1-2. Bukin tera bwa a kukukurei ana toro te Atua? (Iakobo 1:22-25)

 E TANGIRIRA Iehova ma Natina bwa ti na kukurei. E kangai te tia korea te Areru 119:2: “A a kukurei akana kawakin ana kauring, akana ukoukoria ma nanoia ni kabane.” E karaui nanora riki Iesu ni kangai: “A a kukurei riki te koraki ake a ongo ana taeka te Atua ma n toua mwina!”—Ruka 11:28.

² Bon taan taromauria Iehova ngaira aika ti kukukurei. Bukin tera? A bati bukina iroura, ma teuana bukina ae kakawaki bwa ti katoatai ni wareka Ana Taeka te Atua ao ni kakorakoraira ni maiuakina te baere ti reiakinna.—Wareka Iakobo 1:22-25.

3. Tera kakabwaiaara mani maiuakinan te baere ti warekia n Ana Taeka te Atua?

³ Iai aanga tabeua aika ti kakabwaiaaki iai ngkai ti “riki bwa taan toua mwin te taeka.” Ti ataia ae bon aei kiingini kakukureian Iehova. Ao ti kukurei man ataakin ae e kukurei Iehova iroura. (TeMin. 12:13) E a nakoraoi riki reitakira n ara utu ao n ara ekaretia ngkai ti maiuakina te baere ti warekia n Ana Taeka te Atua ae kairaki koreana n taamneina. E bae naba n riki anne ni maium. Irarikina naba, ti kamanoaki mani kangaanga aika bati, aika boo ma ngaai naake a aki ongeaba iroun Iehova. Ni koauana, ti boraoi n iango ma te Uea are Tawita. Ngke e tia ni mwanewea ana tua Iehova ma ana babaire ao ana motikitaeka, ao e motika kunana n ae kangai: “Ao iai te kaniwanga ae bubura ngkana a kawakinaki.”—TaiAre. 19:7-11.

4. Bukin tera bwa e aki bebete te riki bwa taan toua mwin Ana Taeka te Atua?

 ⁴ N etina, e bon aki bebete n taai nako iroura te riki bwa taan toua mwin Ana Taeka te Atua. Ti riai ni karekea ara tai ribuakon tabera, bwa ti na wareka ao n ukeuke n te Baibara, ao n ota n ae tangiria Iehova bwa ti na karaoia. Ngaia are ti na rinanoi ngkai bwaai n ibuobuoki tabeua aika kona ni buokira ni wawareka te Baibara ni katoatai. Ti na noria naba bwa tera ae e na buokira n iaiangoa te baere ti warekia, ao n nori aanga aika ti kona iai ni maiuakina te baere ti reiakinna.

KAMWAWAA AM TAI IBUKINI WAREKAN ANA TAEKA TE ATUA

5. Baikara bwaai tabeua aika ti tatabetabe iai?

⁵ Angia ana aomata Iehova a rangi n tatabetabe ni maiuia. Ti kabanea te tai ae bati ni karaoi tabera aika kakaokoro aika boto man te Baibara. N te katoto, angiina i buakora ti mwakuri ni kareketianti ibukini kainnanora ma ara utu. (1Tim. 5:8) A bati Kristian aika tararuaiia aia aoraki ke aia koraki aika kara. Ao ti bon riai naba n tabeakina oini marurungira, ae te bwai ae kainnanoa naba te tai ae bati. Irarikin tabera aikai, iai naba mwiokoara n te ekaretia. Ao ae kakawaki riki, ti na uataboa te mwakuri n uarongorongo ma te ingaingannano. Irarikin tabem aika bati aikai, ko na kangaa ni kamwawaa am tai ibukini warekan te Baibara ni katoatai, ni kananoa am iango i aon te baere ko warekia, ao ni maiuakinna?

6. Ko na kangaa ni moanibwaia te wareware n te Baibara? (Nora naba te taamnei.)

⁶ Te wareware n te Baibara bon teuana mai buakoni “bwaai aika kakawaki riki” irouia Kristian, ngaia are ti riai ni moanibwaia. (IBir. 1:10) E taekinaki ae kangai n te moan areru ni kaineti ma te aomata ae kukukurei: “E rangi ni kimwareirei n ana tua Iehova, ao e wareware n Ana tua ni karauraua bwanaana ni ngaina ao ni bong.” (TaiAre. 1:1, 2) E oti n aei bwa ti riai ni kamwawaa ara tai ibukini warekan te Baibara. N ningai te tai ae te kabanea n tamaroa ibukini warekan te Baibara? E bae ni kakaokoro ara kaeka ngaira n tatabemanira  nako. Ma e kakawaki bwa ko na kona ni wareware iai ao ni katoatai naba. E taku te tari te mwaane ae Victor: “I kani kakaraoa au wareware n te Baibara n te moaningabong. E ngae ngke I aki ututimwaaka n te moaningabong, ma e karako riki iai te kamangaongao. E uki iai au iango ao I kona naba ni kananoa iai au iango.” Anne naba am namakin? Titirakiniko aei, ‘N ningai te tai ae te kabanea n tamaroa irou, ibukini warekan te Baibara?’

IANGOA TE BAERE KO WAREKIA

7-8. Tera ae kona n tukira mani kakabwaiaakira ae reke man ara wareware? Kabwarabwaraa.

⁷ Ni koauana, ti wawareki baika bati ma ti aki rangi ni kaatuua ara iango iai. Ko a tia ni wareka te bwai teuana ao tabeua te tai imwina ko a mwaninga naba? E riiriki anne nakoira ni kabane. Ao e kananokawaki bwa e kona naba n riki nakon ara wareware n te Baibara. Tao ti katea tiara bwa ti na wareki tabeua mwakoron te Baibara ni katoabong. Ao e rangi n raoiroi anne. Ti riai ni katei tiara ao ni kakorakoraira n roko iai. (1Kor. 9:26) Ma bon tii te moani mwaneka ae raoiroi warekan te Baibara. E bati riki ae kainnanoaki ngkana ti kani kakabwaiaaki raoi mani wawarekan Ana Taeka te Atua.

⁸ Iangoa te kabotau aei: E rangi ni kakawaki te ran ae te karau. Ma ngkana e a manga tata bwakan te karau ae korakora, e na manga kaabokaboka te tano. Ao ngkana e a kaabokaboka te tano, ai akea ngkanne bonganan te karau ae bati. E kainnanoa te tai ae maan teutana te tano ni mwakuria te karau are e bwaka ao ni katauraoia ibukia aroka. Ti aki riai ni katawe ni wareka te Baibara n te aro are e a aki reke ara tai n iaiangoa te baere ti warekia, n ururingnga ao ni maiuakinna.—Iak. 1:24.

9. Tera ae ti riai ni karaoia ngkana e rereke naba iroura ae ti a warekaanako naba te Baibara ni katawea?

⁹ E rereke iroum n tabetai ae ko a warekaanako naba te Baibara ni katawea? Tera ae ko riai ni karaoia? Karaurau. Kataia n iangoa raoi te baere ko warekia ke ae ko a tibwa tia ni warekia. E aki riai ni kangaanga karaoan anne. Ngkana e kangaanga iroum te kaungaunga ae ko na kananoa am iango, tao ko kona n taraia bwa tii iaiangoan te baere ko warekia. Ko bae  ni manga kaananaua am tai n ukeuke n reirei ao ni karina naba iai am tai ni kananoa am iango. N te itera are teuana, ko kona n rineia bwa ko na wareki kiibu tabeua ao nikiran am tai ko kabanea n iaiangoi kiibu ake ko a tibwa tia ni wareki. E taku Victor are e taekinaki mai mwaina: “I kakauarerekea au wareware n te Baibara, tao tii teuana te mwakoro. Ibukina bwa I wawareware n te ingabong, e a reke ngkanne au tai n iaiangoa te baere I warekia n uaa e bong.” N aki ongeia bwa tera arom ni wareware, ma e rangi ni kakawaki bwa ko na warekia n te aro ae ko na ota n angiin te baere ko warekia.—TaiAre. 119:97; nora te bwaoki ae “ Titiraki Aika Riai n Iangoaki.”

10. Taekina te katoto ni kaineti ma arom ni maiuakina te baere ko reiakinna. (1 I-Tetaronike 5:17, 18)

¹⁰ N aki ongeia bwa n ningai ae ko wareka iai te Baibara ao maanra ngkoe ni warekia, ma taraia raoi bwa ko na maiuakini baike ko wareki. Ngkana ko wareka mwakoron Ana Taeka te Atua teuana, ao titirakiniko aei, ‘N na kangaa ni maiuakina te reirei aei ngkai ke n te tai ae imwaira?’ N te katoto, iangoia ae tao ko wareka 1 I-Tetaronike 5:17, 18. (Warekia.) Imwini warekani kiibu aika uoua aikai, ko kona n toki moa ao n iangoia bwa mwaitira am tai n tatataro, ao tera arom n tataro. Ko kona naba n iaiangoi baika ko kakaitau iai. Tao ko motinnanoia bwa ko na kaitaua Iehova ibukini baika kakawaki aika tenua. E ngae ngkana tii tabeua am miniti ni kaatuua am iango, ma imwina riki ane ko na riki bwa te tia ongora ao te tia toua naba mwin Ana Taeka te Atua. Iangoa aroni kakabwaiaam ngkana ko okioki ni kakaraoa aron anne ni katoabong ma mwakoron nako te Baibara aika ko wareki! Eng ane ko na rikirake bwa te tia toua mwin Ana Taeka te Atua. Ma tera arom ngkana e taraa n ae e a rangi ni bati baika ko riai ni mwakurii?

KATEI TIAM AIKA KO KONAI

11. Bukin tera ngkai ko kona n namakina te bwarannano n tabetai? Aanga te katoto.

¹¹ N tabetai ko kona n namakina te bwarannano ngkana ko a noria mani warekan te Baibara, bwa a a bati baika ko riai ni mwakurii. Iangoa te katoto aei: Am wareware n te Baibara n te bong aei e irekereke ma te reirei ni kairiri ni kaineti ma kaotiotan te inanonano. (Iak. 2:1-8) Ko noria bwa ko kona ni katamaroaa riki arom nakoia tabemwaang, ngaia are ko a karaoi bitaki tabeua. E rangi n raoiroi anne! N te bong are imwina, ko a wareka te mwakoro ae katuruturua kakawakin tiatianakin am taetaenikawai. (Iak. 3:1-12) Ko uringnga ae iai naba taai ake ko a tia n taetae n te aro ae aki riai. Ngaia are ko a motinnanoia bwa ko na kabatiaa riki tataekinani baika raraoi ao aika kaungaunga. Am wareware n  te bong are imwina e kaotaki iai te kauring ni kaineti ma raoraonakia kaain te aonnaba. (Iak. 4:4-12) Ko noria ae ko riai n rinei am kaakibotu aika raoiroi riki. Ma n am kaabong, ao ko a namakina te bwarannano ngkai a a rangi ni bati baika ko riai ni mwakurii.

12. Bukin tera bwa ko aki riai ni kabwaraa nanom ngkana ko a noria man am wareware n te Baibara bwa iai bitaki aika ko riai ni karaoi? (Nora naba te kabwarabwara mai nano.)

¹² Tai kabwaraa nanom ngkana ko noria bwa a bati bitaki ke katamaroa aika ko riai ni karaoi. E oti iai bwa e raoiroi nanom. Te aomata ae nanorinano ao ni bwabwaina te koaua, e wareka te Baibara ma iangoan ae e na kakaaei itera aika e riai ni mwakurii. a Ururingnga naba are karinan “te aroaro ae boou” bon te mwakuri ae reitinako karaoana. (IKoro. 3:10; nora te study note n te Baibara n taetae n Ingiriti i aon te taeka ae “is being made new.”) Tera ae e na buokiko n teimatoa n riki bwa te tia toua mwin Ana Taeka te Atua?

13. Ko na kangaa ni katei tiam aika ko konai? (Nora naba te taamnei.)

¹³ N oneani mwin ae ko nang boni kataia naba ni maiuakini bwaai ni kabane ake ko wareki n te tai ae tii teuana, katei tiam aika ko konai. (TaeRab. 11:2) Ko na bae ni kani kataa aei: Korei bwaai aika ko riai ni mwakurii, ao rinea teuana ke uoua mai iai aika ko na mwakurii moa, ao ake tabeua ko a manga mwakurii imwina. E nga iai ae ko na moani mwakuria?

14. Baikara tiam aika ko kona ni moana mwakuriaia moa?

¹⁴ Ko bae ni kani moanna man tiam ae e bebete rekena iroum. Ke ko bae n rineia bwa ko na mwakuria moa te itera teuana ae ko tangiria ni katamaroaa moa. Ngkana ko a ataa tiam, karaoa am kakaae i aon ara boki, tao ko  kamanena te Watch Tower Publications Index ke te Research Guide for Jehovah’s Witnesses. Tataroa tiam, ao butiia Iehova bwa e na ‘karekea nanom ni kani mwakuria’ tiam anne. (IBir. 2:13) Imwina maiuakina reireiam. Ngkana e a nakoraoi riki tiam are te moan, e na bae n unga nanom ao ni kani mwakuria teuana riki. Ni koauana, ngkana e a nakoraoi riki aroarom ni Kristian teuana, ko na bae n noria ae e a bebete riki kanakoraoan itera ake tabeua riki.

KARIAIA ANA TAEKA TE ATUA BWA E NA ‘MWAMWAKURI I NANOM’

15. Tera kaokoroia ana aomata Iehova ma aomata aika bati aika wawareka te Baibara? (1 I-Tetaronike 2:13)

¹⁵ A taku tabeman bwa e a bati aia tai n tia ni wawareka te Baibara. Ma a kakoauaa raoi te Baibara? A maiuakinna ke a kariaia bwa e na rota maiuia? E kananokawaki bwa n angiin te tai ao a bon aki. Ai kaokorora ngkanne ana aomata Iehova! N aroia Kristian ake n te moan tienture, ti butimwaea te Baibara “bwa bon ana taeka raoi te Atua.” Irarikina, ti kakorakoraira ni kaotia ae ti maiuakin ana boto n reirei.—Wareka 1 I-Tetaronike 2:13.

16. Tera ae kona ni buokira n riki bwa taan toua mwin te Taeka?

¹⁶ E aki bebete n taai nako warekan ao maiuakinan Ana Taeka te Atua. E bae ni kangaanga rereken ara tai ni warekia. Ke tao ti a manga wareware ni kabaititi ao n aki karekei otara n angiini baike ti wareki. Ke tao ti a manga iangoia bwa e a kangaanga maiuakinani baika ti riai ni katamaroai riki ni maiura. N aki ongeia bwa tera am kangaanga, ma e bon aki riaon am konaa. Ko kona n tokanikai i aona man ana ibuobuoki Iehova. Ti bia kakorakoraira ni butimwaea ana ibuobuoki, ao n riki bwa taan toua mwin te Taeka ao tiaki taan ongora aika mwamwaninga. Ti kakoauaa raoi bwa ngkana ti kabatiaa warekan Ana Taeka te Atua ao ni maiuakinna, ti na boni kukurei riki.—Iak. 1:25.