E noria Delphine are taekinaki mai mwaina, bwa e kokoro ni manging ibukin raraomana. E aki kabuakakaa te moi manging n te aro ae tau te Baibara, ma e kangai: “Tai mena i buakoia te koraki aika nima te wain ae riao.” (Taeka N Rabakau 23:20) Te kokoro ni manging e karekea te aoraki ae kakaiaki, uruakin te tekateka n taanga, ao moantaaini mateia aomata aika mirion ma mirion ni katoa ririki. A kona n totokoaki angiini kangaanga aikai ngkana a kakairi aomata n ana taeka n reirei te Baibara ae kawanawana te aba.

E karaoa anne Delphine. E taku neiei ngkai: “I a ataia bwa ngaia e aki katoka raraomau te manging. I kamanena te wanawana are reke n I-Biribi 4:6, 7, are kangai: ‘Tai raraomaeakina te bwai teuana, ma a na kaotaki ami bubutii . . . nakon te Atua.’ Ni katoai tairiki ake e a korakora iai aki raun au iango ao tabeaiangau, I tataro ni bubutiia Iehova. I taekini au kangaanga nakoina, ma uniu, marakiu, ao bwaran nanou, ao I a butiia bwa e na buokai ni karekea te kukurei. N te ingabong ao I taraia raoi bwa N na kanakoi namakin akanne. E buokai te anua aei ni kaatuua au iango i aoni baika iai irou ao n aki kaatuui baika akea irou. I a baireia bwa N na aki manga manging. Ibukina bwa e rangi ni kakawaki te rau ae e a reke irou, I a aki kani kabuaa.”

Te wene ni bure boni ngaia naba ae karika te uruakinnano ao te rawawata ae riao. Ma a kona ni buokira booto n reirei man te Baibara n totokoi kangaanga aikai, ngkana ti rinanoi tabeua baika a kona ni kairira nakon te wene ni bure, n aron te kababa ao baika bwaitingako. E taku te rorobuaka n ataei ae arana Samuel: “E rangi ni bebete te kababa. N tabetai I aki nano iroun te aine temanna, ma I kona n noria bwa iai nanona irou, ngaia are I a kababaa.” E noria Samuel bwa e a taraaki bwa ai te tia kababa, e ngae ngkana e bon aki, ngaia are e a boni karikia bwa anuana. Ma e bon tabeaianga n te anua aei. E taku ngkai: “E karuanikai ibukina bwa e kauekea te bangaomata.”

E wareka te kaongora teuana Samuel ibukia rooro n rikirake ae boreetiaki n ara atureti n te Intanete ae jw.org. Ao e iangoa Taeka N Rabakau 20:11, ae kangai: “E kinaaki naba te nati [ke, “te teinimwaane,” kabwarabwara mai nano] man ana mwakuri, bwa tao e itiaki ma n eti aroarona ke e aki.” E kangaa n ibuobuoki anne? E a ataia Samuel bwa e aki itiaki ma n eti aroarona ae te kababa. E taku ngkai: “E a reke naba reireiau bwa te roro n rikirake ae kakababa e karikirakei aroaro aika bubuaka aika kona ni karika te aomata bwa te buu ni mare ae aki tau. I a iaiangoia bwa ngkana e a reke buu, e na tera ana namakin ngkana e a nonorai ni kababaa te aine temanna. E kairai bwa N na ataia ae e karuanikai te anua aei. E koaua ae e rangi ni bebete karaoana, ma e bon aki eti.” E a tia ni bitaki Samuel. Rarawana nakon te kababa e buokia naba n rarawa nakon te wene ni bure.

E rangi n ruanikai naba Antonio n te wene ni bure bwa e a babaaeakini baika bwaitingako. E ngae ngke e a tia n reke buuna ae e rangi n tangiria, ma e noria teuaei bwa e bon okiokira naba te anua aei. E taku bwa iaiangoan 1 Betero 5:8 e rangi ni buokia. E kangai: “Kam na kawanawanaingkami ao taratara raoi! E nakonako teuare kairiribai nakoimi are te Riaboro ni bekorara n ai aron te raian, n ukoukora ae e na ongnga.” E korea ae kangai Antonio: “Ti a otabwaniniaki n taamnein te bwaitingako n te aonnaba aei, ao a kona n nim taamnei aikai n te iango. E buokai raoi te kibu anne bwa N na iangoa teuare nibwan taiani kariri aikai. I a riai n reiakina ae N na kai uringa ae taamnein te bwaitingako e bon nako mairoun te Riaboro. I a ataia ngkai bwa bon tii Iehova ae kona ni buokai ‘ni kawanawanaai ao n taratara raoi’ bwa I aonga ni kona ni buakani baika a na uruana au iango, nanou, ao au mare.” E reke buokan Antonio ae kainnanoia, ao n tokina e a katoka anuana ae buakaka aei. Ao e boni buokaki iai n totokoi kangaanga aika kakaiaki riki.

E teretere bwa e boni katauraoi taeka n reirei aika manena te Baibara, ake a kona ni buokira n totokoi kangaanga aika kakaiaki. Ma tera aroni kangaanga ake a a nene wakaaia ao ni kangaanga tokia? Ti na noria bwa e na kangaa Ana Taeka te Atua ni buokira ni katoki kangaanga aikai.