N TE Baibara, a bati rongorongoia aomata aika iai naba aia namakin “n ai arora.” (Iak. 5:17) N te katoto, ti kona n ota n ana taeka Bauro ake n I-Rom 7:​21-24: “Ngkana I kani karaoa ae raoiroi, ao e memena irou te buakaka. . . . Ai kananoangara ngai!” Ngkana ti kabokorakora ma aki kororaoira, a rau nanora n ataakin ae e namakina naba anne Bauro.

E kaotii naba Bauro ana namakin riki tabeua. N I-Karatia 2:​20, e kaotia ae e kakoauaa bwa ‘e tangiria [Iesu] ao e anga ngaia ibukina.’ Ko namakina naba anne? Tao tiaki n taai nako.

Ngkana ti teimatoa n namakina ae akea bongara ibukini buure ake ti a tia ni karaoi, ti a kona ni kakoauaa ae e a aki tangirira Iehova ao e aki kabwarai ara bure, ao e kona ni kangaanga iangoan ae ana karea Iesu bon ibukira naba. Ma te koaua bwa e tangiria Iesu bwa ti na iangoa te kaboomwi n aron anne? Ngkana e riki anne, tera ae kona ni buokira? Ti na neneri titiraki aika uoua aikai.

E tangiria Iesu bwa ti na iangoa ana karea bwa bon ana bwaintangira naba nakoira. Ti na kangaa ni kakoauaa anne? Kataamneia te baere taekinaki n Ruka 23:​39-43. E tauraki te mwaane temanna i aon te kai ni kammaraki i rarikin Iesu. E taekinna teuaei ae e a tia ni karaoi baika buakaka. E bae ni kakaiaki ana bure ibukina bwa tuuaaia aomata aika rangi ni buakaka a na tauraki i aon te kai. E taonaki n te rawawata teuaei ao e bubutiia Iesu ni kangai: “Uringai ngkana ko a roko n am Tautaeka n Uea.”

Tera aron Iesu? Iangoa aroni marakina ngke e a rairaki n taraa matan teuaei. E ngae ngke e korakai ni maraki, ma e keiaki ni moangare nakoina ao ni karaua nanona ni kangai: “E koaua ae I tuangko n te bong aei, ko na mena ma ngai n te Bwaretaiti.” E boni kona Iesu n tii kauringa teuaei ae “Natin te aomata . . . e na anga maiuna bwa te kaboomwi ibukia aomata aika bati.” (Mat. 20:28) Ma n oneani mwin anne, e kaota te akoi n taekina manenan ana kaboomwi ibukin teuaei. E kaota te mwamwannano ni kabonganai taeka aika “ko” ao “ngai.” Ao e boni kaineta ana taeka nakon teuaei ngke e taekina te kantaninga ibukina ae e na maeka n te bwaretaiti i aon te aba.

Akea te nanououa bwa Iesu e tangira teuaei bwa e na ataia ae ana karea are e nang anga, bon te bwaintangira naba nakoina. Ngkana anne ana namakin Iesu ibukin te aomata ae buakaka ae aki reke ana tai ni beku ibukin te Atua, e na bon namakina naba anne ibukin te Kristian ae e a tia ni bwabetitoaki ae beku ibukin te Atua. Tera ae kona ni buokira ngkanne ni karikirakea te namakin ae raoiroi ibukira, n aki ongei buure ake ti a tia ni karaoi?

Man ana mwakuri ni minita Bauro, e a kona iai n ataia ae e mate Iesu ibukina. N te aro raa?  E taku: “I kaitau nakoni Kristo Iesu ae ara Uea, are e kakorakoraai ibukina bwa e aranai bwa I kakaonimaki, ngkai e mwiokoai n te mwakuri ni minita, e ngae ngke boni ngai ngkoa te tia taetae ni kamatauningaa te Atua ao te tia bwainikirina te aba, ao te aomata ae I kainikatonga.” (1Tim. 1:​12-14) Mwiokoani Bauro aei e a karauaki iai nanona bwa e bon nanoangaia Iesu, e tangiria, ao e onimakinna. N aron anne, e mwiokoira naba Iesu n te mwakuri ni minita. (Mat. 28:​19, 20) Ti kona ni buokaki ni mwiokoara aei n ataia ae e mate naba Iesu ibukira?

E taku Albert ae e a tibwa okira Iehova imwini kabaneakina n te maan ae kaania 34 te ririki: “I aki toki n ururingi au bure. Ma ngkana I karaoa au mwakuri ni minita, I namakina are iroun te abotoro Bauro, ae e mwiokoai naba Iesu n te mwakuri aei. I kaungaaki iai ao I buokaki bwa N na iangoi baika raraoi ibukiu, ibukini maiuu, ao taai aika a na roko.”​—TaiAre. 51:3.

E taku Allan ae rangi ni buakaka ao n iowawa ngkoa imwain reiakinan te koaua: “I teimatoa n iangoi baika bubuaka ake I karaoi nakoia aomata. N tabetai, I rangi n rawawata iai. Ma I karabwaa Iehova ngkai e kariaia bwa N na tataekina te rongorongo ae raoiroi nakoia aomata, e ngae ngke te tia bure ngai. Ngkana I noriia aomata ni butimwaea te rongorongo ae raoiroi, I a kauringaki iai aron Iehova ae raoiroi ao e tatangira. I namakinna bwa e kabonganaai ibukini buokaia aomata ake a a tia naba ni karaoi baika bubuaka.”

Ni karaoan ara mwakuri ni minita, ti a kaatuua iai ara iango i aoni mwakuri ao iango aika raoiroi. Ti kakoauaa naba iai ae e bon nanoangaira Iesu, e tangirira, ao e onimakinira.

E kona n teimatoa ni kabuakakaira nanora ibukin ara bure ngkoa, ni karokoa te tai are e a kamaunaaki iai ana waaki ae buakaka Tatan i aon te aba. Tera ae e na buokira ni buakani aeka n namakin akanne?

E taku Jean ae kabokorakora n angiin te tai ma uringaabana ibukini maiuna ae kiriuoua ngke e ataei: “E karauaki nanou ngkai e ‘rianako riki aron te Atua nakon nanora.’” (1Ioa. 3:​19, 20) Ti kona naba ni kabebeteaki n ataakin ae Iehova ao Iesu a ataia ae bon taani bure ngaira. Uringnga are a tatangira ni katauraoa te kaboomwi ibukia taani bure aika rairi nanoia, ao tiaki ibukia aomata aika kororaoi.​—1Tim. 1:15.

Ti kakoauaa ae te kaboomwi bon ibukira naba ngkana ti kananoi ara iango i aon aron Iesu nakoia aomata aika aki kororaoi, ao ngkana ti karaoa ara kabanea ni konaa ni kakororaoa ara mwakuri ni minita are e mwiokoira iai. Ni karaoan aei, ti a kona naba ni kangai n aroni Bauro: “E tangirai [Iesu] ao e anga ngaia ibukiu.”