1. Tera te namakin ae a kabokorakora ma ngaia tabeman ana toro Iehova aika kakaonimaki?

 AI KARAURANANORA ataakin ae e kukurei Iehova irouia ana aomata ni kabane! E kangai te Baibara: “E kukurei Iehova irouia ana aomata.” (TaiAre. 149:4) Ma n tabetai ao a bwara nanoia tabeman ao a a iango ni kangai, ‘E boni kukurei Iehova irou?’ Iai tabeman taan taromauria Iehova aika kakaonimaki aika karakinaki n te Baibara ae a kabokorakora naba n tabetai ma te aeka n iango anne.—1Tam. 1:6-10; Iobi 29:2, 4; TaiAre. 51:11.

2. Antai ae e kukurei irouna Iehova?

² E kaotia raoi te Baibara bwa a kona aomata aika aki kororaoi ni kakukureia Iehova. N te aro raa? Ti riai n onimakina Iesu Kristo ao ni bwabetitoaki. (Ioa. 3:16) N te aro anne ti a kaotia i mataia aomata ae ti a tia n raira nanora man ara bure ao ni berita nakon te Atua bwa ti na karaoa nanona. (Mwa. 2:38; 3:19) E kimwareirei Iehova ngkana ti karaoi mwaneka aikai ibukini karikirakean ara iraorao ma ngaia. E kukurei Iehova iroura ao n iangoira bwa raoraona ni kaan, tii ngkana ti teimatoa ni kabanea ara konaa ni maiuakina ara taetae ni bau ibukin ara katabu.—TaiAre. 25:14.

3. Tera ae ti na maroroakinna ngkai?

³ Bukin tera ngkai a namakinna tabeman bwa e aki kukurei te Atua irouia n tabetai? E kangaa Iehova ni kaota kukureina iroura? Ao e na kangaa te Kristian ni kakoauaa raoi ae e kukurei te Atua irouna?

 BUKINA NGKAI A KONA TABEMAN N NAMAKINNA AE E AKI KUKUREI IEHOVA IROUIA

4-5. Tera ae ti kona ni kakoauaa n aki ongea namakinan ae akea uaara?

⁴ A bati i buakora aika a kabokorakora ma namakinan ae akea uaaia ni moa man uarerekeia. (TaiAre. 88:15) E kangai te tari te mwaane ae Adrián: “I namakinna n taai nako bwa akea uaau. I ururingnga ngke I uarereke ae I tatataro bwa a na karekea te Bwaretaiti au utu, e ngae ngke I kakoauaa ae I aki ngai tau ni karekea.” E taku Tony ae ikawairake bwa tiaki te Kristian: “A aki tutuangai au karo ae a tangirai ke a kakatonga irou. Nanon anne bwa akea te bae I kona ni karaoia ae a na kukurei iai.”

⁵ Ngkana ti kabokorakora n tabetai ma namakinan ae akea uaara, ti kona n ururingnga ae bon Iehova ae katikira nakoina. (Ioa. 6:44) E nora te bae raoiroi iroura ae tao ti aki noria, ao e nora naba nanora. (1Tam. 16:7; 2Rong. 6:30) Ngaia are ti kona ni kakoauaa ngkana e taekinna bwa ti rangi ni kakawaki irouna.—1Ioa. 3:19, 20.

6. Tera ana namakin te abotoro Bauro n ana bure ake rimoa?

⁶ Iai tabeman i buakora aika karaoi bwaai imwain reiakinan te koaua, ae a teimatoa naba n uringaaba iai. (1Bet. 4:3) A kabokorakora naba Kristian aika kakaonimaki ma tangiran te bure. E kabuakakako nanom? Ngkana eng, kabebetea nanom n ataakin ae a kabokorakora naba ana toro Iehova aika kakaonimaki ma te namakin anne. N te katoto, e namakinna te abotoro Bauro bwa e kananoanga ngke e iaiangoi aki kororaoina. (IRom 7:24) E koaua ae e a tia Bauro n raira nanona man ana bure ao ni bwabetitoaki. Ma e bon teimatoa naba n iangoia i bon irouna bwa “te kabanea ni mangori i buakoia abotoro” ao “karotoia” taani bure.—1Kor. 15:9; 1Tim. 1:15.

7. Tera ae ti riai n ururingnga ni kaineti ma ara bure ake rimoa?

⁷ E berita Tamara are i karawa bwa e na kabwarai ara bure ngkana ti raira nanora. (TaiAre. 86:5) Ngaia are ngkana ti nanokawaki ni koaua n ara bure ake ti karaoi rimoa, ti kona ni kakoauaa ana taeka Iehova ae e a tia ni kabwarai ara bure.—IKoro. 2:13.

8-9. Ti na kangaa n tokanikai i aon namakinan ae ti aki kona ni kakukureia Iehova?

⁸ Ti bane ni kani beku iroun Iehova n aron ara kabanea ni konaa. Ma a namakinna tabeman ae a aki kona ni kakukureia. E kangai te tari te aine ae Amanda: “I iaiangoia bwa anganakin Iehova au kabanea ni konaa, e nanonaki iai bwa I riai ni karaoa riki ae bati n taai nako. N angiin te tai I kantaningaa ae riaon au konaa. Ngkana e aki koro nanon te baere I kantaningaia, I a iangoia naba bwa e a un Iehova irou, n aron naba ae I namakinna.”

⁹ Ti na kangaa n tokanikai i aon namakinan ae ti aki kona ni kakukureia Iehova? Uringnga are e aki matoatoa Iehova ke e kangaanga bitakina. E tuai mani kairoroira bwa ti na karaoa ae riaon ara konaa. E kakaitau ni baika ti karaoi ibukina, ngkana ti karaoa ara kabanea n tamaroa. Iangoiia naba naake a karakinaki n te Baibara ake a beku iroun Iehova ma nanoia ni kabane. Iangoa Bauro. E kabanea korakorana ma te ingainga i nanon ririki aika bati, ao e mwamwananga iraua te maire ao e katei ekaretia aika bati. Ma ngke e a tiatianaki ana konabwai n uarongorongo, e nanonaki ngkanne bwa e a aki kukurei te Atua irouna? Tiaki ngaia. E teimatoa ni karaoa are e konaa ao e kakabwaiaa Iehova. (Mwa. 28:30, 31) N aron anne, e kona ni kakaokoro mwaitin are ti angan Iehova n te tai teuana ma teuana. Ma e kakawaki riki irouna bukini karaoana iroura. Ti na nori aanga tabeua ae kaotia iai Iehova bwa e kukurei iroura.

 E KANGAA IEHOVA NI KAOTIA BWA E KUKUREI IROURA?

10. Ti na kangaa n ongo ae e kukurei Iehova iroura? (Ioane 16:27)

¹⁰ Rinanon te Baibara. E tatangiria Iehova ni kaota kukureina irouia ake e tangiriia. E kaotaki n te Baibara taai aika uoua ake E tuanga iai Iesu ae boni ngaia Natina ae E tangiria ao E kakatonga irouna. (Mat. 3:17; 17:5) Ko kan ongo naba bwanaan Iehova ni karaua nanom bwa e boni kukurei iroum? E aki taetae nakoira Iehova mai karawa, ma e taetae nakoira rinanon te Baibara. Ti kona n ongo bwanaan Iehova ae e kukurei iroura ngkana ti wareki ana taeka Iesu ake n taian Euangkerio. (Wareka Ioane 16:27.) E kaotiotii aroaron Tamana Iesu n te aro ae kororaoi. Ngaia are ngkana ti wareki ana taeka Iesu ni kaota kukureina irouia taan rimwina aika kakaonimaki e ngae ngke a aki kororaoi, ti kona naba iai ni kataamneia Iehova n taekin taeka akanne nakoira.—Ioa. 15:9, 15.

11. Ngkana ti rinanoni kataaki, e aera ngkai e aki nanonaki iai bwa e aikoa kukurei Iehova iroura? (Iakobo 1:12)

¹¹ Rinanon ana mwakuri. E ingainga Iehova ni buokira, n arona ni katauraoi baika ti kainnanoi n te itera n rabwata. N tabetai e kariaia Iehova bwa ti na rinanon te rawawata, n aron are e karaoia nakon Iobi. (Iobi 1:8-11) Ngkana a riki kataaki tiaki nanona bwa e aikoa kukurei iroura te Atua. Ma e a reke iai ara tai ni kaota tangiran te Atua ae korakora ao onimakinana. (Wareka Iakobo 1:12.) Ti na namakina ana tararua ae aanaki n te tangira ao ana boutoka ngkana e buokira n nanomwaaka.

12. Tera reireiara man rongorongon Dmitrii?

¹² Iangoa te tari te mwaane i Atia ae Dmitrii. E bua ana mwakuri ni kareketianti ao e aki te roko n reke ana mwakuri i nanon namwakaina aika bati. Ngaia are e a iangoia bwa e na kabatiaa riki ana tai n te mwakuri ni minita, ni kaotia bwa e onimakina Iehova. Ai iraua te namwakaina ao e bon tuai naba man reke ana mwakuri. E a manga bwaka n aoraki n te aro are e a aki kona n teirake man ana kainiwene. E a iangoia bwa e a aki tau n riki bwa te buu ao te karo ngaia, ao e a namakinna ae e aikoa kukurei Iehova irouna. N te tairiki teuana ao e a korea kanoan Itaia 30:15 natina te aine ae kangai: “E na reke korakorami ngkana kam teimatoa n rau ao n onimaki.” E uotia nako rarikin ana kainiwene ao e taku, “Daddy,  ngkana ko nanokawaki, ururinga te kibu aei.” E uringa anne Dmitrii ao e kaitaua Iehova ngkai a teimatoa ana utu n reke kanaia ae tau, oneaia, ao mwengaia. E taku teuaei: “Te bwai ae I riai ni karaoia, N na teimatoa n rau ao n onimakina Atuau.” Ngkana ko kaitiboo ma te aeka ni kataaki anne, ko kona n onimakinna ae e bon tabeakiniko Iehova ao e na buokiko n nanomwaaka.

13. Antai ae e kona ni kamanenaia Iehova ni kaota iai kukureina iroura, ao n te aro raa?

¹³ Rinanoia taari n te onimaki. E kamanenaia Iehova taari n te onimaki ni kaotiota iai kukureina iroura. N te katoto, e kona ni kairiia tabemwaang bwa a na taekin taeka aika kaungaunga n te tai ae riai. E riki anne nakon te tari te aine temanna i Atia ngke e rinanon te rawawata ae korakora. E bua ana mwakuri ni kareketianti ao e a rangi ni kakaiaki aorakina. Ao buuna e a manga karaoa te bure ae kakaiaki ao e a kakerikaakaki mani mwiokoana ae te unimwaane n te ekaretia. E taku neiei: “I aki ataia bwa e aera e a riki aei. I a iangoia bwa tao iai au bure iroun Iehova ao e aikoa kukurei irou.” E a bubutiia Iehova neiei bwa e na kaotia nakoina bwa e boni kukurei irouna. E kangaa Iehova ni karaoa anne? E taku neiei, “A maroro ma ngai unimwaanen te ekaretia ao ni karaua nanou bwa e bon tangirai Iehova.” Imwina e a manga bubutiia riki Iehova ana ibuobuoki. E taku neiei, “Ni bon te bong naba anne, e a roko au reta mairouia taari n te ekaretia. Ngke I wareki aia taeka aika kabebetenano, I a namakinna ae e bon ongo Iehova irou.” Eng, e aki toki Iehova ni kaota kukureina iroura rinanon aia taeka n akoi tabemwaang.—TaiAre. 10:17.

14. Tera te anga riki teuana ae kaotia iai Iehova bwa e kukurei iroura?

¹⁴ E kaota naba kukureina iroura Iehova rinanoia taari n te onimaki ngkana a anganira  te reirei ni kairiri ae ti kainnanoia. N te katoto, n te moan tienture ao e kabongana te abotoro Bauro Iehova ni korei reeta aika 14 nakoia taari n te onimaki. Kanoan reeta akanne bon reirei ni kairiri aika matoa man aanaki n te tangira. Bukin tera Iehova ngke e kaira Bauro bwa e na korei reirei ni kairiri aikai? Iehova bon te Tama ae tatangira ao e kani kaetiia natina aika ‘e kukurei irouia.’ (TaeRab. 3:11, 12) Ti kona ni kakoauaa ae e kukurei iroura te Atua ngkana ti karekea te reirei ni kairiri ae aanaki n te Baibara, ao tiaki ibukina bwa e aki kukurei iroura. (Ebera 12:6) Tera riki ae oti iai bwa e boni kukurei iroura Iehova?

TE BWAI NI KAKOAUA RIKI AE E BONI KUKUREI IROURA IEHOVA

15. E anga taamneina ae raoiroi Iehova nakoia antai, ao bukin tera bwa ti kona ni kakoauaa iai bwa e kukurei iroura?

¹⁵ E anganga taamneina ae raoiroi Iehova nakoia akana e kukurei irouia. (Mat. 12:18) Ti kona n titirakinira ni kangai, ‘I a tia ni kona ni kaotiotii tabeua uaan taamnein te Atua i nanoni maiuu?’ Ko noria bwa ko a kona riki n taotaona nanom nakoia aomata ngkai nakon are ngke ko tuai ni kinaa Iehova? Ni koauana ngkana ko kabatiaa reiakinan aroni kaotiotan uaan taamnein te Atua, ane ko na kai kakoauaa riki ae e boni kukurei Iehova iroum!—Nora te bwaoki ae “ Uaan te Taamnei ae Raoiroi Bon . . .”

16. Antai ae e kamanenaia Iehova n tataekina te rongorongo ae raoiroi, ao tera am namakin iai? (1 I-Tetaronike 2:4)

¹⁶ E mwiokoiia naake e kukurei irouia Iehova n te rongorongo ae raoiroi. (Wareka 1 I-Tetaronike 2:4.) Nora aron te tari te aine temanna ae Jocelyn ni kakabwaiaaki man tibwaakin te rongorongo ae raoiroi nakoia tabemwaang. N te bong teuana, ao e a uti ma te rawawatannano Jocelyn. E taku: “I namakinna ae akea te bae I konaa. Ma I bwaiania n te tai arei ao au bong n nakonako. Ngaia are I a tataro ao I a nako n nakonako.” E kaitiboo n te ingabong anne Jocelyn ma Mary, ae te aine ae akoi ao e butimwaea te reirei n te Baibara. Tabeua te namwakaina imwina ao e a taekinna Mary ae e tataro nakon te Atua ibukini buokana ngke e a karebwerebwe naba Jocelyn. Ngkana e ururinga te baei Jocelyn ao e taku, “I namakinna ae ai aron ae kangai Iehova nakoiu, ‘I kakatonga iroum.’” E koaua ae a na aki bane aomata ni kukurei n ara mwakuri  n uarongorongo. Ma ti kona ni kakoauaa raoi ae e kukurei Iehova ngkana ti kabanea ara konaa n tibwaa te rongorongo ae raoiroi nakoia tabemwaang.

17. Tera reireiam man ana taeka Vicky ibukin te kaboomwi? (Taian Areru 5:12)

¹⁷ E kamanena Iehova kakawakin te kaboomwi nakoia ake e kukurei irouia. (1Tim. 2:5, 6) Ma tera arora ngkana e rawa nanora ni kakoauaa ae e kukurei Iehova iroura, e ngae ngke ti onimakina te kaboomwi ao ti a tia ni bwabetitoaki? Uringnga are ti aki kona n onimakin ara namakin n taai nako, ma ti boni kona n onimakina Iehova. E iangoiia naake a onimakina te kaboomwi bwa aomata aika raoiroi i matana ao e berita bwa e na kakabwaiaia. (Wareka Taian Areru 5:12; IRom 3:26) E buokaki Vicky ni kananoan ana iango i aon te kaboomwi. N te bong teuana imwini kananoan ana iango i aon te kaboomwi, ao e a kakoauaa aei neiei: “E a tia Iehova n taotaona nanona nakoiu i nanon te tai ae maan. . . . Ma ai aron ae I kakangai nakoina: ‘E aki rangi n tau am tangira nakoiu. E aki naba rabunaki au bure n ana karea Natim.’” Ni kananoan ana iango i aon te bwaintituaraoi ae te kaboomwi ao e a namakina tangirana iroun Iehova. Ti kona naba n namakina tangirara iroun Iehova ao n ataia ae e kukurei iroura ngkana ti iaiangoa te kaboomwi.

18. Tera ae ti kona ni kakoauaa ngkana ti teimatoa n tangira Tamara are i karawa?

¹⁸ E ngae ngkana tao ti kataia ni maiuakini baike a a tibwa taekinaki, ma ti boni kona naba ni bwarannano n tabetai ao n raraoma bwa e kukurei Iehova iroura ke e aki. Ngkana e riki anne, uringnga are e kukurei irouia “te koraki ake a teimatoa n tangiria.” (Iak. 1:12) Ngaia are teimatoa ni kaania Iehova ao nora aroni kukureina iroum. Ururingnga n taai nako ae e “aki raroa mairoura n tatabemanira nako” Iehova.—Mwa. 17:27.