A a tia taari mwaane n te Betaera ni mwakuria katean te WBBR ae te tabo ni kanakobwanaa i aon Staten Island, i New York i nanon teuana tabun te ririki. Imwini kaitiakan te aba, a a katea te auti ae bubura ibukia taani mwakuri ao te kateitei teuana ae okoro ibukini bwaai ni mwakuri. Ngke e a tia te mwakuri aei, ao a a waaki mwaane aikai ni katomatomai aia bwai ni mwakuri ake a kainnanoi ibukini kamaiuan aia tabo ni kanakobwanaa. Ma iai kangaanga aika riai ni kanakoraoi.

A noria taari mwaane bwa kanimwan te antena ibukin te tabo ni kanakobwanaa bon te bwai ae kangaanga. E kainnanoaki te antena ae 91 te mita abwakina (300 te buuti) bwa e na nim i marenani kaai aika uaai aika kaka 61 te mita abwakia (200 te buuti). E aki nakoraoi karaoana n te moantai. Ma a onimakina ana ibuobuoki Iehova ao e a nakoraoi imwina. E taku Calvin Prosser, ae mwakuri i aon te antena aei, “Ngke arona bwa e nakoraoi kanimwan te antena n te moantai, ti na boni bae ni kamoamoaira iai.” A kamoamoaa Iehova taari n nakoraoin aia mwakuri, ma e aki toki aia kangaanga.

Bon te bwai ae boou te kanakobwanaa n te rerio, ao e aki bebete karekeani baike a kainnanoaki iai. Ngaia are a kamanena taari te transmitter ae 500 te watt korakorana ae e a tia ni kabonganaaki, ae reke n te tabo anne. N oneani mwin are a na kabooa te bwai n taetae, a a kamanena teuana bwain te tareboon. N te tairiki teuana ni Beberuare ao a iangoia taari bwa a na tuoa bwaina ni kabane. A kainnanoa te bae a na katanoataa ngaia are a anenei kunan te Tautaeka n Uea. E ngarengare Ernest Lowe ngke e uringia taari ngke  a anene ao a a tarebooniaki naba iroun te tia Moti ae Rutherford b mai Brooklyn, ngke e ongo aia anene n te rerio, ae tao 25 te kiromita raroaia ma ngaia (15 te maire).

E taku Brother Rutherford, “Katoka ami anene. Titeboo bwanaami ma katamwa aika tatakarua!” A boni bwainrang teutana taari ao a waekoa n tiringnga, ma a kakoauaa raoi bwa a a tauraoi nakon aia moani kanakobwanaa.

Ni Beberuare 24, 1924, n tain te moani kanakobwanaa, ao e taekinna Brother Rutherford bwa e na kamanenaaki te tabo ni kanakobwanaa aei ibukini karaoan te mwakuri are a mwiokoaki iai irouni Kristo ae te Uea. E taekinna bwa manenan te tabo ni kanakobwanaa aei, e na buokiia aomata bwa a na ota n te Baibara ao ni kakawakin te tai ae ti a maeka iai ngkai.

E bon rangi n nakoraoi aia moani kanakobwanaa. E kamanenaaki te tabo ni kanakobwanaa aei i nanon 33 te ririki ni katanoatai aia kaetieti ana aomata Iehova.

N Turai 1924 ao a a ikotaki Taan Reirei n te Baibara ibukin te bwabwaro i Columbus, i Ohio. A roko Taan Reirei n te Baibara man aaba nako, ao a ongoraei kabwarabwara n te taetae n Arabic, n Ingiriti, ni Buranti, n Tiaman, ni Kuriiti, n Hungaria, n Itare, n Lithuania, ni Botukare, n Rutia, n Scandinavia, ao n Ukraine. A katangaki i aon te rerio tabeua kanoan te kaetieti ao a baireaki bwa a na koreaki mwin ribooti ni katoaa bongin te bwabwaro n te Ohio State Journal.

N te Kaabong, Turai 24, ao e raka i aon 5,000 aika a uarongorongo n te kaawa are e na boo iai te bwabwaro. A anganako tao 30,000 booki ao a kairi reirei n te Baibara aika nga ma nga. E arana te bong aei Te Taua-n-Tantani bwa “kanoan te bwabwaro ae rangi ni kakukurei.”

N ana kabwarabwara teuana Brother Rutherford n te Kanimabong, Turai 25 ao e ninikoria ni wareka rongorongoni kabuakakaaia mataniwin Aaro. E taekinna bwa a tukiia aomata mataniwin te tautaeka, Aaro, ao bitineti, man reiakinan te koaua ibukin Ana Tautaeka n Uea te Atua are e na kamanena te Atua ni kakabwaiaia iai aomata. E taekinna naba bwa a kairua mwaane aikai ibukina bwa a boutokaa Aia Botaki te Botannaomata aika ikotaki ao a bukina te Atua bwa aei ana anga  n tautaekana te aonnaba. A kainnanoa te ninikoria Taan Reirei n te Baibara n taekina te rongorongo aei nakoia aomata.

E kakimototoaki n taekinaki ae kangai n Te Taua-n-Tantani ibukin aron rotakia aomata n te bwabwaro: “A oki rikaaki ma korakoran aia onimaki ana taanga ni buaka ae uarereke te Uea aei, ake a botaki n te Bwabwaro i Columbus . . . , ni kona n tokanikai i aoni mwaakan te tia kairiribai ke ana kai ni katebe ae uramwaaka are e na kona ni bakarereiia iai.” E taku Leo Claus, are e kaea te bwabwaro aei: “Ti kitana te runga ma namakinan te ingainga n tibwaa te rongorongo aei n ara aono.”

N Okitobwa, ao a a tibwatibwaa katoton te turaeki ae te Ecclesiastics Indicted Taan Reirei n te Baibara, ae kanoana te baere taekinna Brother Rutherford ibukia mataniwin Aaro. E bane kabutan ana turaeki Frank Johnson n te kaawa ae uarereke ae Cleveland, i Oklahoma, 20 te miniti imwain rokon anaakina irouia taan uarongorongo ake tabeman. E aki tataninga n te tabo ae kai noraki iai ibukina bwa a a kakaaea mwaanen te kaawa anne ake a un ibukin ana mwakuri n uarongorongo. E iangoia Brother Johnson bwa e na karabaa i nanon te umwantabu ae uakaan. Ngke e noria bwa akea kaaina, e a katikui naba katoton te turaeki ae te Ecclesiastics Indicted i nanon ana Baibara te mitinare ao ni kaintekateka nako. E kabaitiia ni karaoa aei. Ngke e noria bwa e reke riki ana tai, e a manga karaoa naba aron aei n umwantabu riki aika uoua.

E kabaitiia Frank n oki rikaaki nakon te tabo are e na anaaki iai. E karabaa i akun te tabo ni bwaa, ao n tataraiia mwaane ake a kakaaea. A buti mwaane aikai rirarikina ma a aki noria. Ngke a nako raoi ao a a roko naba taari ake raon Frank n uarongorongo, ake a mwakuri i rarikin te aono anne, n anaia ao a butinako.

E taku temanna te tari te mwaane, “Ngke ti kitana te kaawa ao ti buti rirarikin umwantabu ake tenua. Iai tao 50 aomata aika a teitei i tinaniku i matan taian umwantabu akanne. Tabeman a wareware n te turaeki, ao ake tabeman a kateitea te turaeki i eta bwa e na noria te mitinare. Ti kitana raoi ikekei imwain rikin te kangaanga! Ma ti karabwaa Iehova ae Atuara ngkai e buokira bwa ti na ataa te bae ti na karaoia bwa ti aonga ni karokoa te rongorongo ao n aki mwane.”

A ninikoria naba n uarongorongo Taan Reirei n te Baibara n aaba tabeua. E uarongorongo Józef Krett ae mena i meangini Buranti nakoia taani keni koora aika kaaini Poland. E baireaki bwa e na anga te kabwarabwara ae atuna “E a Kaan Mangautiia Maate.” Ngke a tibwaaki beeba ni kakao nakoia kaain te kaawa, ao e a kauringia naba ana aomata te mitinare n te tabo anne bwa a na aki kaea. Boni kaitaraan raoi ana kauring te baere riki. E raka i aon 5,000 aomata aika kaea te kabwarabwara, n ikotaki naba ma te mitinare! E kaoa te mitinare Brother Krett bwa e na kabwarabwaraa ana koaua, ma e rawa. E tibwai ana maekatin ni kabane Brother Krett nakoia aomata ake e uarongorongo nakoia, bwa e ataia ae a taka ibukin Ana Taeka te Atua.—Amota 8:11.

I aon Aberika, ao e uota te rongorongo ae raoiroi Claude Brown nakon te kaawa ae Gold Coast, ae kinaaki ngkai bwa Ghana. E waekoa ni buta te koaua n te aba anne man ana kabwarabwara ao ni booki ake e tibwai. E roko naba John Blankson are reirei ibukini bwainnaoraki, n ongora n ana kabwarabwara teuana Brother Brown. E waekoa n ataia ae e a kunea te koaua. E ururinga aei John, “I namakina te kukurei n te koaua ao I aki toki ni mamaroroakinna n ara tabo n reirei ibukini bwainnaoraki.”

 N te bong teuana, ao e a kawara te umwantabu n Anglican John ao n titirakina te mitinare taekan te Temanna n Teniman, ae te bwai ae e a mataata raoi iai John bwa tiaki kanoan ana reirei te Baibara. E tatakarua te mitinare ao ni kakionakoa teuaei ni kangai: “Tiaki ngkoe te Kristian, ana aomata te Riaboro ngkoe. Kitana ikai!”

Ngke e a okira mwengana John ao e a korea ana reta nakon te mitinare ao e tuangnga bwa e na maroroakina taekan te Temanna n Teniman n ana tabo te botannaomata. E kaeka te mitinare ao e tuanga John bwa e na kawara ana aobiti te mataniwi n ana reirei, ike e a titirakinaki iai bwa e boni korea ana reta nakon te mitinare ke e aki.

E kaeka John ni kangai “Eng Sir, I koreia.”

E tuangaki John iroun te mataniwi bwa e na korea ana reta ni kabwarabure nakon te mitinare. Ngaia are e a korea aei John:

“Sir, E tuangai au mataniwi bwa N na korea au reta ni kabwarabure nakoim ao I tauraoi ni karaoa anne ma tii ngkana ko kaotia ae ko angareirei baika kewe.”

E rangi ni mimi te mataniwi ao e taku, “Blankson, aei te bwai ae ko tangiria ni koreia?”

“Eng, Sir. Tii anne ae I kona ni koreia.”

“Ko na kabaneaki man te reirei. Ko kangaa ni kaitaraa te mitinare n te Aro ae boutokaaki iroun te tautaeka, ao ni kantaningaia bwa ko na teimatoa n tiku n te reirei aei?”

“Ma Sir, . . . ngkana ko angareirei nakoira ao iai baika ti aki ota iai, tiaki ti kona n titirakiniko naba?”

“Eng kam konaa.”

“Sir, anne naba ae riki. E angareirei teuarei n te Baibara ao I a titirakinna naba. Ngkana e aki kona ni kaekaa te titiraki, bukin tera ngkanne ngkai I riai ni korea au reta ni kabwarabure nakoina?”

E a aki kabaneaki man te reirei Blankson. Ao akea te reta ni kabwarabure ae kanakoaki.

E taekinaki ae kangai ibukin te mwakuri ae karaoaki n te ririki anne n Te Taua-n-Tantani: “Ti kona ni kakoauaa ana taeka Tawita aei: ‘Ko na kataubobongaai n te korakora ibukin te buaka.’ (TaiAre. 18:39) E rangi ni kaungaunga te ririki anne ibukina bwa ti a tia n nora ana ibuobuoki te Uea . . . A kimwareirei n tataekina te rongorongo . . . ana toro aika kakaonimaki.”

Imwina riki n te ririki anne, a iangoia taari bwa a na manga karekea riki te tabo ni kanakobwanaa teuana. E waakinaki katean te tabo ni kanakobwanaa riki teuana i rarikin Chicago. E aranaki te tabo ni kanakobwanaa ae boou aei bwa WORD ae kaineti ma Ana Taeka te Atua, ibukina bwa a uarongorongoa Ana Taeka te Atua n te rerio. E a kona n roko rongorongon te Tautaeka n Uea nakon taabo aika raroanako n ikotaki naba ma meangini Kanata.

E buokiia Iehova taari n 1925 bwa a na ota n te rongorongo ae boou are n Te Kaotioti mwakoro 12. E na riki aei bwa te bwai ni kabwakabwaka nakoia tabeman. Ma a bati naba aika a na kukurei ni karekea otaia raoi ni baika riki i karawa ao aron rotakia iai ana aomata te Atua aika i aon te aba.