E aki taekinaki n te Baibara. Ma e oti rongorongo tabeua aika kakaongora aika kona ni kaota bukina ngkai a karaoa aia motinnano anne.

E tuanga Maria te anera bwa e na bikoukou ao e na bungia natina. Ngke e karokoa te rongorongo aei te anera ao a maeka Maria ao Ioteba i Natareta, ae ana kaawa Ioteba i Kariraia. (Ruka 1:26-31; 2:4) Imwina riki ngke a oki mai Aikubita, ao a okira Natareta. E ikawairake Iesu ikanne ao e a riki bwa te I-Natareta. (Mat. 2:19-23) Anne bukina ngkai ti iaiangoa Natareta ngkana ti taekina Iesu, Ioteba ao Maria.

Iai ana koraki Maria ae arana Eritabeta ae maeka i Iuta. Boni buun te ibonga ae Tekaria ao tinan Ioane te tia Bwabetito. (Ruka 1:5, 9, 13, 36) E kawara Eritabeta Maria ao n tiku i rarikina tenua te namwakaina i Iuta. Imwina ao Maria e a okira Natareta. (Ruka 1:39, 40, 56) Ngaia are e bae Maria n ataa teutana aonon Iuta.

Imwina riki ao e a karaoa nanon te tua Ioteba are “a na karin araia.” Ngaia are e mwananga Ioteba mai Natareta nako Betereem, are “ana kaawa Tawita” ao te tabo are e taetae ni burabetinaki bwa e na bungiaki iai te Mesia. (Ruka 2:3, 4; 1Tam. 17:15; 20:6; Mika 5:2) Imwini bungiakin Iesu ikekei, ao e aki tangiria Ioteba ni kaira Maria n te mwananga ae abwabwaki n okira Natareta ma natina ae e a tibwa bungiaki. A tiku i Betereem, ae tao ruaiwa te kiromita (tao 6 te maire) mai Ierutarem. Ngaia are e a angaraoi irouia bwa a na kaira natiia nakon te tembora ao n anga te karea ae riai ni kaineti ma te Tua.—NakIbo. 12:2, 6-8; Ruka 2:22-24.

E tuangaki Maria mai mwaina iroun ana anera te Atua ae e na anganaki natina te mwaane “ana kaintokanuea tamana are Tawita” ao e na “tautaeka bwa te Uea.” Tao a bae n ota Ioteba ao Maria ni kakawakin ae e riai ni bungiaki Iesu n ana kaawa Tawita. (Ruka 1:32, 33; 2:11, 17) Tao a bae n iangoia ae e raoiroi ngkana a tiku ikanne ao n tataningaa te tai are a ataa iai te bae e tangiria te Atua bwa a na karaoia imwina.

Ti aki ataia bwa ai maanra ngaiia n tiku i Betereem ngke a a roko taani kaiwan itoi. Ma n te tai anne, ao a mena n te auti ma “te teei,” ma tiaki te merimeri, ae bon taekan natiia te mwaane. (Mat. 2:11) Taraan ae a tiku ni maan teutana i Betereem n oneani mwin are a na okira Natareta.

E tua Erote “kamateaia ataei aika mwaane ni kabane i Betereem . . . ake kaka uoua aia ririki rikaaki.” (Mat. 2:16) Ngke e roko ana kauring te Atua ibukin te tua aei ao a a birinako Ioteba ao Maria nako Aikubita ma Iesu, ao n tiku ikanne ni karokoa maten Erote. Imwina riki ao Ioteba e kairiia ana utu nako Natareta. E aera ngke a aki oki nako Betereem? E kararoaa natin Erote ae Arekerau are mena i Iuta ao ibukina naba bwa e ongeaba nakon ana kauring te Atua. Ni menaia i Natareta e kona Ioteba ni kaikawaa Iesu bwa te tia taromauria ni koaua te Atua.—Mat. 2:19-22; 13:55; Ruka 2:39, 52.

N taraana, e mate Ioteba imwaini maten Iesu ao imwaini kaukan te kawai nako karawa ibukia aomata. Ngaia are e na boni kautaki Ioteba nakon te aonnaba. A bati aika a na kaitiboo ma ngaia ao ni karekei riki rongorongo mairouna ibukin tikuna ma Maria i Betereem imwini bungiakin Iesu.