A kona ni kabwaraaki ara bure tii rinanon te karea ni kaboomwi are e kabwakaa Iesu n raraana. (IEbe. 1:7) Ma e kangai te Baibara: “Bwa n taotaonan [nanon te Atua] ao e kabwarai buure ake a karaoaki rimoa,” ae nanonaki iai taai ake imwaini katauraoan te kaboomwi iroun Iesu. (IRom 3:25) E kangaa Iehova ni kona ni karaoa aei ao ni kateimatoa naba kororaoin ana kaetitaeka ae riai?

N ana taratara Iehova ao ai aron ae e a kaman tauraoi te kaboomwi man te tai are e iangoia iai bwa e na iai ‘te kanoa’ are e na kamaiuia aomata aika onimakinna. (KBwaai 3:15; 22:18) E kakoauaa raoi te Atua bwa n te tai are e a tia ni baireia, ao e na boni kukurei Natina are ana rikitemanna ni katauraoa te kaboomwi. (IKar. 4:4; Ebera 10:7-10) Ngke e mena n te aonnaba Iesu bwa te tia tei ibukin te Atua, iai mwaakana ni kabwarai buure imwain ae e kabwakaa te kaboomwi. E kona ni kabwarai aia bure ake a onimaki bwa e ataia ae a na boni bane n rabunaki aia bure n ana karea.—Mat. 9:2-6.