E KANGAANGA iroum bwa ko na katoatai n ukeuke n te Baibara ao n unga iai? E bane n rereke iroura anne n tabetai. Ma iangoi bwaai ake tabeua ake ti katoatai ni karaoi, n aron te tebotebo. E anaa naba te tai te tebotebo ma ko bebete imwina! Ti kona naba n namakina te bebete man te ukeuke n reirei n te Baibara. (IEbe. 5:26) Iangoi tabeua aanga n ibuobuoki aikai:

• Karaoa am babaire. Te ukeuke n reirei n te Baibara bon teuana mai buakoni “bwaai aika kakawaki riki” aika e riai ni karaoi te Kristian. (IBir. 1:10) Ibukini buokam bwa ko na irira am babaire, e aera ko aki katekea n te tabo ae ko kai noria iai n aron te baba ni koroboki ke ni matan am aitibwaoki? Ke e kona naba n ibuobuoki ngkana ko kabeeroa am tai n am tareboon ni kauringko imwain am tai n ukeuke n reirei.

• Bairea am tai ae angaraoi iroum. E bebete riki iroum ngkana ko karaoa te bwai teuana i nanon te tai ae maan ke i nanon te tai ae uarereke? Ko bon ataa te tai ae tamaroa iroum. Kataia ni kaangaraoiko ma am tai n ukeuke. Ngkana e a roko am tai n ukeuke ao e aki unga nanom ni kani karaoia, e aera ko aki karaoia tii i nanon tebwina te miniti? E ngae ngkana ko ukeuke tii i nanon te tai ae uarereke anne, ma ko kona n reiakini baika bati nakon are bon akea. N te tai are ko waakinna iai ane ko na kaungaaki bwa ko na reitianako riki.​—IBir. 2:13.

• Moantaai n rinei atu n reirei aika ko na ukeuke iai. Ngkana ko a tibwa iangoa te bwai ae ko na ukeuke iai n am tai n ukeuke, ko aki ngkanne ‘kabongana raoi am tai.’ (IEbe. 5:16) E aera ko aki korokorei kaongora ke atu n reirei ake ko kan ukeuke i aoia? Ngkana iai te titiraki ae ko aki ota raoi iai, koreia. Ao ni katoaa banen am ukeuke, ko kona ni manga karini riki iango tabeua ibukini baika ko kan ukeuke i aoia.

• Tauraoi ni karaoi bitaki ngkana e riai. Kataia ni karaoi bitaki tabeua, tao n aroni maanin am tai n ukeuke ke atu n reirei aika ko rinei. Te bwai ae kakawaki bwa ko na katoatai n ukeuke, e aki kakawaki bwa n ningai, maanra ke tera ae ko ukeuke iai.

Ti rangi ni kakabwaiaaki ngkana ti katoatai n ukeuke n reirei. Ti a kaaniaki riki iai ma Iehova, ti a wanawana riki, ao ti bebete iai.​—Iot. 1:8.