1, 2. Baikara kataaki ake a na kaaitarai ana toro Iehova?

E MOANAKI aia kakorakora taan taromauri aika kakaonimaki ni koaua mairoun te moan aomata ae kakaonimaki are Abera ni karokoa ara bong aikai. E koroboki te abotoro Bauro nakoia Kristian aika taian Ebera bwa a ‘nanomwaaka ni marakia n te kakorakora ae bati,’ ibukin ukeran akoaia ao kakabwaiaaia iroun Iehova. (Ebera 10:32-34) E kabotaua Bauro aia kakorakora Kristian ma aia kabokorakora taan takaakaro n aia kauaaba I-Kuriiti n te biri, te kaunrabwata, ao te itau. (Ebera 12:1, 4) Ni boong aikai, ti ira naba te kabobirimwaaka ibukin te maiu, ao ti kaaitara ma naake a tangiria ni katikiiranako, ni kabwakaira, ni konaira, ao ni kabuaa kukureira ma kaniwangara n taai aika imwaira.

² Ara kabokorakora (ke “kaunrabwata,” kabwarabwara mai nano) ae moan te kakawaki bon ara buaka ma Tatan ao ana aonnaba ae buakaka. (IEbe. 6:12) E rangi ni kakawaki bwa ti na rarawa n rotakibuaka ni “baika nene wakaaia” n te aonnaba aei. E nanonaki naba iai ana reirei, ana karioiango, ao baika karuanikai n aron te wene ni bure, kamanenaan te baakee, ao kamanenaan te kamanging ma te drug n te aro ae aki riai. Ao ti riai n teimatoa  ni buakani mamaaran te rabwata ao te bwarannano.​—2Kor. 10:3-6; IKoro. 3:5-9.

3. E kangaa te Atua ni kataneiaira ni kaaitaraia taani kairiribai nakoira?

³ Ti kona n tokanikai i aoia taani kakaaitara aika rangi ni korakora? Eng, ma ti riai ni kakorakoraira. E taku Bauro ngke e kabotaua ma te tia itau rimoa: “I itau tiaki n aron ae I orea te ea.” (1Kor. 9:26) N aron te tia itau ae kaitaraa aiana, ti riai naba ni kaaitaraia taani kairiribai nakoira. E buokira Iehova ni kataneiaira ni karaoa anne. E katauraoi kaetieti ibukini kamaiuara n ana Taeka. E buokira naba rinanon ara boki aika aanaki man te Baibara, bobotaki ni Kristian, ruunga, ao bwabwaro. Ko maiuakini baika ko reiakin? Ngkana ko kabwaka ni karaoa anne, titeboo iai ma ko “orea te ea,” ae nanona bwa ko aki orea raoi aiam.

4. Ti na kangaa n aki kariaia konaakira n te buakaka?

⁴ A kona taani kairiribai nakoira n oreira n te tai ae ti aki kantaningaia ao n tabanira ngkana ti bwaka, ngaia are ti riai n tatauraoi. Ti kauringaki n te Baibara aei: “Tai kariaia konaakim n te buakaka, ma teimatoa ni kataenikaia te buakaka n te raoiroi.” (IRom 12:21) E kaotaki n te kaungaunga ae ti na aki kariaia ‘konaakira n te buakaka’ bwa ti kona ni kataenikaia te buakaka. Ti kona ni karaoa anne ngkana ti teimatoa ni buakanna. Ni kaitaraan anne, ti kona ni konaaki iroun Tatan, ana aonnaba ae buakaka, ao rabwatara ae aki kororaoi, ngkana ti buutii ara bwai ni buaka ao n aki manga buaka. Tai kariaia Tatan bwa e na kakamaakuko bwa ko aonga ni katinetinei baim bwa ko a konaaki!​—1Bet. 5:9.

5. (a) Tera ae kona ni buokira n teimatoa ni kakorakoraira ni karekei kakabwaia mairoun te Atua? (b) Antai aika taekinaki n te Baibara aika ti na rinanoi taekaia?

⁵ Ibukini karekean te tokanikai, a riai naake a kabokorakora n ururinga bukini karaoan anne irouia. Ngkana a na karekea akoaia iroun te Atua ao kakabwaiaaia, a riai n teimatoa ni kaatuui aia iango n te kaungaunga ae ti warekia n Ebera 11:6, ae kangai: “Ane e kawara te Atua ao e riai ni kakoauaa bwa bon iai ngaia ao bon te tia karekei kaniwangaia te koraki ake a ingainga n ukoukoria.” Te weabe ni Kuriiti ae rairaki bwa “ingainga n ukoukoria” e nanonaki iai te kakorakora ao te kekeiaki mwaaka. (Mwa. 15:17) Iai n te Baibara aia katoto aika raraoi mwaane ma aine ake a rangi ni kakorakoraia n ukeri kakabwaiaaia mairoun Iehova. A kaaitara Iakoba, Rakera, Ioteba, ao Bauro, ma baika rotaki iai aia iango ao rabwataia, ma e kaotaki n aia katoto bwa e karekei kakabwaia aika rangi ni bati te botumwaaka. Ti na kangaa ni katotongia taani kabokorakora aika rianako aroia aikai?

6. Tera are buoka Iakoba ni botumwaaka, ao e kangaa ni kakabwaiaaki? (Nora te taamnei ni moan te kaongora aei.)

⁶ E kakorakoraa te baatua are Iakoba ao e botumwaaka ibukina bwa e tangira Iehova, e kakawaki irouna ana iraorao ma ngaia, ao e onimakina raoi ana berita Iehova are e na kakabwaiaia kanoana. (KBwaai 28:3, 4) Anne bukina ngke e kabanea korakorana Iakoba ni kani karekea kakabwaiaana mairoun te Atua ngke e a kaania 100 ana ririki, ngaia are e a kaunrabwata ma te anera are karikia n aomata. (Wareka Karikani Bwaai 32:24-28.) Iai korakoran Iakoba ao nanomwaakana ae tau bwa e aonga n tokanikai n ana kaunrabwata ma te anera ae korakora? Akea! Ma bon te tia kabokorakora ae nanomatoa ao e kaotia bwa e bon aki kerikaaki mai iai! Ao e boni kakabwaiaaki ibukini botumwaakana. E bon tau ngkai e anganaki te ara ae Iteraera, (ae nanona “te tia Kabokorakora [te tia Botumwaaka] ma te Atua” ke “E Kabokorakora te Atua”). E reke iroun  Iakoba te kaniwanga ae ti bane naba n ukoukoria ae te akoaki ao te kakabwaia mairoun Iehova.

7. (a) Tera are e karawawataa Rakera? (b) Tera arona ni kabokorakora ao ni kakabwaiaaki iai n tokina?

⁷ E ingainga naba buun Iakoba are tangiria ae Rakera ni kan nora aron Iehova ni kakoroa bukin ana berita nakoni buuna. Ma iai ana kangaanga ae taraa n aki kona n tokanikai i aona. Bon akea natina. E iangoaki anne n ana bong neiei bwa te rawawata ae korakora. E kangaa n reke ana iango ae riai ao korakorana are e na teimatoa iai ni buakani baika kabwaranano aikai ake a riaon ana konaa? E aki roko n te bwara nanona. Ma e teimatoa ni kabokorakora n arona n tataro ma nanona ni kabane. E ongoraei Iehova ana tataro Rakera ma nanona ni koaua, ao n tokina e a kakabwaiaaki bwa a a reke natina. Maroaka ae n te taina ao e takarua ni kakatonga ni kangai Rakera: “I kaunrabwata . . . n te kaunrabwata ae korakora, ao I tokanikai naba!”​—KBwaai 30:8, 20-24.

8. Baikara kangaanga ake e rinanoi Ioteba, ao e kangaa n riki bwa te katoto ae tamaroa ibukira arona ni kaaitarai?

⁸ E korakora rotakin Ioteba are natin Iakoba ma Rakera n aia katoto ibukin aia kakaonimaki, ao e a buokaki iai ni kaaitarai kataakina. E korakora te bitaki ni maiun Ioteba ngke 17 ana ririki. A kaboonakoa tarina bwa te toro ibukini bakantangia irouna. Imwina riki, e a riai n nanomwaaka i nanon ririki aika bati ngke e kabureaki n te aro ae aki eti i Aikubita. (KBwaai 37:23-28; 39:7-9, 20-21) E aki roko n te bwara nanon Ioteba ao e aki naba kaikoa unna n ukoukora kataeani kaina. Ma e kaatuua ana iango ma nanona i aon ana iraorao ae kaan ma Iehova. (NakIbo. 19:18; IRom 12:17-21) E reke buokara man ana katoto Ioteba. N te katoto, e ngae ngkana iai ara kangaanga ni uarerekera ke e taraa n akea uaani maiura ngkai, ma ti riai n teimatoa ni kabokorakora ao ni botumwaaka. Ti kona ni kakoauaa bwa e na boni kakabwaiaira Iehova ni karaoan anne.​—Wareka Karikani Bwaai 39:21-23.

9. Tera aron ara kakorakora ibukini karekeani kakabwaiaara mairoun Iehova n aron Iakoba, Rakera, ao Ioteba?

⁹ Iangoa te bwai ae riki nakoim ae tao kataakim. E kona n ae tao te ribuaka, te riribai, ke te kakaniko. Ke kataakim anne tao iai ae e kabuakakako bwa tao e bakantang iroum. N oneani mwin are ko na katinetinei baim bwa ko a konaaki, ururinga te bwai are e buokiia Iakoba, Rakera, ao Ioteba, n teimatoa ni beku iroun Iehova ma te kimwareirei. E kakorakoraia ao ni kakabwaiaia te Atua ibukina bwa e teimatoa ni kakawaki irouia aia iraorao ma ngaia. A teimatoa ni kabokorakora ao ni kaboraoi maiuia ma aia tataro. Ti a maeka n raatokin te waaki ae buakaka ae ngkai, ngaia are ti bon riai n taua raoi te kantaninga ae nene ae kamenaaki imwaira! Ko tauraoi ni kakorakorako ni karekea akoam mairoun Iehova n aron ae kaanga ko kaunrabwata ibukin rekena?

10, 11. (a) E aera ngkai ti riai ni kaunrabwata ibukini kakabwaiaara mairoun te Atua? (b) Tera ae e na buokira ni karaoi motinnano aika eti ao n tokanikai ni buakanakin te bwarannano ao bwaai n tutuki?

¹⁰ Baikara bwaai tabeua ake ti kainnanoa iai te kaunrabwata ibukini kakabwaiaara mairoun te Atua? Te bwai teuana ae a kaitaraa aomata aika bati bon te kakorakora ni buakani mamaaran rabwataia. A riai tabemwaang ni kakorakoraia ni kateimatoa te iango ae riai ibukin te mwakuri ni minita. Ke tao iroum, ko kainnanoa te teimatoa n nanomwaaka, e ngae ngke ko nimwaoraki ke ko tiku n tii ngkoe. Ti aki riai naba n tarariaoi aia kakorakora tabeman ibukini kabwaraan aia bure naake a un irouia ke aika a  bure nakoia. E ngae ngkana ti a maan ni beku ibukin Iehova, ma ti riai ni bane ni buakani baika kona n tutuka ara beku ibukin te Atua, are e angania aika kakaonimaki kaniwangaia.

¹¹ E kona ni kangaanga rineani motinnano aika eti ao te kakairi n te aroaro ni Kristian, ai moarara riki ngkana ti buakana nanora ae kamwamwane ae tangiri baika aki riai. (Ier. 17:9) Ngkana ko ataia bwa ko rotakibuaka n aanga tabeua, tataroa te taamnei ae raoiroi. E kona ni buokiko te tataro ao te taamnei ae raoiroi n anganiko te korakora ni kakaaea te kawai ae ko ataia bwa e eti ao ae e na kakabwaiako iai Iehova. Karaoa ae boraoi ma am tataro. Kataia ni wareka mwakoron te Baibara teuana ni katoabong, ao kamwawaa am tai ibukin te ukeuke n reirei i bon iroum ao te katoatai n Taromauri n Utu.​—Wareka Taian Areru 119:32.

12, 13. A kangaa ni buokaki uoman Kristian n aia kabokorakora ma tangirani baika aki raoiroi?

¹² A bati katoto n Ana Taeka te Atua ibukin aron taamneina ao ara boki ni Kristian ni buokiia taari n tokanikai i aon tangirani baika bure. Iai temanna te teinimwaane ae tebwi tabun ana ririki ae e wareka te kaongora ae, “How Can You Resist Wrong Desires?” ae boreetiaki n te Awake! n te taetae n Ingiriti ae bwain Ritembwa 8, 2003. Tera ana iango imwina? E taku: “I kakorakoraai ni buakan au iango aika aki riai. Ngke I wareka te kaongora ae taekan ae a ‘bati aika kakorakoraia ni buakani iango aika aki riai,’ I a namakinna iai bwa ngai naba kaain te botaki n itaritari, ao tiaki tii ngai ni kaaitara  ma anne.” E kakabwaiaaki naba te roro n rikirake aei man te kaongora ae, “Alternative Life-Styles—Does God Approve?” ae bwain Okitobwa 8, 2003 n te taetae n Ingiriti. E noria teuaei bwa e mwaneweaki iai ae tabeman a iangoa aia kabokorakora bwa “te bwai ni kateketeke n te rabwata.” (2Kor. 12:7) Ngkai a teimatoa ni kabokorakora ibukini kateimatoaan aroaroia aika eti, a a kona ni kantaningaa te tai ae e na roko ae kakukurei. E taku: “Ibukin anne, I iangoia bwa I a kona n teimatoa ni kakaonimaki n te bong teuana ma teuana. I rangi ni kaitaua Iehova ngkai e kamanena ana botaki ni buokira iai n teimatoa n nanomwaaka n te waaki ae buakaka ae ngkai.”

¹³ Iangoa naba te baere e rinanona te tari te aine temanna n te United States. E korea aei: “I kani kaitauingkami bwa kam kaamwarakeira n taai nako ni baika ti boni kainnanoi n taina ae riai. I aki toki n iangoia bwa a kaineti raoi nakoiu kaongora aikai. I nanon ririki aika bati, I buakana te bwai ae I rangi n tangiria ae e ribaia Iehova. N tabetai, e a bwara nanou ao I a aki manga kakorakoraai. I ataia ae e nanoanga Iehova ao e kabwarai buure, ma irou e a aki kona n reke buokau ibukina bwa I tangira te bwai ae aki raoiroi aei, ao I aki ribaia. E rotakibuaka maiuu ni kabane n te kabokorakora ae reitinako aei. . . . Imwini warekan te kaongora ae, ‘Iai Iroum “te Nano n Ataa” Iehova?’ n Te Taua-n-Tantani ae bwaini Maati 15, 2013, I a ataia raoi ae e kani buokai Iehova.”

14. (a) Tera ana namakini Bauro n ana kabokorakora? (b) Ti na kangaa n tokanikai ni buakanakini mamaaran rabwatara?

¹⁴ Wareka I-Rom 7:21-25. E ataia Bauro man te baere rinanona bwa e rangi ni kangaanga buakanakini mamaaran te rabwata ae aki kororaoi ma kaibwabwaruna. Ma e kakoauaa raoi bwa e kona n tokanikai n te buaka ane i nanona anne rinanon te tataro, onimakinan Iehova, ao onimakinan ana karea ni kaboomwi Iesu. Ma tera arora? Ti kona n tokanikai naba i aoni mamaaran rabwatara ngkai ti kabokorakora ma ngaia. N te aro raa? Ngkana ti katotonga Bauro n onimakina raoi Iehova ao tiaki oini korakorara, ao n onimakina naba te kaboomwi.

15. E aera bwa e kona te tataro ni buokira n teimatoa ni kakaonimaki ao n nanomwaaka i aani kataaki?

¹⁵ N tabetai, e kona ni kariaia te Atua bwa ti na kaota korakoran tabeaiangara n te bwai teuana. N te katoto, tera ae ti na karaoia ngkana ti (ke kaain ara utu temanna) taonaki n te aoraki ae kakaiaki ke mwakuri n ribuaka tabeua? Ti na kaota onimakinan raoi Iehova rinanon te onnon nakoina n te tataro bwa e na anganira te korakora ae ti na teimatoa iai ni kakaonimaki, ao n aki kabuaa kukureira ao ara iraorao ae kaan ma ngaia. (IBir. 4:13) E kaotaki n aia katoto Kristian aika bati n ana bong Bauro ao n ara bong aikai bwa e kona ni kakorakoraira te tataro ao n anganira te ninikoria ae ti kainnanoia bwa ti aonga n teimatoa n nanomwaaka.

16, 17. Tera ae ko motinnanoia bwa ko na karaoia?

¹⁶ E kan noriko te Riaboro bwa e na bwara nanom ao ko na katinetinei baim bwa ko a konaaki. Motinnanoia bwa ko na “taua ae raoiroi.” (1Tet. 5:21) Karaua nanom bwa ko boni kona n tokanikai ni buakana Tatan, ana waaki ae buakaka, ao tangirani baika aki raoiroi. Ko kona ni karaoa anne ngkana ko onimakina raoi te Atua bwa e kona ni kakorakorako.​—2Kor. 4:7-9; IKar. 6:9.

¹⁷ Mangaia are teimatoa ni buaka. Teimatoa ni kakorakorako. Teimatoa ni kabokorakora. Teimatoa ni botumwaaka. Onimakina raoi Iehova bwa e na “kabwaroa i [aom] te kakabwaia ni karokoa aki rekeni nnena.”​—Maraki 3:10.