A tei ibukin te taanga ni buaka ake i karawa ake a buoka kamaunaan Ierutarem ngkoa, ao a na ibuobuoki naba ni kamaunaan ana waaki Tatan ae buakaka ae ngkai n Aremaketon. E aera ngkai e riai te bitaki n te ota aei?

Ngke e tia n nori baika bubuaka Etekiera ake a karaoaki i Ierutarem ae te kaawa ae a tannako man te koaua kaaina imwaini kamaunaana n 607 B.C.E., ao e a anganaki te miitara ae taekani baika a na riki imwaini kamaunaan te kaawa anne. E noriia mwaane aika onoman ma aia kai n oro. E nora naba te mwaane temanna i buakoia ae “kunnikainna n te rinen,” ao iai irouna “nnen ana ingke te tia koroboki.” (Etek. 8:6-12; 9:2, 3) E tuangaki teuaei ni kangai: “Naako rinanon te kaawa, . . . ao kanikinaei ramwaia aomata aika ikenrawa ma ni ngirangira ibukini baika riribaaki ni kabane, aika karaoaki n te kaawa.” Imwina ao a tuangaki mwaane ake iai aia kai n oro, bwa a na kamateia aomata ni kabane n te kaawa ake akea te kanikina irouia. (Etek. 9:4-7) Tera reireiara n te miitara aei, ao antai te mwaane are iai irouna nnen ana ingke te tia koroboki?

E taekinaki te taetae ni burabeti aei n 612 B.C.E., ao moani kakoroani bukina e kaineti ma kamaunaan Ierutarem iroun te taanga ni buaka mai Baburon, ae te bwai ae riki tii nimaua te ririki imwina. E ngae ngke a kariaiakaki kaaini Baburon aika beekan bwa a na karokoa te kamaunaaki aei, ma a a riki bwa ana tia karekekai Iehova. (Ier. 25:9, 15-18) E riki aei ibukina bwa e kabonganaia Iehova bwa a na katuuaaeia ana aomata aika tannako man te koaua. Ma e baireaki raoi aron te kamaunaaki aei. A aki kamaunaaki ake a raoiroi i rarikia ake a buakaka. E tatangira Iehova ni karekea angani kamaiuaia I-Iutaia ake a aki kukurei ni baika riribaaki ake a karaoaki n te kaawa.

E aki buoka kanikinaeaia aomata Etekiera ke kamaunaaia. Ma e karokoaki te motikitaeka irouia anera. Ngaia are rinanon te taetae ni burabeti aei, ai aron ae ti a kona iai n nora te bwai ae riki i karawa ae aki noraki. E mwiokoiia anera Iehova bwa a na aki tii bairea kamaunaaia ake a buakaka, ma kaokoroaia naba ake a raoiroi bwa a aonga ni kamaiuaki. *

N taai aika nako ao ti kabwarabwaraa bwa kakoroani bukin te miitara aei n taai aikai, are te mwaane ma nnen ana ingke te tia koroboki, e bon tei ibukia nikiraia taani kabiraki. E iangoaki bwa naake a butimwaea te rongorongo ae tataekinaki, a a kanikinaeaki ngkai ibukin te kamaiuaki. Ma n ririki aika tibwa nako, e a mataata bwa e riai ni bitaki te kabwarabwara aei. N aron ae taekinaki ni Mataio 25:31-33, bon Iesu ae motiki taekaia aomata. E karaoa ana kabanea ni motikitaeka n tain te rawawata ae korakora, ni kaokoroia aomata aika ai aroia tiibu ake a na kamaiuaki, mairouia aomata aika ai aroia kooti ake a na kamaunaaki.

Ngaia are ni kaineti ma te ota ae bitaki aei, tera reireiara n ana miitara Etekiera? Iai nimaua reireiara:

1.  Imwaini kamaunaan Ierutarem ao e beku Etekiera bwa te tia tantani ma Ieremia ao Taniera, n aron are e karaoia Itaia mai mwaina. Ni boong aikai, e kabongana Iehova te kurubu ae uarereke ae kaainaki irouia ana toro aika kabiraki bwa a na kaamwarakeia ana aomata, ao n anga te kauring nakoia tabemwaang imwain rokon te rawawata ae korakora. Ngaia are a na bane ana tabonibai Kristo n uataboa katanoataan te kauring aei.​—Mat. 24:45-47.

2.  E aki irekereke Etekiera ma kanikinaeia naake a na kamaiuaki, ao ai aroia naba ana aomata te Atua ni boong aikai. A tii kaota ana rongorongo  Iehova, ae iteran naba aia mwakuri n uarongorongo ae a karaoia i aan aia kairiri anera.​—TeKao. 14:6.

3.  N ana bong Etekiera, akea ae e boni kanikinaeaki raoi ramwana. Ai arona naba ni boong aikai. Tera ae a riai ni karaoia aomata bwa a aonga ni kanikinaeaki n te aro ni kaikonaki ibukin te kamaiuaki? A riai ni butimwaea te mwakuri n uarongorongo ae karaoaki, a na karina te aroaro ni Kristian, a na katabui maiuia nakon Iehova, ao ni kakaonimaki ni koaua ni boutokaiia tarini Kristo. (Mat. 25:35-40) Naake a karaoi baikai, a na boni kanikinaeaki ibukin te kamaiuaki n rokon te rawawata ae korakora.

4.  Ni kaineti ma kakoroani bukina ni boong aikai, te mwaane are iai irouna nnen ana ingke te tia koroboki e tei ibukin Iesu Kristo ae e na kanikinaeia naake a na kamaiuaki. A na kanikinaeaki te koraki ae uanao ngkana a motikaki taekaia bwa tiibu n tain te rawawata ae korakora. Aei are a a kona iai ni karekea te maiu are aki toki i aon te aba.​—Mat. 25:34, 46. *

5.  Ni kaineti ma kakoroani bukina ni boong aikai, mwaane ake onoman ma aia kai n oro, a tei ibukin ana taanga ni buaka Iesu ake i karawa ao boni ngaia aia tia kairiri. A na waekoa ni kamaunaia natannaomata ma te buakaka ni kabane.​—Etek. 9:2, 6, 7; TeKao. 19:11-21.

Otara n reirei aika kakawaki aikai e kamatoaa ara koaua ae e aki kona Iehova ni kamaunaia aika raoiroi i rarikia aika buakaka. (2Bet. 2:9; 3:9) Ti kauringaki naba iai kakawakin ara mwakuri n uarongorongo n ara bong aikai. A riai ni bane aomata n ongo te kauring imwain rokon te toki!​—Mat. 24:14.