KO NORIA ae a a bati aomata n te aonnaba aei aika namakinna bwa a kakawaki riki nakoia tabemwaang, ao a riai ni karekei baika okoro? N aki ongeia bwa mwaitira baika a karekei, ma a boni kantaningaa naba ae bati riki. Aei te aeka n iango ae aanaki n te bangaomata ao te aki kakaitau, aika kanikinaeani kabaneani boong.​—2Tim. 3:2.

E bon aki boou te aroaro ae te bangaomata. A motikia Atam ma Ewa bwa a na iangoia i bon irouia bwa tera ae raoiroi ke ae buakaka, ao ti a bane ni karawawataaki mani mwin aia motinnano. Irabubua te ririki imwin anne, e iangoia Uean Iuta are Utia bwa e tau ni kareani baika boiarara n te tembora, ma e boni kairua anne. (2Rong. 26:​18, 19) N aron naba anne, a kakoauaa Baritaio ma Tarukaio bwa a tau ni karekea akoaia ae okoro iroun te Atua, tii ibukin ae kanoan Aberaam ngaiia.​—Mat. 3:9.

Ti a otabwaniniaki irouia aomata aika bangaomata ma n iaiangoiia i bon irouia, ao ti kona n rotaki n aroaroia. (IKar. 5:26) Ti kona n iangoia bwa ti tau ni karekea te mwioko teuana, ke e na karaoaki ae okoro nakoira. Ti na kangaa n rarawa n iaiango n aron aei? Te moanibwai, ti riai n ataa ana iango Iehova iai. Ti na buokaki mani booto n reirei aika uoua aika n te Baibara.

Bon Iehova ae baireia bwa tera ae riai n reke iroura. Iangoi katoto tabeua.

• N te babaire ibukin te utu, ao e riai te buu te mwaane n namakinna ae e karineaki irouni buuna, ao e riai te buu te aine n namakinna ae e  tangiraki irouni buuna. (IEbe. 5:33) E riai te buu n namakina tangirana tii irouni buuna. (1Kor. 7:3) E bon riai bwa a na kantaningaiia natiia kaaro bwa a na ongeaba irouia, ao a riai naati n namakina tangiraia irouia aia karo.​—2Kor. 12:14; IEbe. 6:2.

• N te ekaretia, ti riai ni karineia unimwaane aika mwakuri korakora. (1Tet. 5:12) Ma bon akea riaia bwa a na bwabwaotinia taari.​—1Bet. 5:​2, 3.

• E a tia te Atua n angania tautaeka n aomata riaia n rikoa te taekiti mairouia aia aomata, ao ni karineaki irouia.​—IRom 13:​1, 6, 7.

E tatangira Iehova n anganira baika riaon ae ti riai ni karekei. Kioina ngkai taani bure ngaira, ti bon tau ni mate. (IRom 6:23) Ma e kakabwaiaira ni baika bati Iehova ibukin ana tangira ae koaua ibukira. (TaiAre. 103:​10, 11) Ti karekei mairouna kakabwaiaara ke mwiokoara ibukin ana akoi ae rianako.​—IRom 12:​6-8; IEbe. 2:8.

Tarataraiko man aroaroia kaain te aonnaba. Ti kona n aki namakinna ae ti a iangoia bwa ti riai ni karekea ae bati riki nakoia tabemwaang. E kaota Iesu aroni kai rikiraken te iango anne, ngke e kamanena te kabotau ibukia taani mwakuri ake a kabooaki n teuana te tenariati. A kaman uti ni mwakuri n te moaningabong tabeman taani mwakuri, ao a mwakuri i aani kabuebuen taai n uaa e bong, ake temwangina a tii mwakuri teuana te aoa. A kantaningaia naake a utimwaaka bwa e na bubura riki booia ni kaineti ma aia mwakuri ake a tia ni karaoi. (Mat. 20:​1-16) E kamanena te kabotau aei Iesu, ni kaotia iai nakoia taan rimwina ae a riai n rau nanoia ni baike e kukurei ni katauraoi te Atua.

Kakaitau ao tai kabinekaau. (1Tet. 5:18) Kakairi iroun te abotoro Bauro, ae e aki tuatua buokana irouia taari i Korinto, e ngae ngke e kona naba ni karaoa anne. (1Kor. 9:​11-14) Ti riai ni kakaitau ni kakabwaia nako aika ti karekei ao n rarawa ni kabinekaau.

Karikirakea te nanorinano. Ngkana iai te aomata ae e rangi ni kabatiaa iaiangoana i bon irouna, e kona n namakinna ae e tau n reke irouna ae bati riki. Te nanorinano boni bwainnaorakian te aeka n iango ane boitin anne.

 E katea te katoto ae raoiroi te burabeti are Taniera ni kaotiotan te nanorinano. Ngkai e nako man te utu ae kakawaki, e baaraoi, e wanawana, ao e konabwai, e kona ni kairaki iai bwa e na iangoia ae e tau ni karaoaki te bae e okoro ibukina ke ni karekei mwioko aika okoro. (Tan. 1:​3, 4, 19, 20) Ma e bon teimatoa n nanorinano Taniera, ao ibukin anne e a rangi ni kakawaki iai iroun Iehova.​—Tan. 2:30; 10:​11, 12.

Ti bia rarawa nakon te bangaomata ao n aki iaiangoira i bon iroura, aika aroaro aika taabangaki n te aonnaba aei. Ma ti bia teimatoa ni karekea kimwareireira ni kakabwaia nako aika e anganira Iehova rinanon ana akoi ae rianako.