1. Ti kangaa ni kakabwaiaaki mani kaeani Kauringaani mateni Kristo?

 KO BONI bae ni kakoauaa ae te bwaintituaraoi ae rangi ni kakawaki te kaboomwi! (2Kor. 9:15) Ko a kona ni karekea am iraorao ma Iehova ae te Atua ibukina bwa e anga maiuna n aomata Iesu. Ko kona naba ni karekea te kantaninga ae te maiu are aki toki. Ai riaira ngkanne bwa ti na kaota ara kakaitau ibukin te kaboomwi ao ibukin Iehova are e kairaki n ana tangira bwa e na katauraoia! (IRom 5:8) Ibukini buokara bwa ti na kateimatoa ara kakaitau ao n aki mwaninga taekan te kaboomwi, e a tua Iesu bwa ti na kaea Kauringaani matena are kakaraoaki ni katoa ririki.​—Ruka 22:​19, 20.

2. Tera ae e na maroroakinaki n te kaongora aei?

² E na karaoaki te Kauring n te ririki aei n te Kaonobong, Eberi 12, 2025. Akea te nanououa bwa ti na bane ni kaea. Ti na rangi ni kakabwaiaaki ngkana ti karekea ara tai n namwakainan te Kauring ni kananoa ara iango a i aon te baere a a tia ni karaoia Iehova ao Natina ibukira. N te kaongora aei, ti na maroroakina reireiara ibukin Iehova ao Natina n te kaboomwi. N te kaongora are imwina ti na buokaki n ota bwa ti na kangaa ni kakabwaiaaki man te kaboomwi anne ao ti na kangaa ni kaota ara kakaitau iai.

 REIREIARA IBUKIN IEHOVA MAN TE KABOOMWI

3. E na kangaa maten te mwaane ae tii temanna ni kainaomataia aomata aika mirion ma mirion? (Nora naba te taamnei.)

³ Ti reiakinaki ana kaetitaeka ae riai Iehova n te kaboomwi. (TuaKau. 32:4) N te aro raa? Iangoa aei: Ti ituaki n te bure ae kairiri nakon te mate ibukin ana aki ongeaba Atam. (IRom 5:12) Ibukini kainaomataara man te bure ao te mate, e a baireia Iehova bwa e na katauraoa te kaboomwi Iesu. Ma e na kangaa ana angakarea te aomata ae kororaoi ae tii temanna ni kamaiuia aomata aika mirion ma mirion? E kabwarabwaraa te abotoro Bauro ni kangai: “N aroia aomata aika bati aika riki bwa taani bure n ana aki ongeaba te mwaane ae tii temanna [Atam], ao ai arona naba bwa a na riki n raoiroi aomata aika bati n ana ongeaba te aomata ae tii temanna [Iesu].” (IRom 5:19; 1Tim. 2:6) Ae nanona ti riki n tautoronaki n te bure ao te mate man ana aki ongeaba te mwaane ae tii temanna ae kororaoi. Ngaia are ti na kainaomataaki naba man ongeaban te mwaane ae tii temanna ae kororaoi.

4. E aera Iehova ngke e a aki naba tii baireia bwa a na maiu n aki toki kanoan Atam aika raoiroi nanoia?

⁴ E bon riai Iesu ni mate ibukini kamaiuara? E aera Iehova e a aki naba tii baireia bwa a na maiu n aki toki kanoan Atam aika raoiroi nanoia? N aia taratara aomata aika aki kororaoi, e taraa n akoi ao n riai karaoan anne. Ma e aki oti iai ana kaetitaeka ae kororaoi Iehova. E na bon aki kona Iehova n tarariaoa ana aki ongeaba Atam ibukina bwa e kaetitaeka n te aro ae riai.

5. Bukin tera bwa ti kona ni kakoauaa ae e na boni karaoa ae eti n taai nako Iehova?

⁵ Ma tera ae e na riki ngke arona bwa e aki katauraoa Iehova te kaboomwi, ao e aki kaetitaeka n te aro ae riai n arona ni kariaia kanoan Atam aika aki kororaoi bwa a na maiu n aki toki? A na bon iangoia aomata ae e na kona naba te Atua ni kakeaa bongan ana kaetitaeka ae riai ni bwaai riki tabeua. N te katoto, e kona ni kabwaka ni kakororaoi ana berita tabeua? Ti aki riai n raraoma ibukin rikin anne. Man aron Iehova ni karaoa te kaetitaeka ae riai e ngae naba ngke e rangi rotaki iai bwa e anga maiun oin Natina ae tangiraki irouna, e karauaki iai nanora bwa e na boni karaoa ae eti n taai nako.

6. Tera te anga teuana ae oti iai ana tangira Iehova n te kaboomwi? (1 Ioane 4:​9, 10)

⁶ E ngae ngke ti buokaki n te kaboomwi bwa ti na ota n ae e kaetitaeka n te aro ae riai Iehova, ma ti buokaki riki iai n ota ni korakoran ana tangira. (Ioa. 3:16; wareka 1 Ioane 4:​9, 10.) E kaotaki n te reirei ae te kaboomwi bwa e tangirira Iehova bwa ti na maiu n aki  toki ao n riki naba bwa kaain ana utu. Iangoa aei: Ngke e bure Atam, ao Iehova e a kabanea man Ana utu aika kaainaki irouia taan taromauria. Ibukin aei, ti a bane n aki kaaina ana utu te Atua ngke ti bungiaki. Ma ibukin te kaboomwi, e kabwarai ara bure Iehova ao n tokin te tai e na kairiia aomata ni kabane aika kaotiota aia onimaki ao n ongeaba bwa a na kaaina ana utu. Ti kona naba ngkai ni karekea ara iraorao ae kaan ma Iehova ao ma raora n te onimaki. Ni koauana, e bon rangi n tangirira Iehova!​—IRom 5:​10, 11.

7. Ti kangaa ni buokaki bwa ti na ota n tangirara ae korakora iroun Iehova ni kammarakan Iesu?

⁷ Ti kona n ota riki n tangirara ae korakora iroun Iehova ngkana ti iangoa aron rotakina n te kaboomwi. E bukibuki Tatan bwa akea ana toro te Atua ae e na teimatoa ni kakaonimaki nakoina ngkana e kangaanga karaoana irouna. Ibukini kaekaan te bukibuki anne, e a kariaia Iehova bwa e na kammarakaki Iesu imwaini matena. (Iobi 2:​1-5; 1Bet. 2:21) E mamataku Iehova ngke e kakanikoaki Iesu irouia taani kakaaitara man Aaro, e batiboaki irouia tautia, ao e bobitiaki i aon te kai. Imwina e a nora Natina ae tangiraki irouna Iehova ngke e rinanon te mate ae kammaraki. (Mat. 27:​28-31, 39) Iai mwaakan Iehova ni katoki baike a riki akanne. N te katoto, ngke a kangai taani kakaaitara: “Ke E kamaiua te Atua ngkana E tangiria,” e kona Iehova ni karaoa anne. (Mat. 27:​42, 43) Ma ngke arona bwa e karaoa anne te Atua, e na akea te kaboomwi ae e na kabwakaaki ao ti na tiku n akea te kantaninga ibukira. Ngaia are e kariaia Iehova bwa e na rinanon te kammarakaki Natina ni karokoa matena.

8. E maraki Iehova ngke e nora Natina ni kammarakaki? Kabwarabwaraa. (Nora naba te taamnei.)

⁸ Ti aki riai n iangoia ae moan te mwaaka te Atua ao akea ana namakin! Ti karaoaki ni katotongana, ao ti karikaki ma ara namakin ngaia are bon iai naba ana namakin Iehova. E kabwarabwaraaki n te Baibara bwa e namakina te ‘maraki’ ao te “nanokawaki.” (TaiAre. 78:​40, 41) Iangoa naba rongorongon Aberaam ao Itaaka. Ko bae n uringnga are e tuangaki Aberaam bwa e na anga natina ae te rikitemanna bwa te karea. (KBwaai 22:​9-12; Ebera 11:​17-19) Ti kona n iangoi ana namakin aika kakaokoro Aberaam ngke e katauraoia bwa e na kamatea natina n te biti. Ai korakorara riki nanokawakin Iehova ngke e tataraa Natina ngke e kammarakaki n te aro ae riao n uaa matena irouia aomata aika aki tangira te Atua!​—Nora te taamnei ae Imitate Their Faith​—Abraham, Part 2 n jw.org.

9. Tera ae taekinaki n I-Rom 8:​32, 38, 39 ae buokiko n ota n ana tangira ae korakora Iehova ibukim ao raom n te onimaki?

⁹ Ti reiakinaki n te kaboomwi ae akea riki temanna ae korakora tangirara irouna nakon Iehova, tiaki naba ara utu aika ti rangi n tangiria  ke raoraora ni kaan. (Wareka I-Rom 8:​32, 38, 39.) E bon tangirira Iehova nakon tangirara i bon iroura. Ko kani maiu n aki toki? E rangi n tangiria riki Iehova bwa e na reke anne iroum. Ko tangiria bwa a na kabwaraaki am bure? E rangi n tangiria riki Iehova bwa e na kabwarai am bure. Tii te bwai ae tangiria bwa ti na butimwaea ana bwaintituaraoi n arora ni kaotiota ara onimaki ao n ongeaba. Te kaboomwi bon te bwai ae kaotaraea raoi ana tangira te Atua. Ao ti na reiakina riki taekan ana tangira Iehova n te waaki ae boou i aon te aba.​—TeMin. 3:11.

REIREIARA IBUKIN IESU MAN TE KABOOMWI

10. (a) Tera ae e kananokawaka riki Iesu ibukini matena? (b) Baikara aanga ake e katabua aran Iehova iai Iesu? (Nora naba te bwaoki ae “ E Katabuaki Aran Iehova n Etin Aron Iesu”)

¹⁰ E rangi n tabeakina taekan Tamana Iesu. (Ioa. 14:31) E rangi n nanokawaki Iesu ngkai e kona ni kabuakakaaki aran Tamana ni bukinana bwa e bakannatua ao e karitei. Anne bukina ngke e tataro ni kangai: “Tamau, ngkana e kona, ao kararoaa te mwangko aei mairou.” (Mat. 26:39) Ma e boni katabua aran Tamana Iesu n tokin te tai n arona ni kateimatoa etin arona i matan Iehova ni karokoa matena.

11. E kangaa Iesu ni kaota ana tangira ae korakora ibukia aomata? (Ioane 13:1)

¹¹ Ti reiakinaki naba n te kaboomwi bwa e rangi n tabeakinia aomata Iesu, moarara riki taan rimwina. (TaeRab. 8:31; wareka Ioane 13:1.) N te katoto, e ataia Iesu ae iai tabeua iteran ana mwakuri ni minita i aon te aba aika kangaanga moarara riki matena ae kammaraki. Ma e aki karaoi mwiokoana i aon te aba ibukin ae e bon riai ni karaoi. Ma e kabanea nanona Iesu n ana uarongorongo, n ana angareirei, ao ni buokiia tabemwaang. E reke naba ana tai Iesu n te bong are e nang mate iai, n teboki waeia ana abotoro n anga taeka  ni kaungaunga aika kabebetenano ao kaetieti. (Ioa. 13:​12-15) E reke naba ana tai teutana Iesu ngke e tine i aon te kai, n taekina te kantaninga nakon te kamwarua are e a kaani mate ao e karaoa naba ana babaire ibukin tararuaan tinana. (Ruka 23:​42, 43; Ioa. 19:​26, 27) Ngaia are e aki tii oti korakoran ana tangira Iesu ni matena, ma e oti naba i nanoni maiuna ni kabane i aon te aba.

12. N te aro raa ae e teimatoa Iesu ni karaoi baika bati ibukira?

¹² E ngae ngke e rinanon te mate Kristo “ae tii teuana ae manena n aki toki,” ma e bon teimatoa naba ni karaoi baika bati ibukira. (IRom 6:10) N te aro raa? E teimatoa ni kabanea ana tai ao korakorana ni karaoi baika bati bwa ti aonga ni kakabwaiaaki n te kaboomwi. Iangoi baika e tabe ni karaoi. E beku bwa ara Uea, te Ibonga ae Rietata, ao atun te ekaretia. (1Kor. 15:25; IEbe. 5:23; Ebera 2:17) E mataniwi n te mwakuri ae ikotakia aika kabiraki ao te koraki ae uanao, ae te mwakuri ae e na toki karaoana imwaini moanakin te rawawata ae korakora. b (Mat. 25:32; Mareko 13:27) E taraia naba bwa a na nuai raoi n te amwarake n taamnei ana toro aika kakaonimaki ni kabaneani boong aikai. (Mat. 24:45) Ao e na teimatoa ni karaoi baika ti na kabwaia iai i nanon ana tai n Tautaeka ae Maanna Tenga te Ririki. E bon anga raoi Natina Iehova ibukira!

TEIMATOA N REIAKINI BAIKA BATI

13. Ko na kangaa n teimatoa n reiakina taekan ana tangira te Atua ao Iesu ibukira ngkana ko kananoa am iango?

¹³ Ko kona n teimatoa n reiakina taekan ana tangira Iehova ae te Atua ao Kristo Iesu ibukira, ngkana ko teimatoa ni kananoa am iango iai. Tao n namwakainan te Kauring n te ririki aei, ko kona ni karaua ni wareka teuana kanoan te Euangkerio ke e raka riki. Tai kataia ni wareki mwakoro aika bati n tii teuana te tai. Ma karaurau ni wareki ao nori riki bukina ngkai ti riai n tangira Iehova ao Iesu. Ao tibwai baike ko reiakin nakoia tabemwaang.

14. N aron ae taekinaki n Taian Areru 119:97 ao te kabwarabwara mai nano, ti na kangaa ni buokaki n ara kakaae bwa ti na teimatoa n reiakina taekan te kaboomwi ao reirei riki tabeua? (Nora naba te taamnei.)

¹⁴ Ngkana ko a maan i nanon te koaua, ko bae n iangoia bwa iai riki baika boou aika ko na reiakin ibukin ana kaetitaeka te Atua, ana tangira ao te kaboomwi, ke akea. Ni koauana, e bon aki kona n toki reiakinani baikai ke reirei  riki tabeua. Ngaia are tera ae ko kona ni karaoia? Kabonganai raoi rongorongo aika bati aika n ara boki. Ngkana ko boo ma te rongorongo ae ko aki raoi ota iai, karaoa am kakaae iai. Imwina kananoa am iango i nanon te bong anne, i aoni baike ko a tia n reiakini ibukin Iehova, Natina, ao aia tangira ibukim.​—Wareka Taian Areru 119:97 ao te kabwarabwara mai nano.

15. Bukin tera bwa ti riai n teimatoa n ukoukori baika kakawaki man te Baibara?

¹⁵ Tai kabwaraa nanom ngkana akea te bae boou ke ae kakaongora ni katoatai are ko wareware iai ke ko karaoa am kakaae. Titeboo arom ma te aomata ae kakaaea te koora. A taotaon nanoia ni kabanei aoa ma boong aika bati taani kakaae koora imwain ae a kunea naba te koora ae rangi n uarereke. Ma a teimatoa ni kakorakoraia ibukina bwa e rangi ni kakawaki te koora irouia e ngae naba ngkana e uarereke. Ai kakawakira riki ngkanne koaua ni kabane man te Baibara! (TaiAre. 119:127; TaeRab. 8:10) Ngaia are taotaona nanom ao kateimatoa am babaire ibukin am wareware n te Baibara.​—TaiAre. 1:2.

16. Ti na kangaa ni kakairi iroun Iehova ao Iesu?

¹⁶ Ngkana ko ukeuke n reirei, kakaaei am anga ni maiuakini baike ko reiakin. N te katoto, kakairi n ana kaetitaeka ae riai Iehova n arom n aki inanonano nakoia aomata. Kakairi n ana tangira Iesu ibukin Tamana ao ibukia aomata n arom n tauraoi ni karawawataaki ibukin aran Iehova ao n arom ni mwakuri korakora ibukia raom ni Kristian. Kakairi naba iroun Iesu n arom n uarongorongo nakoia tabemwaang bwa e aonga n reke naba aia tai ni butimwaea ana bwaintituaraoi ae rangi ni kakawaki Iehova.

17. Tera ae ti na maroroakinna n te kaongora are imwina?

¹⁷ Ngkana ti a ota riki n te kaboomwi ao n ataa kakawakina, e na korakora riki iai tangiran Iehova iroura ao Natina. Ibukin aei, e na korakora riki tangirara irouia. (Ioa. 14:21; Iak. 4:8) Ngaia are ti bia kabonganai raoi baika e katauraoi Iehova n teimatoa n reiakina iai taekan te kaboomwi. E na maroroakinaki n te kaongora are imwina aanga tabeua aika ti kona ni kakabwaiaaki iai man te kaboomwi ao arora ni kaota ara kakaitau ibukin ana tangira Iehova.