1. A kangaa ni baireaki raoi ana aomata Iehova n te moan tienture?

 NGKANA e angania ana aomata Iehova mwiokoaia, e kantaningaiia bwa a na karaoia n te aro ae baireaki raoi. (1Kor. 14:33) N te katoto, bon nanon te Atua bwa e na tataekinaki te rongorongo ae raoiroi n te aonnaba ni kabutaa. (Mat. 24:14) E mwiokoa Iesu Iehova bwa e na kaira te mwakuri anne. Ao e taraia raoi Iesu bwa e na karaoaki n te aro ae baireaki raoi. N te moan tienture ngke a a tei ekaretia n taabo aika kakaokoro, ao a mwiokoaki unimwaane bwa a na anga te kaetieti ao a na kairiri. (Mwa. 14:23) E kaainaki te rabwata n unimwaane are i Ierutarem irouia abotoro ao unimwaane, ake a karaoi babaire ibukia ekaretia nako ake a kantaningaaki bwa a na ongeaba iai. (Mwa. 15:2; 16:4) Ibukin ongeabaia nakoni kaetieti ake a karekei, “a teimatoa ni kakorakoraaki taian ekaretia n te onimaki, ao e a rarakarake mwaitiia kaaia.”—Mwa. 16:5.

2. E kangaa Iehova ni katauraoa te kairiri ao te amwarake n taamnei man 1919?

² E teimatoa naba Iehova ni baireiia raoi ana aomata ni boong aikai. Man 1919 ao e kabongana Iesu te kurubu ae uarereke ae kaainaki irouia taari mwaane aika kabiraki, bwa a na bairea raoi te mwakuri n uarongorongo ao ni katauraoa te amwarake n taamnei nakoia taan rimwina. a (Ruka 12:42) E oti  raoi bwa e kakabwaiaa Iehova aia mwakuri kaain te kurubu anne.—Ita. 60:22; 65:13, 14.

3-4. (a) Taekina te katoto ibukini kakabwaiaakira ngkana ti baireaki raoi. (b) Tera ae ti na rinanona n te kaongora aei?

³ Ti na bon aki kona ni karaoa te mwakuri are e mwiokoira iai Iesu bwa ti na karaoia, ngke arona bwa ti aki baireaki raoi. (Mat. 28:19, 20) N te katoto, ngke arona bwa a aki baireira taari mwaane nakon aonon nako ara ekaretia ake ti na uarongorongo iai, ao ane ti nang uarongorongo ngkanne n taabo ake ti bon tangiri. A kona n okioki karaoan aono tabeua irouia taan uarongorongo aika bati, ao aono ake tabeua a a bon aki karaoaki. Ko kona n iangoi riki aanga tabeua ake ti kakabwaiaaki iai ngkana ti baireaki raoi?

⁴ N aron Iesu ni baireiia taan rimwina ni menana i aon te aba, e teimatoa naba ni baireiia ana aomata te Atua ni boong aikai. N te kaongora aei, ao ti na rinanon ana katoto Iesu ao aron ara botaki ni kakairi irouna. Ti na maroroakina naba arora ni kona ni kaota onimakinan ana botaki Iehova.

E KAKAIRI ARA BOTAKI N ANA KATOTO IESU

5. Tera te anga teuana ae ti kakairi iai n ana katoto Iesu? (Ioane 8:28)

⁵ E reiakina te bae e na karaoia Iesu ao ae e na taekinna, mairoun Tamana are i karawa. N aron are e karaoia Iesu, e kabotoi naba ana reirei ibukin te aroaro ni maiu ana botaki Iehova ao ana kairiri i aon Ana Taeka te Atua. (Wareka Ioane 8:28; 2Tim. 3:16, 17) Ti aki toki ni kauringaki bwa ti na wareka Ana Taeka te Atua ao ni maiuakinna. Ti kangaa ni kakabwaiaaki ngkana ti kakairi n te reirei ni kairiri aei?

6. Tera te anga teuana ae kakawaki ae ti kakabwaiaaki iai man te ukeuke n reirei n te Baibara?

⁶ Ti rangi ni kakabwaiaaki ngkana ti ukeuke n reirei n te Baibara ao ni kamanenai ara boki ni Kristian ao baika katauraoaki. N te katoto, ti a kona ni kabotaui ana reirei te Baibara ma te kairiri are ti karekea man ara botaki. Ngkana ti noria bwa e boto i aon te Baibara te kairiri are ti karekea, ane e na korakora riki onimakinan ana botaki Iehova iroura.—IRom 12:2.

7. Tera are e uarongorongoa taekana Iesu, ao e kangaa ana botaki Iehova ni kakairi n ana katoto?

⁷ E tataekina “te rongorongo ae raoiroi ae taekan ana Tautaeka n Uea te Atua” Iesu. (Ruka 4:43, 44) E tua naba Iesu nakoia taan rimwina bwa a na uarongorongoa taekan te Tautaeka n Uea. (Ruka 9:1, 2; 10:8, 9) A bane kaain ana botaki Iehova ni boong aikai n uarongorongoa te Tautaeka n Uea, n aki ongeia bwa a mena ia ke mwaitira mwiokoaia i nanon ana botaki Iehova.

8. Tera ae ti kakabwaiaaki iai?

⁸ Ti kakabwaiaaki ngkai ti kona n tataekina te koaua ibukin Ana Tautaeka n Uea te Atua nakoia tabemwaang! A aki kona aomata ni kabane ni karekea te kakabwaia anne. N te katoto, ngke e mena Iesu i aon te aba, ao e aki kariaia bwa a na tataekina te koaua ibukina taimonio. (Ruka 4:41) Ni boong aikai, ao te aomata ae e kan uataboa te mwakuri ni minita ma ana aomata Iehova, e riai n tau nakon te kakabwaia anne. Ti kaota ara kakaitau ae bati n te kakabwaia anne n arora n uarongorongo n taabo ao n taai ake ti kona iai. N aron Iesu, tiara bon unikan ao tebotebokani koraan te koaua ibukin te Tautaeka n Uea i nanoia aomata.—Mat. 13:3, 23; 1Kor. 3:6.

9. E kangaa ana botaki Iehova ni kaota aran te Atua?

⁹ E kaota Iesu aran te Atua. E taku Iesu n ana tataro nakon Tamana are i karawa: “I a tia ni kaota aram.” (Ioa. 17:26) N aron Iesu, e kabanea naba ana konaa ana botaki Iehova ni buokiia aomata bwa a na ataa aran te Atua. E  kaotaki raoi aei n te Baibara ae Tabu ae te Rairai ae te Aonnaba ae Boou ngke e a kaoka aran te Atua nakon nnena ae riai. E a tauraoi ngkai te Baibara aei ae bwanin ke mwakorona n taetae aika raka i aon 270. N te Bukinibaa A4 ao A5 n te rairai aei, ao ane ko na kunei rongorongo ni kaineti ma kaokan aran te Atua n te Baibara. N te Bukinibaa C n te Baibara n Ingiriti ae te Study Bible ao a katauraoaki bwaai ni kakoaua aika bati, ae e riai n oti aran te Atua 237 te tai n te Baibara ae te Koroboki ni Kristian ae Tabu n te Taetae ni Kuriiti.

10. Tera reireiam man rongorongon te aine ae maeka i Myanmar?

¹⁰ N aron Iesu, ti kani buokiia naba aomata aika bati bwa a na ataa aran te Atua. Ngke e a ataa aran te Atua temanna te aine i Myanmar ae 67 ana ririki ao a tiinako raninmatana ao e taku: “I a tibwa ongo ngkai ae Iehova aran te Atua. . . . Ko reireinai te bwai ae moan te kakawaki ae I tuai n ataia mai mwaina.” N aron ae oti n te rongorongo aei, e kona ataakin aran te Atua ni bita maiuia aomata aika raoiroi nanoia.

TEIMATOA NI KAOTIOTA ONIMAKINAN ARA BOTAKI

11. A na kangaa unimwaane ni kaota onimakinan ana botaki Iehova? (Nora naba te taamnei.)

¹¹ Tera te anga teuana ae a kona iai unimwaane ni kaota onimakinan ana botaki te Atua? Ngkana a karekea te kaetieti, a riai unimwaane ni karaua raoi ni warekia ao ni kabanea aia konaa ni kakairi iai. N te katoto, a aki tii karekea te kairiri ni kaineti ma aroni karaoani mwiokoaia ibukini bobotaki ao aroia n tataro ibukia kaain te ekaretia, ma aroia naba n tabeakinia ana tiibu Kristo. Unimwaane aika kakairi n ana kaetieti te Atua a buokiia naake a mena i aan aia tararua n namakinna ae a tabeakinaki raoi ao n tangiraki.

12. (a) Bukin tera bwa ti riai n ongeaba irouia akana kairiri? (Ebera 13:7, 17) (b) Bukin tera bwa ti riai ni kaatuua ara iango i aon aroaroia aika raraoi akana kairiri?

¹² Ngkana ti anganaki te kaetieti mairouia unimwaane, ti riai n tauraoi n ongeaba iai. Karaoan anne, e na bebete riki irouia akana kairiri karaoan aia mwakuri. Ti kaungaaki n te Baibara bwa ti na ongeaba ao n aantaeka irouia akana kairiri. (Wareka Ebera 13:7, 17.) N tabetai e kona ni kangaanga anne. Bukin tera? Ibukina bwa a aki kororaoi mwaane aikai. Ma ngkana ti kaatuua ara iango i aon aroaroia aika bubuaka ao tiaki aika raraoi, ti a buokiia iai naake a riribaira. N te aro raa? Ti nang kamemeerea iai onimakinan ana botaki te Atua iroura, ae te bwai ae a tangiria taani kakaaitaraira bwa e na riki. Tera te bwai ae ti kona ni karaoia bwa ti aonga n atai aia kewe naake a riribaira ao n rarawa nako iai?

TAI KARIAIA TABEMWAANG BWA A NA KAMAMARAA ONIMAKINAN ANA BOTAKI TE ATUA IROUM

13. A kangaa taan riribaa te Atua ni kataia ni kabuakakaa ana botaki?

¹³ A kataia taani kakaitaraa te Atua ni kabuakakai baika raraoi ibukin ana botaki Iehova. N te katoto, ti reiakinna man te Baibara bwa e kantaningaiia Iehova taan taromauria bwa a na itiaki n rabwataia, n aroaroni maiuia, ao n aia onimaki. E taekinna bwa ane e kakaraoa ae buakaka, e na kamwawaaki man te ekaretia. (1Kor. 5:11-13; 6:9, 10) Ti ongeaba nakon ana tua te Baibara anne. Ma a kataia taani kakaaitara ni kabongana te tua anne ni bukinira iai bwa ti tuamatoa, ti momotikitaeka, ao ti aki tatangira.

14. Antai raoi ae e taekini karaki aika aki koaua ibukin ana botaki Iehova?

¹⁴ Kinaa raoi te tia kakaaitara. Bon Tatan te Riaboro are e taekini karaki aika aki koaua. Boni ngaia “taman te kewe.” (Ioa. 8:44;  KBwaai 3:1-5) Ngaia are ti riai ni kantaningaa Tatan bwa e na kabonganaia taani boutokaia n tataekini karaki aika aki koaua ibukin ana botaki Iehova. E oti koauan aei n te moan tienture.

15. Tera are a karaoia mataniwin Aaro nakon Iesu ma taan rimwina?

¹⁵ E ngae ngke e kororaoi Natin te Atua ae Iesu ao e karaoi kakai aika kamimi, ma Tatan e kamanenaia tabeman aomata ni kabutiinako keewe ibukin Iesu. N te katoto, a tuangia aomata mataniwin Aaro ae e reke mwaakan Iesu ni kanakoia taimonio mairoun “aia tia tautaeka taimonio.” (Mareko 3:22) Ngke e a kaboowiaki Iesu, ao a bukinna mataniwin Aaro bwa e bakannatua ao a anai nanoia te koraki aika bati bwa a na tua kamatean Iesu. (Mat. 27:20) Imwina, ngke a tataekina te rongorongo ae raoiroi taan rimwini Kristo, ao naake a kakaaitaraia “a kakiriwei nanoia aomata . . . ma ni kananobuakaia” bwa a na bwainikirinia Kristian akanne. (Mwa. 14:2, 19) Ni kaineti ma Mwakuri 14:2, ao e kabwarabwaraaki ae kangai n Te Taua-n-Tantani ae bwain Ritembwa 1, 1998, n te taetae n Ingiriti: “A aki rauaki nanoia taani kakaaitaraia I-Iutaia ngke a ribaa te rongorongo, ma a mwananga naba ni kabuakakaia ao ni kataia ni kairiia Tientaire bwa a na kaaitaraia Kristian.”

16. Tera ae ti riai n uringnga ngkana ti ongo karaki aika aki koaua?

¹⁶ E aki toki ana kewe Tatan n te moan tienture. E bon teimatoa naba ni boong aikai ni “burebureiia kaain te aonnaba ni kabutaa.” (TeKao. 12:9) Ngkana ko ongo karaki aika aki raraoi ibukin ara botaki ke ibukia taari mwaane aika kairiri, uringa aroia taan riribaa te Atua n te moan tienture ni karaoa ae aki riai  nakon Iesu ma taan rimwina. A bwainikirinaki ana aomata Iehova ni boong aikai ao a taekinaki keewe ibukia n aron raoi are e a kaman taekinaki n te Baibara. (Mat. 5:11, 12) Ti na bon aki kakoauai karaki aika aki koaua ngkana ti uringa teuare kauekei rongorongo akanne ao ti waekoa ni karaoa te bwai teuana. Tera ae ti riai ni karaoia?

17. Ti na kangaa n rarawa n ongoraei karaki aika aki koaua? (2 Timoteo 1:13) (Nora naba te bwaoki ae “ Arom Ngkana Ko Ongo Karaki Aika Aki Koaua.”)

¹⁷ Rarawa n ongoraei karaki aika aki koaua. E anga kaetieti aika mataata te abotoro Bauro ibukin arora ngkana ti ongo karaki aika aki koaua. E tuanga Timoteo bwa e na “tua nakoia tabemwaang bwa a na aki . . . tabeakini karaki aika aki koaua” ao a na “tai mutiakini karaki aika aki koaua aika kakeai bongani baika tabu.” (1Tim. 1:3, 4; 4:7) E ngae ngkana e kona te teei n anaa te bwai teuana mai i aontano ao ni karinna i wina, ma te aomata ae ikawai ae ataa te kangaanga e na bon aki kona ni karaoa anne. Ti rawa n ongoraei karaki aika aki koaua ibukina bwa ti ataa nibwan te kewe. Ti bon tii ongoraei “taeka aika koaua.”—Wareka 2 Timoteo 1:13.

18. Ti na kangaa ni kaotia bwa ti onimakina ana botaki Iehova?

¹⁸ Ti a tia n rinanoi tii tenua mai buakon aanga aika bati aika e kakairi iai ana botaki te Atua iroun Iesu. Ngkana ko ukeuke n te Baibara, nori aanga riki tabeua ake e kakairi iai ara botaki n ana katoto Iesu. Buokiia tabemwaang n am ekaretia bwa a na karikirakea onimakinan ana botaki te Atua. Ao teimatoa ngkoe ni kaotiota onimakinana iroum, n arom ni beku iroun Iehova ma te kakaonimaki ao n nimta ana botaki are e kamanena ni kakororaoa iai nanona. (TaiAre. 37:28) Ti bia teimatoa ni kawakina kakabwaiaara ae raonakia ana aomata Iehova aika tatangira ma ni kakaonimaki ni koaua.