Ko a tia ni wareki raoi kaongora man Te Taua-n-Tantani n te ririki aei? Noria ngkana ko kona ni kaekai titiraki aikai:

Tera te katoto ae kateia Iehova ni karaoan ae riai nakoia aine?

E karaoa ae riai nakoia ma te aki inanonano, ao e aki tatangiriia riki mwaane nakoia aine. E kakauongo te Atua irouia aine, e tabeakina aia namakin ao tabeaiangaia. Ao e onimakinia bwa a na karaoa te mwakuri ibukina.​—w24.01, i. 15-16.

Ti na kangaa ni maiuakina I-Ebeto 5:​7, ae kangai: “Tai ibuokanibwai ma ngaiia”?

E kauringira te abotoro Bauro bwa ti na aki reitaki ma aomata aika aki buokira n nimti ana kaetieti te Atua. Aeka n reitaki akanne a kaineti nakoia naake ti kakabanea ara tai ma ngaiia n ikotaki naba ma naake ti rereitaki ma ngaiia i aon te intanete.​—w24.03, i. 22-23.

Baikara karaki aika aki koaua aika ti riai n tarataraira mai iai?

Ti riai n tarataraira mani karaki aika aki koaua mairouia raoraora ni kaan, meeri aika kamimi mairouia aika ti aki kinaia, ao taan tannako man te koaua ake a bakaaea te kan ongora n te koaua.​—w24.04, i. 12.

Tera ae ti bon ataia ao ae ti aki ataia ibukin aron Iehova ni motika taekan te Uea ae Toromon n ikotaki ma naake a mate i Totom ao Komora ao n te Ieka?

Ti aki raoi koaua ngkana e iangoia Iehova bwa e na kamaunaia n aki toki ke e na aki. Ma ti ataia ae e atai bwaai ni kabane ao e korakora ana nanoanga.​—w24.05, i. 3-4.

Tera ae ti kakoauaa raoi ngkai e riki te Atua bwa “te Bwaa? (TuaKau. 32:4)

Ti kona n ukera kamanoara iroun Iehova. E kona n onimakinaki, ao e teimatoa ni kakororaoi ana berita. Ao e aki bibitaki aroarona ao ana kantaninga.​—w24.06, i. 26-28.

Tera ae kona ni buokiko ni kaangaraoiko n am ekaretia ae boou?

Onimakina Iehova bwa e na buokiko n aron are buokiia ana toro rimoa. Tai kabotaua am ekaretia are mai mwaina ma ae boou. Katabetabeko n am ekaretia ae boou, ao kataia ni karekeia raoraom aika boou.​—w24.07, i. 26-28.

Baikara reirei aika kaotaki ni kaikonaki ake tenua ni Mataio mwakoro 25?

Te kaikonaki ae te tiibu ao te kooti e kaotaki iai kakawakin te kakaonimaki ao te kakaonimaki ni koaua. Te kaikonaki ae aine aika wanawana ao aika nanobaba aika tuai ni boo ma mwaane e kabwarabwaraa aron te tauraoi ao te marurung. Ao te kaikonaki ae taian tarena a kaota kakawakin te taningamarau ao te kekeiaki mwaaka.​—w24.09, i. 20-24.

Abwakira te kaman are n ana tembora Toromon?

E taekinaki n taiani koroboki rimoa tabeua n 2 Rongorongo 3:​4, bwa “120 te mwanokunibai,” rietan te kaman, ae nanona bwa 53 te mita abwakina (175 te buuti.) Ma a taekinaki ni koroboki tabeua bwa “20 te mwanokunibai,” rietan te kaman, ae nanona ruaiwa te mita rietatana (30 te buuti.) E taraa ni boraoi aei ma matentenin oon te tembora.​—w24.10, i. 31.

Tera ae nanonaki ngkana e na ‘buuna te aine ae tii temanna’ te tabonibai? (1 Tim. 3:12)

E nanonaki iai bwa e na mare ma te aine ae tii temanna ao e na aki karaoa te wene ni bure. Irarikina, e aki riai n iaiangoiia riki aine tabeman n te aro ae aki riai.​—w24.11, i. 19.

Bukin tera ngkai ti kona n taekinna ae Ioane 6:53 bon tiaki te bwai ae e na karaoaki n Ana Katairiki te Uea?

E taekinaki n Ioane 6:53 bwa e riai ni kanaki irikon Iesu ao raraana. E taekin taeka aikai Iesu n 32 C.E., i Kariraia nakoia I-Iutaia ake a riai n onimakinna. Ma e moani karaoaki Ana Katairiki te Uea teuana te ririki imwina i Ierutarem. E taetae Iesu ikanne nakoia naake a na uea i karawa.​—w24.12, i. 10-11.