1. Ni kaineti ma Mataio 11:​28-30, tera te berita are e taekinna Iesu?

E TAEKINA te berita ae raoiroi Iesu nakoia aomata aika bati ake a ongora irouna. E taku: “Nakomai nakoiu . . . ao N na motiki rawami.” (Wareka Mataio 11:​28-30.) Bon tiaki te berita ae akea nanona. N te katoto, iangoa te baere e karaoia nakon te aine ae karawawataaki n te aoraki ae kamwara.

2. Tera ae e karaoia Iesu nakon te aine ae aoraki?

² E rangi ni kainnanoa buokana te aine aei. E a tia ni kawariia taokita aika bati, ma kantaningaan ae e na marurung. Imwin 12 te ririki ma aorakina aei, e bon tuai naba mani marurung. E boni kamwara neiei i aan te Tua. (NakIbo. 15:25) Ma e ongo taekan Iesu bwa e kona ni kamarurungia aoraki, ngaia are e a nako ni kakaaea. Ngke e reke irouna, e ringa buruburun ana kauaatao ao e a rina naba ni marurung! Ma e aki tii kamarurunga neiei Iesu, ma e karekea naba irouna namakinan ae e tangiraki ao e karineaki. N te katoto, ngke e kataetaea neiei, e kabongana te taeka ae “natiu” ae kaota te tangira ao te karinerine. E bon namakina neiei te kabebeteaki ao te kakorakoraaki!​—Ruka 8:​43-48.

3. Baikara titiraki aika ti na kaekai?

³ Noria bwa bon neiei ae nakon Iesu. E aki taningaa kawarana. Ai arora naba ni boong aikai, ti riai n ‘nakon’ Iesu. E a aki kona ngkai Iesu ni kamarurungia n te kakai naake a ‘nakoina.’ Ma e bon teimatoa ana kakao are kangai: “Nakomai nakoiu . . . ao N na motiki rawami.” N te kaongora aei,  ti na kaekai titiraki aika nimaua aikai: Ti na kangaa n ‘nakon’ Iesu? Tera ae e nanonna Iesu ngke e kangai: “Amoa amou i aomi”? Tera reireiara mairoun Iesu? E aera ngkai ti kabebeteaki n te mwakuri ae e anganira? Ao ti na kangaa n teimatoa ni karekea kabebeteara i aan amon Iesu?

4-5. Baikara aanga tabeua ake ti kona iai n ‘nakon’ Iesu?

⁴ Te anga teuana ae ti ‘nakon’ iai Iesu, boni man reiakinani baike e taekin ao ni karaoi n aron ara konaa. (Ruka 1:​1-4) Akea ae e kona ni karaoa aei ibukira, boni ngaira ae ti riai n reiakin rongorongo aikai. Ti bon ‘nakon’ naba Iesu ngkana ti motinnanoia bwa ti na bwabetitoaki ao n riki bwa te tia rimwini Kristo.

⁵ Te anga riki teuana ae ti ‘nakon’ iai Iesu, boni mani kawaraia unimwaane n te ekaretia ngkana ti kainnanoa buokara. E kabonganaia Iesu “mwaane ake a a riki bwa bwaai n tituaraoi” aikai bwa a na kawakinia ana tiibu. (IEbe. 4:​7, 8, 11; Ioa. 21:16; 1Bet. 5:​1-3) Boni ngaira ae ti riai ni biririmoa ni bubutii buokara mairouia. Ti aki kona ni kantaningaia unimwaane bwa a na atai baika ti iangoi ao baika ti kainnanoi. Iangoa ana taeka te tari te mwaane ae Julian: “I a riai ni kitana mwiokoau n te Betaera ibukin te aoraki, ma e tuangai raoraou temanna bwa N na bubutiia unimwaane bwa a na kawarai ni kaungaai. N te moantai I taku bwa I aki kainnanoia. Ma imwina riki I a bubutii buokau, ao kawarau anne bon teuana mai buakoni bwaintangira aika taiani kabanea n tamaroa aika reke irou.” A kona unimwaane aika kakaonimaki n aroia naake uoman ake a kawara Julian, ni buokira n ataa “ana iango Kristo” ke n ota n ana iango ao aroarona ao ni kakairi irouna. (1Kor. 2:16; 1Bet. 2:21) Anne bon teuana i buakoni bwaintangira aika taiani kabanea n tamaroa aika a kona n anganira.

6. Tera ae e nanonna Iesu ngke e kangai: “Amoa amou i aomi”?

⁶ Ngke e kangai Iesu: “Amoa amou i aomi,” e boni bae n nanona, “Butimwaea mwaakau ni kairiri.” E kona naba n nanona aei, “Uataboa te amo ma ngai ao ti na uaia ni beku ibukin Iehova.” A irekereke kabwarabwaraana akanne ma te mwakuri.

7. Ni kaineti ma Mataio 28:​18-20, tera te mwakuri ae ti mwiokoaki iai, ao tera ae ti aki nanououa iai?

⁷ Ti butimwaea ana kakao Iesu ngkana ti katabui maiura nakon Iehova ao ni bwabetitoaki. E uki te kakao anne nakoia aomata nako. E aki kona Iesu ni katinanikua ane e boni kan toro raoi iroun te Atua. (Ioa. 6:​37, 38) A kakabwaiaaki taan rimwini Kristo ni kabane ake a mwiokoaki n uataboa te mwakuri are e mwiokoaki iai Iesu iroun Iehova. Ti aki nanououa bwa e na bon tauraoi n taai nako Iesu ni buokira ni karaoan te mwakuri anne.​—Wareka Mataio 28:​18-20.

8-9. E aera bwa a anaaki nanoia aika nanorinano iroun Iesu, ao baikara titiraki ake ti na titirakinira iai?

⁸ A anaaki nanoia aomata aika nanorinano iroun Iesu. (Mat. 19:​13, 14; Ruka 7:​37, 38) Bukin tera? Iangoa te kaokoro i marenan Iesu ma Baritaio. A aki tatangira mataniwi n te Aro aikai ao a kainikatonga. (Mat. 12:​9-14) E tatangira Iesu ao e nanorinano. A kani kakannato Baritaio ao a kamoamoa ibukin rietatan nakoaia. E aki kaungaa Iesu te kani kakannato, ao e reireinia taan rimwina bwa a  na iangoiia bwa tooro aika mangori. (Mat. 23:​2, 6-11) A taui aroia aomata Baritaio ni kakamaakuia. (Ioa. 9:​13, 22) E kabebeteia aomata Iesu n ana mwakuri n tatangira ao n ana taeka aika kaotiota te akoi.

⁹ E reke reireiam mairoun Iesu? Titirakiniko ni kangai: ‘I kinaaki bwa te aomata ae I nimamannei ao I nanorinano? I kukurei ni karaoi mwakuri aika mangori ibukia tabemwaang? I akoiia aomata?’

12-14. E aera ngkai ti kabebeteaki n te mwakuri ae e anganira Iesu?

¹² E aera bwa ti kabebeteaki n te mwakuri ae e anganira Iesu? A bati bukina, ma ti na rinanoi tabeua mai iai.

¹³ Bon iai ara mataniwi aika taiani kabanea n tamaroa. E aki bangaomata ke ni kairimatoa Iehova ae ara Mataniwi ae Moan te Rietata. E kakaitau n te mwakuri ae ti karaoia. (Ebera 6:10) Ao e anganira te korakora ae ti kainnanoia ibukini karaoan uotara ae tabera. (2Kor. 4:7; IKar. 6:​5, kbn.) E katea te katoto Iesu ae ara Uea ni kaineti ma arora nakoia tabemwaang. (Ioa. 13:15) Ao unimwaane ake taani kawakinira a kataia ni katotonga Iesu ae “te tia kawakintiibu ae kakannato.” (Ebera 13:20; 1Bet. 5:2) A kakorakoraia ni bwaina te akoi, te ikaungaunga, ao te ninikoria, ngkai a tabeakinira ao ni kamanoira.

¹⁴ Bon iai raoraora aika taiani kabanea n tamaroa. Bon akea aika karaoa te mwakuri ae manena ke ni kabaeaki n te tangira n ai arora. Iangoa aei: Ti kakabwaiaaki ni mwakuri ma aomata aika rangi n raoiroi aroaroia, ma a aki iangoia bwa a raoiroi riki nakoia tabemwaang. E bati aia konabwai ma a nanorinano, ao a iangoiia tabemwaang bwa a kakannato riki nakoia. A aki tii iangoira bwa raoia ni mwakuri, ma a iangoira naba bwa raoraoia. Ao e rangi ni kaan te reitaki anne n te aro are a tauraoi naba n anga maiuia ibukira!

15. Tera te namakin ae riai n reke iroura ibukin te mwakuri ae ti karaoia?

¹⁵ Bon te kabanea n tamaroa ara mwakuri. Ti reireinia aomata te koaua ibukin Iehova ao ti kaotaraei ana kewe te Riaboro. (Ioa. 8:44) E karawawataia aomata Tatan n uota aika rawawata. N te katoto, e tangirira bwa ti na kakoauaa ae e na aki kabwarai ara bure Iehova ao ti aki tau n tangiraki. Bon te uota ae karawawata anne ao te kewe ae buakaka! Ngkana ti ‘nakoni’ Kristo, a a kabwaraaki ara bure. Ao ni koauana, e rangi n tangirira ni kabane Iehova. (IRom 8:​32, 38, 39) Ai kakimwareireira reiakinaia aomata bwa a na onimakina Iehova, ao norakin ae e a nakoraoi riki maiuia!

16. A kangaa ni kaokoro uota ake tabeua ma te uota are e tuangira Iesu bwa ti na uotia?

¹⁶ E kaokoro te uota ae e tuangira Iesu bwa ti na uotia ni kabotauaki ma uota ake tabeua. N te katoto, n tokin te bong imwin te mwakuri ni kareketianti, a bati aika namakina te kua ao te aki kukurei. Ni kaitaraan anne, ti namakina te raunnano ae bati ngkana ti kabanea ara tai ni beku ibukin Iehova ao Kristo. Ti kona ni kua imwin ara mwakuri ni kareketianti ao ti a riai ni kairoroira bwa ti na kaea te taromauri n te tairiki anne. Ma n angiin te tai ngkana ti oki man te taromauri, ti kabebeteaki ao ni kakorakoraaki. Tii te arona anne ma ara kakorakora n uarongorongo ao karaoan ara ukeuke n reirei n te Baibara i bon iroura. Ngkana ti karaoia, e a rianako riki kakabwaiaara ni kabotauaki ma ara kakorakora iai!

17. Tera ae ti riai n ataia ao n taratara raoi iai?

¹⁷ Ma ti riai n ataia ae iai tiani korakorara n tatabemanira nako. Ngaia are ti riai n taratara raoi ma uotara are ti uotia. N te katoto, ti kona ni bakataea korakorara ibukini kaikoan ara bwai. Nora ana taeka Iesu nakon te rorobuaka n ataei are kaubwai are e titiraki ni kangai: “Tera ae I riai ni karaoia bwa e aonga n reke irou te maiu are aki toki?” E a kaman ongeaba teuaei n te Tua ao e boni bae n ae te mwaane ae raoiroi ngaia, bwa e taekinaki n ana Euangkerio Mareko bwa Iesu “e namakina tangirana.” E anga te kakao Iesu nakon te mwaane aei ni kangai: “Naako kaboonakoi am bwai . . . ao nakomai riiki bwa te tia rimwiu.” E a tikimaurekaki ana iango teuaei, ma e taraa n ae e aki kona ni kanakoi ‘ana bwai aika bati.’ (Mareko 10:​17-22) Ibukin anne, e rawa ni butimwaea te amo are e anganna Iesu ao e teimatoa n toronaki iroun “te Kaubwai.” (Mat. 6:24) Ngke arona bwa ngkoe, tera ae ko na rineia?

18. Tera ae ti riai ni katoatai ni karaoia, ao bukin tera?

¹⁸ Ti riai ni katoatai n tuoi baika ti moanibwai ni maiura. Bukin tera? Bwa ti aonga ni koaua raoi bwa ti kamanena korakorara n te aro ae riai. Iangoa ana taeka te rorobuaka n ataei ae Mark: “I iangoia i nanon ririki aika bati bwa I kabebetea maiuu. I bwaiania ma e bati au tai ni karekemwane bwa I aonga ni mwengaraoi riki. I iaiangoia bwa e aera ngkai e rawawata maiuu. Ao I a ataia ae I bon ukoukori riki baike I tangiri ao I angan Iehova nikirani korakorau ao au tai.” E bita ana iango Mark ao aroni maiuna bwa e aonga ni kabatiaa riki ana tai ni beku ibukin Iehova. E taku: “I raraoma n tabetai, ma I tokanikai i aon au kangaanga man ana ibuobuoki Iehova ao Iesu.”

19. E aera bwa e rangi ni kakawaki bwainan te iango ae riai?

¹⁹ Ti na teimatoa ni karekea kabebeteara i aan amon Iesu ngkana ti karaoi baika tenua. Te moan, kateimatoa te iango ae riai. Ti karaoa ana mwakuri Iehova, ngaia are ti bon riai ni karaoia n aron ae boraoi ma nanona. Boni ngaira taani mwakuri ao Iehova bon ara Toka. (Ruka 17:10) Ngkana ti kataia ni karaoa ana mwakuri n aron ae ti taku, ti na boni karawawataaki i aan te amo. E na boni kaikoakia ao ni kakuaa i bon irouna te kao mwaane ae korakora ngkana e teimatoa n uota oini kawaina ni kaitaraa te amo are bweenaki iroun ana toka. N te itera are teuana, ngkana ti ongeaba i aan ana kairiri Iehova ti kona ni karaoi baika ti taku bwa ti aki kona ni karaoi ao n tokanikai i aoni kangaanga. Uringnga are bon akea ae e kona n tuka kakororaoan nanona!​—IRom 8:31; 1Ioa. 4:4.

20. Tera bukina ae riai ngkai ti amoa amon Iesu?

 ²⁰ Te kauoua, karaoa te mwakuri ma te nano ae riai. Tiara bwa ti na karekea neboan Tamara ae tatangira ae Iehova. Aomata ake n te moan tienture ake a karaoa te mwakuri ibukin te nanonrang ke karekean aroia, a waekoa n aki kukurei ao a a nako mai aan amon Iesu. (Ioa. 6:​25-27, 51, 60, 66; IBir. 3:​18, 19) Ni kaitaraan anne, naake a kairaki n tangiran raoi te Atua ao raoia n aomata, a kukurei n uota te amo anne i nanoni maiuia ni kabane i aon te aba, ma kantaningaan te beku ma Kristo i karawa. Ti na bon teimatoa ni kukurei n aroia ngkana ti amoa amon Iesu ma te nano ae riai.

21. Ni kaineti ma Mataio 6:​31-33, tera ae ti kona ni kantaningaia mairoun Iehova?

²¹ Te katenua, kantaningaia bwa e na boni buokiko Iehova. Ti a tia n rinea te maiu ae ti na kakeaira iai ao ni mwakuri korakora. E anga te kauring nakoira Iesu bwa ti na boni bwainikirinaki. Ma ti kona ni kantaningaia bwa e na anganira te korakora Iehova bwa ti aonga n nanomwaaka i aani kangaanga. Ngkana ti teimatoa n nanomwaaka, ti na korakora riki. (Iak. 1:​2-4) Ti kona ni kantaningaia bwa e na katauraoi baika ti kainnanoi Iehova, e na kawakinira Iesu, ao a na kaungaira raora n te onimaki. (Wareka Mataio 6:​31-33; Ioa. 10:14; 1Tet. 5:11) A tauraoi baika ti kainnanoi bwa ti aonga n nanomwaaka i aani kangaanga.

22. Tera ae ti kona ni kakaitau iai?

²² E kabebeteaki te aine are e kamarurungnga Iesu n te bong are e marurung iai. Ma e tii kona ni karekea te kabebeteaki ae teimatoa ngkana e riki bwa te tia rimwini Kristo ae kakaonimaki. N am iango tera ae e karaoia neiei? Ngkana e rineia bwa e na amoa amon Iesu, iangoa kaniwangana ae te beku ma Iesu i karawa! E na bon rianako riki kakabwaiaana anne ni kabotauaki ma baike e kakeaa iai bwa e aonga n ririmwin Kristo. N aki ongeia bwa ti kantaningaa te maiu n aki toki i karawa ke i aon te aba, ma ai kakaitaura ngaira ngkai ti a tia ni butimwaea ana kakao Iesu aei: “Nakomai nakoiu!”