E aki. E bon eti te baere e koreia Tawita ao e boni kona n riki.

Iangoa te baere e koreia n te kibu anne ao ni kiibu riki aika ai aron anne: “N na anene n neboa aram n aki toki, ngkai I kakororaoi au taeka ni bau ni katoabong.” “I karaoiroiko ngkoe ae Iehova ae Atuau, ma nanou ni kabane, ao N na neboa aram n aki toki.” “N na karaoiroa aram n aki totoki.”—TaiAre. 61:8; 86:12; 145:1, 2.

E aki karakaraka Tawita n iangoia bwa e na aki mamate. E ataa ana tua Iehova ae boon aia bure aomata bon te mate, ao e kakoauaa naba Tawita ae te tia bure ngaia. (KBwaai 3:3, 17-19; TaiAre. 51:4, 5) E ataia ae a boni mate naba aomata aika e akoiia te Atua, n aron Aberaam, Itaaka, ao Iakoba. Ao e ataia Tawita ae e na bon toki maiuna imwina riki. (TaiAre. 37:25; 39:4) Ma ana taeka ake n Taian Areru 61:8 e kaotaki iai nanona ao ana motinnano ae e kan neboa te Atua n aki toki, ae e nanonaki iai bwa n uaa tokini maiun Tawita.—2Tam. 7:12.

Tabeua ana koroboki Tawita a kaineti ma baika riki i nanoni maiuna, n aron ae ti noria n atun Taian Areru 18, 51, ao 52. N Taian Areru 23, ao Tawita e kabwarabwaraa iai Iehova bwa te tia kawakintiibu ae te tia kairiria, te tia kaungaa, ao te tia kamanoa. Te tia kawakintiibu naba ngkoa Tawita ae ai aron anne, ao e kan beku iroun te Atua ‘n ana bong ni kabane.’—TaiAre. 23:6.

Ururingnga naba are bon Iehova ae kaira Tawita bwa e na korei baikai. Ao iai naba taetae ni burabeti ake e korei aika a na koro bukia n taai aika imwaira. N te katoto, e koreia n Taian Areru 110 bwa ‘e na tekateka i angaatain te Atua’ ana Uea i karawa ao ni karekea te mwaaka ae korakora. Tera ae e na karaoia? E na kataenikaiia taani kairiribai nakon te Atua ao ni “motikitaeka n ekiianako natannaomata” aika n te aonnaba. Tawita bon ana bakatibu te Mesia, are e na tautaeka mai karawa ao n riki bwa “te ibonga . . . n aki toki.” (TaiAre. 110:1-6) E taekinna Iesu ae te taetae ni burabeti are n Taian Areru 110 e boni kaineti nakoina, ao e na koro nanona n taai aika imwaira.—Mat. 22:41-45.

Eng, e kairaki Tawita n te taamnei ae raoiroi bwa e na korei taekan taai ake e maiu iai ao taai aika imwaira, ike e nang kautaki iai ao n neboa Iehova n aki toki. Ti ataia n aei bwa Taian Areru 37:10, 11, 29 e kona ni kaineti ma taekan Iteraera rimoa, ao taekan naba te aonnaba aei n taai aika imwaira, ike e nang kakororaoaki iai ana berita nako te Atua.—Nora barakirabe 8 n te kaongora ae “Ko na Mena ma Ngai n te Bwaretaiti” n te maekatin aei.

E kaotaki n Taian Areru 61:8 ao ni kiibu riki tabeua bwa e tangiria Tawita ni kamoamoaa Iehova i Iteraera rimoa n uaa matena. Ao e oti naba iai te bae e na kona ni karaoia Tawita n taai aika imwaira ngkana e kautia Iehova man te mate.