N 1970, a kunea taani kakaae i aantano te nira ni boki teuana ae e a tia ni bue i Ein Gedi i Iteraera, i rarikini mataniwin Taari are Mate mai maeao. A kunea te nira ni boki anne ngke a kena te tinakoka are kabuekaki n tain uruakan te kaawa, tao n te ka-onoua n tienture C.E. E kuri kangaanga kabwaranakoan te nira ni boki anne ao e a aki kona ni warekaki n aron teina anne. Ma e kakukurei bwa e kabonganaaki te bwai n rawerawe teuana ae kona ni karaoa taamnein nanon te nira ni boki anne, ike e a “kabwaranakoaki” iai. E kammwakuraki te taamnei aei i aon te kaombiuta ao e a kona ni warekaki kanoan te nira ni boki anne.

Tera ae oti n te taamnei anne? Boni kanoan te Baibara. A koreaki iai kiibu tabeua ake ni moani mwakoron te boki ae Nakoaia Ibonga. Iai naba aran te Atua n te taetae n Ebera ae te Tetragrammaton. N taraana, te nira ni boki aei e koreaki i marenan te moan ao te kaaua n tienture C.E., are e a iangoaki iai bwa bon te kabanea ni mane n nira ni boki n te Baibara n Ebera ae kuneaki ni moa man te tai are a kuneaki iai koroboki nikawai i Qumran. E taekinna Gil Zohar n te nuutibeeba ae The Jerusalem Post bwa imwaini kunean te nira ni boki ae mwakoron Nakoaia Ibonga i Ein Gedi, tao 1,000 tabun te ririki marangan te tai are a koreaki iai taiani kabanea ni mane ni koroboki n te Baibara ae te Nira ni Boki Man Taari ae Mate (ae tao man 100 B.C.E.) ao te Aleppo Codex (ae tao man 930 C.E.). Irouia taan rabakau, e kaotaki n te nira ni boki ae kabwaranakoaki aei bwa kanoan te boki ae te Torah ae koreaki irouia taian Masorite e “aki bitaki mangke e koreaki tenga te ririki n nako, ao a aki burebureaki kanoana irouia taani kaewewe.”