E A TIA ara tia Karikiriki ni kakabwaiaia aomata ma ana bwaintituaraoi ae akea n ai arona, ae te inaomata n rinea ae a na karaoia. Irarikin anne, e rangi ni kakabwaiaia te koraki ake a kabonganai raoi inaomataia n rinea ae a na karaoia ni karikirakea riki iai te taromauri ae koaua. N ikotaki naba ma te koraki ake a kakorakoraia ni katabua arana ao ni boutokaa ana kantaninga ae moan te kakawaki. E aki tangiria Iehova bwa ti na irii nanon tuua tii ibukina bwa ti kakamaakaki ao ni kairoroaki nako iai. Ma e rangi ni kakawaki irouna te nano ni kan anga ae karikirakeaki n te tangira ni koaua ao te kakaitau ae rangi ni bati.

N te katoto, ngke a mena tibun Iteraera n te rereua are Tinai ao e tuangia Iehova bwa a na katea te tabo n taromauri teuana. E taku: “Kam na karekea te angabai nakon Iawe mai buakon ami bai. Te aomata nako ae e kukurei nanona iai, e kona ni uoti baikai nakoni Iawe.” (Te Otinako 35:5, BK) E riai n anga ae konaa te I-Iteraera n tatabemania nako, n aki ongeia bwa tera ana angabwai ke iraua boon are e na anga, ma e kona ni kabonganaaki n te aro ae riai ibukini karaoan nanon te Atua. Tera aroia iai?

‘A bane n roko akana a kaungaia i nanoia’ ma ‘akana a kan angabwai mai nanoia,’ ni karaoa aia angakarea ma ‘kukurein nanoia ni kan anga.’ A kukurei mwaane ma aine n uotii bwaai tabeua ibukini karaoan te bwai are e tangiria Iehova n aron aikai: burenibai, taninga, mwamwa, koora, tirewa, buraati, te karai ae buruu ao ae uraroo, te kunnikai ae uraura, te rinen ae raoiroi, buraen te kooti, kunia tiibu mwaane aika kaurauraaki, kunia tiire, te kai ae te aketia, atibu aika raneanea, makano aika boiarara ao te bwaa. N tokina, “a bon tau maitini bwai ake i rouia i bukini katian te makuri ni kabanea, ao iai naba nikirana.”—Te Otinako 35:21-24, 27-29; 36:7, BG.

Te bwai ae e rangi ni kakatonga iai Iehova boni kukurein nanoia naake a boutokaa te taromauri ae koaua ao tiaki baike a bwaintangirai. A kukurei naba n anga aia tai ao aia boutoka n te mwakuri. E taekinaki ae kangai n te rongorongo: “Ao aine aika rabakau nanoia a bane ni bibinoka ni baia.” Ni koauana, ‘aine ake a kaungai nanoia n te rabakau a bane ni bibinokai buraeia kooti.’ Irarikin anne, e anganaki Betarera iroun Iehova “te rabakau, te ataibwai, ma te atatai, ma ataan aroni makuri ni kabane.” Ni koauana, a kaonaki Betarera ao Ooriaba n te nano n rabakau iroun te Atua bwa a na karaoi mwakuri ni kabane ake a tuangaki.—Te Otinako 35:25, 26, 30-35, BG.

Ngke e kaoia Iehova tibun Iteraera bwa a na anga aia bwaintangira, e onimakinna raoi bwa a kona ‘aomata nako ake a kukurei nanoia’ ni boutokaa te taromauri ae koaua. Ibukin anne, e tituaraoi ni kabwaiaia te koraki ake a kukurei n anga mai nanoia rinanon te reirei ni kairiri ao reken te kimwareirei ae akea tiana. Ma e boni kaotiotia Iehova bwa ngkana e kakabwaiaa aia anga nano ana toro, e kona n taraia raoi bwa a na akea te bwai teuana ke te aomata temanna ae mwaatai ae na kakororaoa nanona. (Taian Areru 34:9) Ngkai ko beku nakon Iehova n aki mwamwanaia, e na boni kakabwaiaa nanom ni kan anga.