1. Tera ae ti kona ni karaoia bwa ti aonga ni kakukureia Iehova?

 IANGOIA bwa ko angan temanna ae ko tangiria te bwaintangira ae okoro ae tamaroa ao ni bongana. Ko na bon aki kukurei iroun te aomata anne ngkana e karina am bwaintangira anne n te tabo teuana ni kawakinna iai ao n aki manga tabe iai! N te itera are teuana, ko na boni kukurei ngkana e kabongana raoi am bwaintangira anne ao e kaota ana kakaitau iai. Tera te reirei n aei? E a tia Iehova n anga Natina ibukira. Ai kukureira Iehova ngkana ti kaota ara kakaitau ibukin te bwaintangira ae kakawaki anne ao ibukin ana tangira are e kairia bwa e na katauraoa te kaboomwi!​—Ioa. 3:16; IRom 5:​7, 8.

2. Tera ae e na maroroakinaki n te kaongora aei?

² Ni waakinakon te tai, ti a kona ni mwaninga taekan te bwaintangira ae te kaboomwi. Kaanga ai aron ae ti a karina ana bwaintangira te Atua anne n te tabo ae ti kawakinna iai. Ti kukurei bwa e reke iroura ma ti katikua n te tabo ae ti aki kona n noria iai. Ti riai n teimatoa ni kakabooua ara kakaitau ibukin te baere e a tia ni karaoia te Atua ao Kristo ibukira. E kona ni buokira te kaongora aei ni karaoa anne. Ti na maroroakinna bwa ti na kangaa ni kakabwaiaaki man te kaboomwi ngkai ao nakon taai aika imwaira. Ti na maroroakinna naba bwa ti na kangaa ni kaota ara kakaitau ibukin ana tangira Iehova, moarara riki n namwakainan te Kauring.

ARORA NI KAKABWAIAAKI NGKAI

3. Tera te anga teuana ae ti kakabwaiaaki iai ngkai man te kaboomwi?

³ Ti a kamani kakabwaiaaki n ana karea ni kaboomwi Kristo.  N te katoto, e kabwarai ara bure Iehova ibukin te kaboomwi. E bon aki kabaeaki bwa e na kabwarai ara bure. Ma e boni kani karaoia. E anene ni kakaitau te tia areru ni kangai: “Bwa ko raoiroi ngkoe ae Iehova, ao ko tauraoi ni kabwarabure.”​—TaiAre. 86:5; 103:​3, 10-13.

4. E katauraoa te kaboomwi Iehova ibukia antai? (Ruka 5:32; 1 Timoteo 1:15)

⁴ A namakinna tabeman bwa a aki tau ni kabwaraaki aia bure iroun Iehova. Ni koauana, ti boni bane n aki tau. E ataia te abotoro Bauro ae e “aki tau n aranaki bwa te abotoro.” Ma e reitia n taku: “N ana akoi ae rianako te Atua, ao I a riki n ai arou aei.” (1Kor. 15:​9, 10) E kabwarai ara bure Iehova ngkana ti rairannano man ara bure. Bukin tera? Ibukina bwa e tangirira, ao tiaki ibukin ae ti tau ni karekea kabwaraan ara bure. Ngkana ko rawawata n namakinan ae ko aki tau, uringnga ae e katauraoa Iehova te kaboomwi tiaki ibukia aomata aika bubure, ma ibukia taani bure aika rairi nanoia.​—Wareka Ruka 5:32; 1 Timoteo 1:15.

5. Iai i buakora ae kona n iangoia bwa e riai ni karekea nanoangaana iroun Iehova? Kabwarabwaraa.

⁵ Ti aki riai n iangoia ae ti na karekea nanoangaara iroun Iehova ibukina bwa ti a tia ni beku irouna i nanon ririki aika bati. E koaua ae e kakaitau Iehova ibukin ara kakaonimaki ni beku irouna. (Ebera 6:10) E anga Natina bwa ana bwaintangira ae aki kabooaki nakoira, ma tiaki boon ara beku ibukina. Ngkana arona bwa ti iangoia ae ti bon tau n nanoangaaki ke n iangoia bwa ti kakawaki riki, ai aron ae kaanga ti taekinna bwa akea uaani mateni Kristo.​—Kabotaua ma I-Karatia 2:21.

6. E aera Bauro e kakorakoraa ni beku iroun Iehova?

⁶ E ataia Bauro ae aki kona ni karekea akoana iroun te Atua. E aera ngkanne ngke e kakorakoraa ni beku iroun Iehova? E aki karaoia bwa e kani kaotia ae e tau ni karekea ana akoi ae rianako te Atua, ma e kani kaota ana kakaitau ibukin ana akoi ae rianako Iehova. (IEbe. 3:7) N aroni Bauro, ti teimatoa ni beku ma te ingainga tiaki ibukini karekean nanoangaara iroun Iehova ma ibukini kaotan ara kakaitau ibukin ana nanoanga.

7. Tera riki te anga teuana ae ti kakabwaiaaki iai ngkai man te kaboomwi? (I-Rom 5:1; Iakobo 2:23)

⁷ Te anga teuana ae ti kakabwaiaaki iai man te kaboomwi ngkai, bwa ti a kona ni karekea ara iraorao ae kaan ma Iehova. a N aron ae taekinaki n te kaongora are mai imwaina, ti aki karekea ara iraorao ma te Atua ngke ti bungiaki. Ma ibukin te kaboomwi, ti a kona ni karekea te “raoi ma te Atua” ao ni kaan ma ngaia.​—Wareka I-Rom 5:1; Iakobo 2:23.

8. Bukin tera bwa ti riai ni kaitaua Iehova ngkai ti kona n tataro?

⁸ Te tataro bon te bwai teuana ae rangi ni kakawaki ae ti kona ni karekea man ara iraorao ae kaan ma Iehova. E aki tii ongoraei Iehova aia tataro ana aomata n taini bobotaki ma e ongoraei naba ara tataro n tatabemanira nako n tii ngaira. E kona ni karauaki nanora n te tataro ao n anganira raun ara iango, ma a bati riki kakabwaiaara n te tataro nakon aikai. E kona ni kakorakoraa ara iraorao ma te Atua. (TaiAre. 65:2; Iak. 4:8; 1Ioa. 5:14) E tatataro Iesu ni menana i aon te aba ibukina bwa e ataia ae e kakauongo Iehova ao e na kakorakoraaki iai ana reitaki ma Tamana. (Ruka 5:16) Ai kakaitaura ngaira ngkai ti kona n riki bwa raoraon Iehova ao n taetae naba ma Ngaia n te tataro, man ana karea Iesu!

 ARORA NI KONA NI KAKABWAIAAKI N TE TAI AE IMWAIRA

9. A na kangaa ni kakabwaiaaki man te kaboomwi n te tai ae imwaira taan taromauria Iehova aika kakaonimaki?

⁹ A na kangaa taan taromauria Iehova aika kakaonimaki ni kakabwaiaaki man te kaboomwi n te tai ae imwaira? A na karekea te maiu are aki toki. A bati aomata aika iangoia bwa e aki kona n riki aei ibukina bwa a teimatoa ni mamate aomata i nanon iranga te ririki. Ma bon ana moani kantaninga Iehova ae a na maiu n aki toki aomata. Ngke arona bwa e aki bure Atam ao e na akea ae e na iangoia bwa ti aki kona ni maiu n aki toki. Ao e ngae ngke e kangaanga iangoan ae ti na maiu n aki toki ngkai, ma ti kona ni kakoauaa bwa e na bon riki ibukina bwa ti ataia ae e a tia Iehova ni kabwakaa te boo ae rangi ni bobuaka ibukini karekeana, ae maiun oin Natina.​—IRom 8:32.

10. Tera ae a ingainga ni kariariaa taani kabiraki ao tiibu tabemwaang?

¹⁰ E ngae ngke bon te kakabwaia te maiu are aki toki n te tai ae imwaira, ma e tangirira Iehova bwa ti na iaiangoia mangkai. A ingainga taani kabiraki ni kariariaa kantaningaan te maiu i karawa ngkana a tautaekana te aonnaba ma Kristo. (TeKao. 20:6) A ingainga ni kariariaa te maeka n te aonnaba ae bwaretaiti tiibu tabemwaang ike e nang akea iai te maraki ao te rawawata. (TeKao. 21:​3, 4) Temanna ngkoe i buakoia tiibu tabemwaang aika kantaningaa te maiu are aki toki n te aonnaba? Aei bon tiaki te kaniwanga ae mangori riki! Bon te maiu ae a bane ni karikaki aomata nako iai. Ti na rangi ni kukurei ni maiu n te aonnaba.

11-12. Baikara kakabwaia tabeua n te Bwaretaiti ae ti kona ni kariariaa? (Nori naba taamnei.)

¹¹ Iangoia bwa e na tera aron te maiu n te aonnaba ae Bwaretaiti. Ko nang aki manga raraomaeakina te aoraki ke te mate. (Ita. 25:8; 33:24) E na katoka raoi nanom Iehova ni baika ko tangiri. Baikara bwaai aika ko kan reiakini? Ko kani kamatebwaia taekaia maan? Ko kan reireiniko ni katangitang? Ko kan reireiniko ni korotaamnei? A boni  bae ni kainnanoaki taani korotaamnei, taani kateitei, ao taan ununiki. A na kainnanoaki naba taan ibuobuoki ao kateimatoaan raoiroini bwaai, n aroni katauraoan amwarake, karaoani bwaai ni mwakuri, ao te ununiki ma tararuaan te onnaroka bwa e na tamaroa. (Ita. 35:1; 65:21) E na rangi ni bati am tai ae ko kona ni kabanea n reireiniko iai te rabakau teuana ngkana ko a maiu n aki toki.

¹² Ai kakimwareireira te tai are ti nang butimwaeia iai naake a manga kautaki! (Mwa. 24:15) Iangoa naba kukureim n reiakinan riki taekan Iehova ngkana ko ukeuke i aon ana karikibwai aika bati. (TaiAre. 104:24; Ita. 11:9) Ao ae tamaroa riki, ko nang kukurei n taromauria Iehova n akea manga namakinan te uringaaba imwini karaoan ae bure! Ko na kakeai kakabwaia n taai aika imwaira aikai ibukin “te kimwareirei ae kai toki ae kakukurein te bure”? (Ebera 11:25) Ko na bon aki! A materaoi riki kakabwaia aikai nakoni baika ti riai ni kakeai ngkai. Uringnga ae e na aki teimatoa n riki te aonnaba ae Bwaretaiti bwa te kantaninga n taai aika imwaira. E na bon riki bwa te tabo ae ti na maeka iai ni katoabong. A kona n reke baikai ibukina bwa e rangi n tangirira Iehova n te aro are e anga Natina ibukira!

KAOTA AM KAKAITAU IBUKIN ANA TANGIRA IEHOVA

13. Ti na kangaa ni kaota ara kakaitau ibukin ana tangira Iehova? (2 I-Korinto 6:1)

¹³ Ti na kangaa ni kaota ara kakaitau nakon Iehova ngkai e katauraoa te kaboomwi? Ngkana ti moanibwaia ara beku irouna ni maiura. (Mat. 6:33) E mate Iesu “bwa a aonga n aki manga maiu akana maiu i bon ibukia, ma a na maiu ibukin teuare mate ibukia, are e a tia ni kautaki.” (2Kor. 5:15) Ti aki tangiria bwa ti na kakeaa bongan ana akoi ae rianako Iehova.​—Wareka 2 I-Korinto 6:1.

14. Ti na kangaa n onimakina ana kairiri Iehova?

¹⁴ Ti kona naba ni kaota ara kakaitau ibukin ana tangira Iehova ngkana ti onimakina ana kairiri. N te aro raa? Ti riai n iangoia bwa tera ae e tangiria Iehova bwa ti na karaoia, ngkana ti karaoi ara motinnano n aron ae buburara ara reirei ae ti riai ni karekea ke te aeka ni mwakuri raa ae ti riai ni butimwaeia. (1Kor. 10:31; 2Kor. 5:7) Te bwai ae tamaroa ae e na riki ngkana ti kaotiota ara onimaki n ara mwakuri, e na korakora onimakinan Iehova iroura ao ara iraorao ma ngaia. E a nene riki iai ara kantaninga.​—IRom 5:​3-5; Iak. 2:​21, 22.

15. Ti na kangaa ni kaota ara kakaitau n namwakainan te Kauring?

¹⁵ Iai riki te anga teuana ae ti kona ni kaota iai ara kakaitau ibukin ana tangira Iehova. Ngkana ti kabongana raoi namwakainan te Kauring aei ni kaota ara kakaitau nakon Iehova ibukin te kaboomwi. Irarikin ae ti na riai ni kaea te Kauring, ti kona ni kaoia naba tabemwaang bwa a na kaea. (1Tim. 2:4)  Kabwarabwaraa nakoia naake ko kaoia bwa tera ae e na karaoaki n te Kauring. E kona n ibuobuoki kaotan nakoia taamnei aika Bukin Tera Ngke E Mate Iesu? ao Kauringa Maten Iesu. A riai n taraia raoi unimwaane bwa a na kaoia naake a katoka aia beku. Iangoa te kimwareirei i karawa ao n te aonnaba ngkana iai ana tiibu Iehova tabeman aika a manga okira te nanai! (Ruka 15:​4-7) Ti bia iangoia bwa ti na aki tii kamaurira i marenara n tain te Kauring ma ti na kamauriia riki naake a boou ke naake a a maan n tuai ni kaea te Kauring. Ti tangiria bwa a na namakinna ae a butimwaeaki raoi!​—IRom 12:13.

16. Bukin tera bwa ti riai ni karababaa ara mwakuri ni minita n namwakainan te Kauring?

¹⁶ Ko kona ni kabatiaa am beku iroun Iehova n namwakainan te Kauring? Karaoan aei bon te anga ae tamaroa ni kaota ara kakaitau ibukini bwaai ni kabane ake e a tia ni karaoia te Atua ao Kristo ibukira. Ngkana ti kabatiaa ara beku iroun Iehova, ti na namakina riki boutokaara irouna ao e na rikirake ni korakora riki iai onimakinana iroura. (1Kor. 3:9) Taraia raoi bwa ko na irira te wareware n te Baibara ibukin te Kauring ae oti n te boki ae Neneran te Baibara ni Katoabong ke n te taibora ae mena n te boki n reirei ibukin te taromauri i nukan te wiki. Ko kona naba n rinei kiibu akanne bwa am bwai n ukeuke n reirei i bon iroum.

17. Tera ae e kukurei iai Iehova? (Nora naba te bwaoki ae “ Aanga Aika Ti Kaota iai Ara Kakaitau Ibukin Ana Tangira Iehova.”)

¹⁷ Ko bae n aki kona ni karaoi bwaai ni kabane aika taekinaki n te kaongora aei ibukin te bae ko rinanona ngkai. Ma uringnga ae e aki kakabotaui Iehova mwaitini baika ko kona ni karaoi ma are a kona ni karaoia tabemwaang. E nora te baere i nanom. E kukurei ngkana e nora nanom ni kakaitau ibukin ana bwaintangira ae rangi ni kakawaki ae te kaboomwi.​—1Tam. 16:7; Mareko 12:​41-44.

18. Bukin tera ngkai ti kakaitau nakon Iehova ae te Atua ao Iesu Kristo?

¹⁸ E reke kabwaraan ara bure, ara iraorao ma Iehova, ao kantaningaan te maiu are aki toki iroura, tii man te kaboomwi. Ti bia kaotiota ara kakaitau n taai nako ibukin ana tangira Iehova are e kairaki iai bwa e na katauraoi kakabwaia aikai nakoira. (1Ioa. 4:19) Ti bia kaotiota naba ara kakaitau nakon Iesu are e rangi n tangirira n te aro are e a anga maiuna n aomata ibukira!​—Ioa. 15:13.