E tei te kaman n te kawai n rin nakon te tembora ae Tabu. Ni kaineti ma Te Baibara ae Tabu—Te Rairai ae te Aonnaba ae Boou are boreetiaki imwain 2023, ao “te kaman are mai moa bon 20 te mwanokunibai abwakina, ae boraoi ma raababan te auti, ao rietana bon 120.” (2Rong. 3:4) E taekinaki naba n rairai tabeua bwa “120 te mwanokunibai” rietan te kaman, ae nanona bwa 53 te mita abwakina! (175-te buuti)

Ma e taekinaki ae kangai n Te Rairai ae te Aonnaba ae Boou are boreetiaki n 2023 ni kaineti ma te kaman are n ana tembora Toromon: “Rietana bon 20 te mwanokunibai,” ke tao 9 te mita rietatana a (30 te buuti.) Iangoi tabeua bukin te bitaki aei.

E aki taekinaki rietan te kaman n 1 Uea 6:3. N te kibu anne, ao te tia koreia are Ieremia, e korea abwakin ao raababan te kaman, tiaki rietana. Ma n te mwakoro are imwina, ao e kabwarabwaraa n te aro ae mataata raoi bwain nako te tembora aika rangi n rianako, n ikotaki ma nnen te ran ae buburakaei ae Taari ae te biti, kaa n uabwai aika kokokaki aika tebwina, ao boua ake uaai ake buraati ake a tei i tinanikun te kaman. (1Uea 7:15-37) Ngkana ngaia bwa e riaon 50 te mita abwakin te kaman ao e rietata riki nakon te tembora, e aera ngkanne Ieremia e aki taekina rietana? N tienture naba ake imwina, ao a ribootinna I-Iutaia ake taani koro rongorongo bwa e aki abwabwaki riki te kaman nakon ana tembora Toromon.

A nanououa taan rabakau bwa e kona oon te tembora n taua te kaman ae 120 te mwanokunibai abwakina ke e aki. A rangi n raababa aani kateitei aika rietata ake a karaoaki man atibu ao buriki n taai ake rimoa ao a irariki nako eta, n aroni mataroan oon te tembora are i Aikubita. Ma e kaokoro ana tembora Toromon. A kakoauaa taan rabakau bwa e aki raka i aon 6 te mwanokunibai ke 2.7 te mita (9 te buuti) matentenin oon te tembora. E taekina aei te tia korea rongorongoni kateitei rimoa ae Theodor Busink: “Ni kaineti ma matentenin oon te [tembora n rinnako], ao e aki kona n roko abwakin te kaman n 120 te mwanokunibai.”

E bae ni bure kaewean te koroboki n 2 Rongorongo 3:4. E ngae ngke tabeua koroboki nikawai a taekina “120” n te kibu aei, ma tabeua koroboki aika kona n onimakinaki n aron te Codex Alexandrinus n te kanimaua n tienture ao te Codex Ambrosianus n te kaonoua n tienture, a taekina “20 te mwanokunibai.” E aera te tia koroboki ngkai e kona ni kaburea ni koreia bwa “120”? Te taeka ae “tebubua” ao “te mwanokunibai” a kuri n titeboo teia n te taetae n Ebera. Ngaia are e bae te tia koroboki ni korea te taeka ae “tebubua” ao tiaki “te mwanokunibai.”

Ni koauana, e ngae ngke ti kataia n ota n rongorongo aikai ao ni katea taamnein ana tembora Toromon n te aro eti raoi, ma ti kaatuua riki ara iango i aon te baere e kaikonakaki iai te tembora anne ae taekan te tembora n taamnei ae kakannato. Ai kakaitaura ngaira ngkai e kaoia ni kabane ana toro Iehova bwa a na taromauria n te tembora anne!—Ebera 9:11-14; TeKao. 3:12; 7:9-17.