E riai n iai ara onimaki ngkana ti na kakukureia Iehova. Ma e taekinaki n te Baibara bwa “a aki bane n onimaki aomata.” (2Tet. 3:2) E nanonia ikai taani bwainikirinna te abotoro Bauro, aika “aomata aika iowawa ao aika buakaka” aika e kani kamaiuaki mairouia. Ma e kona naba ni kaineti ana taeka are ibukin te onimaki nakoia aomata nako. Tabeman aomata a rineia bwa a na katinanikua te bwai ni kakoaua ae bon iai te tia Karikiriki ae te Atua. (IRom 1:20) Tabemwaang a taku bwa a onimakina te bwai teuana ke te aomata temanna ae mwaaka riki. Ma tiaki anne te onimaki ni koaua.

Ti riai ni kakoauaa ae bon iai Iehova ao boni ngaia “te tia karekei kaniwangaia” akana korakora aia onimaki. (Ebera 11:6) Bon teuana naba uaan te taamnei ae raoiroi te onimaki. E kona te tataro nakon Iehova ni buoka temanna ni karekea te taamnei ae raoiroi. (Ruka 11:9, 10, 13) Te anga ae kakawaki ae ti kona iai ni karekea te taamnei anne boni warekan ana Taeka te Atua ae kaira koreana rinanon taamneina. Ti kona ngkanne n iaiangoa te baere ti warekia ao ni kataia ni maiuakina reireiara. E kona taamnein Iehova ni kairira maiura, ni buokira bwa ti na karekea te onimaki ae kukurei iai.