1. Tera ae e tei n am iango ngkana ko iangoa Iehova?

 KO A TIA n iaiangoia bwa aekakira Iehova? Tera ae e tei n am iango ngkana ko taetae nakoina n te tataro? E ngae ngke e aki kona n noraki Iehova, ma e kabwarabwaraaki n te Baibara n aanga aika kakaokoro. E aranaki Iehova bwa “taai ao te otanga” ao “te ai ae kaakang.” (TaiAre. 84:11; Ebera 12:29) E kabwarabwaraaki teina bwa kaanga ai aron tein te atibu ae te tabeiro, te biti ae raneanea, ao nei wirara. (Etek. 1:26-28) Tabeua kabwarabwaraan Iehova aikai ti kona ni mimi ke ni maaku iai.

2. Tera ae e kona n tukiia tabemwaang mani kaanian Iehova?

² E kona ni kangaanga iroura kakoauaan ae e tangirira Iehova ibukina bwa ti aki kona n noria. A iangoia tabeman bwa e aki kona n tangiriia Iehova ibukini baike a rinanoi rimoa. Tao akea tamaia ae e tangiriia. E ota Iehova n namakin akanne ao aron rotakira iai. Ibukini buokara, e kaotii aroarona aika tamaroa n ana Taeka.

3. Bukin tera ngkai ti riai ni karaua n nenera ana tangira Iehova?

³ Te taeka teuana ae kabwarabwaraa raoi Iehova bon te tangira. (1Ioa. 4:8) Iehova bon te tangira. E karaoi bwaai ni kabane ibukin ana tangira. E tituaraoi te Atua n ana tangira ao e korakora, n te aro are e a raababanako nakoia naake a aki tangiria. (Mat. 5:44, 45) N te kaongora aei, ao ti na karaua n nenera Iehova ao ana tangira. Ngkana ti reiakina riki ae bati ibukin Atuara, ane ti na tangiria riki.

E RANGI N TANGIRIRA IEHOVA

4. Tera am namakin n ana tangira Iehova? (Nora naba te taamnei.)

⁴ “E rangi n tatangira Iehova.” (Iak. 5:11) E kabotaua i bon irouna n te Baibara ma te tina ae tatangira. (Ita. 66:12, 13) Iangoa te tina ae tatangira ae e tabeakina natina ae uarereke. E  bwabwakoa raoi natina i aon toaniwaena ao n taetae nakoina ma bwanaana ae maraara. Ngkana e tang ke ni maraki natina, e taraia raoi bwa e na reke baika e kainnanoi. Ngkana ti maraki, ti kona n onimakina ana tangira Iehova. E korea aei te tia areru: “Ngkana a taonainako iango n raraoma, ao ko kabebeteai ma ni karaua nanou.”—TaiAre. 94:19.

5. Tera nanon ana tangira ae koaua Iehova iroum?

⁵ E kakaonimaki ni koaua Iehova. (TaiAre. 103:8) E aki kabwaraa nanona iroura ngkana ti karaoa te bwai ae kairua. A okioki I-Iteraera ni kauna Iehova, ma e ngae n anne e kaota ana tangira ae koaua nakoia ana aomata ake a rairi nanoia ngke e kangai: “Ko rangi ni kakawaki i matau, ko karineaki, ao I tangiriko.” (Ita. 43:4, 5) E aki bibitaki ana tangira te Atua. Ti kona n onimakinna n taai nako. E ngae ngkana ti karaoi kairua aika kakaiaki, ma e bon aki kitanira Iehova. Ngkana ti rairi nanora ao n okira Iehova, ane ti na noria bwa e bon teimatoa naba n tangirira. E berita bwa “e na kaabwabwaka kabwaraan te bure.” (Ita. 55:7) E kabwarabwaraaki n te Baibara te kabwarabure aei, bwa kaanga ai aron rokon “taai ni kakamaiu mairoun Iehova.”—Mwa. 3:19.

6. Tera reireiara man Tekaria 2:8 ibukin Iehova?

⁶ Wareka Tekaria 2:8. Ibukina bwa e tangirira Iehova, e kai atai ara namakin ao e ingainga ni kamanoira. E maraki ngkana ti maraki. Ngaia are ti kona n tataro ni kangai: “Kawakinai n aron ataeini matam.” (TaiAre. 17:8) Te mata boni bwain te rabwata ae kakai rotaki ao e rangi ni kakawaki naba. Ngaia are ngke e kabotauira Iehova ma ataeini matana, ai aron ae e kangai, ‘Ane e kaikoakingkami, ngkami aika au aomata, ao e boni kaikoaka te bwai ae rangi ni kakawaki irou.’

7. Bukin tera bwa ti riai ni kakorakoraa onimakinan ana tangira Iehova iroura?

⁷ E tangiria Iehova bwa ti na kakoauaa raoi ae e bon tangirira n tatabemanira nako. Ma e ataia ae ibukini baika ti rinanoi rimoa, ti kona n nanououa bwa e tangirira ke e aki. Ke ti kona ni kaaitara ma kangaanga ngkai aika kataa onimakinan ana tangira Iehova iroura. Tera ae e na kakorakoraa ara onimaki? Reiakinan aron Iehova ni kaota ana tangira nakon Iesu, taani kabiraki, ao boni ngaira ni kabane.   

 ARON IEHOVA NI KAOTA ANA TANGIRA

8. Bukin tera Iesu ngke e kakoauaa raoi ana tangira Tamana?

⁸ E a tia Iehova ma Natina ae tangiraki irouna ni karikirakea aia reitaki ae kaan i nanon ririki aika bati. Bon te kabanea ni maan n te iuniweeti aia reitaki. E kaota raoi Iehova ana tangira ibukin Iesu n aron ae ti warekia ni Mataio 17:5. E kona n tii kangai Iehova, ‘I kakatonga iroun teuaei.’ Ma e tangirira bwa ti na ataia ae e rangi n tangira Iesu, ngaia are e weteia ni kangai, “Natiu ae I tangiria teuaei.” E rangi ni kakatonga Iehova iroun Iesu ao n te bwai are e nang karaoia. (IEbe. 1:7) Ao e aki nanououa Iesu n ana tangira Tamana ibukina. E kakoauaa raoi Iesu ana tangira Iehova ao e kona n namakinna i nanona. E okioki Iesu ni kaotia ma te aki nanououa bwa e bon tangiraki iroun te Tama.—Ioa. 3:35; 10:17; 17:24.

9. Tera te taeka ae kabwarabwaraa ana tangira Iehova ibukia taani kabiraki? Kabwarabwaraa. (I-Rom 5:5)

⁹ E kaota naba Iehova ana tangira ibukia taani kabiraki. (Wareka I-Rom 5:5.) E kaotaki n te taetae are moan rairaki iai te kibu aei bwa e rangi ni korakora ana tangira Iehova ibukia taani kabiraki, n te aro are e a kabotauaki iai ma te karaanga n ran. Ai kaungananora aroni kataamneian ana tangira ae bati Iehova ibukia taani kabiraki! A ataia taani kabiraki bwa a “tangiraki iroun te Atua.” (Iuta 1) E kaota aia namakin te abotoro Ioane ngke e korea aei: “Taraa aron ana tangira te Tama ae kaotia nakoira ngke e kariaia bwa ti na atongaki bwa natin te Atua!” (1Ioa. 3:1) E tii tangiriia Iehova taani kabiraki? E aki, e a tia Iehova ni kaota ana tangira ibukira ni kabane.

10. Tera te bwai ni kakoaua ae moan te rianako ibukin ana tangira Iehova ibukim?

¹⁰ Tera te bwai ni kakoaua ae moan te rianako ibukin ana tangira Iehova? Te kaboomwi bon te mwakuri n tangira ae moan te rianako n te iuniweeti! (Ioa. 3:16; IRom 5:8) E anga Iehova Natina ae moan te kakawaki, ao e kariaia bwa e na mate ibukia aomata ni kabane, bwa a aonga ni kabwaraaki ara bure ao ti a kona n riki bwa Raoraona. (1Ioa. 4:10) Ngkana ti kananoa ara iango n te boo are e kabwakaa Iehova ao Iesu, ti na kona riki n ota bwa mwaitira tangiraia aomata n tatabemania nako irouia. (IKar. 2:20) E aki kabwakaaki te kaboomwi tii ibukin ana kaetitaeka ae riai Iehova. Bon te bwaintangira ae aanaki n te tangira. E a tia Iehova ni kaota ana tangira ibukira ngke e anga bwa te karea teuare e rangi ni kakawaki irouna, ae Iesu. E kariaia Iehova Natina bwa e na rawawata ao ni mate ibukira.

11. Tera reireiara ae reke man Ieremia 31:3?

¹¹ N aron ae ti noria e aki tii namakina te tangira ibukira Iehova, ma e kaotiotia naba. (Wareka Ieremia 31:3.) E katikira Iehova nakoina ibukina bwa e tangirira. (Kabotaua Te Tua-Kaua 7:7, 8.) Akea te bwai teuana ae kona ni karaurenakoira ma te tangira anne. (IRom 8:38, 39) Tera am namakin n te tangira aei? Wareka te Areru 23, ao nora aron rotakin Tawita n ana tangira Iehova ao tabeakinana irouna, ao nora naba aron rotakira iai.

TERA AM NAMAKIN N ANA TANGIRA IEHOVA?

12. Ko na kangaa ni kabwarabwaraa n te aro ae kimototo te Areru 23?

¹² Wareka Taian Areru 23:1-6. Te Areru 23 bon te anene ae kaotaki raoi iai onimakinan ana tangira ma ana akoi Iehova. E kabwarabwaraa Tawita are korea te areru aei, ana reitaki ae korakora ma te tia Kawakinna ae Iehova. E namakina te mano raoi Tawita ngke e kariaia Iehova bwa e na kairiria ao e bon onimakinna raoi. E ataia Tawita ae ana tangira Iehova, bon iriana n ana bong ni maiu ni kabane. Tera ae e kairia bwa e na kakoauaa raoi aei?

13. Bukin tera ngke e kakoauaa raoi Tawita ae e tabeakinna Iehova?

 ¹³ “Akea te bwai ae e na kai nanou iai.” E namakinna Tawita bwa e tabeakinaki raoi ibukina bwa e katauraoi Iehova n taai nako baike e kainnanoi. E karekea naba Tawita ana iraorao ma Iehova ao akoakina irouna. Anne bukina ngke e kakoauaa raoi ae n aki ongei baika a na riki n taai aika imwaina, ma e na bon teimatoa Iehova n tabeakini kainnanona. E korakora riki iroun Tawita onimakinan ana tangira Iehova nakoni baike e raraomaeakini, ao anne are karekea nakoina te kukurei ao te raunnano ni koaua.—TaiAre. 16:11.

14. E kangaa Iehova ni kaota tabeakinara?

¹⁴ E rangi n tabeakinira Iehova, moarara riki ngkana a riki baika bubuaka ni maiura. E namakinna Claire, a ae beku n te Betaera i nanon 20 tabun te ririki, bwa ai akea ana konaa ni buokiia ana utu ake a kaaitara ma kangaanga ake a rotaki iai teuana imwin teuana. E taonaki taman neiei n te aoraki ae te boo, e kabaneaki man te ekaretia tarina temanna, ao e bua aia bitineti ae uarereke ao mwengaia. E kangaa Iehova ni kaota tabeakinaia? E kangai Claire: “E taraia raoi Iehova bwa a na rereke baika a kainnanoi au utu ni katoabong. E okioki Iehova ni katauraoi baika a riaon are I kantaningaia! I aki toki n iaiangoi taai ake I nora iai ana tangira Iehova, ao I aki kona ni mwaninga. A buokai ururingan taai akanne bwa N na teimatoa ni beku iroun Iehova ma te kimwareirei n aki ongei kataaki.”

15. Bukin tera ngke e namakinna Tawita bwa e boou angina? (Nora naba te taamnei.)

¹⁵ “E kabooua angiu.”  Iai taai ake e namakina iai te rawawata Tawita ibukini kangaanga  ao kataaki ake e kaaitarai. (TaiAre. 18:4-6) Ma e kaboouaki angina n ana tangira Iehova ao n tabeakinana irouna. E kaira Iehova raoraona ae akea korakorana aei nakon “tawaana n uteute” ao “taabo ni motirawa i rarikin raan.” Ibukin anne, e a oki korakoran Tawita ao e a kona n teimatoa ni beku iroun Iehova ma te kimwareirei.—TaiAre. 18:28-32.

16. E kangaa ana tangira Iehova ni kabooua angim?

¹⁶ Ngkana ti kaaitara naba ni boong aikai ma kataaki ao kangaanga, ti bon “aki roko n tokira ibukin ana tangira Iehova ae koaua.” (Bwae. 3:22; IKoro. 1:11) Iangoa ana katoto Rachel. E rangi n uruaki nanona ngke e kitanna buuna ao e kitana naba Iehova n taini butinakon te COVID-19. Tera are e karaoia Iehova ibukina? E taku neiei: “E taraia raoi Iehova bwa N na namakinna ae I tangiraki. E otabwaniniai irouia raoraou aika kabanea aia tai ma ngai, a ninikira kanau, a kanakoi taeka aika kaunganano ao kiibu, a wingare nakoiu, ao a kakauringai ae e bon tabeakinai Iehova. I rangi ni kaitaua Iehova ngkai e anganai au utu ae bubura aika a tatangira.”

17. Bukin tera ngke ‘akea te bwai ae karuanikai ae e maakua’ Tawita?

¹⁷ “Akea te bwai ae karuanikai ae I maakua, bwa bon raou ngkoe.” E aki toki n ruanikai maiun Tawita, ao a bati aiana aika korakora. Ma e namakina te mano raoi n ana tangira Iehova. E kona n namakinna Tawita bwa e memena Iehova i rarikina n taai nako, ao anne ae e karauaki iai nanona. Ngaia are e anene ni kangai: “E kainaomataai [Iehova] mani baike I maakui ni kabane.” (TaiAre. 34:4) E boni maaku Tawita, ma e boni korakora riki ana tangira Iehova nakoni maakuna.

18. E kangaa ataakin ae e tangiriko Iehova, ni kakorakorako riki ngkana ko maaku?

¹⁸ E na kangaa ataakin ae ti tangiraki iroun Iehova, ni kakorakoraira ngkana ti rinanon taai aika kakamaaku? E taekina ana namakin te bwaiania ae Susi ma buuna ngke e bakabureia natiia te mwaane, ni kangai: “E kauruakinano rikin te kabuanibwai ae karina ao e kona ni karekea namakinan te mamaara ao ae akea uaam. Ma ti namakina te mano raoi n ana tangira Iehova.” E ururing ni kangai Rachel are e taekinaki mai imwaina: “N te tairiki teuana ngke I a rangi n nanokawaki ma n rangi n raraoma ao ni maaku, ao I tang n takarua n tataro nakon Iehova. Imwin anne, I a namakinna  bwa e kabebetea ma ni karaua nanou n aron ae e karaoia te tina nakon natina, ao I a matunako. N na bon aki mwaninga te tai anne.” E kabanea aua te ririki n te karabuuti te unimwaane n te ekaretia ae Tasos ngke e rawa ni kaaina te taanga ni buaka. E kangaa n nora tangirana ma tabeakinana iroun Iehova? E taku teuaei: “E tabeakini kainnanou ni kabane Iehova ao ae bati riki. Aei ae e a kakorakoraa kakoauaan ae I kona n onimakinna raoi. E anganai naba Iehova te kimwareirei rinanon taamneina, e ngae ngke I mena n te tabo ae karawawata. I buokaki n aei bwa N na ataia ae ngkana I onimakina riki Iehova, N na bon namakina riki tangirau irouna. Ngaia are I a moana au beku irouna bwa te bwaiania ae katoatai ni menau n te karabuuti.”

KAANIA ATUAM AE TATANGIRA

19. (a) E na tera aron ara tataro n ataakin ae e tangirira te Atua? (b) Tera aron rotakim n aroni kabwarabwaraan ana tangira Iehova? (Nora te bwaoki ae “ Taeka Aika Buokira n Namakina Ana Tangira Iehova.”)

¹⁹ Rongorongo ni kabane aika ti maroroakin aikai, a kaotia bwa e boni memena iroura Iehova ae “te Atua ae nibwan te tangira”! (2Kor. 13:11) E kan atai arora n tatabemanira nako. Ti kakoauaa raoi bwa ti “otabwaniniaki . . . n Ana tangira ae koaua.” (TaiAre. 32:10) Ngkana ti kakananoa ara iango i aon arona ni kaota ana tangira nakoira, ane ti na kakoauaa riki ae bon iai ngaia ao ti a kaaniaki riki ma ngaia. Ti kona ni kawaria n akea tutukara ao n tuangnga ae ti rangi ni kainnanoa ana tangira. Ti kona n taekin raraomara ni kabane nakoina, ibukina bwa e ota iai ao e ingainga ni kani buokira.—TaiAre. 145:18, 19.

20. E kangaa ana tangira Iehova ni kaanira riki ma ngaia?

²⁰ N aron te ai ae kaabueira n tain te kamwaitoro, ai aron naba ana tangira Iehova ni kona ni kabebeteira ngkana ti boo ma kataaki ao kangaanga. Ngaia are butimwaea ana tangira Iehova ae kona ni kabebeteko ao n anganiko te rau. Ao ti bia bane ni kaekaa ana tangira anne, n arora ni kangai: “I tangira Iehova”!—TaiAre. 116:1.