1. E aera bwa ti kona ni kakoauaa ae e mwaaka Ana Taeka te Atua? (Nora te taamnei ni moan te kaongora aei.)

NGKAI ana aomata Iehova ngaira, ti kakoauaa ae ‘e maiu ao e mwaaka’ ana taeka te Atua, ke ana rongorongo nakoia aomata. (Ebera 4:12) A bati i buakora aika kaota koauan ae e mwaaka te Baibara ni kona ni bitii maiuia aomata. Tabeman taari bon taan iraa ngkoa, a tautoronaki n te drug, ke taani wene ni bure. Tabeman a maiu ni kaubwai n te waaki ae ngkai, ma a namakinna bwa iai te bwai ae bua i nanoni maiuia. (TeMin. 2:​3-11) E kakukurei bwa a bati aika akea aia kantaninga ake a a kunea te kawai nakon te maiu mani mwaakan te Baibara ni bitii maiuia. Ko bae n unga ni wawareki rongorongo aikai n Te Taua-n-Tantani n te kaongora ae bati mwakorona ae, “E Bitii Maiuia Aomata te Baibara.” Ao ko a tia n noria ae imwini butimwaean te koaua irouia Kristian, a bon teimatoa naba ni karikirakea aia onimaki man ana ibuobuoki te Baibara.

2. E kangaa n oti mwaakan Ana Taeka te Atua n te moan tienture?

² Ti riai ni mimi ngkai a bati n taai aikai aika karaoi bitaki aika korakora imwin reiakinan Ana Taeka te Atua? Ti aki! Ti kauringaki n rongorongo akanne taekaia taari ake n te moan tienture ake a kantaningaa te nako karawa. (Wareka  1 I-Korinto 6:​9-11.) Imwin taekinaia aeka n aomata ake a na aki karekea Ana Tautaeka n Uea te Atua, e reitia ni kangai te abotoro Bauro: “Akanne aroia tabeman i buakomi ngkoa.” Ma a a tia ni bitaki man ana ibuobuoki Ana Taeka te Atua ao taamneina. Imwini butimwaean te koaua, tabeman a bon riai naba n tokanikai i aon aia kangaanga n aia onimaki. E taekinaki n te Baibara te Kristian ae kabiraki temanna ae e riai ni kabaneaki, ma imwina riki e a manga kaokaki. (1Kor. 5:​1-5; 2Kor. 2:​5-8) Ti kaungaaki n iangoan ae a kakaokoro aia kangaanga raora n te onimaki, ma a tokanikai i aoia man Ana Taeka te Atua.

3. Tera ae ti na rinanona n te kaongora aei?

³ Ibukina bwa bon te bwai ni mwakuri ae mwaaka Ana Taeka te Atua ae iai iroura, ti bon riai ni kamanena raoi. (2Tim. 2:15) N te kaongora aei, ti na maroroakinna bwa tera ae ti na karaoia ni kamanena iai mwaakan ana taeka te Atua (1) i nanoni maiura, (2) ni karaoan ara mwakuri ni minita, ao (3) ngkana ti angareirei mai moa. Ti na buokaki ni kauring aikai bwa ti na kaota ara tangira ao ara kakaitau nakon Tamara are i karawa ae tatangira, are e reireinira arora ae ti na kabwaia iai.​—Ita. 48:17.

4. (a) Tera ae kainnanoaki ngkana e na rotaki maiura n Ana Taeka te Atua? (b) Ko na kangaa ni karekea am tai ni wareka te Baibara?

⁴ Ngkana e na rotaki maiura n Ana Taeka te Atua, ti riai ni kataia ni warekia ni katoabong. (Iot. 1:8) E koaua ae ti bane n tatabetabe. Ma ti aki riai ni kariaia te bwai teuana bwa e na urua ara babaire ibukini warekan te Baibara, e ngae naba ngkana tabera aika kakawaki. (Wareka I-Ebeto 5:​15, 16.) A bati ana aomata Iehova ake a rangi ni kakauiango ibukini karekean aia tai ni wareka te Baibara ni katoabong, tao n te ingabong ke n te tairiki, ke i marenan taai akanne. A namakina naba are iroun te tia areru are korea aei: “Ai batira tangiran am tua irou! I iaiangoia raoi ni kabongnga.”​—TaiAre. 119:97.

5, 6. (a) E aera ngkai e kakawaki kananoan te iango? (b) Ti na kangaa ni kananoi ara iango n te aro ae uaana? (c) Tera kakabwaiaam ni warekan Ana Taeka te Atua ao kananoan am iango iai?

⁵ Irarikini wawarekan te Baibara, e kakawaki naba kananoan ara iango n te baere ti warekia. (TaiAre. 1:​1-3) Ti a kona ngkanne ni maiuakina raoi te wanawana are iai ae teimatoa ni manena. Ngkana ti wareka Ana Taeka te Atua are boreetiaki ke are n ara tareboon ke ara tablet, tiara bwa ti na kariaia ana taeka te Atua bwa e na rotii nanora.

⁶ Ti na kangaa ni kananoi ara iango n te aro ae uaana? A bati aika noria bwa e ibuobuoki te motirawa teutana imwini warekan te kibu, ao iangoan titiraki n  aron aikai: ‘Tera ae kaotaki n aei ibukin Iehova? Itera raa ake I a kamani maiuakina iai te boto n reirei n te kibu aei? Itera raa ake I kona ni kanakoraoi riki?’ Ngkana ti tataro ao ni kananoa ara iango n Ana Taeka te Atua, ti kairaki iai bwa ti na kani maiuakin riki reirei ni kairiri ake iai. Ao ti a kona riki iai n namakina mwaakan te Baibara i nanoni maiura.​—2Kor. 10:​4, 5.

7. Ti na kangaa ni kamanena raoi Ana Taeka te Atua n ara mwakuri ni minita?

⁷ Tera ae kona ni buokira ni kamanena raoi Ana Taeka te Atua n ara mwakuri ni minita? Te moan, boni kabonganaana n taai nako ngkana ti uarongorongo ke ti angareirei. E kabwarabwaraa n aron aei te tari te mwaane temanna, “Ngkana ko uarongorongo man te auti teuana ma teuana ao ko toa ma Iehova, ko na tii tataetae ke ko na anganna naba ana tai?” Te bwai ae e nanonna bwa ngkana ti wareka Ana Taeka te Atua n ara mwakuri ni minita, ti a angan iai Iehova ana tai n taetae ma kaain te auti. E na bae n ringa riki te nano kamanenaan te kibu ae ti a kamani katauraoia, nakoni baike ti na taekin. (1Tet. 2:13) Titirakiniko ni kangai, ‘I ukeri aanga nako ake I kona iai ni wareka te kibu nakoia naake I uarongorongo nakoia?’

8. E aera ngkai ti aki riai n tii wareki kiibu ngkana ti uarongorongo?

⁸ Ni koauana, e bati riki ae kainnanoaki nakon tii warekan te kibu nakoia naake ti maroro ma ngaiia. Bukin tera? Ibukina bwa a bati aika karako otaia n te Baibara ke bon akea. E riki naba anne n te moan tienture ao ai aron naba boong aikai. (IRom 10:2) Ngaia are ti aki riai n iangoia bwa e na ota te aomata n te kibu ngkana ti a tii warekia naba. Ti riai ni karekea ara tai ni katereterei baika kakawaki man te kibu, tao ni manga wareki ao ni kabwarabwarai nanoia. Karaoan aei e kona ni buokiia  naake a ongora bwa a na rotaki nanoia ao aia iango n te rongorongo man Ana Taeka te Atua.​—Wareka Ruka 24:32.

9. Ti na kangaa ni kauekea karinean te Baibara imwain taekinan te kibu? Taekina te katoto.

⁹ Ti wanawana naba ngkana ti kauekea karinean te Baibara imwain taekinan te kibu. N te katoto, ti kona ni kangai, “Ti na noria bwa tera ana taeka ara tia Karikiriki ibukin aei.” Ngkana ti maroro ma te aomata ae tiaki te Kristian, ti kona ni kangai, “Nora te bae taekinaki n te Koroboki ae Tabu.” Ke ngkana ti uarongorongo ma te aomata ae akea irekerekena ma te Aro, ti kona ni kangai, “Ko a tia n ongongo te taeka n rabakau mangkoa aei?” Eng, ti mwannanoiia aomata n tatabemania nako, ao ti kaangaraoi ara maroro nakoia.​—1Kor. 9:​22, 23.

10. (a) Taekina rongorongon te tari temanna. (b) Tera ae ko a tia n nora iai mwaakan Ana Taeka te Atua n am mwakuri ni minita?

¹⁰ A bati aika noria bwa kamanenaan Ana Taeka te Atua n te mwakuri ni minita, e kona n rangi n rotii nanoia naake a uarongorongo nakoia. Iangoa te katoto teuana. Iai te tari te mwaane ae okira te unimwaane temanna ae wawareki ara maekatin i nanon ririki aika bati. N oneani mwin ae e tii anga Te Taua-n-Tantani ae boou, e iangoia te tari aei bwa e na wareka te kibu teuana man te maekatin. E wareka 2 I-Korinto 1:​3, 4, ae kangai: “Te Tama ae nananoanga ao te Atua ae anga te kabebetenano n aekana nako . . . e kabebeteira ni kataakira nako.” E rangi n rotaki teuare kaain te auti n taeka aikai, ao e butiia te tari aei bwa e na warekia riki. E taekinna teuaei bwa e rangi ni kainnanoa kabebeteana ma buuna, ao e a kan ongora ngkai n te rongorongo man te Baibara. Ko aki kakoauaa ngkanne ae e mwaaka Ana Taeka te Atua n ara mwakuri ni minita?​—Mwa. 19:20.

11. Tera mwiokoaia taari mwaane ake a angareirei mai moa?

¹¹ Ti bane ni kukurei ni kaakaei ara bobotaki nako ma ara runga ao ara bwabwaro. Bukin rokora ae kakawaki bwa ti na taromauria Iehova. Ti karekei naba kakabwaia aika bati man reirei ake ti anganaki. A kukurei taari mwaane n tibwangaia ae kakawaki ae te angareirei mai moa ni bobotaki aikai. Ma a riai naba n ataia ae bon te mwioko ae rangi ni kakawaki. (Iak. 3:1) A riai n taraia raoi n taai nako bwa e na boto aia angareirei i aon Ana Taeka te Atua. Ngkana ko mwiokoaki bwa ko na angareirei mai moa, ko na kangaa ni kabongana mwaakan ana taeka te Atua bwa e na ringi nanoia taan ongora?

12. E na kangaa n taraia raoi te tia kabwarabwara bwa e na boboto riki ana kabwarabwara i aon te Baibara?

¹² Taraia raoi bwa e na boboto riki am kabwarabwara i aon te Baibara. (Ioa. 7:16) Tera ae irekereke ma anne? Taratara raoi bwa a na aki katikakinako aia iango aomata mani kiibu ake ko kabonganai, n am rongorongo, am kaikonaki, ke arom ni kabwarabwara. Uringnga naba are ngkana ko tii wareki kiibu tiaki nanona bwa ko a angareirei iai man te Baibara. Ni koauana, ngkana ko kamanenai kiibu aika rangi ni bati, a kona n aki uringi taan ongora. Ngaia are rinei raoi am kibu aika kakawaki ao karekea am tai ni wareki, kabwarabwarai, taekina te kaikonaki iai, ao kairekerekei raoi ma am maroro. (Neem. 8:8) Ngkana ko anganaki te kabwarabwara ae ko na iria are katauraoaki man ana botaki Iehova, kamatebwaia raoi kanoana ma kiibu ake iai. Karekea otam bwa tera irekerekeni kanoana ma kiibu ake a kaotaki. Ao kamanenai tabeua mai buakoni kiibu akanne n angareirei iai i aoni baika kakawaki ake a oti n te kabwarabwara anne. (Ko kona n nori aanga aika manena  n reirei 21 nakon 23 n te boki ae Benefit From Theocratic Ministry School Education.) Ao ae kakawaki riki, tataro ni butiia Iehova buokam bwa ko na taekin reirei aika rangi ni kakawaki aika mena n ana Taeka.​—Wareka Etira 7:10; Taeka N Rabakau 3:​13, 14.

13. (a) E kangaa n ringaki nanon te tari te aine temanna ni kabonganaani kiibu ni bobotaki ni Kristian? (b) Ko kangaa ni kakabwaiaaki n te angareirei man te Baibara n ara bobotaki?

¹³ E rangi n ringaki nanon te tari te aine temanna i Aotiteria n aroni kabonganaani kiibu n taini bobotaki ni Kristian. A bati kangaanga aika riki nakoina n ana tai n ikawairake, ma e ngae n anne e butimwaea te rongorongo man te Baibara ao e katabua maiuna nakon Iehova. Ma e noria bwa e kangaanga irouna kakoauaan ae e tangiraki iroun Iehova. Ma imwina riki, e a kakoauaa ae e bon tangiria te Atua. Tera ae buokaki iai? E reke bitakina ngke e kananoa ana iango i aon te kibu teuana ae kabonganaaki n tain ara botaki, ao e a manga kairekerekea ma kiibu tabeua. * Ko a tia naba n rotaki n aron anne n aroni kabonganaan Ana Taeka te Atua n taini bobotaki, ruunga, ao bwabwaro?​—Neem. 8:12.

14. Ti na kangaa ni kaota ara kakaitau ibukin Ana Taeka Iehova?

¹⁴ Tiaki bwa ti kakaitau nakon Iehova ibukin ana Taeka ae koreaki ae te Baibara? E aki tii tatangira ni katauraoia ibukia aomata, ma e kakoroa naba bukin ana berita are e na teimatoa. (1Bet. 1:​24, 25) Ni koauana, ti wanawana ngkana ti katoatai ni wareka Ana Taeka te Atua, ti maiuakinna, ao ti kabongana ni buokiia iai tabemwaang. Ti kaota iai ngkanne ara tangira ao ara kakaitau tiaki tii ibukin te bwai ae rangi ni kakawaki aei, ma ai moarara riki nakon te tia Koreia ae Iehova ae te Atua.