N te bong teuana ao e a mataku te tari te aine temanna mai New Zealand n te taamnei n jw.org ae maroroakinaki iai aron Iehova ni kaotiota te nanoanga ao e aki tii namakinna. (Ita. 63:7-9) E a iangoia neiei bwa e na maiuakina te baere e reiakinna ao ni buoka temanna. Imwina riki n te bong naba anne, ao e a nako ni boobwai ike e a boo iai ma te aine ae akea ana auti, ao e a tuangnga bwa e na kabooa kanana. E kariaia neierei. Ngke e oki te tari te aine arei ma te amwarake ao e a uarongorongo naba nakoina ni kamanena te turaeki ae Iai te Tai ae E na Akea Iai te Rawawata?

E a tang neierei ao e a kabwarabwaraa ae e kaikawaaki bwa te tia Kakoaua, ma e kitana te koaua i nanon ririki aika bati. Ma e a bon tibwa tataro naba nakon Iehova bwa e na buokia n okira te koaua. E karekea ana Baibara neiei ao e karaoa ana babaire ma ngaia ibukin te reirei n te Baibara. a

N aron Iehova, ti kona ni kaotiota te nanoanga nakoia aomata, n ikotaki ma ara koraki, ao tarira ma mwaanera n te ekaretia. Ao ti kona ni kaota te nanoanga n arora n ukeri aanga ake ti na uarongorongo iai nakoia aomata.