Titiraki Mairouia Taani Wareware
E kaineti taeka ake n Taian Areru 12:7 ae “Ko na kawakinia” nakoia “akana rawawata” (kibuna 5) ke nakon “ana taeka Iehova” (kibuna 6)?
E oti n tein te rongorongo bwa te kibu aei e kaineti nakoia aomata.
Ti warekia n Taian Areru 12:1-4 bwa “a maunanako aomata aika kakaonimaki mai buakoia aomata.” Iangoa ngkanne Taian Areru 12:5-7, ae te kibu ae irekereke ma te titiraki.
“E taku Iehova: ‘Ibukina bwa a karawawataaki akana rawawata,
Ao ibukina bwa a ikenrawa akana maiu ni kainnano,
Ao N na teirake ni waaki.
N na kamaiuia mairouia te koraki ake a kakanikoia.’
A itiaki ana taeka Iehova,
Kaanga ai aron te tirewa ae kaitiakaki raoi ni nnen te ai i aontano, ae kaitiakaki itiua te tai.
Ko na kawakinia, ngkoe ae Iehova,
Ko na kamanoia n tatabemania nako mairoun te roro aei n aki toki.”
E kaotaki ni kibuna 5 ana taeka te Atua ibukia “akana rawawata.” E na kamaiuia.
E a manga taekinaki ni kibuna 6 bwa “a itiaki ana taeka Iehova, kaanga ai aron te tirewa ae kaitiakaki raoi.” E oti n aei ara namakin ibukin ana taeka Iehova.—TaiAre. 18:30; 119:140.
Iangoa ngkanne kibuna are imwina, Taian Areru 12:7: “Ko na kawakinia, ngkoe ae Iehova, ko na kamanoia n tatabemania nako mairoun te roro aei n aki toki.” E kaineti nakon tera te kibu aei?
Ibukina bwa bon taekan “ana taeka Iehova” are imwaini kibuna 7, ngaia are a iangoia tabeman bwa te taeka ae “kawakinia” e nanonaki iai ana taeka te Atua. Ao ti ataia bwa e boni kawakina te Baibara te Atua, n aki ongei aia kakorakora taani kakaaitara ni katabuaka kabonganaana ke ni kamauna.—Ita. 40:8; 1Bet. 1:25.
Ma e koaua naba are taekinaki ni kibuna 5. E a tia Iehova ni buokiia aika a “rawawata” ao aika “a karawawataaki” ao e na bon teimatoa ni buokiia.—Iobi 36:15; TaiAre. 6:4; 31:1, 2; 54:7; 145:20.
Ngaia are tera raoi ngkanne ae nanonaki ni kibuna 7?
E oti n tein te rongorongo n te areru aei bwa a nanonaki iai aomata.
E moan taekinaki n Taian Areru 12:1 taekaia “aomata aika kakaonimaki” aika a a tia ni mwamwanaaki. Ao ti noria n are imwina taekan ae e na teirake Iehova n ekiianako naake a kabongana buaka neweia. A karauaki nanora n te areru aei bwa ti boni kona n onimakina te Atua bwa e na tei ibukia ana aomata ibukina bwa a bon itiaki ana taeka.
Ngaia are ngke e taekinaki ni kibuna 7 bwa e na kawakinia ao ni kamanoia Iehova, e bon nanonia naake a rawawata irouia aomata aika buakaka.
Ngaia are taeka aika kabonganaaki n te kibu aei boni kanoan te Baibara n Ebera rimoa. N te Baibara ae te Greek Septuagint ao e kabongana te taeka ae “ngaira” uatai ni kibuna 7, ae kaineti nakoia aomata aika kakaonimaki aika rawawata ao ni karawawataaki. Ni kabaneana ao e oti ni kibuna 7 ae a na boni kamanoaki aomata aika kakaonimaki n “tatabemania nako mairoun te roro aei,” ae taekaia aomata aika kauekea te bae kammaira. (TaiAre. 12:7, 8) E rairaki ni kangai kibuna 7 n te Baibara ae te Aramaic Targums: “Ngkoe ae TE ATUA, ko na kamanoia akana raoiroi, ko na kawakinia n aki toki mairoun te roro ae buakaka aei. A ririaki n taabo nako aomata aika bubuaka, n ai aron te man ae temeka raraaia natiia aomata.” E a kakoauaaki n aei bwa Taian Areru 12:7 bon tiaki taekan ana taeka te Atua.
Ma e oti n te kibu aei te kantaninga ibukia “aomata aika kakaonimaki” ae e na bon tei ibukia te Atua.
