Ko a tia ni wareki raoi kaongora n Te Taua-n-Tantani n te ririki aei? Noria ngkana ko kona ni kaekai titiraki aikai:

Ti na kangaa ni kakabwaiaaki ngkana ti karekea ara tai ni maroro ma Iehova, ni kakauongo irouna, ao n iaiangoia?

Ti na boni karaoi motinnano aika tamaroa, ti na riki bwa taan reirei aika mwaatai, e na korakora ara onimaki, ao n rikirake tangiran Iehova iroura.—w22.01, i. 30-31.

Ti na kangaa ni buokaki ngkana ti karikirakea onimakinan Iehova ao taani kairiri ake e mwiokoiia?

Aei te tai ni karikirakea onimakinan ana babaire te Atua n arora n aki nanououa n te kairiri ao n aia babaire unimwaane. Ngkana e a roko te rawawata ae korakora, ti na tauraoi n ongeaba e ngae ngke ti karekei kaetieti aika taraa n aki boo ma ongia ke ni kangaanga te ongeaba iai.—w22.02, i. 4-6.

Tera ae nanonna te anera nakon Tekaria ngke e taekina “te kora ni kaeti i nanoni bain Terubabera [ae te Kowana]”? (Tekaria 4:8-10)

E kaotaki nakoia ana aomata te Atua n te miitara aei bwa e na boni katiaaki te tembora ae mangori aei n aron are e tangiria te Atua.—w22.03, i. 16-17.

Ti na kangaa n riki bwa “te banna ni katoto . . . n te taetaenikawai”? (1Tim. 4:12)

Ti taetae ma te akoi ao te karinerine n ara mwakuri ni minita, ti anene ma nanora ni kabane, ti katoatai n anga ara kaeka, ti bwaina te koaua ao n taetae n te aro ae a na kateimatoaaki iai tabemwaang, ao ni kaaki te tinaraa.—w22.04, i. 6-9.

Bukin tera bwa kabwarabwaraani maan ake aman (ae taekaia tautaeka) ake a mwaneweaki n Taniera mwakoro 7, a bane i aon te man ae tii temanna are kabwarabwaraaki n Te Kaotioti 13:1, 2?

E aki tei te man are n Te Kaotioti 13 ibukin tii teuana te tautaeka n uea n aron Rom. Ni kaitaraan anne, e tei ibukia tautaeka ake a tautaekania aomata ma rimoa ni karokoa ngkai.—w22.05, i. 9.

Tera te anga teuana ae ti kaota iai onimakinan ana kaetitaeka te Atua?

Ngkana e kabuakakaira temanna, ni kaunira, ke ni bure nakoira, ti kataia n kanakoa mairoura te un ao te riribai ao ni katikui bwaai ni kabane i nanoni bain Iehova. E na katoki kangaanga ake a bane n riki man te bure.—w22.06, i. 10-11.

Tera ae e riai n ururingnga te tari te mwaane ngkana e tataro n tain te taromauri?

E aki riai ni kamanenaaki te tataro bwa te tai ni kaetiia kaain te ekaretia ao ni katanoata. E aki riai ni ‘kabatiaaki te taeka’ moarara riki ni moanakin te botaki. (Mat. 6:7)—w22.07, i. 24.

N te aro raa ae a na karekea “te mangauti are te kabuakakaaki” “te koraki ake a kakaraoi baika rangi ni buakaka”? (Ioane 5:29)

A na aki karekea te motikitaeka ae aki raoiroi ni kaineti ma maiuia rimoa. A na tuoaki raoi ni kaineti ma aroaroia ao aia mwakuri imwini kautakia.—w22.09, i. 18.

Tera te kaungaunga ae kakukurei are e anga J. F. Rutherford n te bwabwaro n Tebetembwa 1922?

E taekina ae kangai n te bwabwaro are i Cedar Point, Ohio, U.S.A.: “E a uea te Uea! Bon taan tataekina rongorongona ngkami. Ngaia are kaotiota, kaotiota, kaotiota, te Uea ao ana Tautaeka n Uea!”—w22.10, i. 3-5.

Baikara bwaai aika tenua ake e buokira iai te Atua n nanomwaaka, ake a taekinaki n Itaia mwakoro 30?

E kaotaki n te mwakoro aei bwa (1) e kakauongo ao ni kaekai ara tataro, (2) e kairirira, ao (3) e kakabwaiaira ngkai ao n taai aika a na roko.—w22.11, i. 9.

E aera bwa ti kona n taekinna ae Taian Areru 37:10, 11, 29, iai kakoroani bukina n taai ake rimoa ao e na iai naba kakoroani bukina n taai aika imwaira?

A kabwarabwaraaki n ana taeka Tawita kakabwaia aika reke i Iteraera, n aron are e riki ngke e tautaeka Toromon. E taekina Iesu taekan te bwaretaiti n taai aika imwaira ao ni mwanewea kanoan te kibu 11. (Mat. 5:5; Ruka 23:43)—w22.12, i. 8-10, 14.