1-2. Tera ae e riai ni karaoia temanna imwain ae e na bwabetitoaki?

 I NANON nimaua te ririki n nako, ao e raka i aon teuana te mirion aomata aika bwabetitoaki ao n riki bwa Ana Tia Kakoaua Iehova. A bati mai buakoia aika ai aron te tia rimwini Kristo n te moan tienture are Timoteo, ae a reireinaki te koaua “mangke [a] merimeri.” (2Tim. 3:14, 15) Tabemwaang a reiakina taekan Iehova ngke a a ikawai, ao tabeman ngke a a boni kara. N taai aika nako ao iai te aine temanna ae reirei n te Baibara ma Ana Tia Kakoaua Iehova ae e bwabetitoaki ngke 97 ana ririki!

² Ngkana ko reirei n te Baibara ke ngkana ko kaikawaaki irouia am karo aika taani Kakoaua, ko iaiangoa te bwabetito? Anne bon te tia ae rangi n raoiroi! Ma imwain ae ko bwabetitoaki, ko riai moa ni katabua maium nakon Iehova. E na kabwarabwaraaki n te kaongora aei bwa tera ae nanonaki n te katabu. E na buokiko naba n nora bukina ngkai ko aki riai n tabwarabwara nakon te mwaneka anne, n ikotaki naba ma te bwabetito, ngkana ko a bon tauraoi nako iai.

TERA TE KATABU?

3. Aanga katoto man te Baibara ibukia aomata ake a katabuaki nakon Iehova.

³ E kaotaki n te taeka ae katabu n te Baibara taekan te bwai ae kaokoroaki ibukin te kantaninga ae tabu. Bon te natannaomata ae katabuaki nakon Iehova tibun Iteraera. Ma iai tabeman mai buakon te natannaomata aei ae a katabuaki nakon Iehova n te aro ae okoro. N te katoto, e kabongana Aaron “te kanikina ae tabu ibukin te katabu” ae te mwakoro ni biti ae raneanea ae te koora i moani bwarana. E oti n te mwakoro ni biti  anne bwa e kaokoroaki ibukin te beku ae okoro, ae aia ibonga ae rietata tibun Iteraera. (NakIbo. 8:9) A katabuaki naba nakon Iehova n te aro ae okoro taian Natiraite. Te taeka ae “Natiraite” are reke man te taeka n Ebera ae nazirʹ, e nanonaki iai “Temanna ae Kaokoroaki” ke “Temanna ae Katabuaki.” A riai taian Natiraite ni maiuakini kaetieti ake a koreaki ibukia n te Tua Rinanoni Mote.—WarIte. 6:2-8.

4. (a) Ngkana ko katabua maium nakon Iehova, tera ae e nang moanibwai ni maium? (b) Tera nanon ae ko na ‘kakeako i bon iroum’? (Nora naba te taamnei.)

⁴ Ngkana ko katabua maium nakon Iehova, ko a rineia bwa ko na riki bwa te tia rimwin Iesu Kristo, ao ni moanibwaia karaoan nanon te Atua i nanoni maium. Tera ae irekereke ma te katabu ni Kristian? E taku Iesu: “Ngkana iai ae e kan rimwiu ao ke e kakeaa boni ngaia.” (Mat. 16:24) Te kibuntaeka ni Kuriiti ae rairaki bwa “kakeaa boni ngaia” e kona naba n rairaki bwa “ko a aki maiu i bon ibukim.” Ngkana ana toro Iehova ngkoe ae ko a tia ni katabua maium nakoina, ko na riai ni kona n rarawa nakon te bwai ae kauntaba ma nanona. (2Kor. 5:14, 15) E nanonaki naba n anne te rarawa nakon “ana mwakuri te rabwata” n aron te wene ni bure. (IKar. 5:19-21; 1Kor. 6:18) E na kangaanga riki maium man aeka ni kaetieti aikai? E na aki riki anne ngkana ko tangira Iehova ao ko kakoauaa raoi ae boni kabwaiam ana tua. (TaiAre. 119:97; Ita. 48:17, 18) E kangai te tari te mwaane ae Nicholas, “Ko kona n iangoi ana kaetieti Iehova bwa kaanga oon te matawariki ae tukiko mani karaoan te bae ko kani karaoia, ke kaanga oon te raian ae kamanoko man te kabuanibwai.”

5. (a) N te aro raa ae ko katabua iai maium nakon Iehova? (b) Tera te kaokoro i marenan te katabu ao te bwabetito? (Nora naba te taamnei.)

⁵ N te aro raa ae ko katabua iai maium nakon Iehova? Ko berita nakoina n te tataro bwa  ko na taromauria n tii ngaia ao ko na moanibwaia nanona ni maium. Ni koauana, ko a berita iai nakon Iehova bwa ko na teimatoa n tangiria “ma nanom ni kabane, maium ni kabane, am iango ni kabane, ao korakoram ni kabane.” (Mareko 12:30) Ko karaoa am katabu tii i marenam ma Iehova, ao akea ae e noriko. Ni kaitaraan anne, te bwabetito ko karaoia i mataia aomata ni kaotia nakoia bwa ko a tia ni karaoa am katabu. Bon te taetae ni bau ae tabu am katabu anne, ao ko riai ni kakororaoa raoi nanona n aron ae e kantaningaia naba Iehova.—TeMin. 5:4, 5.

BUKIN TERA BWA KO KATABUA MAIUM NAKON IEHOVA?

6. Tera ae kaira te aomata bwa e na katabua maiuna nakon Iehova?

⁶ Bukina ae kakawaki ngkai ko katabua maium nakon Iehova, bon ibukin tangirana. E aki aanaki am tangira anne n tii te namakin. Ma e aanaki “n te atatai ae eti” ao “n te ataibwai are e anga taamnein te Atua,” aika baika ko reiakin ibukin Iehova, aika karikirakea tangirana iroum. (IKoro. 1:9) E a tia ni kairiko te reirei n te Baibara bwa ko na kakoauaa ae (1) bon iai Iehova, (2) te Baibara bon ana Taeka ae kaira koreana, ao (3) e kamanena ana botaki ni kakororaoa iai nanona.

7. Tera ae ti riai ni karaoia imwain ae ti katabua maiura nakon te Atua?

⁷ A riai n atai moan reirei n Ana Taeka te Atua naake a katabui maiuia nakon Iehova, ao a na maiuakin ana kaetieti. A kabanea aia konaa n tibwai baike a reiakin nakoia tabemwaang. (Mat. 28:19, 20) E ririkirake tangiran Iehova irouia, ao e korakora nanoia ni kan taromauria n tii ngaia. Anne naba ae riki nakoim? Ngkana iai iroum te aeka n tangira aei,  ko na aki iangoa te katabu ao te bwabetito bwa te bwai ae ko karaoia tii ibukini kakukureian am tia reirei n te Baibara ke am karo, ao ko na aki naba iangoia bwa te bwai ae ko karaoia tii ibukina bwa a karaoia raoraom.

8. E kangaa te kakaitau ni buokiko ni motinnanoia bwa ko na katabua maium nakon Iehova? (Taian Areru 116:12-14)

⁸ Ngkana ko iaiangoi bwaai ni kabane aika e a tia Iehova ni karaoi ibukim, ane ko na kani katabua maium nakoina. (Wareka Taian Areru 116:12-14.) E bon eti te Baibara ngke e arana Iehova bwa te tia Anga “bwaai n tituaraoi aika raraoi ma bwaintangira aika kororaoi.” (Iak. 1:17) Te kabanea n rianako mai buakoni bwaai n tituaraoi akanne bon ana angakarea Natina are Iesu. Iangoa aron tamaroan te bwaintituaraoi anne! E a tia te kaboomwi anne ni kariaia bwa ko na karekea am iraorao ae kaan ma Iehova. Ao e a tia n anganiko te kantaninga ae te maiu n aki toki. (1Ioa. 4:9, 10, 19) Katabuani maium nakon Iehova bon te anga naba ae te kabanea n tamaroa ae ko kaota iai am kakaitau n te tangira ae korakora are kaotiotaki nakoim, ao ai kakabwaia ake e anganiko Iehova. (TuaKau. 16:17; 2Kor. 5:15) E kaotaki raoi taekan te kakaitau anne n te boki ae Ko Kona ni Kukurei n Aki Toki!, reirei 46 nambwa 4, ae kanoana naba te taamnei ae tenua te miniti maanna ae Angan te Atua Am Bwaintituaraoi.

KO A TAURAOI NAKON TE KATABU AO TE BWABETITO?

9. Bukin tera ngkai e aki riai temanna ni kabotaua ma tabemwaang, ni karaoan ana motinnano ibukin te katabu?

⁹ Ko bae n namakinna bwa ko tuai n tauraoi nakon te katabu ao te bwabetito. Tao ko teimatoa ni kainnanoa kaboraoani maium ma ana kaetieti Iehova, ke tao ko kainnanoa riki te tai ibukini kakorakoraan am onimaki. (IKoro. 2:6, 7) A aki bane n titeboo aron rikirakeia naake a reirei n te Baibara, ao a aki naba titeboo aia ririki ni maiu rooro n rikirake ae a tauraoi iai nakon te katabu ao te bwabetito. Kataia n ota bwa baikara bitaki aika ko kona ni karaoi ao n aki kabotauko ma temanna.—IKar. 6:4, 5.

10. Tera ae ko kona ni karaoia ngkana ko ataia bwa ko tuai n tauraoi nakon te katabu ao te bwabetito? (Nora naba te bwaoki ae “ Ibukia Naake A Kaikawaaki n te Koaua.”)

¹⁰ E ngae naba ngkana ko noria bwa ko tuai n tauraoi ni katabua maium nakon Iehova, ma teimatoa kateia bwa tiam. Tataro nakon Iehova bwa e na kakabwaiaa am kakorakora ni karaoi bitaki aika riai i nanoni maium. (IBir. 2:13; 3:16) Ko kona ni kakoauaa bwa e na bon ongoraea am tataro ao ni kaekaa.—1Ioa. 5:14.

BUKINA NGKAI A TABWARABWARA TABEMAN

11. E na kangaa ni buokira Iehova bwa ti na teimatoa ni kakaonimaki nakoina?

¹¹ Iai tabeman aika a tabwarabwara e ngae ngke a a tauraoi nakon te katabu ao te bwabetito. A bae n iaiango ni kangai, ‘Tera arou ngkana I a manga karaoa te bure ae kakaiaki ao ni kabaneaki man te ekaretia?’ Ngkana anne ae ko maakua, ke e karauaki nanom bwa e na bon anganiko bwaai ni kabane Iehova aika ko kainnanoi bwa ko “aonga n nakonako n te aro ae tau i [matana] ni karekea iai kakukureiana ni bwaai ni kabane.” (IKoro. 1:10) E na kakorakorako naba ni karaoa ae eti. E a tia ni kaotia bwa e kona ni karaoa anne, n arona n tia ni buokiia aika bati ni karaoa ae eti. (1Kor. 10:13) Anne bukina teuana ae bon tii tabeman aika kabaneaki man te ekaretia ni Kristian. E buokiia Iehova ana aomata bwa a na teimatoa ni kakaonimaki.

12. Ti na kangaa ni kona n rarawa nakoni karaoan te bure ae kakaiaki?

 ¹² A bane aomata aika aki kororaoi ni kaririaki nakoni karaoani baika kairua. (Iak. 1:14) Ma ko boni kona n rineia bwa tera ae ko na karaoia ngkana ko kaririaki, anne bon am rinerine. Ni koauana boni ngkoe ae ko bairea aroni maium. E ngae ngke a taku tabeman bwa ko aki kona n taona nanom nakon te kaririaki, ma ko boni kona n reireiniko arom n rarawa nakoni karaoan ae kairua. Ao ngkana a rio naba iango aika bubuaka tabeua, ko kona n rineia bwa ko na aki karaoi. Ngaia are tataro ni katoabong. Kateimatoa am babaire ibukin te ukeuke n reirei n Ana Taeka te Atua. Kaakaei bobotaki ni Kristian. Tataekina am onimaki nakoia tabemwaang. Karaoani mwaneka aikai n taai nako e na anganiko te korakora ni maiuakina am taetae ni bau ibukin am katabu. Ao tai mwaninga ae e na boni buokiko Iehova ni karaoa anne.—IKar. 5:16.

13. Tera ana katoto ae raoiroi Ioteba ae kateia ibukira?

¹³ Ko na kunea bwa e bebete maiuakinan am katabu ngkana ko moantaai n iaiangoi baika ko na karaoi ngkana ko kaririaki. Ti tuangaki n te Baibara taekaia tabeman aomata aika karaoa raoi anne, e ngae ngke a bon aki naba kororaoi. N te katoto, e okioki buuni Botiba ni kabwakabwakaa Ioteba. Ma e a kaman ataa teuaei te bae e riai ni karaoia. Ti tuangaki n te Baibara bwa “e rawa” ao e taku: “N na kangaa ni karaoa te buakaka ae korakora aei ao ni bure nakon te Atua?” (KBwaai 39:8-10) E teretere bwa e ataa te bae e na karaoia Ioteba imwain ae e kataia neiei ni kariria. Anne bukina ae e bebete iai irouna karaoan te bae eti ngke e a kaririaki.

14. Ti na kangaa n reireinira n rarawa nakon te kaririaki?

¹⁴ Ko na kangaa ni kakairi n ana motinnano Ioteba? Ko kona n iaiangoia mangkai bwa tera ae ko na karaoia ngkana ko a kaririaki. Reireiniko ni waekoa n rarawa nakoni baika e ribai Iehova ao tai iaiangoi naba. (TaiAre. 97:10; 119:165) N te aro anne ko na aki bwaka ngkana ko kaririaki. Ko na kaman ataa arom. Ko na kamani bairea te bae ko na karaoia.

15. E kangaa temanna ni kaotia bwa e ‘ingainga n ukoukora’ Iehova? (Ebera 11:6)

¹⁵ Tao ko ataia ae ko a kunea te koaua ao ko a kani beku iroun Iehova ma nanom ni kabane, ma iai te bae e tautaua am katabu ao am bwabetito. Ko kona ni karaoa are e karaoia te  Uea are Tawita. Ko kona ni bubutiia Iehova ni kangai: “Te Atua, nenerai ao ataa nanou. Tuoai ao atai tabeaiangan au iango, ao noria bwa iai i nanou te aro ae karuanikai ke akea, ao kairirai n te kawai ae teimatoa n aki toki.” (TaiAre. 139:23, 24) E kakabwaiaia Iehova ake a “ingainga n ukoukoria.” Ngkana ko uaiakina tiam ae te katabu ao te bwabetito, ko a kaotia iai nakoina bwa ko ingainga n ukoukoria.—Wareka Ebera 11:6.

TEIMATOA NI KAANIA IEHOVA

16-17. A kangaa ni katikaki nakon Iehova naake a kaikawaaki n te koaua? (Ioane 6:44)

¹⁶ E taku Iesu bwa bon Iehova ae katikiia taan rimwina. (Wareka Ioane 6:44.) Iangoa tamaroan te iango anne ao irekerekena ma ngkoe. E nora te bwai ae raoiroi Iehova i nanon temanna ma temanna ao e katikia nakoina. E iangoa temanna bwa ‘ana aomata ae okoro’ ke “ana bwai ae kakawaki.” (TuaKau. 7:6; kbn.) Anne naba ana iango ibukim.

¹⁷ Tao te roro n rikirake ngkoe ae ko kaikawaaki n te koaua. Ko kona n namakinna ae ko bon tii beku iroun Iehova ibukina bwa a beku irouna am karo, ao tiaki ibukina bwa e katikiko nakoina. Ma e kangai te Baibara: “Kaania te Atua, ao ane e na kaaningkami.” (Iak. 4:8; 1Rong. 28:9) Ngkana ko biririmoa ni kaania Iehova ao ane e na manga kaaniko. E aki iangoiko Iehova bwa bon tii kaain te kurubu teuana ngkoe. E katika temanna ma temanna nakoina, n ikotaki naba ma naake a kaikawaaki n te koaua. Ma ngkana iai temanna ae biririmoa ni kaania Iehova ao E na kaania naba n aron ae ti noria n Iakobo 4:8.—Kabotaua ma 2 I-Tetaronike 2:13.

18. Tera ae ti na maroroakinna n te kaongora are imwina? (Taian Areru 40:8)

¹⁸ Ngkana ko katabua maium nakon Iehova ao ni bwabetitoaki, ko a kaotiota iai aroaron Iesu. E kukurei n anga ngaia nakon Tamana bwa e na karaoa are e tangiria mairouna. (Wareka Taian Areru 40:8; Ebera 10:7) Ti na maroroakinna n te kaongora are imwina te bwai ae e na buokiko n teimatoa ni kakaonimaki ni beku iroun Iehova, imwin naba bwabetitoam.