni buokiia ara koraki bwa a na kamaiuaki?

E kakawaki bwa ti na kaota te atataiaomata, bwaina te aroaro ae tamaroa bwa bon te anga n uarongorongo ae raoiroi, ao bwaina te taotaonakinnano ao taetae ma te akoi.​—w19.08, i. 15-17.

Ti kangaa ni kabebeteaki n aron are e beritanna Iesu ni Mataio 11:28?

Iai ara mataniwi aika Kristian aika tatangira, raoraora aika taiani kabanea n tamaroa, ao ara mwakuri ae te kabanea n tamaroa.​—w19.09, i. 23.

E na kangaa te Atua ni karekei nanora ni kani mwakuri? (IBir. 2:13)

Ngkana ti wareka Ana Taeka te Atua ao ni kananoa ara iango iai, e kona te Atua ni kakorakoraira ao ni karekea nanora bwa ti na kani karaoa nanona, ao te korakora bwa ti na mwakuri. E kona ni katamaroai ara konabwai rinanon taamneina.​—w19.10, i. 21.

Baikara aanga aika manena ake ti riai ni karaoi imwaini karaoan te motinnano ae kakawaki?

Aanga aika nimaua: Karaoa raoi am ukeuke. Tataro ibukin te wanawana. Nenera raoi bukini karaoan am motinnano. Katei tiam ake ko na uaiakin. Karaoa ae ko boni konaa.​—w19.11, i. 27-29.

Te koaua bwa e riki te reirei are e aki mamate te taamnei man te baere e taekinna Tatan nakon Ewa?

N taraana, e bon aki. E tuanga Ewa Tatan bwa e na bon aki mate ao tiaki n ae e na mate rabwatana ma e na teimatoa ni maiu taamneina. A kamaunaaki koaua aika kewe man Aaro n tain te Ieka. Kakoauaan ae e aki mamate taamnein te aomata e bae n reke imwaini kamaenakoaia aomata iroun te Atua, ake a katea te taua are i Babera.​—w19.12, i. 15.