1. Tera arora n iangoa te bwaintituaraoi ae ti kona n tataro nakon Iehova?

 E A TIA te tia Karaoa karawa ma aonnaba n anganira te bwaintituaraoi ae moan te kakawaki. E boni kariaia bwa ti na tataro nakoina. Iangoa aei: Ti kona ni bunrii nanora nakon Iehova n taai nako ao ni kamanena te taetae ae ti tangiria, n akea kainnanoan te babaire ibukin ara tai ni kawaria n te tataro. Ti kona n tataro nakoina man te onnaoraki ke te karabuuti, ao ti kakoauaa raoi bwa e na bon ongora Tamara ae tatangira. Ti rangi ni kakaitau ibukin te bwaintituaraoi aei.

2. E kangaa ni kaotia te Uea ae Tawita bwa e kakawaki irouna te bwaintituaraoi ae te tataro?

² E rangi ni kakawaki iroun te Uea ae Tawita te bwaintituaraoi ae te tataro. E anenea aei nakon Iehova: “E bia riki au tataro bwa ai aron te bwai ae boiarara ae katauraoaki i matam.” (TaiAre. 141:1, 2) N ana tai Tawita, ao e karauaki ni katauraoaki raoi te karea ae boiarara man tabu, are kakamanenaaki n te taromauri ae koaua irouia ibonga. (TeOti. 30:34, 35) N taekinan te bwai ae boiarara iroun Tawita, e kaotia iai ae e kani karaua n iaiangoi naba baike e na taekin nakon Tamana are i karawa, n aron are e karaoaki ni katauraoan te karea ae boiarara. Ti boni kani karaoa naba anne. Ti tangiria bwa a na kakukureia Iehova ara tataro.

3. Tera arora ae riai ngkana ti tataro nakon Iehova, ao bukin tera?

³ Ngkana ti tataro nakon Iehova, ti riai ni bwaina te karinerine. Iangoi miitara aika kamimi ake a anganaki Itaia, Etekiera, Taniera, ao Ioane. A kakaokoro miitara akanne, ma  iai te bwai teuana ae a titeboo iai. A bane ni kabwarabwaraa Iehova bwa te Uea ae mimitong. Itaia e “nora Iehova n tekateka i aon te kaintokanuea ae rangi n rietata ma ni karietataaki.” (Ita. 6:1-3) Etekiera e nora Iehova n tekateka i aon ana kaa ni buaka i karawa, ao e katobibiaki n “te raneanea ae kaanga ai aron nei wirara.” (Etek. 1:26-28) Taniera e nora “Teuare iai Mangkoangkoa” ni kunnikainna n te kunnikai ae mainaina ao uran te ai e roko man Ana kaintokanuea. (Tan. 7:9, 10) Ao Ioane e nora Iehova n tekateka i aon te kaintokanuea ae otabwaniniaki n nei wirara ae ai aron taraan te atibu ae te emerote. (TeKao. 4:2-4) Ngkana ti iaiangoa mimitongin Iehova ae akea kabotauana, ti a kauringaki iai te bwaintituaraoi ae rangi ni kakawaki ae kawarana n te tataro, ao e kakawaki karaoan anne ma te karinerine. Ma tera ngkanne ae ti riai n tataroia?

4. Tera reireiara mani moan taeka n te tataro ni katoto? (Mataio 6:9, 10)

⁴ Wareka Mataio 6:9, 10. N te Kabwarabwara i aon te Maunga, ao Iesu e reireinia taan rimwina aroia n tataro ae e na kukurei iai te Atua. Imwin taekinan are “ma kam riai n tataro n aron aei” iroun Iesu, ao e a taekini moa baika kakawaki aika irekereke ma ana kantaninga Iehova, n aroni katabuan Arana, rokon ana Tautaeka n Uea are e na kamaunaia naake a kakaitaraa, ao kakabwaia ake e na angania aomata n taai aika a na roko n te aonnaba. N taekinani baikai n ara tataro, ti a kaotia iai bwa e kakawaki iroura ana kantaninga te Atua.

5. E na ongora Iehova n ara tataro ngkana ti butiia baika ti kainnanoi?

⁵ Ni kanoan te tataro ni katoto are imwina riki, e kaotia iai Iesu bwa e raoiroi naba ngkana ti tataro ibukini baika ti kainnanoi. Ti kona naba ni bubutiia Iehova kanara n te bong aei, kabwaraan ara bure, kawakinara man te kariri, ao kamaiuara mairoun teuare buakaka. (Mat. 6:11-13) Ngkana ti bubutiia Iehova baikai, ti a kaotia iai bwa ti ataia ae ti kainnanoa ana ibuobuoki, ao ti kani kakukureia naba.

6. E koaua bwa ti na tii mwanewei baika a taekinaki n te tataro ni katoto? Kabwarabwaraa.

⁶ E aki kantaningaiia taan rimwina Iesu bwa a na toua raoi mwin te tataro ni katoto.  N ana tataro Iesu ake tabeua, e boni mwanewei iai baika kakaokoro ake a kakawaki ibukina n taai akanne. (Mat. 26:39, 42; Ioa. 17:1-26) N aron naba anne, ti kona n tataroa te bwai ae ti tabeaianga iai, tao ibukin ara motinnano. Ngkana ti na karaoa ara motinnano, ti kona n tataroa te wanawana ao te ataibwai. (TaiAre. 119:33, 34) Ngkana ti nang karaoa mwiokoara ae kangaanga, ti kona n tataroa buokara ibukin aroni karaoana. (TaeRab. 2:6) A kona kaaro n tataro ibukia natiia, ao naati ibukia aia karo, ao ngaira ni kabane ibukia aomata ake ti reirei ma ngaiia n te Baibara, n ikotaki naba ma naake ti uarongorongo nakoia. Ni koauana, ti aki riai n tataro tii ibukini buokara ke baika ti kainnanoi.

7. E aera ngkai ti riai ni kamoamoaa Iehova n ara tataro?

⁷ Ti riai n uringnga ni kamoamoaa Iehova n ara tataro. Bon akea ae e riai ni kamoamoaaki riki i rarikin Atuara ae ‘raoiroi ao n tauraoi ni kabwarai buure.’ E bon “nanoanga ao e atataiaomata, E iremwe n un ao e bati irouna te tangira ae koaua ao te kakaonimaki.” (TaiAre. 86:5, 15) Ti riai ni kamoamoaa Iehova ibukina bwa bon te Atua ni koaua ao ibukin naba bwaai nako ake e a tia ni karaoi.

8. Baikara bwaai tabeua aika ti kona ni kaitaua iai Iehova? (Taian Areru 104:12-15, 24)

⁸ Irarikini kamoamoaan Iehova n ara tataro, ti kaungaaki naba bwa ti na kaitaua ibukin bwaai aika moan raraoi ake e katauraoi ibukira. N te katoto, ti kona ni kaitaua ibukin uee aika kakaokoro karaia mani kantara, amwarake aika kangkang ma ni mwaiti aekaia, ao te kukurei ae ti karekea mairouia raoraora aika tangiraki iroura. E anganira baikai Tamara ae tatangira ao baika bati riki, ibukini kakukureiara. (Wareka Taian Areru 104:12-15, 24.) Ma ae kakawaki riki, ti kaitaua Iehova ibukin amwarake n taamnei aika mwaitikurikuri ao te kantaninga ae raoiroi ibukin taai aika imwaira.

9. Tera ae na buokira bwa ti na aki mwaninga ni kaitaua Iehova? (1 I-Tetaronike 5:17, 18)

⁹ Ti kona naba ni mwaninga ni kaitaua Iehova ibukin bwaai ni kabane ake e karaoi ibukira. Ma tera ae e na buokiko bwa ko aonga n aki mwaninga? Ko kona ni korei  bwaai ake ko a tia ni bubutii n am tataro ao imwina riki ko a manga iangoa aron Iehova ni kaekai. Imwin anne, tataro ni kaitaua ibukin ana ibuobuoki. (Wareka 1 I-Tetaronike 5:17, 18.) Iangoa aei: Ti boni kukurei ao n ataia bwa ti tangiraki ngkana ti kaitauaki irouia tabemwaang. N aron naba anne, ngkana ti ururingnga ni kaitaua Iehova ibukini kaekaan ara tataro, e na boni kukurei naba. (IKoro. 3:15) Ma tera riki bukina ngkai e kakawaki bwa ti na kaitaua Atuara?

10. E aera bwa ti riai ni kaitaua Iehova ngkai e kanakoa Iesu nakon te aonnaba? (1 Betero 2:21)

¹⁰ Wareka 1 Betero 2:21. Ti riai ni kaitaua Iehova bwa e a tia ni kanakoa natina ae tangiraki irouna bwa e na reireinira. Ti reiakina ae bati ibukin Iehova ao arora ni kakukureia man reiakinan rongorongoni maiun Iesu. Ngkana ti kaotiota onimakinan ana karea Kristo, ti a kona ni karekea ara iraorao ae kaan ma Iehova ae te Atua ao n raoiakinaki naba ma Ngaia.—IRom 5:1.

11. E aera bwa ti riai n tataro n aran Iesu?

¹¹ Ti kaitaua Iehova ngkai ti kona n tataro nakoina rinanon Natina. E boni kamanena Iesu bwa te kawai are ti na bubutii iai nakoina. E ongoraei Iehova ara tataro ao e kaekai ngkana ti bubutii n aran Iesu. E taku Iesu: “Te bwai naba ane kam bubutii n arau, ao N na karaoia, bwa e aonga n neboaki te Tama rinanon te Nati.”—Ioa. 14:13, 14.

12. E aera bwa ti riai ni kaitaua Iehova ibukin Natina?

¹² E boto kabwaraan ara bure iroun Iehova man ana karea ni kaboomwi Iesu. E taekinaki Iesu n te Baibara bwa ara “ibonga ae rietata . . . ae tekateka i angaatain ana kaintokanuea Teuare Mimitong i karawa.” (Ebera 8:1) Iesu bon “te tia buokira ae mena iroun te Tama.” (1Ioa. 2:1) Ti rangi ni kaitaua Iehova bwa e a tia n anganira ara Ibonga ae Rietata ae e atai mamaarara ao e “bubutii naba ibukira”! (IRom 8:34; Ebera 4:15) Bon aomata ngaira aika ti aki kororaoi, ma ibukin ana karea Iesu, ti a kona n tataro nakon Iehova. Akea te nanououa bwa ko bae ni kakoauaa ae e bon aki boraoi ara kakaitau ma ana bwaintituaraoi Iehova ae rangi ni kakawaki are e a tia n anganira, ae bon Natina ae tangiraki irouna!

13. E kangaa Iesu ni kaota tangiraia taan rimwina n te tairiki are imwaini matena?

¹³ N te tairiki are imwaini maten Iesu, e tataro i nanon te tai ae maan ibukia taan rimwina ao e butiia Tamana bwa e na “kawakinia mairoun teuare buakaka.” (Ioa. 17:15) Ai korakorara ana tangira Iesu! E ataia bwa e nang kaaitara ma te kataaki ae kangaanga, ma e bon tabeaianga naba ibukia ana abotoro.

14. Ti na kangaa ni kaota tangiraia taari?

¹⁴ Ngkana ti na kakairi iroun Iesu, ti na aki tii iaiangoi baika ti tangiri. Ma ti katoatai n tataro ibukia tarira. Ni karaoan anne, ti a ongeaba iai n ana tua Iesu ae ti na itangitangiri, ao ti kaotia naba nakon Iehova bwa ti rangi n tangiriia raora n te onimaki. (Ioa. 13:34) A na boni buokaki tarira n ara tataro. E kaotaki n Ana Taeka te Atua bwa e “rangi ni mwaaka ana kakorakora n tataro ni bubutii te aomata ae raoiroi.”—Iak. 5:16.

15. E aera ngkai ti riai n tataro ibukia taari?

¹⁵ A kaaitara ma kataaki aika bati raora n taromauri, ngaia are a boni kainnanoa ara tataro ibukia. Ti kona ni butiia Iehova  bwa e na buokiia n nanomwaaka i aan te aoraki, kabuanibwai aika karina, te buaka, te bwainikirinaki, ke kangaanga riki tabeua. Ti kona naba n tataro ibukia taari ake a anga ngaiia ibukini mwakuri n ibuobuoki nakoia ake a kainnanoa buokaia. Ko bae n ataia tabeman aika kaaitara ma aeka ni kangaanga akanne. E aera bwa ko aki mwanewei araia n am tataro? Ti kaota te itangitangiri ni koaua ngkana ti butiia Iehova bwa e na buokiia bwa a na nanomwaaka.

16. E aera bwa ti riai n tataro ibukia naake a kaira te waaki i buakora?

¹⁶ A rangi ni kakaitau naake a kaira te waaki n te ekaretia n aia tataro tabemwaang ao a boni kakabwaiaaki iai. E nora koauan aei te abotoro Bauro. E korea ae kangai: “Tataro naba ibukiu, bwa N na anganaki au taeka ngkana I kaurea wiu, bwa I aonga ni kona n taetae ma te ninikoria, ni kaota te bwai ae raba ae tabu ae taekan te rongorongo ae raoiroi.” (IEbe. 6:19) A bati naba ni boong aikai taari mwaane aika mwakuri korakora ni kairiri i buakora. Ti kaota naba tangiraia ngkana ti butiia Iehova bwa e na kakabwaiaa aia mwakuri.

17-18. N ningai te tai ae ti kona ni butiiaki iai bwa ti na tataro ibukia tabemwaang, ao tera ae ti riai n ururingnga?

¹⁷ N tabetai, ti boni butiiaki bwa ti na tataro ibukia tabemwaang. N te katoto, e kona te tari te aine ae kaira te reirei n te Baibara ni butiia te tari te aine ae e raonna n ana reirei bwa e na tataro ibukia. E bae n aki kinaa raoi te aomata anne neiei, ngaia are e bae ni kan tataro n tokin te reirei. N te aro anne, e na bebete riki irouna kaangaraoan ana tataro nakoni baike e kainnanoi te aomata ane e reirei anne

¹⁸ E kona naba ni butiiaki te tari te mwaane temanna bwa e na tataro n te mwakuri ni minita ke n te taromauri n te ekaretia. A riai taari mwaane ake a mwiokoaki n anne n ataa te boto n iango n te botaki anne. E aki riai ni kamanenaaki te tataro bwa te tai ni kaetiia kaain te ekaretia, n reireinia, ao ni katanoata. Ni bobotaki n te ekaretia, ao e katauaki nimaua te miniti ibukin te tataro ao te anene. E riai ngkanne te tari te mwaane ae tataro n aki ‘kabatiai ana taeka,’ moarara riki ni moanakin te botaki.—Mat. 6:7.

19. Tera ae e na buokira n tauraoi imwain ana bong ni motikitaeka te Atua?

¹⁹ E riai ni moanibwai riki te tataro ni maiura ngkai ti a uakaan ma ana bong Iehova ni motikitaeka. E taku Iesu ni kaineti ma aei: “Mangaia are teimatoa n tantani, ao katoatai ni kakorakora n tataro ni bubutii bwa kam aonga n tokanikai ni birinako mani baika a na riki aikai ni kabane.” (Ruka 21:36) Eng, te tataro n taai nako, e boni kakorakoraaki iai ara onimaki ao ti na tauraoi iai imwain ana bong ni motikitaeka te Atua.

20. A na kangaa n riki ara tataro bwa kaanga te boi ae boiarara?

²⁰ Baikara baika ti a tia ni maroroakin ngkai? Eng, e rangi ni kakawaki iroura te bwaintituaraoi ae te tataro. Ti riai ni moanibwai n ara tataro baika irekereke ma ana kantaninga Iehova. Ti kakaitau naba ibukin Natin te Atua, ana kairiri n ana Tautaeka n Uea, ao ti tataro ibukia raora n te onimaki. Ti kona naba n tataro ibukini baika ti kainnanoi ao kakorakoraan ara onimaki. Ngkana ti iaiangoi raoi ara taeka imwain ara tataro, ti a kaotia iai bwa e kakawaki iroura te bwaintituaraoi ae moan te tamaroa aei. Ao a na riki iai ara taeka bwa kaanga te boi ae boiarara nakon Iehova ae “a kakukurei Irouna.”—TaeRab. 15:8.