KO A TIA n nanamakinna ae tii ngkoe n am kangaanga? Ti a maeka n “taai aika okoro aika karuanikai” aika kona ni kabwarai nanora ao n iangoia bwa ti tiku n tii ngaira. (2Tim. 3:1) Ma ti bon aki riai ni kaaitarai kangaanga n te maiu aei n tii ngaira. E katereaki n te Baibara kakawakin ae iai raoraom ni koaua n “tain te rawawata.”​—TaeRab. 17:17.

E kakabwaiaaki te abotoro Bauro mani karekean ana iraorao ma naake e mwamwananga ma ngaiia. (IKoro. 4:​7-11) Ngke e karabuutinaki Bauro i Rom, ao a karaoi tabeni Bauro ake e a aki kona ni karaoi i bon irouna raoraona. N te katoto, e uotii n nikiri irouni Bauro bwaai mairouia taari i Biribi Ebaberorito. (IBir. 4:18) E nikiri ana reta Bauro nakoia ekaretia aika kakaokoro Tukiko. (IKoro. 4:7) E kakororaoa ana mwakuri ni minita Bauro man aia ibuobuoki raoraona, e ngae ngke e kabureaki n te auti ke n tiku tii ngaia n te karabuuti. Ko na kangaa n riki bwa te rao ni koaua ni boong aikai?

E oti man aia katoto taari ni boong aikai kakawakin te riki bwa te rao ni koaua. Iangoa te tari te aine are e kaotia bwa bon te rao ni koaua nakon Elisabet, ae te bwaiania ae katoatai i Tibein. Ngke e reke tinan Elisabet n te aoraki ae te kaentia, ao e a text nakoina neiei ni kaungaa n rongorongo aika boto man te Baibara. E kangai Elisabet, “A riki ana text aikai bwa kakorakoraau ni katoabong bwa N na kaitaraa te bong teuana ma namakinan ae I aki tiku n tii ngai.”​—TaeRab. 18:24.

Ti kona ni kakorakoraa ara iraorao ma taari n arora ni kaungaia nakon te nakonako ao te taromauri. N te katoto, ko kona ni baona te tari te mwaane ke te aine ae e a kara nakon te taromauri ke te mwakuri ni minita? Ngkana ko kona, ane e na reke am tai ni kaungaia ao ko na kaungaaki naba. (IRom 1:12) Ma iai Kristian tabeman aika aki kona ni kitana mwengaia. Ti na kangaa n riki bwa te rao ni koaua nakoia?

Iai tabeman taani kakoaua aika iai aorakia ke bwaai riki tabeua aika tukiia mani kaean te taromauri. Iangoa David, are e reke irouna te aoraki ae te lymphoma. E chemotherapy n te maan ae raka i aon onoua te namwakaina. N te tai anne, ao a irira te taromauri David ma buuna rinanon te intanete.

Tera aroia raoraoia n te ekaretia ni boutokaiia? Ni katoaa banen te taromauri, a kataia tabeman taari ni maroro ma David ao Lidia rinanon te intanete. Ao ngkana a manga anga aia kaeka David ao Lidia, a text taari nakoia ni kaungaia imwina.  Tera mwina? A aikoa bati n namakinna ae a tionako David ma buuna n aia tai ni bwainnaoraki.

A kona ni katoaira n ara mwakuri ni minita, naake a aki kona ni kitana mwengaia? Ti kona ni kaotia bwa ti aki mwanuokinia naake a rinanon te kangaanga aei, ngkana ti karaoi bitaki aika uarereke naba. (TaeRab. 3:27) E aera ko aki bairea am tai teuana n uarongorongo ma ngaiia rinanon te reta ke te tareboon? A kona n toma rinanon te intanete ao n ira karaoan te nakonako naake a aki kona ni kitana mwengaia. A rangi ni kakaitau n te babaire aei David ao Lidia. E kangai David, “E korakora ungan nanora man iriran ara kurubu n uarongorongo, n ira te maroro teutana ao te tataro.” Ngkana e na angaraoi riki imwina ko kona ni kaira am reirei n te Baibara temanna nakoni mwengan te tari are e aki kona ni kitana mwengana, ao n reirei ma ngaia iai?

Ngkana ti kakabanea ara tai ma taari ake a aki kona ni kitana mwengaia, ane ti na kaaniaki riki ma ngaiia man noran aroaroia aika raraoi. N te katoto, ngkana ko uarongorongo ma ngaiia, ao ko nora aroia ni kamanena raoi Ana Taeka te Atua ao n rota nanon te aomata, ko na boni kaaniaki riki ma ngaiia. Ngkana ko boutokaiia taari n te onimaki ni kaea te taromauri ao te uarongorongo, ane e na bati riki raoraom.​—2Kor. 6:13.

E kabebeteaki Bauro ngke e airi ma raoraona are Tito. (2Kor. 7:​5-7) E kauringira te rongorongo aei bwa ti kona ni kabebeteia naake a kainnanoa kabebeteaia ngkana ti kaotiota te nanoanga nakoia ao ni karaoi bwaai ni boutokaiia iai.​—1Ioa. 3:18.

A kaotiota te katoto ae tamaroa taari ake i Rutia, ni kaineti ma boutokaaia i marenaia. Iangoa te baere a rinanona Sergey ao buuna ae Tatyana. Imwin tuoan aia auti irouia bureitiman ao a kairakinako bwa a na titirakinaki. E kaotinakoaki moa Tatyana ao e a okira mwengara. E kangai Sergey: “Ngke e a bon tibwa roko [Tatyana] ni mwengara, ao e a kaoti naba temanna te tari te aine ae ninikoria. A a manga roko riki raoraora tabeman ao ni buokira ni kaitiaka ara auti.”

E reitia ni kangai Sergey: “I taatangira Taeka N Rabakau 17:​17, are kangai: ‘E kaotiota te tangira n taai nako te rao ni koaua, ao boni ngaia te tari ae bungiaki ibukin tain te rawawata.’ I a nori raoi koauan taeka aikai n te tai are I bwainikirinaki iai ao I a aki kona ni kaitaraa n oini korakorau. E a tia Iehova n anganai raoraou aika ninikoria bwa boutokaau.” a

Ngkai ti a kaaitara ma baika kangaanga riki, ti a kainnanoia raoraora bwa a na buokira. Ti na rangi ni kainnanoiia riki n tain te rawawata ae korakora. Ngaia are ti bia kakorakoraira n riki bwa te rao ni koaua ngkai!​—1Bet. 4:​7, 8.