1. E aera bwa ti a riai ni katauraoi imwain te bwainikirinaki?

N TE tairiki are imwaini maten ara Uea ae Iesu, e taekinna bwa a na bon riribaaki naake a motikia bwa a na riki bwa taan rimwina. (Ioa. 17:14) Ni moa man te tai anne, a bwainikirinaki Ana Tia Kakoaua Iehova aika kakaonimaki irouia taani kaitaraa te taromauri ae koaua. (2Tim. 3:12) Ngkai e a kaan tokin te waaki ae ngkai, ti kantaningaia bwa a nang kaaitaraira riki taani kairiribai nakoira.​—Mat. 24:9.

2-3. (a) Tera ae ti riai n ataia ibukin te maaku? (b) Tera ae ti na neneria n te kaongora aei?

² Ti na kangaa ni katauraoira ngkai imwain te bwainikirinaki? Ti aki riai n iangoi baika bubuaka ake a kona n riki nakoira. Ngkana ti karaoa anne, ti kona n taonakinako iai n te maaku ao te raraoma. Ti kona ni katoka ara beku ibukin Iehova ibukini maakakini bwaai aika bon tuai n riki. (TaeRab. 12:25; 17:22) Te maaku bon ana bwai ni buaka ae kokona “teuare kairiribai [nakoira] are te Riaboro” ae e na kataia ni kabwakaira iai. (1Bet. 5:​8, 9) Tera ae ti kona ni karaoia bwa ti aonga ni korakora?

³ N te kaongora aei, ti na nora iai arora ni kona ni kakorakoraa reitakira ma Iehova ao e aera bwa e kakawaki karaoan anne ngkai. Ti na nenera naba arora ae ti kona iai ni karikirakea ninikoriara. Ao kabaneana, ti na nenera arora ae ti kona ni kaitaraa iai te kairiribai mairouia taani kaaitaraira.

4. Ni kaineti ma Ebera 13:​5, 6, tera ae ti riai ni kakoauaa raoi, ao bukin tera?

⁴ Kakoauaa raoi bwa e tangiriko Iehova ao e na bon aki kitaniko. (Wareka Ebera 13:​5, 6.) N ririki aika bwakanako, e taekina aei Te Taua-n-Tantani: “Te aomata ae kinaa raoi te  Atua, e na bon onimakinna riki n tain te kataaki.” Ai koauara taeka akanne! Ngkana ti na nanomwaaka i aan te bwainikirinaki, ti riai n tangira Iehova ma n onimakinna raoi, ao ni kakoauaa ae e bon tangirira.​—Mat. 22:​36-38; Iak. 5:11.

5. Tera ae kona ni buokiko n ota n ana tangira Iehova?

⁵ Wareka te Baibara ni katoabong, ma tiam ae kaanian riki Iehova. (Iak. 4:8) Ngkana ko wareware, iaiangoi raoi aroaron Iehova aika tamaroa. Kataia n ota n ana tangira ae kaotaki ni baike e taekin ao baike e karaoi. (TeOti. 34:6) Tabeman e kangaanga irouia kakoauaan ae e tangiriia te Atua, ibukina bwa akea ae e kaotiota tangiraia. Ngkana e riki naba anne nakoim, kataia ni korei ni katoabong aanga ake e kaota iai Iehova te nanoanga ao te akoi nakoim. (TaiAre. 78:​38, 39; IRom 8:32) Ngkana ko iaiangoi baika riki nakoim ao ni kananoa am iango n te baere ko warekia n Ana Taeka te Atua, ko a kona ni korei baika bati riki ake e karaoi Iehova ibukim. Ngkana e a rikirake am kakaitau ni baike e karaoi Iehova, e nang nene riki iai reitakim ma ngaia.​—TaiAre. 116:​1, 2.

6. Ni kaineti ma Taian Areru 94:​17-19, e na kangaa ni buokiko te tataro mai nanom?

⁶ Katoatai n tataro. Iangoa te teei ae te mwaane ae mwanokaaki iroun tamana. E namakina te kamanoaki raoi te teei aei ngaia are e aki maakina tamana ni maroroakini ma ngaia baika raraoi ao baika bubuaka ake a riki nakoina n te bong anne. Ko kona naba ni karekea te aeka n reitaki anne ngkana ko kaania Iehova n am tataro ma nanom ni koaua ni katoabong. (Wareka Taian Areru 94:​17-19.) Ngkana ko tataro nakon Iehova, “bunra nanom ni kabwaroa n aron te ran” ao tuanga Tamam ae tatangira bwaai nako aika ko maakui ao n tabeaianga iai. (Bwae. 2:19) Tera mwina? Ko na namakina te baere aranaki n te Baibara bwa “te rau are mairoun te Atua ae riaon aia iango aomata.” (IBir. 4:​6, 7) Kabatiaan am tataro n aron aei, ko na kaaniaki riki iai ma Iehova.​—IRom 8:​38, 39.

7. E aera bwa ko riai ni kakoauaa raoi ae a na boni koro bukin ana berita te Atua ni kaineti ma ana Tautaeka n Uea?

⁷ Kakoauaa raoi bwa a na boni koro bukini kakabwaia man Ana Tautaeka n Uea te Atua. (WarIte. 23:19) Ngkana ko aki kakoauaa ae a na koro bukini berita akanne, e na kai kakamaakuko riki Tatan ma ana koraki. (TaeRab. 24:10; Ebera 2:15) Ko na kangaa ni karikirakea ngkai onimakinan Ana Tautaeka n Uea te Atua? Karekea bwa kanoan am ukeuke n reirei taekan ana berita te Atua ibukin ana Tautaeka n Uea, ao bukina ngkai ko kona ni kakoauaa raoi bwa a na boni koro bukia. Ko na kangaa ni buokaki iai? Iangoa ana katoto Stanley Jones ae kabureaki i nanon itiua te ririki ibukin ana onimaki. * Tera ae buokia bwa e  na teimatoa ni kakaonimaki? E taku teuaei: “E nene au atatai ibukin Ana Tautaeka n Uea te Atua ao I kakoauaa raoi, ngaia are I aki kona ni kitana Iehova.” Ngkana e korakora iroum onimakinan ana berita nako te Atua, ko na kaaniaki riki iai ma Iehova ao ko na aki taonakinako n te maaku.​—TaeRab. 3:​25, 26.

8. Tera ae kona ni kaotaki man arora n iririi bobotaki? Kabwarabwaraa.

⁸ Katoatai n iririi bobotaki ni Kristian. Ti kona ni kaaniaki riki ma Iehova man ara bobotaki. Arora ni kaineti ma irirakini bobotaki e na oti iai bwa ti na tokanikai ni kaitaraa te bwainikirinaki n te tai ae imwaira ke ti na aki. (Ebera 10:​24, 25) Bukin tera? Ngkana ti kariaia baika uarereke bwa a na tukira ngkai mani kaeani bobotaki, e na tera arora n te tai ae imwaira ngkana e a karuanikai te bobotaki ma tarira n te onimaki? Ngkana ti kamatoaa nanora ngkai bwa ti na kaakaei bobotaki, ane ti na bon aki kariaia taani kakaaitara bwa a na tukira mani karaoan aei. Boni ngkai ara tai ni karikirakea i nanora tangiran ara bobotaki. Ngkana e a reke tangiran ara bobotaki, a na bon aki kona taani kakaaitara ke te tautaeka n tukira man irakin nanon te Atua.​—Mwa. 5:29.

9. E aera ngkai kamatenikunaan kiibu bon te anga ae raoiroi ibukin te katauraoi imwain te bwainikirinaki?

⁹ Kamatenikunai kiibu ake ko tatangiri. (Mat. 13:52) Tao e aki rangi n nakoraoi am ururing, ma e kona Iehova ni kamanena taamneina ae raoiroi ae mwaaka ni kauringko iai kiibu akanne. (Ioa. 14:26) E taku ana taeka te tari te mwaane temanna ae kabureaki i Tiaman Mainiku ao e katukaki n tii ngaia: “I rangi ni kukurei bwa n te tai anne a a tia ni matenikuna irou kiibu aika bubua ma bubua! E ngae ngke tii ngai ma I katabetabea au iango n iaiangoi reirei aika kakaokoro man te Baibara.” E buokaki te tari aei ni kiibu akanne bwa e na kaaniaki ma Iehova ao n teimatoa ni kakaonimaki.

10. E aera bwa ti riai ni kamatenikunai anene?

¹⁰ Kamatenikunai ao anenei kuuna n nebonebo nakon Iehova. Ngke a kabureaki i Biribi Bauro ma Tira, a anenei kunan te onimaki ake a matenikuna irouia. (Mwa. 16:25) N aron naba anne, ngke a kairaki ni kabureaki i Siberia tarira n te onimaki n te Soviet Union ngkoa, tera ae kakorakoraia? E ururing ni kangai Sister Mariya Fedun: “Ti anenenei kuuna ni kabane ake ti rabakau man te boki n anene.” E taekinna neiei bwa a bane ni kaungaaki ni kuuna akanne  ao a namakina ae a kaaniaki riki iai ma Iehova. Ko namakina naba kakorakoraam ngkana ko anenei kunan te onimaki aika ko tatangiri? Ngaia are kamatenikunai kuuna akanne mangkai!​—Nora te bwaoki ae “ Kaninikoriaai.”

11-12. (a) Ni kaineti ma 1 Tamuera 17:​37, 45-47, e aera ngkai e ninikoria Tawita? (b) Tera reireiara ae kakawaki n ana katoto Tawita?

¹¹ Ko kainnanoa te ninikoria ibukini kaitaraan te bwainikirinaki. Ngkana ko namakinna bwa ko aki ninikoria, tera ae ko na karaoia? Uringnga ae te ninikoria ni koaua e aki boboto i aoni buburam, korakoram, ke am konabwai. Iangoa ana katoto te roro n rikirake ae Tawita ngke e kaaitara ma Koria. E uarereke riki rabwatan Tawita, e mamaara riki, ao e aki taubobonga nakon te buaka, ni kabotauaki ma te toa are Koria. Akea naba ana kabaang Tawita. Ma e rangi n ninikoria ao e biri ni kaitaraa te toa ane kainikatonga anne.

¹² E aera ngkai e rangi n ninikoria Tawita? E kakoauaa raoi ae e memena Iehova irouna. (Wareka 1 Tamuera 17:​37, 45-47.) E aki kaatuua ana iango Tawita i aoni buburan Koria ni kabotauaki ma ngaia. Ma e kaatuua ana iango i aon ae e rangi n uarereke Koria ni kabotauaki ma Iehova. Tera reireiara iai? Ti na namakina te ninikoria ngkana ti kakoauaa ae e memena iroura Iehova ao n ataakin ae a rangi n uarereke taani kakaaitaraira ni kabotauaki ma te Atua ae Moan te Mwaaka. (2Rong. 20:15; TaiAre. 16:8) Ti na kangaa ni karikirakea ngkai ninikoriara imwain te bwainikirinaki?

13. Ti na kangaa ni karikirakea te ninikoria? Kabwarabwaraa.

¹³ Ti kona ni karikirakea te ninikoria man tataekinan te rongorongo ae raoiroi ae taekan Ana Tautaeka n Uea te Atua. Bukin tera? Ibukina bwa te uarongorongo e reireinira arora n onimakina Iehova ao n tokanikai i aoni maakakia aomata. (TaeRab. 29:25) N aron ara mwatireti ae kakorakoraaki ngkana ti kamarurung, e kakorakoraaki naba ninikoriara ngkana ti uarongorongo man te auti teuana ma teuana, n ana tabo te botannaomata, n te tai ae aki baireaki, ao n taabo ni bitineti. Ngkana ti karikirakea ngkai te ninikoria n uarongorongo, ti na bon tauraoi ao n teimatoa n uarongorongo ngkana e a katokaki naba ara mwakuri.​—1Tet. 2:​1, 2.

14-15. Tera reireiara mairoun Nancy Yuen ao Valentina Garnovskaya?

 ¹⁴ E kona n reke reireiara ae bati man aia katoto taari aine aika kakaonimaki aika uoman ake a kaotiota te ninikoria ae rianako. E aki raka i aon 1.5 te mita abwakin Nancy Yuen, ma e rangi n ninikoria. * E rawa ni katoka uarongorongoan Ana Tautaeka n Uea te Atua. Ibukin anne, e a kabureaki i nanon 20 tabun te ririki i Tiaina. A taekina neiei kaain te tautaeka ake a titirakinna bwa bon “te aomata ae te kabanea n imanono” i abaia!

¹⁵ N aron anne, e kabureaki Valentina Garnovskaya n te Soviet Union ngkoa n taai aika kakaokoro aika tenua ao ikotaia ae tao 21 te ririki. * Bukin tera? E kamatoaa nanona neiei bwa e na teimatoa n uarongorongo, ngaia are a aranna kaain te tautaeka bwa “te tia kakeru ae rangi ni kakamaaku.” Tera ae karika ninikoriaia aine aikai? A kakoauaa raoi ae e memena Iehova irouia.

16. Tera aron reken te ninikoria ni koaua?

¹⁶ N aron ae ti a tia ni maroroakinna, ngkana ti na karikirakea ninikoriara ti aki riai ni kaatuui ara iango i aoni korakorara ao ara konabwai. Ma ti riai ni kakoauaa ae e memena Iehova iroura ao boni ngaia ae buaka ibukira. (TuaKau. 1:​29, 30; Tek. 4:6) Anne aron reken te ninikoria ni koaua.

17-18. Ni kaineti ma Ioane 15:​18-21, tera te kauring are e anga Iesu? Kabwarabwaraa.

¹⁷ Ti kukurei ngkana ti karineaki irouia aomata, ma ti aki riai n iangoia bwa akea bongara ngkana a riribaira aomata. E taku Iesu: “Kam a kukurei ngkana kam riribaaki irouia aomata, ao ngkana a katinanikuingkami ma ni kabwainrangingkami, ao ngkana a kabuakakai arami ibukin Natin te aomata.” (Ruka 6:22) Tera ae e nanonna Iesu?

¹⁸ E aki nanonna Iesu bwa a kukurei Kristian ngkana a riribaaki. Ma e taekina te bwai ae e na bon riki nakoira. Ti aki arona  aroia kaain te aonnaba. Ti maiuakin ana reirei Iesu ao ti tataekina te rongorongo are e uarongorongoia. Ibukin anne, a a riribaira kaain te aonnaba. (Wareka Ioane 15:​18-21.) Ti kani kakukureia Iehova. Ma ngkana a ribaira aomata ibukin tangiran Iehova iroura, ti aki nanokawaki iai.

19. Ti na kangaa ni kakairi n aia katoto abotoro?

¹⁹ Tai kariaia te bwai teuana ae a taekinna aomata ke ni karaoia bwa ko na maamaa iai ngkai Ana Tia Kakoaua Iehova ngkoe. (Mika 4:5) Ti kona n reireinira arora n tokanikai i aoni maakakia aomata, ngkana ti neneri aia katoto abotoro i Ierutarem tabeua te tai imwini kamatean Iesu. A ataia ae a rangi n riribaaki irouia mataniwi n te Aro n Iutaia. (Mwa. 5:​17, 18, 27, 28) Ma a katoabong n nanako n te tembora ao ni kaotiia i mataia aomata bwa bon taan rimwin Iesu ngaiia. (Mwa. 5:42) A aki kariaia te maaku bwa e na katokiia. Ti kona naba n tokanikai i aoni maakakia aomata ngkana ti katoatai ni kaotiira ae Ana Tia Kakoaua Iehova ngaira, n te tabo ni mwakuri, n te tabo n reirei, ao n ara kaawa.​—Mwa. 4:29; IRom 1:16.

20. E aera ngke a kukurei abotoro e ngae ngke a ribaaki?

²⁰ E aera ngke a kukurei abotoro? A ataa bukin ribaakia ao a iangoia bwa bon te kakabwaia ngkai a bwainikirinaki ibukini karaoan nanon Iehova. (Ruka 6:23; Mwa. 5:41) E korea aei te abotoro Betero imwina riki: “Kam a kukurei, e ngae naba ngkana kam kammarakaki ibukin te raoiroi.” (1Bet. 2:​19-21; 3:14) Ngkana ti ataia bwa ti ribaaki ibukini karaoan ae raoiroi, ti na bon aki kona ni kariaia ribaakira bwa e na katoka ara beku ibukin Iehova.

21-22. (a) Tera ae ko motinnanoia bwa ko na katauraoiko iai imwain te bwainikirinaki? (b) Tera ae ti na rinanona n te kaongora are imwina?

²¹ Ti aki kona n ataia bwa e na roko n ningai te bwainikirinaki ke katokan ara taromauri nakon Iehova. Ma ti ataia ae ti kona ni katauraoi mangkai ngkana ti kakorakoraa reitakira ma Iehova, ti karikirakea ninikoriara, ao n reiakina arora n tokanikai i aon ribaakira irouia aomata. Ara katauraoi ake ti karaoi ngkai, a na boni buokira n tei n nene n te tai ae imwaira.

²² Ma tera arora ngkana e a katabuakaki ara taromauri? N te kaongora are imwina, ti na nori booto n reirei aika a na buokira n teimatoa n toro iroun Iehova e ngae ngke e a katabuakaki ara mwakuri.