“A A RANGI ni bati uaa aika riai n taiaki ngkai, ma a karako taani mwakuri. Mangaia ae butiia Mataniwin te tai bwa e na kanakoia taani mwakuri nakon taiakin ana uaa.” (Ruka 10:2) Aikai ana taeka Iesu tao 2,000 te ririki n nako aika kaineti raoi ma te bwai ae riki ngkai i Myanmar. Bukin tera? Tii 4,200 tabun taan uarongorongo i Myanmar aika kabutaanako te rongorongo ae raoiroi i buakoia aomata aika 55 te mirion.

Ma e ngae n anne, e a tia “Mataniwin te tai” ae Iehova ni kaungai nanoia bubua ma bubua taari man aaba aika kakaokoro, ao a a roko n te aba aei i Maiakimainikun Atia ni buoka te mwakuri n tai. Tera ae kaungaia bwa a na kitan abaia? A kangaa ni buokaki bwa a na mwaing nakon te aba aei? Ao baikara kakabwaia aika karekei? Ti na noria.

Tabeua te ririki n nako ao te bwaiania ae Kazuhiro i Tiaban, e ituaki n te kaatikitiki ao e a aki namakinaaba, ike e a uotaki iai nakon te onnaoraki. E tuangaki iroun te taokita bwa e na aki kabutikaa i nanon uoua te ririki. E aki kukurei iai Kazuhiro. E taku i nanona: ‘N na kangaa n teimatoa ni karaoa te bwai ae I tangiria ae te bwaiania?’ E kakorakoraa n tataro ni bubutiia Iehova bwa e na karekea te anga ae e na teimatoa ni bwaiania iai.

E taku Kazuhiro: “Teuana te namwakaina imwina, e a ongo taekan aorakiu raoraou temanna ae beku i Myanmar. E tarebooniai ao e taku: ‘Te bao ni mwamwananga i Myanmar bon te bwati. Ngkana ko nakomai, ko kona ni waakina am mwakuri ni minita n akea kainnanoan te kaa!’ I tuanga au taokita ana iango bwa I kona ni mwananga nako Myanmar ma aorakiu aei ke I aki. I mimi n ana kaeka ae kangai: ‘E na kawara ngkai Tiaban te tia rabakau temanna i aon aorakin te kaburoro mai Myanmar. N na kairiko nakoina bwa e aonga ni kinako. Ngkana ko a manga kaatikitiki, e kona n tabeakiniko.’ I iangoa ana kaeka te taokita bwa bon ana kaeka Iehova.”

E a kanakoa ngkekei naba Kazuhiro ana reta nakon te aobiti n tararua i Myanmar ao e kaotia bwa e kani bwaiania ma buuna n te aba anne. Tii nimabong imwina ao e a roko ana kaeka te aobiti ae kangai, “Nakomai, ti kainnanoia riki bwaiania!” A kaboonakoi aia kaa Kazuhiro ma buuna ae Mari, a karekei aia beeba ni mwananga, ao a kabwakaa kantokaia n te wanikiba. Ni boong aikai, a a beku ma te kukurei n te kurubu ae kamanena te taetae n te bai i Mandalay. E taku Kazuhiro: “Ni mwaingira aio, e a kakorakoraaki  iai onimakinan ana berita te Atua n Taian Areru 37:5 ae kangai: ‘Angan Iehova arom, onimakinna ao e na karaoi bwaai ibukim.’”

N 2014, a kakabwaiaaki Ana Tia Kakoaua Iehova i Myanmar bwa a a kona ni karaoa aia bwabwaro ae okoro. A bati aika roko ni kaea man aaba aika kakaokoro. Temanna i buakoia bon te tari te aine man te United States ae Monique ae 34 ana ririki. E taku: “Ngke I oki man te bwabwaro, I tataro nakon Iehova ibukin te bwai ae I riai ni karaoia ni maiuu. I maroro naba ma au karo ibukin tiau ni kaineti ma te beku ibukin Iehova. Ti bane n iangoia bwa I riai n oki nako Myanmar, ma imwin te tai ae maan teutana ao tataroakinana ae bati, e a moti au babaire.” E kaota bukin rikin aei Monique.

“E kaungaia taan rimwina Iesu bwa a na ‘warebwaia te kabanemwane.’ Ngaia are I titirakinai ni kangai: ‘I kona ni kaitaraa te kabanemwane ngkana I mwaing? N na kona ni boutokaai n te aba anne ngkana e karako au tai ni mwakuri ni kareketianti?’” E taku neiei: “I waekoa n ataia ae e aki tau au mwane ibukini mwaingiu nakon te aba teuana.” Ma e kangaa n reke mwaingina?—Ruka 14:28.

E taku Monique: “N te bong teuana, e tua au tia kammwakuri bwa N na kawaria. E nako nanou bwa n au iango N nang kamotirawaaki. E aki riki anne ma e karabwaai ibukin au mwakuri ae raoiroi. Imwina e a tuangai ae e baireia bwa N na anganaki au boneti, ae mwaitin raoi au taarau are I riai ni kabwakaa!”

E a tia ni beku Monique i Myanmar man Ritembwa 2014. Tera ana iango ngkai te tia ibuobuoki ngaia n te tabo ae korakora riki iai kainnanoan te ibuobuoki? E taku: “I rangi ni kukurei n rokou ikai. I kairi reirei n te Baibara ma aomata aika teniman. Temanna i buakoia bon 67 ana ririki. E kakamaurai neiei ma te moangare ao n rabwatai. E tang ngke e a ataia ae Iehova aran te Atua. E taku te unnaine aei: ‘I a tibwa ongo ngkai ae Iehova aran te Atua. Ko uarereke riki nakoiu, ma ko reireinai te bwai ae moan te kakawaki ae I tuai n ataia mai mwaina.’ I rotaki n te kukurei ngaia are I a manga tang. N rikini bwaai aika aron aikai nakoiu, I a iangoa te beku n te tabo ae korakora iai kainnanoan te ibuobuoki bwa te maiu ae rangi ni kakukurei.” N taai aika tibwa nako, e a kakabwaiaaki Monique bwa e a kaea te Kuura Ibukia Taan Uarongorongoa te Tautaeka n Uea.

Te bwai ae a kaungaaki iai tabemwaang bwa a na nako Myanmar bon rongorongon te aba aei n te 2013 Yearbook of Jehovah’s Witnesses. E a kamani maeka i Maiakimainikun Atia te tari te aine ae Li ae 30 tabun ana ririki. E mwakuri ni kareketianti ni kabwanina ana tai, ma e kaungaaki n te rongorongo n te Yearbook bwa e na iangoa te beku i Myanmar. “N 2014 ngke I kaea te bwabwaro ae okoro i Yangon, I kaitiboo ma te taanga teuana ae a beku bwa taan ibuobuoki n aia aono I-Tiaina i Myanmar. Kioina ngkai I kamanena te taetae n Tiaina, I a motikia bwa N na mwaing nako Myanmar ni boutokaa te kurubu n Tiaina iai. I kaai ni mwakuri ma Monique, ao ti mwaing nako Mandalay. E kakabwaiaira Iehova bwa a reke ara mwakuri n tia reirei ake ti itera n tai iai n te reirei ae tii teuana, ao e reke ara auti ae uakaan. I kukurei ni beku ikai n aki ongea te kabuebue ma kangaanga riki tabeua. E bebete maiuia kaaini Myanmar, ma a ataa te katei ao a kukurei n ongora te rongorongo ae raoiroi. E rangi ni kakukurei noran aron Iehova ni kabaitiia te mwakuri. I kakoauaa raoi ae bon nanon Iehova bwa N na beku ikai i Mandalay.”

A bati taan ibuobuoki aika nora mwaakan te tataro. Iangoa Jumpei ae 37 ana ririki ma buuna ae Nei Nao ae 35 ana ririki. A beku n te ekaretia ae kamanena te taetae n te bai i Tiaban. E aera bwa a mwaing nako  Myanmar? E taku Jumpei: “Tiau ma buu bon te beku bwa taan ibuobuoki n te aba ae ianena. E mwaing nako Myanmar te tari te mwaane temanna man ara ekaretia ae kamanena te taetae n te bai i Tiaban. E ngae ngke e aki tau ara mwane ma ti boni mwaing naba ni Mei 2010. Ti butimwaeaki ma te tangira irouia taari i Myanmar!” Tera ana iango teuaei ibukin te aono ae kamanena te taetae n te bai i Myanmar? “A rangi ni bati aika kan ongora. Ngkana ti kaota te taamnei n te taetae n te bai, a rangi ni mimi kaain te auti aika bonotaninga. Ti rangi ni kukurei ngke ti motikia bwa ti na beku ibukin Iehova ikai!”

A kangaa Jumpei ma Nao ni kaaitarai aia kabanemwane? “Imwin tenua te ririki, e a raabane ara mwane ao e a aki tau ibukini boon ara auti ibukin te ririki are imwina. I kakorakoraai ma buu n tataro. E a karina naba n roko ara reta man te aobiti n tararua ike ti a kaoaki iai bwa ti na riki bwa bwaiania aika okoro i nanon tabeua te tai! Ti onimakina Iehova ao ti namakinna bwa e bon aki kitanira. E a tia n tabeakinira n aanga nako.” N taai aika tibwa nako, a kaea naba te Kuura Ibukia Taan Uarongorongoa te Tautaeka n Uea Jumpei ma Nao.

Tera ae e kaungaa Simone ae te tari te mwaane ae 43 ana ririki ae kaain Itare, ao buuna ae Anna ae 37 ana ririki ae kaain Nutiran, bwa a na mwaing nako Myanmar? E kaeka ni kangai Anna: “Bon rongorongon Myanmar n te 2013 Yearbook!” E taku Simone: “Bon te kakabwaia te mwaing nako Myanmar. E bebete riki te maiu ikai, ao I a kona ni kabanea au tai ae bati riki n ana mwakuri Iehova. E kakukurei namakinan ana mwamwannano Iehova nakoira ngkai ti beku n te tabo ae korakora riki iai kainnanoan te ibuobuoki.” (TaiAre. 121:5) E taku Anna: “I a kukurei riki ngkai. E a bebete maiura. E a bati riki au tai ma buu, ao ti a kaaniaki riki i marenara. A a reke naba raoraora aika boou aika ti tangiriia. A aki riribaiia taani Kakoaua kaain te aba, ao e rangi ni korakora te kan ongora!” N aaro raa?

E taku Anna: “N te bong teuana, I uarongorongo nakon temanna ataein te reirei ae rietata n te mwakete ao I boraraoi ma ngaia bwa N na okiria. Ngke I a okiria, e kaira raoraona temanna. N rokou are imwina, e a kairiia tabeman riki. Imwina, a a bati riki. I a reirei ngkai ma niman i buakoia.” E taku Simone: “A rangi n akoi aomata ao a kan atai baika bati. A bati aika kan ongora. E a aki tau ara tai ibukin te reirei ma ngaiia ni kabane.”

Ma baikara mwaneka aika kakawaki aika irekereke ma te motinnano ibukin te mwaing nako Myanmar? E taku Nei Mizuho mai Tiaban: “Ti a kamani kani beku ngai ma buu ae Sachio n te aba ae korakora riki iai kainnanoan te ibuobuoki, ma n te aba raa? Imwini warekan rongorongon Myanmar n te 2013 Yearbook, a rangi n ringaki nanora n rongorongo aika kaunganano, ngaia are ti a iangoia bwa ti kona n nako ni beku i Myanmar ke ti aki.” E reitia Sachio ni kangai: “Ti iangoia bwa ti na neweaba i nanon teuana te wiki  i Yangon, ae atuni kaawani Myanmar, n tuoa aona. Ti a kaungaaki ni mwanangara n tutuo ae kimototo aei bwa ti riai ni mwaing nako iai.”

A beku bwa taan ibuobuoki i Myanmar man 2010 Rodney ma buuna ae Nei Jane ae kaain Aotiteria aika 50 tabun aia ririki, ao natiia te mwaane ae Jordan ao natiia te aine ae Danica. E taku Rodney: “A rangi n anaaki nanora n noran ingaingaia aomata ni kan reiakina taekan te Atua. I rangi ni kani kaungaia utu riki tabeua bwa a na kataia ni beku n te aba ae titeboo ma Myanmar.” Bukin tera? “E rangi ni kakukurei noran ae ti a kaaniaki riki ma Iehova ni karaoan aei! A bati rooro n rikirake aika kabanei aia tai ma aia tareboon, aia kaa, aia mwakuri ni kareketianti, ao a a bati riki. Ma natira, a kabanei aia tai n reiakin taeka aika boou ake a na kamanenai n te mwakuri ni minita. A kataia n reireinia aroia ni maroro ma naake a aki ataa kanoan te Baibara, ao aroia n anga aia kaeka ni bobotaki n te ekaretia, ao a rangi n tabetabe ma bwaai riki tabeua aika kakukurei aika irekereke ma ara taromauri.”

E kabwarabwaraa Oliver ae te tari te mwaane ae 37 ana ririki man te United States, bwa e aera ngkai e kaungaunga nakon te aeka ni beku aei: “A bati kakabwaia n te beku ibukin Iehova ngkana ti kitani baika ti taneiai ao ni mwengaraoi iai. I buokaki ni kitanani mwengau bwa N na karikirakea onimakinan Iehova n aki ongei kangaanga aika I kaaitarai. Ngkai I kaai ni beku ma aomata ake I a tibwa kinaia aika titeboo au onimaki ma ngaiia, I a rangi ni buokaki iai bwa N na ataia ae akea te bwai ae kakawaki riki n te aonnaba aei nakon Ana Tautaeka n Uea te Atua.” Ni boong aikai, a bon teimatoa naba n ingainga n aia beku n te aono ae kamanena te taetae n Tiaina Oliver ma buuna ae Anna.

E beku i Myanmar man 2004 te tari te aine ae Trazel mai Aotiteria ae 52 ana ririki. E taku: “I rangi ni kani kaungaia te koraki ake e angaraoi aei irouia bwa a na beku n taabo ake e korakora iai kainnanoan te ibuobuoki. I a tia n noria bwa ngkana iai nanom ni kani beku, e na kakabwaiaa am kakorakora Iehova. Bon akea au iango bwa N na roko n te aeka ni maiu aei. Bon te maiu ae rangi ni manena ao ni kakukurei ae I tangiria.”

E bia kaungaaki nanom n taeka aika ringa te nano aikai mairouia taan ibuobuoki i Myanmar bwa ko na iangoa buokaia aomata aika raoiroi nanoia n aono aika tuai ni mwakuriaki. Eng, a kakao taan ibuobuoki aikai ni kangai, “Taiaoka, nakomai nako Myanmar ni buokira!”