1. Bukin tera bwa ti kona n taekina ana kantaninga Aberaam bwa bon iai aana?

 E BERITA Iehova nakon raoraona are Aberaam bwa a na kakabwaiaaki natannaomata ni kabane aika n te aonnaba, rinanoni kanoana. (KBwaai 15:5; 22:18) Ibukina bwa e korakora onimakinan te Atua iroun Aberaam, e kakoauaa raoi bwa e na boni koro bukin ana berita te Atua anne. Ai 100 ana ririki Aberaam ao buuna ai 90 ana ririki, ao e bon tuai naba man reke natiia taanga aika kakaonimaki aikai. (KBwaai 21:1-7) Ma e ngae n anne, e kangai te Baibara: “E kantaningaia Aberaam ma n onimakinna bwa e na riki bwa tamaia natannaomata aika bati. . . . E kakoauaa are e a tia n taekinaki.” (IRom 4:18) Ao e boni koro bukin ana kantaninga Aberaam. E reke natina te mwaane are e a kamani kakantaningaia ae Itaaka. Bukin tera bwa e kakoauaa raoi Aberaam ae e na boni kakoroa bukin ana berita Iehova?

2. Bukin tera Aberaam ngke e kakoauaa raoi bwa e na boni koro bukin ana berita Iehova?

² Ibukini kaanin ana iraorao Aberaam ma Iehova, e a “kakoauaa raoi bwa e kona te Atua ni kakoroa bukin ana berita.” (IRom 4:21) E akoa Aberaam Iehova ao e atongnga bwa e raoiroi ibukin ana onimaki. (Iak. 2:23) N aron ae oti n I-Rom 4:18, iai irekereken ana onimaki Aberaam ma ana kantaninga. Ti na rinanon ngkai ana taeka te abotoro Bauro ibukin te kantaninga, are koreaki n I-Rom mwakoro 5.

3. Tera ae e kabwarabwaraa Bauro ibukin te kantaninga aei?

³ E kabwarabwaraa Bauro bukina ngkai ti kona ni kakoauaa  raoi bwa ara “kantaninga aei e aki karekea te bwarannano.” (IRom 5:5) E buokira naba n ota bwa e na kangaa n ririkirake ara kantaninga ni Kristian. Ngkana ti rinanon te baere e kabwarabwaraa Bauro n I-Rom 5:1-5, iaiangoi naba baika riki nakoim. Ni karaoan anne, ane ko na bae n noria i nanoni waakinakon te tai bwa e a nene riki am kantaninga. Ni maroroakinan te kaongora aei, ti na noria naba iai bwa ko na kangaa ni kanenea riki am kantaninga nakon ae ngkai. Ti na maroroakina moa ngkai te kantaninga ae rianako are e taku Bauro bwa e na aki karekea te bwarannano.

4. Tera ae taekinaki n I-Rom 5:1, 2?

⁴ Wareka I-Rom 5:1, 2. E korei taeka aikai Bauro nakoia kaain te ekaretia i Rom. A a tia taari ake iai n reiakina taekan Iehova ao Iesu, a kaotiota aia onimaki, ao a a riki bwa Kristian. Ngaia are e ‘a atongia te Atua bwa a raoiroi ibukin aia onimaki,’ ao e kabiriia n taamneina ae raoiroi. Eng, a a kona ni kakoauaa bwa a na karekea te kantaninga ae tamaroa.

5. Tera aia kantaninga taani kabiraki?

⁵ Imwina riki ao e a manga koroboki Bauro nakoia Kristian aika kabiraki ake i Ebeto ibukin te kantaninga are a weteaki nako iai. Kanoan naba te kantaninga anne boni karekean “tibwangaia te koraki aika itiaki.” (IEbe. 1:18) Ao e kaota naba Bauro nakoia kaaini Korote te tabo ae a na karekea iai tibwangaia. E aranna bwa “te kantaninga are kamenaaki imwaimi i karawa.” (IKoro. 1:4, 5) Ngaia are aia kantaninga Kristian aika kabiraki bon te kautaki nakon te maiu ae aki toki i karawa, ike a na tautaeka iai ma Kristo.—1Tet. 4:13-17; TeKao. 20:6.

6. Tera ana taeka temanna te kabiraki ibukin te kantaninga aei?

⁶ E rangi ni kakawaki irouia Kristian aika kabiraki te kantaninga anne. E kaota ana namakin ibukin te kantaninga anne, temanna mai buakoia ae Brother Frederick Franz ni kangai: “E koaua ara kantaninga aei, ao e na boni kakororaoaki nanona nakoira n tatabemanira nako ngaira aika 144,000, n te aro ae riaon ara  iango.” Imwin ana beku iroun te Atua ma te kakaonimaki n ririki aika bati ao e a kamatoaa ni kangai Brother Franz n 1991: “E bon teimatoa naba ngkai ni kakawaki [iroura] ara kantaninga aei. . . . E a rikirake riki ara kakaitau iai ngkai ti tabe ni kakantaningaia. Bon te bwai ae materaoi kakantaningaana, e ngae naba ngkana e na mirion te ririki maanna. E a kakawaki riki ngkai irou ara kantaninga aei nakon are mai mwaina.”

7-8. Tera te kantaninga ae ti karekea angiina i buakora? (I-Rom 8:20, 21)

⁷ Angiina aika taromauria Iehova ni boong aikai, e kaokoro aia kantaninga ae a karekea. Bon te kantaninga are e karekea Aberaam, ae te maiu n aki toki n te aonnaba i aan Ana Tautaeka n Uea te Atua. (Ebera 11:8-10, 13) E korea Bauro taekan te bae raoiroi ae e mena imwaia naake a karekea te kantaninga aei. (Wareka I-Rom 8:20, 21.) Ngke ko moan reiakina ana berita te Baibara ibukin taai aika imwaira, tera ae ko kunea bwa e rangi n anaaki riki iai nanom? Iangoan te koaua ae n te bong teuana ao ko nang kororaoi ao n aki manga bure? Ke ko kimwareirei n ataakin ae naake ko tangiriia aika a a tia ni mate a na manga kautaki nakon te aonnaba ae bwaretaiti? A bati baika raraoi aika ko ingainga nako iai aika reke man “te kantaninga.”

⁸ N aki ongeia bwa ti na karekea te maiu n aki toki i karawa ke i aon te aba, ma ti boni kimwareirei n te kantaninga ae rianako. Ao e kona n ririkirake n nene riki ara kantaninga ae kakimwareirei aei. E kabwarabwaraaki n te baere e koreia Bauro imwina riki bwa e kangaa ni kona n riki anne. Ti na rinanon ngkai te baere e koreia ni kaineti ma ara kantaninga aei. Karaoan anne e na kakorakoraa riki kakoauaan te kantaninga anne iroura ao e na bon aki kabwarai nanora.

9-10. N aron ae oti n ana katoto Bauro, tera ae a kona ni kantaningaia Kristian? (I-Rom 5:3) (Nori naba taamnei.)

⁹ Wareka I-Rom 5:3. Noria bwa ngkana ti rawawata, ao e a nene riki ara kantaninga. Ti bae ni mimi iai. Ma a boni kona taan  rimwini Kristo ni kantaningaa te rawawata. Iangoa ana katoto Bauro. E kangai nakoia I-Tetaronike: “Ngke ti mena iroumi ao ti a kaman tutuangingkami naba ae ti na boni bae n rinanon te karawawataaki, ao . . . e bon riki anne.” (1Tet. 3:4) Ao e korea aei nakoia I-Korinto: “Ti tangiringkami taari bwa kam na ataa taekan te rawawata are riki nakoira . . . Ti a nanououa bwa ti na maiu ke ti na aki.”—2Kor. 1:8; 11:23-27.

¹⁰ A kona naba Kristian ni boong aikai ni kantaningaa te rawawata n aekana nako. (2Tim. 3:12) Tera ngkoe arom? Ngkai ko onimakina Iesu ao ni kakairi irouna, ko a tia ni boo ma te rawawata? A bae ni bwainingareiko raoraom ao am koraki. A bae n riribaiko. Ko a tia ni boo ma kangaanga n am tabo ni mwakuri ibukina bwa ko kakorakorako ni bwabwaina te koaua ni bwaai ni kabane? (Ebera 13:18) Ko a tia ni boo ma ana kakaaitara te tautaeka ibukina bwa ko tibwaa am kantaninga nakoia tabemwaang? N aki ongeia bwa te aeka n rawawata raa ae ti kona ni boo ma ngaia, ma e taku Bauro bwa ti riai ni kimwareirei. Bukin tera?

11. Bukin tera bwa ti riai ni motinnanoia bwa ti na nanomwaaka i aani kataaki nako?

¹¹ Ti kona ni kimwareirei ngkana ti boo ma te rawawata ibukina bwa iai mwina ae karekea. E taekinaki n I-Rom 5:3 bwa ‘te rawawata e karika te nanomwaaka.’ A na boo ma te rawawata Kristian ni kabane, ngaia are a riai ni bane n nanomwaaka. Ti riai ni motinnanoia bwa ti na nanomwaaka i aani kataaki aika imwaira. Tii mani karaoan anne ti na kona n nora iai kakororaoan ara kantaninga. Ti aki kan riki n ai aroia naake e iaiangoiia Iesu ngke e taekini koraa aika bwaka n te tano ae riribwa. A butimwaea te taeka ma te kimwareirei n te moantai, ma a a bwaka naba ngke “e roko te karawawataaki ke te bwainikirinaki.” (Mat. 13:5, 6, 20, 21) Bon akea bebeten ke kakukurein ae ko boo ma te kakaaitara ke te kataaki, ma ngkana ko nanomwaaka i aaia ao ko na taia taiani kakabwaia aika akea tokia. N te aro raa?

12. Ti na kangaa ni kakabwaiaaki ngkana ti nanomwaaka i aani kataaki?

¹² E katuruturui kakabwaia aika reke man te nanomwaaka i aani kataaki, te tia rimwini Kristo are Iakobo, ngke e korea aei: “Ke e katiaa raoi ana mwakuri te nanomwaaka, bwa kam aonga ni kororaoi, ao n raoiroi n aroaromi nako, n akea kabwakami n te bwai teuana.” (Iak. 1:2-4) E kabwarabwaraa te nanomwaaka Iakobo bwa kaanga iai tabena ke ana mwakuri ae e na katiaa. Tera te mwakuri ae e mwiokoaki iai te nanomwaaka bwa e na katiaa? E kona ni buokiko ni karikirakea riki te taotaonakinnano, te onimaki, ao onimakinan te Atua. Ma iai riki te kakabwaia ae kakawaki ae ti karekea man te nanomwaaka.

13-14. Tera ae riki man te nanomwaaka, ao tera irekereken anne ma te kantaninga? (I-Rom 5:4)

¹³ Wareka I-Rom 5:4. E mwaneweia Bauro bwa te nanomwaaka e karika “te aroaro ae tau i matan te Atua.” Ibukin nanomwaakam ko a tau iai i matan Iehova. Tiaki nanona bwa e kukurei Iehova ngkana ko boo ma kataaki ke kangaanga. E kukurei te Atua iroum. Ibukin nanomwaakam ko a tau iai i matana. Ai tamaroara te kakabwaia aei!—TaiAre. 5:12.

¹⁴ Uringnga are e nanomwaaka Aberaam i aani kataakina ao e a karekea iai akoana iroun te Atua. E iangoia Iehova bwa Raoraona ao e aranna bwa e raoiroi. (KBwaai 15:6; IRom 4:13, 22) E kona naba n riki anne nakoira. E aki boboto akoara iroun te Atua i aoni mwaitin te bae ti karaoia n ara beku ibukina, ke i aoni mwiokoara ae ti karekei. E reke akoara irouna  ibukina bwa ti nanomwaaka ma te kakaonimaki. Ao n aki ongeia bwa ai rorora ngaira, tera baika ti rinanoi, ke ara konabwai, ma ti bane ni kona n nanomwaaka. Ko kakaonimaki n nanomwaaka i aani kataakim teuana ngkai? Ngkana eng, ao kabebetea nanom n ataakin ae ko a karekea akoam iroun te Atua. Ataakin ae ti karekea akoara iroun te Atua, e kona ni korakora rotakira iai. E kona ni kanenea riki ara kantaninga.

15. Tera riki te bae e taekinna Bauro, ao bukin tera bwa a kona tabeman n aki ota iai?

¹⁵ N aron ae kabwarabwaraa Bauro, ti kona ni karekea akoara iroun Iehova ngkana ti kakaonimaki n nanomwaaka i aani kataakira. Noria bwa e reitia ni kangai Bauro: “Te aroaro ae tau aei e karekea te kantaninga, ao te kantaninga aei e aki karekea te bwarannano.” (IRom 5:4, 5) A kona tabeman n aki ota n aei. Bukin tera? Ibukina bwa e taekinna Bauro mai mwaina n I-Rom 5:2, bwa a a kamani karekea te kantaninga Kristian ake i Rom, ae te “kantaninga ae karekeani mimitongin te Atua.” Ngaia are e kona ni kangai temanna, ‘Ngkana a a tia Kristian akanne ni karekea te kantaninga teuana, bukin tera Bauro ngke e a manga taekina naba te kantaninga imwina riki n ana maroro?’

16. E kangaa n rikirake te kantaninga iroun temanna? (Nori naba taamnei.)

¹⁶ Ti kona n ota n ae kananonaa Bauro ngkana ti ururingnga ae e ririkirake te kantaninga. Aio kabotauana: Ko uringa arom ngke ko moan ongo taekan te kantaninga ae rianako ae n Ana Taeka te Atua? Ko bae n iangoia n te tai anne bwa e bon aki konaa ni koro bukin te kantaninga ae te maiu n aki toki n te aonnaba ae bwaretaiti. Ma ngke ko a reiakina riki taekan Iehova ma berita aika n te Baibara ao ko a kakoauaa ae e na boni koro bukin te kantaninga aei.

17. E kangaa n teimatoa n rikirake am kantaninga imwin am katabu ao am bwabetito?

¹⁷ E teimatoa n rikirake am kantaninga imwin naba am katabu ao am bwabetito, kioina ngkai ko a reiakina ae bati riki ao n ikawai  riki n te onimaki. (Ebera 5:13–6:1) Ko bae ni kakoauaa are e taekinaki n I-Rom 5:2-4. A bati rawawatam, ma ko nanomwaaka i aaia ni kabane ao ni karekea te aroaro ae tau i matan te Atua. Ibukina bwa ko ataia ae e kukurei iroum ao e tangiriko te Atua, ko a kona ngkai ni kantaningai rekeni bwaai ake e beritani. E a nene riki am kantaninga nakon are n te moantai. Ko a boni kakoauaa raoi. E a korakora riki iai rotakim, n te aro ae e a kairaki iai iterani maium ni kabane ao ni bita arom nakoia am utu, arom ni karaoi am motinnano, ao arom ni kamanena am tai.

18. Tera te bwai ni kakoauaa ae e katauraoia Iehova?

¹⁸ E a manga taekina riki te bwai ae kakawaki te abotoro aei ni kaineti ma te kantaninga ae ko karekea, imwini karekean akoam iroun te Atua. E karaua nanom bwa e na boni koro bukin am kantaninga aei. Bukin tera bwa ko kona ni kakoauaa? E taekina te bwai ni kakoauaa aei Bauro nakoia Kristian ni kangai: “Te kantaninga aei e aki karekea te bwarannano, ibukina bwa te Atua e kabongana taamneina ae raoiroi ae anganira ni kaotia iai bwa e tangirira.” (IRom 5:5) A bati bukina ae ko kona iai ni kakoauaa te kantaninga anne.

19. Tera ae ko kona ni koaua raoi iai ni kaineti ma am kantaninga?

¹⁹ Iaiangoa ana berita Iehova nakon Aberaam ao aron Iehova n akoia ao n atongnga bwa Raoraona. E aki matebuaka ana kantaninga Aberaam. E kangai te Baibara: “Imwini kaotan te taotaonakinnano iroun Aberaam, ao e a reke irouna te berita aei.” (Ebera 6:15; 11:9, 18; IRom 4:20-22) E bon aki bwara nanona. Ko kona naba ni kakoauaa ae ngkana ko teimatoa ni kakaonimaki, ao ko na boni karekea te kaniwanga are ko kantaningaia. E boni koaua am kantaninga anne, ao bon nibwan te kimwareirei ao e aki karekea te bwarannano! (IRom 12:12) E korea aei Bauro: “Ke e kaoningkami n te kimwareirei ma te rau ni kabane, te Atua are anganga te kantaninga, ibukina bwa kam onimakinna, bwa e aonga ni kakorakoraaki ami kantaninga ni mwaakan te taamnei ae raoiroi.”—IRom 15:13.