Ko kani kakabwaiaaki riki man am ukeuke n reirei i bon iroum? Ko kona ni katai aanga n ibuobuoki aikai bwa ko aonga ni kaatuua am iango n am ukeuke:

• Rinea te tabo ae raoiroi. Rinea te tabo ae itiaki ao e oota. Ko kona n tekateka i matan te taibora, ke ko kona n rinea te tabo ae kamwengaraoi i tinaniku.

• Kakaaea te tabo ae bon tii ngkoe iai. E rineia Iesu bwa e na tataro “n te karangaina” n “te tabo ae raroanako.” (Mareko 1:35) Ngkana e aki kona n reke te tabo ae bon tii ngkoe iai, ko kona n tuangia am utu ke kaain am auti am tai n ukeuke n reirei bwa a aonga n aki kamangaoko iai.

• Kaatuua am iango. Tai katabetabeko n te bwai riki teuana. Ngkana ko kabongana am tareboon ke am tablet n ukeuke iai, kanakoa tangina ke bitia nakon te airplane mode bwa ko aonga n aki katabetabeaki ni bwaai riki tabeua. Ao ngkana iai te bwai ae ko uringnga ae ko riai ni karaoia, tii koreia n te beeba ae uarereke bwa ko a karaoia imwina. Ngkana ko a aki kona ni kaatuua am iango, ko kona ni motirawa teutana n nako moa n ririaki ke ni katikii bwain rabwatam.