Ngkana ti katauraoira imwain ara ukeuke n reirei, ti kona ni kangai: “Tera ngkai reireiau ae N na karekea?” Ma e ngae ngke ti kantaningaia bwa ti na reiakina te bwai teuana, ma tiaki nanona bwa ai akea te bae boou ae tangiria Iehova bwa ti na reiakinna. Ti na kangaa ni kakauongo nakon te bae e kataia Iehova n reireinira?

Tataroa te wanawana. Bubutiia Iehova buokam n ataa te bae e tangiria bwa ko na reiakinna ngkai. (Iak. 1:5) Tai tii rauaki ni baike ko a tia ni kaman reiakin.—TaeRab. 3:5, 6.

Kariaia mwaakan te Baibara bwa e na rota maium. “E maiu ana taeka te Atua.” (Ebera 4:12) E kona “ana taeka te Atua” ae maiu n rotiira n aanga aika kakaokoro ni katoatai are ti wareka iai te Baibara, ma tii ngkana ti bon tangiria ni kan reireiaki iroun te Atua.

Kakaitau ni bwaai ni kabane aika n ana taibora Iehova. Ai aron “te baka n amwarake ae kangkang” baika e katauraoi ibukin ara onimaki. (Ita. 25:6) Tai tarariaoi atuu n reirei aika ko taku bwa a kabotu. Ko na aki tii buokaki iai ma ko na kimwareirei naba ni baika e katauraoi te Atua!