TE KAONGORA IBUKIN TE REIREI 23
ANENE 28 Karekea te Iraorao ma Iehova
E Kaoira Iehova Bwa Ti na Riki Bwa Ana Iruwa
“E na memena irouia au umwanrianna, ao N na riki bwa Atuaia.”—ETEK. 37:27.
TE BOTO N IANGO
Ibukini karikirakean ara kakaitau ngkai e kaoira Iehova bwa ti na riki bwa ana iruwa n ana umwanrianna ni kaikonaki ao arona n tabeakinira ngkai te tia Kaoira.
1-2. Tera ana kakao Iehova nakoia taan taromauria aika kakaonimaki ni koaua?
NGKANA iai ae titirakiniko aei, ‘Antai Iehova iroum?’ Ko bae ni kaeka ni kangai, ‘Iehova bon Tamau, Atuau, ao Raoraou.’ Iai riki nakoa tabeua ke aara aika ko kona ni kabonganai ibukin Iehova. Ma ko kona naba n iangoia bwa te tia Kaoko?
2 E kabotaua te Uea are Tawita ana reitaki Iehova ma taan taromauria aika kakaonimaki ni koaua, ma ana reitaki te tia kakao ma ana iruwa. E titiraki ni kangai: “Iehova, antai ae e na riki bwa te iruwa n am umwanrianna? Antai ae e na maeka n am maunga ae tabu?” (TaiAre. 15:1) Man taeka aika kairaki koreia aikai rinanon te taamnei, ti a reiakinna iai bwa ti kona n riki bwa ana iruwa Iehova ke raoraona. Tiaki bon te kakao ae rangi n tamaroa anne mairoun Iehova?
E TANGIRIRA IEHOVA BWA TI NA RIKI BWA ANA IRUWA
3. Antai ana moan iruwa Iehova, ao tera ana namakin Iehova ma ana iruwa?
3 Imwain te karikibwai, ao e maeka Iehova n tii ngaia. Ma n te taina, ao e a butimwaea Natina ae te moanibung nakon ana umwanrianna ni kaikonaki. E rangi ni kukurei Iehova ni mwiokoana ae boou ae te tia Kakao nakon ana umwanrianna. E oti n te Baibara bwa e riki Natina aei bwa “ana bwai ni kukurei” Iehova. Ao e “kimwareirei i [matan Iehova] n taai nako” ana moan iruwa aei.—TaeRab. 8:30.
4. E kangaa Iehova ni karababaa riki tian ana umwanrianna?
4 Imwina ao e a karikiia anera Iehova ao e kaoia bwa a na riki bwa ana iruwa naba. A aranaki ana anera bwa “natin te Atua” ao a kabwarabwaraaki bwa a kimwareirei i rarikin Iehova. (Iobi 38:7; Tan. 7:10) I nanon tabeua te tai ao e reitaki Iehova ma tii kaaini karawa, are e maeka iai. Ma imwina ao e a manga kaoia aomata aika i aon te aba bwa a na riki bwa ana iruwa. Tabeman i buakoia aomata akanne bon Enoka, Noa, Aberaam, ao Iobi. A aranaki taan taromauria akanne bwa raoraon te Atua, ke aomata aika nakonako “ma te Atua ae koaua.”—KBwaai 5:24; 6:9; Iobi 29:4; Ita. 41:8.
5. Tera ae ti kona n reiakinna man te taetae ni burabeti are n Etekiera 37:26, 27?
5 I nanoni waakinakon te tienture ao e teimatoa Iehova ni kaoia raoraona bwa a na riki bwa ana iruwa. (Wareka Etekiera 37:26, 27.) N te katoto, ti reiakinna man ana taetae ni burabeti Etekiera bwa e tangiriia taan taromauria aika kakaonimaki ni koaua te Atua bwa a na karekea aia reitaki ae kaan ma ngaia. E berita bwa e na karaoa “te berita n raoi ma ngaiia.” E kaineti te taetae ni burabeti anne nakon te tai are a nang riki iai naake a karekea te kantaninga ae te nako karawa, ao naake a karekea te kantaninga n te aonnaba, bwa “tii tenanaina” i nanon ana umwanrianna ni kaikonaki. (Ioa. 10:16) Te tai anne bon taekan taai aikai!
E TABEAKINIRA TE ATUA N AKI ONGEIA BWA TI MENA IA
6. E na kangaa n riki temanna bwa te iruwa n ana umwanrianna Iehova, ao e mena ia Ana umwanrianna?
6 N taai ake a karakinaki n te Baibara, ao e riki ana umwanrianna te aomata bwa nnena ni motirawa ao e kamanoaki iai man te angibuaka ma te riringa. E kantaningaia te iruwa n te umwanrianna anne bwa e na tabeakinaki raoi. N te tai are ti katabua maiura iai nakon Iehova, ti a riki iai bwa ana iruwa n ana umwanrianna ni kaikonaki. (TaiAre. 61:4) Ti a karekei iai amwarake n taamnei aika mwaitikurikuri ao ni karekeia raoraora aika a riki naba bwa ana iruwa Iehova. E aki mena ana umwanrianna ni kaikonaki n te tabo ae tii teuana. Ko bae n tia ni mwamwananga nakon te aba teuana i tinanikun abam, tao ko kaea te bwabwaro teuana, ao ko kaitiboo iai ma aomata aika kakabwaiaaki bwa a mena naba n ana umwanrianna te Atua. E mena ana umwanrianna Iehova n taabo ake a mena iai taan taromauria aika ongeaba.—TeKao. 21:3.
7. Bukin tera bwa ti kona n taekinna ae naake a kakaonimaki ake a a tia ni mate a bon teimatoa naba n riki bwa iruwa n ana umwanrianna Iehova? (Nora naba te taamnei.)
7 Tera aroia naake a kakaonimaki ake a a tia ni mate? A teimatoa naba n riki bwa iruwa n ana umwanrianna Iehova? Eng! Bukin tera ngkai ti taekina anne? Ibukina bwa a teimatoa ni maiu aomata aikai n ana ururing Iehova. E kabwarabwaraa ni kangai Iesu: “A na kautaki maate n aron are e kaotia naba Mote n rongorongon te aroka are urarake, ngke e arana Iehova bwa ‘Atuan Aberaam ao Atuan Itaaka ao Atuan Iakoba.’ Bon Atuaia aika maiu ao tiaki Atuaia aika mate, bwa n ana taratara te Atua, a bane ni maiu.”—Ruka 20:37, 38.
A bon teimatoa naba n iangoaki bwa iruwa n ana umwanrianna te Atua naake a kakaonimaki ake a a tia ni mate (Nora barakirabe 7)
IAI KAKABWAIAARA MA IAI NABA TABERA
8. A kangaa ni kakabwaiaaki ana iruwa Iehova ni menaia i nanon ana umwanrianna?
8 N aron ae kona n riki te umwanrianna bwa te tabo ni motirawa ao ni kamanomano man te angibuaka, e kona naba n riki ana umwanrianna Iehova bwa kamanoaia ana iruwa mani baika kona n urua aia reitaki ma ngaia ke aia kantaninga ae nene ibukin taai aika imwaira. Ngkana ti teimatoa ni kaan ma Iehova, e na bon aki kona Tatan ni karaoa te bwai teuana ae ti na ruanikai iai n aki toki. (TaiAre. 31:23; 1Ioa. 3:8) E na teimatoa Iehova n te aonnaba ae boou ni kamanoia raoraona aika kakaonimaki, tiaki tii man ruanikain aia onimaki ma man te mate naba.—TeKao. 21:4.
9. Tera ae kantaningaia Iehova mairouia ana iruwa bwa a na karaoia?
9 Bon te kakabwaia ae rianako te riki bwa te iruwa n ana umwanrianna Iehova, bwa ti a karekea iai ara reitaki ae kaan ma ngaia ao ae teimatoa. Tera ae ti riai ni karaoia ngkana ti kan teimatoa n riki bwa ana iruwa? Ngkana ko kaoaki iroun temanna nakoni mwengana, ko na bae ni kan ataia bwa tera ae kantaningaia mairoum. N te katoto, e kantaningaiko bwa ko na buutii moa am kau imwain rinnakom, ao ko na boni karaoa anne. N aron anne, ti kan ataia naba bwa tera ae e tangiria Iehova mairouia akana kan teimatoa n riki bwa iruwa n ana umwanrianna. Ti kairaki n tangiran Iehova bwa ti na kabanea ara konaa ‘ni kakukureia ni bwaai ni kabane.’ (IKoro. 1:10) Ao e ngae ngkai ti iangoa Iehova bwa Raoraora, ti bon uringnga naba ae bon Atuara ao Tamara, ae tau ni karineaki iroura. (TaiAre. 25:14) Ti aki riai ni mwaninga anne ao e riai ni korakora iroura karineana. Ti buokaki n te aeka ni karinerine anne bwa ti na rarawa nakon aroaro aika a na kaunna. Ti bon tangiria n “nakonako ma [Atuara] ma te nanorinano.”—Mika 6:8.
E AKI INANONANO IEHOVA N TE REREUA
10-11. E kangaa n oti ae e aki inanonano Iehova, n arona nakoia tibun Iteraera n rereuan Tinai?
10 E bon aki inanonano Iehova nakoia ana iruwa. (IRom 2:11) Ti kona n nora aron Iehova n aki inanonano n arona nakoia tibun Iteraera n rereuan Tinai.
11 Imwini kainaomataaia ana aomata man tautoronakia i Aikubita, ao e a rineiia Iehova ana ibonga aika a na beku n te umwanrianna ae tabu. A mwiokoaki tibun Rewi bwa a na mwakuri baika irekereke ma te umwanrianna ae tabu. Te koaua bwa a tabeakinaki riki iroun Iehova naake a beku n te umwanrianna ae tabu, ke naake a kaembwa n uakaan, nakoia ake tabemwaang? Tiaki ngaia anne! E bon aki inanonano Iehova.
12. Tera ae karaoia Iehova nakoia tibun Iteraera n te rereua, ae oti iai bwa e aki inanonano? (Te Otinako 40:38) (Nora naba te taamnei.)
12 A bane kaain te kaembwa ni karekea aia iraorao ma Iehova, n aki ongeia bwa tera mwiokoaia ae okoro ke a maeka n uakaan ke n raroa ma te umwanrianna ae tabu. N te katoto, e taraia raoi Iehova bwa a na bane te natannaomata aei ni kona n nora te nang ae te boua ao ae te ai are e tei i etan te umwanrianna ae tabu. (Wareka Te Otinako 40:38.) Ngkana e mwaing te nang, a boni kona naba naake a maeka n raroanako ma te umwanrianna ae tabu n noria, a botii aia bwai, a kabwaranakoi aia umwanrianna ma aia utu, ao n teimatoa n irira te natannaomata. (WarIte. 9:15-23) A bane naba ni kona n ongo tangini buu aika uoua aika karaoaki man te tirewa, ake a kaotia bwa a a riai ni mwaing. (WarIte. 10:2) E teretere ngkanne bwa te maeka n uakaan ma te umwanrianna ae tabu, bon tiaki kaotan ae e kaan riki am reitaki ma Iehova. Ma n oneani mwin anne, a bane tibun Iteraera ni kona n riki bwa Ana iruwa ao ni kantaningaia bwa E na kairiria ao ni kamanoia. N aron anne, n aki ongeia bwa ti maeka ia ni boong aikai, ma ti kona ni kakabwaiaaki naba ngkai e tabeakinira ao ni kamanoira Iehova ma te tangira.
E oti ae e aki inanonano te Atua man ana babaire ibukin te umwanrianna ae tabu (Nora barakirabe 12)
KATOTO NI BOONG AIKAI AIKA KAOTIA AE E AKI INANONANO IEHOVA
13. Tera te anga teuana ae kaotia iai Iehova ni boong aikai bwa e aki inanonano?
13 Tabeman i buakoia ana aomata te Atua ni boong aikai a maeka n uakaan ma kautun aia botaki Ana Tia Kakoaua Iehova ke aia aobiti n tararua. Iai naba aika beku n taabo aikai. Ibukin anne, a kona te koraki aikai ni karaoi baika bati n taabo aikai ao ni kona n reitaki naba ma taani kairiri. Tabeman a beku bwa mataniwi aika mwamwananga ke aeka ni beku riki tabeua aika okoro ae a kabwanina iai aia tai. Ngkana e tuai n reke aeka ni mwioko aikai iroum ngkai, e bia karauaki nanom bwa ara tia Kakao ae Iehova e bon tangiriia ana iruwa ni kabane. Ao e tabeakinia ni kabane. (1Bet. 5:7) A bane ana aomata te Atua ni karekei amwarake n taamnei, te kairiri, ao te kamanomano ae a kainnanoia.
14. Tera te katoto riki teuana ae oti iai bwa e aki inanonano Iehova ngkai ara tia Kakao ngaia?
14 Te katoto riki teuana ae oti iai bwa e aki inanonano Iehova ngkai ara tia Kakao ngaia, bwa e katauraoa te Baibara ibukia aomata nako ni katobibia te aonnaba. E moani koreaki te Baibara n taetae aika tenua: Te taetae n Ebera, n Aramwaike, ao ni Kuriiti. E koaua bwa e kaan riki aia reitaki ma Iehova naake a kona ni wareki taetae aikai, nakoia ake a aki? Tiaki ngaia anne.—Mat. 11:25.
15. Tera ae oti iai bwa e aki inanonano Iehova? (Nora naba te taamnei.)
15 E aki kaoira Iehova bwa raoraona tii ibukina bwa e bubura ara reirei ke ti ota n taetae ake e moani koreaki iai te Baibara. E aki anga wanawanana tii nakoia aika bubura aia reirei ma e katauraoa te Baibara Iehova nakoia aomata ni katobibia te aonnaba, e ngae naba ngkana e bubura aia reirei ke a aki. E a tia n rairaki ana Taeka ae kairaki koreana ae te Baibara nakon taetae aika nga ma nga, bwa a aonga aomata nako n te aonnaba ni kona ni kakabwaiaaki n reirei ake iai, ao n reiakina aroia ni kona n riki bwa raoraona.—2Tim. 3:16, 17.
E kangaa n oti ae e aki inanonano te Atua, man tauraoin te Baibara ni boong aikai? (Nora barakirabe 15)
TEIMATOA NI “BUTIMWAEAKI” IROUN IEHOVA
16. Ti na kangaa n teimatoa ni butimwaeaki iroun Iehova n aron ae oti ni Mwakuri 10:34, 35?
16 Bon te kakabwaia ae rianako butimwaeam iroun Iehova bwa te iruwa n ana umwanrianna ni kaikonaki. Bon te tia Kakao ngaia ae e atataiaomata, e tatangira, ao e akoiia iruwa. Irarikina naba e aki inanonano, bwa e butimwaeira ngaira aikai ni kabane n aki ongeia bwa ti mena ia, tera arora, ara reirei, ara reeti, ara baronga, ara ririki ni maiu, ke tao mwaane ngaira ke aine. Ma bon tii naake a maiuakin ana kaetieti aika a butimwaeaki bwa ana iruwa.—Wareka Mwakuri 10:34, 35.
17. Ti na karekei ia kaetieti riki tabeua ni kaineti ma te riki bwa te iruwa n ana umwanrianna Iehova?
17 E oti n Taian Areru 15:1 ana titiraki Tawita ae kangai: “Iehova, antai ae e na riki bwa te iruwa n am umwanrianna? Antai ae e na maeka n am maunga ae tabu?” E kairaki n te taamnei te tia areru aei bwa e na kaekai titiraki akanne. E na rinanoaki n te kaongora ae imwina kaetieti tabeua aika ti riai ni maiuakini bwa ti aonga n teimatoa ni butimwaeaki iroun Iehova.
ANENE 32 Teei n Ana Itera Iehova!
