Ma bon iai naba taanga aika kabonganai n te aro ae aki riai ao ibukin anne  . . .

• e a aki tau aia tai i marenaia.

• e a moanibwai aia mwakuri e ngae ngke a a roko ni mwengaia.

• a aikoa onimakinia i marenaia ao iai aika a aikoa kakaonimaki nakoni buuia.

AM TAI MA BUUM

E taku te buu te mwaane ae Michael: “N tabetai bon raou buu ma e aki tabe ma ngai.’ E tabe ma ana tareboon, ao e tataku: “E a tibwa reke au tai ngkai n tuoa au tareboon.’” E taekinna naba te buu te mwaane ae Jonathan bwa “a kona ni kaai ni mena n te tabo ae tii teuana taanga, ma a namakinna ae e aki kaan aia reitaki i marenaia.”

IANGOA AEI: Mwaitira am tai ni kaekaeka am tareboon, n am tai ni maroro ma buum?—I-EBETO 5:33.

TE MWAKURI

Iai tabeman aika a kainnanoaki n aia mwakuri bwa a na kaekaekai aia tareboon ke aia meeri n taai nako, e ngae naba ngkana a a roko ni mwengaia. Ma tabeman tiaki anne aron aia mwakuri, ma a boni kani mwamwakuri mani mwengaia. E taku te buu te mwaane ae Lee: “E kangaanga irou bwa N na aki tuoa au tareboon ke au meeri ibukin au bwai ni mwakuri, n te tai are I mena iai i rarikini buu.” E kangai naba te buu te aine ae Joy: “I mwamwakuri mani mwengau, ngaia are e kangaanga reken te tai ae N na mwaawa iai. I riai riki ni kabaeranta au tai.”

IANGOA AEI: Ko kakauongo raoi nakoni buum ngkana e kataetaeko?—RUKA 8:18.

TE AKI KAKAONIMAKI I MARENAIA TAANGA

E noraki n te kakaae teuana bwa te bwai ae kakarika te un i marenaia taanga boni kamanenaan taabo n reitaki n te intanete. Iai tebwina te katebubua man te kakaae anne ae a kaotia bwa a teimatoa ni karabai mairouia buuia, baika a kakatokai n te intanete.

A bati aika a kakoauaa bwa a rangi ni karuanikai ibukia taanga taabo n reitaki n te intanete, ao e karekea te wene ni kimoa. Ti aki mimi n anne bwa a taekinna rooia bwa a a bati utu aika maenako, ibukini kamanenaan taabo n reitaki n te intanete.

IANGOA AEI: Ko kakarabaa mairouni buum am maroro ma temanna ae tiaki raom ni mwaane ke n aine? —TAEKA N RABAKAU 4:23.

RINEI BAIKA MOANIBWAI IROUM

Te aomata ae aki amwamwarake e na bon aoraki. N aron anne, te aomata ae aki kakabanea ana tai ma buuna, e na boni mamaara naba ana mare.​—I-Ebeto 5:28, 29.

Maroroakinna ma buum bwa baikara mai buakon iango aikai aika kam kani katai, ke korei oin ami iango aika a na buoka ami mare bwa e na aki uruanaki ni kukune aika boou.

• Kaai n amwarake ma buum teuana te tai ni katoabong

• Karekea am tai ae ko na aki kabonganai iai am tareboon ke am kaombiuta

• Bairea am tai ma buum ni karaoa te bae okoro ao ni kakukurei

• Kamatei ami tareboon ke ami kaombiuta n te tairiki, ao kararoai ma ami tabo ni matu

• Kamwawaa 15 te miniti ni katoabong bwa am tai ni maroro ma buum, n aki katabetabeaki n am tareboon ke am kaombiuta

• Karekea am tai ni katoabong ae ko kamatea iai am intanete