N TAAI TABETAI, ao taani korea te Baibara a kaokiokii kibuntaeka aika titeboo raoi. Iangoi bukina aika tenua ngkai a karaoa iai anne:

Te tai are koreaki iai. N aia tai tibun Iteraera rimoa, a bati aomata aika akea katoton te Tua irouia. N angiin te tai a ongora ni warekan te Tua ngkana e ikotaki te natannaomata n te umwanrianna. (TuaKau. 31:10-12) E bae n iai baika kona n urua ongoraaia ngke a tei i nanon iraua te aoa i buakoia aomata aika uanao. (Neem. 8:2, 3, 7) N aekaki n tai akanne, a na kai uringi riki kiibu aomata ao ni maiuakini, ngkana a kaokiokaki kibuntaeka aika kakawaki. A na rangi ni buokaki riki n ururingi rongorongo aika mataata n aron ana tua te Atua ao mooti, ngkana a kaokiokaki taeka tabeua.—NakIbo. 18:4-22; TuaKau. 5:1.

Tein te koroboki. Tao 10 te katebubua mani mwakoron te Baibara ae a koreaki bwa taian anene, n aron Taian Areru, Ana Anene Toromon, ao Bwaebwaeti. N tabetai iai taeka aika kaokiokaki n te anene. E katuruturuaki iai te boto n iango n te anene ao ni buokiia taan ongora bwa a na kona ni kamatenikunai taekaia. N te katoto, nori taeka aika koreaki n Taian Areru 115:9-11: “Onimakina Iehova, ngkami aika tibun Iteraera, boni ngaia aia tia ibuobuoki ao aia otanga. Onimakina Iehova, ngkami aika tibun Aaron, boni ngaia aia tia ibuobuoki ao aia otanga. Onimakina Iehova, ngkami aika kam maaka Iehova, boni ngaia aia tia ibuobuoki ao aia otanga.” Kaokiokan taeka akanne a na buokaki iai taan anene n iaiangoi raoi koaua aika kakawaki akanne ao n taui i nanoia.

Katuruturuani baika kakawaki. N tabetai taani korea te Baibara a kaokiokii kibuntaeka aika rangi ni kakawaki. N te katoto, ngke e tuangia I-Iteraera Iehova bwa a na aki kana te raraa, ao E kaira Mote bwa e na kaokioka taekinani bukina nakoia n taai aika bati. E tangiria te Atua ni katuruturua bwa a mena maiuni baika maiu i nanon te raraa, ngaia are te raraa e tei ibukin te maiu. (NakIbo. 17:11, 14) Imwina riki ngke a a korei baika kakawaki abotoro ma unimwaane ake i Ierutarem aika a na rarawa nako iai ibukini kakukureian te Atua, ao a a manga taekina naba riain te rarawa nakon te raraa.—Mwa. 15:20, 29.

E ngae ngke iai kibuntaeka aika kaokiokaki n te Baibara, ma e aki tangiria Iehova bwa e na riki bwa anuara kaokiokaia. N te katoto, e kangai Iesu: “Ngkana ko tataro, tai mwanewei taeka aika titeboo ni kaokiokii.” (Mat. 6:7) Imwina e a manga taekini baika ti riai ni mwanewei n ara tataro aika boraoi ma nanon te Atua. (Mat. 6:9-13) Ngaia are e ngae ngkai ti rarawa ni kaokiokii taeka aika titeboo raoi n taai nako n ara tataro, ma ti kona ni kaokiokii taekan iango tabeua.—Mat. 7:7-11.

Bon iai bukina ae raoiroi ngkai a kaokiokaki taeka ao kibuntaeka tabeua n Ana Taeka te Atua. Bon teuana mai buakon ana aanga aika bati ara Tia Reirei ae Moan te Kakannato n reireinira arora ae ti na kabwaia iai.—Ita. 48:17, 18.