Karekea Kukureim Ngkai Ko Tataningaa Iehova ma te Taotaonakinnano
KO INGAINGA nakon te tai ae e na kamauna iai te buakaka ni kabane Iehova ao ni kabooui bwaai ni kabane? (TeKao. 21:1-5) Ko bae n ingainga! Ma e aki bebete n taai nako te teimatoa n tataningaa Iehova, moarara riki ngkana ti kaaitara ma kangaanga. E kona ni kaaoraka nanora baenikain te bwai ae kantaningaaki. —TaeRab. 13:12, kbn.
Ma e kantaningaira Iehova bwa ti na taotaona nanora n taningaa te tai are e a tia n namatia bwa e na waaki iai. Bukin tera ngkai e kantaningaa anne mairoura? Tera ae e kona ni buokira bwa ti na kukurei ngkai ti tabe n tataninga?
BUKIN TERA NGKAI E KANTANINGAIRA IEHOVA BWA TI NA TATANINGA?
E taekinaki ae kangai n te Baibara: “E teimatoa Iehova n tataninga ma te taotaonakinnano bwa e na akoingkami, ao e na teirake ni kaota te nanoanga nakoimi. Bwa Iehova bon te Atua ae nibwan te kaetitaeka ae riai. A a kukurei te koraki nako akana teimatoa ni kantaningaia.” (Ita. 30:18) A moani koreaki ana taeka Itaia aikai ibukia I-Iutaia aika imanono. (Ita. 30:1) Ma iai tabeman aika kakaonimaki i buakoia I-Iutaia aikai, ao a karekea te kantaninga man taeka aikai. E karekea naba te kantaninga nakoia ana toro Iehova aika kakaonimaki ni boong aikai, taeka aikai.
Ngaia are ti riai n tataninga ma te taotaonakinnano ibukina bwa e tataninga naba Iehova ma te taotaonakinnano. E a tia n namata te bong are e na kamauna iai te waaki ae ngkai, ao e tataningaa rokon te bong ao te aoa anne. (Mat. 24:36) N te tai anne, e nang teretere raoi ae a boni kewe ana bukibuki te Riaboro ibukin Iehova ao ibukia te koraki ake a beku irouna. E nang kamauna ngkanne Tatan ma naake a tei n ana itera, ma E na “kaota [nakoira] te nanoanga.”
Ma ngkai moa, e aki kona Iehova ni kanakoi kataakira ma e karaui nanora bwa ti kona ni kukurei ngkai ti tabe n tataninga. N aron are e koreia Itaia, ti kona ni kukurei ngkai ti kariariaa ke ti kantaningaa te bwai ae raoiroi ae e na riki. (Ita. 30:18) a Ti na kangaa ni karekea te kukurei anne? Iai mwaneka aika aua aika kona ni buokira.
ARORA NI KUKUREI NGKAI TI TATANINGA
Kaatuua iangoani baika raraoi. E nora te buakaka ae korakora te Uea are Tawita i nanoni maiuna. (TaiAre. 37:35) Ma e ngae n anne, e korea ae kangai: “Teimatoa ni kainabwabu i matan Iehova ao tataningaia ma te ingainga. Tai kauna nanom iroun te aomata ae nanakoraoi karaoan ana babaire aika buakaka.” (TaiAre. 37:7) E mutiakina te taeka n reirei anne Tawita n arona ni kaatuua ana iango i aon ana kantaninga ibukin te kamaiuaki. E kakaitau naba ni kakabwaiaana ake e karekei mairoun Iehova. (TaiAre. 40:5) Ngkana ti kaatuua naba iangoani baika raraoi ao n aki taonakinako ni baika bubuaka aika riki ni maiura, e na bebete riki iai iroura tataningaan Iehova.
Katabetabeko ni karaoiroa Iehova. E kangai nakon Iehova te tia korea te Areru 71, ae tao bon Tawita: “N na teimatoa n tataninga, ao N na kabatiaa riki karaoiroam.” (TaiAre. 71:14) E na kangaa ni karaoiroa Iehova? E na tataekina Iehova nakoia tabemwaang ao n anenea karaoiroana. (TaiAre. 71:16, 23) N aron Tawita, ti kona ni kimwareirei ngkai ti tabe n tataningaa Iehova. Ti karaoiroia n ara mwakuri ni minita, n ara maroro ni katoabong, ao n ara anene ibukin te taromauri. Ngkana ko anene imwina n anenen te Tautaeka n Uea, e aera ko aki iaiangoi raoi taekaia aika kaunganano?
Karekea kaungaakim irouia taari n te onimaki. Ngke e kaaitara ma kangaanga Tawita, ao e taku nakon Iehova: “N na kabotoa au kantaninga i aon aram i mataia am aomata aika kakaonimaki ni koaua.” (TaiAre. 52:9) Ti kona naba ni karekea kaungaakira mairouia raora n te onimaki aika kakaonimaki ni koaua, tiaki tii n ara bobotaki ao n te mwakuri ni minita ma n ara botaki naba n ikaungaunga.—IRom 1:11, 12.
Kanenea am kantaninga. E kangai Taian Areru 62:5: “N na bon tataningaa te Atua ma te kainabwabu, ibukina bwa boni ngaia nibwani baika I kantaningai.” E rangi ni kakawaki bwa e na nene ara kantaninga moarara riki ngkana e aki waekoa n roko te toki n aron ae ti kantaningaia. Ti riai ni kakoauaa ae a na boni koro bukin ana berita Iehova n aki ongeia bwa maanra ngaira n tataningaia. Ti kona ni kanenea ara kantaninga rinanon te ukeuke n Ana Taeka te Atua n aron taian taetae ni burabeti, rongorongo ake iai aika aki kauntaba, ao rongorongo riki aika kaota taekan Iehova. (TaiAre. 1:2, 3) Ti riai naba n teimatoa n “tataro ni [kairakira] n te taamnei ae raoiroi” bwa ti na kateimatoa ara iraorao ma Iehova ngkai ti tabe n tataningaa kakororaoan ana berita ibukin te maiu are aki toki.—Iuta 20, 21.
N aron te Uea are Tawita, onimakinna ae Iehova e tarataraiia ake a kakantaningaia ao e kaota Ana tangira ae koaua nakoia. (TaiAre. 33:18, 22) Teimatoa n tataningaa Iehova ma te taotaonakinnano n arom ni kaatuua iangoani baika raraoi ni maium, ni karaoiroia, ni karekea kaungaakim mairouia taani Kakoaua, ao ni kanenea am kantaninga ae kakawaki.
a N te taetae are moan rairaki iai te taeka ae “teimatoa ni kantaningaia,” e kona naba n nanonaki iai ae “ko kariariaa ke ko kantaningaa te bwai ae e na riki,” ae kaotaki iai bwa e aki kairua ngkana ti kariariaa kamaiuara iroun Iehova.
