1, 2. (a) Tera ae taekinna Iesu ibukini kabaneani boong? (b) Baikara titiraki aika ti na rinanoi?

IANGOA te tai are e tekateka iai Iesu i aon te Maunga are Oriweta ao n tarataraa te tembora are i Ierutarem ngke e a taekina iai teuana mai buakon ana taetae ni burabeti aika rangi ni kamimi. A a kakauongo raoi Betero, Anterea, Iakobo ao Ioane ngke e a kaatuua ana iango Iesu ni baika a na riki n taai aika a na roko. E tuangia baika na riki ni kabaneani bongin te waaki ae buakaka i aon te aba, ae te tai are e na tautaeka iai n Ana Tautaeka n Uea te Atua. E tuangia naba bwa n te tai ae kakukurei anne ao a na tei ibukina i aon te aba te “toro ae kakaonimaki ma ni wanawana,” are a na angangania ana tabonibai kanaia n taina ae riai.—Mat. 24:45-47.

² N te taetae ni burabeti naba anne, ao e a manga taekina te kaikonaki Iesu ae taekaia ataeinnaine aika tengaun. (Wareka Mataio 25:1-13.) Ti na rinanoi titiraki aikai: (1) Tera te rongorongo ae taekinaki n te kaikonaki? (2) A kangaa taani kabiraki ni maiuakina te reirei ni kairiri man te kaikonaki, ao tera mwina?  (3) A kangaa ni kakabwaiaaki ana “tiibu tabemwaang” Kristo?

3. E kangaa ni kabwarabwaraaki n ara boki n taai aika nako te kaikonaki ae taekaia ataeinnaine aika tengaun, ao tera mwina?

³ Ti reiakinna n te kaongora ae imwain aei bwa i nanon ririki aika bati, ao e a tia te toro ae kakaonimaki ma ni wanawana ni bita aroni kabwarabwaraan rongorongo tabeua man te Baibara. E a kabatiaaki ngkai tataekinan reirei aika manena iroun te toro ae kakaonimaki ma ni wanawana, ao ni kauarerekea taekinani baika nanonaki ni kaikonaki ao taetae ni burabeti. Ti na iangoa ana kaikonaki Iesu ae taekaia ataeinnaine aika tengaun. E tataekinaki n ara boki bwa a kona n tei taian taura, te bwaa ao te atinibwa ibukin te bwai ke te aomata. E koaua bwa e na bua te bae taekinaki n te kaikonaki ao ae kaumakaki taekinana ngkana ti kaatuui ara iango ni baika a aki kakawaki? Ti riai n nenera kaekaan te titiraki ae kakawaki anne.

4. N te kaikonaki ao ti kangaa n ataa kanikinaean (a) te tia mare te mwaane? (b) ataeinnaine?

⁴ Ti na rinanoa te iango ae boto mai iai ana kaikonaki Iesu. Te moan, ti na iangoia te koraki aika taekinaki n te kaikonaki. Antai te tia mare te mwaane? E teretere ikai bwa e bon taetae ibukina Iesu. N taai aika kakaokoro, ao e taekinna bwa boni ngaia te tia mare te mwaane! (Ruka 5:34, 35) Antai ataeinnaine? E taekinna Iesu n te kaikonaki aei bwa a mwiokoaki ataeinnaine bwa a na tauraoi ma aia taura n rokon te tia mare te mwaane. Nori kaetieti ake e anga Iesu nakon “te nanai ae uarereke” ake taan rimwina aika kabiraki ni kangai: “Kam na tauraoi, ao kaurai ami taura, ao kam na katotongia aomata ake a tataningaa okin aia toka man te mare.” (Ruka 12:32, 35, 36) Irarikin anne, a kairaki n te taamnei te abotoro Bauro ao te abotoro Ioane bwa a na kabotauia taani rimwini Kristo aika kabiraki ma ataeinnaine aika itiaki. (2Kor. 11:2; TeKao. 14:4) E teretere nanon Iesu n tangiria bwa e na riki te kaikonaki ae ni Mataio 25:1-13, bwa te reirei ni kairiri ao te kauring nakoia taan rimwina aika kabiraki.

5. E kangaa Iesu ni katerea te tai ae baireaki are e na koro iai bukin ana kaikonaki?

⁵ Imwin anne, ti na iangoa te tai ae e a tia ni baireaki. E kaineti nakon te tai raa ana reirei ni kairiri Iesu? N raatokin te kaikonaki aei, e a kaotaira Iesu ibukin te tai are ‘E a roko iai te tia mare te mwaane.’ (Mat. 25:10) N Te Taua-n-Tantani ae bwain Turai 15, 2013 ao e maroroakinaki iai ana kaikonaki Iesu ni Mataio mwakoro 24 ao 25, ae kaotaki iai wanua te tai ‘okin’ Iesu. Ngkana e taekina ‘okina’ Iesu, e a katerea iai tain te rawawata ae korakora ngkana e a roko ni motikitaeka ao ni kamauna te waaki ae ngkai i aon te aba. E teretere ngkanne bwa e kaineti te kaikonaki aei ma kabaneani boong, ma e na roko ni korakorana anne n tain te rawawata ae korakora.

6. Tera te rongorongo ae kakawaki n te kaikonaki?

⁶ Tera te rongorongo ae kakawaki n te kaikonaki? Uringa te baere e taekinaki n te Baibara. E a tia Iesu ni kabwarabwaraa taekan “te toro ae kakaonimaki ma ni wanawana.” E kakoauaaki bwa te toro anne bon taani kabiraki aika karako mwaitiia ake a na kairiri i buakoia taan rimwin Iesu ni kabaneani boong. E kauringia Iesu mwaane akanne bwa a riai n teimatoa ni kakaonimaki. N te mwakoro ae imwina, ao e kamanena Iesu te kaikonaki aei ni kaungaia ni kabane taan rimwina ake a kabiraki ni kabaneani boong, bwa a na “teimatoa n tantani” n aki tannako mani kaniwangaia ae kakawaki. (Mat. 25:13) Ti na rinanoa ngkai te kaikonaki ao aroia taani kabiraki ni maiuakina te reirei ni kairiri ma iai.

7, 8. (a) Baikara aroaro aika uoua ae kakoauaaki iai tauraoia ataeinnaine aika wanawana? (b) A kangaa ni kakoauaaki bwa a tauraoi taani kabiraki?

⁷ E katuruturuaki n ana kaikonaki Iesu bwa a tauraoi ataeinnaine aika wanawana imwain rokon te tia mare te mwaane, tiaki n aroia ataeinnaine ake a nanobaba. Bukin tera? Ibukin aroaro aika uoua ae te tatauraoi ao n teimatoa n taratara. A a mwiokoaki n te tairiki anne bwa a na tiku n tataningaa rokon te tia mare te mwaane, a na kateimatoa uran aia taura ao n taratara raoi n te tairiki anne. A aki katotongia ataeinnaine ake a nanobaba ake niman, bwa a bon uotii aia bwaa ae bati i nanon aia atinibwa n ikotaki naba ma aia taura. A kangaa ni kakoauaaki bwa a tauraoi taani kabiraki n aron naba anne?

⁸ A bon tauraoi! A a tia taani kabiraki ni kabaneani boong ni karaoa are a karaoia ataeinnaine aika wanawana, ake a kakaonimaki ni mwiokoaia ni karokoa te toki. A ataia bwa aia beku ibukin te Atua, e kainnanoaki iai kitanani bwaikorakin ana aonnaba Tatan. A a kabanei maiuia ni beku ibukin Iehova, tiaki ibukina bwa e a kaan te toki ma ibukin aia tangira ao aia kakaonimaki nakoina ao nakon Natina. A kateimatoa kakaonimakia n rarawa nakon te nano ae bwabwainaki n te aonnaba aei ma bwaikorakina, te aroaro ni maiu ae buakaka ao te bangaomata. Mangaia are a teimatoa n tauraoi, a rikirake n raneanea n ai aron te oota ao n aki bwarannano ibukini waeremwen rokon te tia Mare te Mwaane.—IBir. 2:15.

9. (a) Tera ana kauring Iesu ibukin te nimatutu? (b) Tera aroia taani kabiraki ni butimwaea te takarua ae kangai: “Aio te tia mare te mwaane”? (Nora kabwarabwaraana ae i nano.)

⁹ Te kauoua n aroaro are a buokaki iai ataeinnaine akanne n tauraoi, bon aroia n teimatoa n taratara. E koaua bwa a kona taani kabiraki ni kabane “n nimatutu ma ni matu” n te tairiki are a tataninga iai rokon te tia mare te mwaane? Eng. Iangoia ataeinnaine aika tengaun ake e taekinia Iesu bwa a bane “n nimatutu ma ni matu” n te tai are e a taraa ni waeremwe iai rokon te tia mare te mwaane. E ataia raoi Iesu bwa e ngae ngkana e tauraoi te aomata ao n ingainga nanona ma e kona n tinewangaaki ni mamaaran te rabwata. A a tia taani kabiraki aika kakaonimaki n ira nanon te kauring anne ao a tia ni kakorakoraia n teimatoa n taratara ao n tantani. E taekinaki n te kaikonaki bwa a bane n takaruaea ae kangai: “Aio te tia mare te mwaane!” Ma tii te koraki aika teimatoa n taratara aika kona n nanomwaaka ni karokoa te toki. (Mat. 25:5, 6; 26:41) Ma tera aroia taani kabiraki ni boong aikai? I nanoni kabaneani boong, a a tia ni butimwaea kakoauaan ae i aoni kawaina n roko Iesu n aroia n tauraoi ao n takaruaea ae kangai: “Aio te tia mare te mwaane!” A tia naba n nanomwaaka nakoni kataaki ao n teimatoa n tauraoi imwain rokon te tia Mare te Mwaane. * Ma e kaatuuaki n te kaikonaki aei te bwai ae kakawaki riki ibukin te tai ae baireaki. Ni kangaa?

10. Tera te titiraki ae aki mataata ae reke man aia maroro ataeinnaine aika wanawana ao ake a nanobaba?

¹⁰ Tao iai te bwai ae aki mataata n raatokin te kaikonaki n te maroro i marenaia ataeinnaine ake a nanobaba ma aika wanawana.  (Wareka Mataio 25:8, 9.) Ibukin anne, e a tabekaki te titiraki ae kangai: “N ningai te tai ae a rawa iai te koraki aika kakaonimaki ni buokiia aika bubutii buokaia, n rongorongoia ana aomata te Atua rimoa?” E kamatataaki raoi anne ngkana ti rinanoa riki te tai ae e a tia ni baireaki. Uringa otara raoi n taekan Iesu ae te tia Mare te Mwane are e na roko ni karaoa te motikitaeka n raatokin te rawawata ae korakora. E aki ngkanne kaatuuaki iteran te kaikonaki aei n te bwai ae na riki imwain te bong ni motikitaeka? E iangoaki bwa e nang roko ni kabaneana kanikinaeaia taani kabiraki n te tai anne.

11. (a) Tera ae na riki imwaini moanakin te rawawata ae korakora? (b) Tera ae a nanonna ataeinnaine aika wanawana ngke a kanakoia naake a nanobaba nakoia taani kaboonakoa te bwaa?

¹¹ E nang roko ni kabaneana kanikinaeaia taani kabiraki i aon te aba imwaini moanakin te rawawata ae korakora. (TeKao. 7:1-4) E kakoauaaki raoi weteaia nako karawa man te tai anne. Ma iangoi ririki ake imwaini moanakin te rawawata ae korakora. Tera ae na riki nakoia taani kabiraki ake a aki taratara raoi ao n aki kakaonimaki? E nang aki reke kaniwangaia ae te nako karawa. E kateretereaki bwa a nang aki kanikinaeaki taani kabiraki akanne imwaini moanakin te rawawata ae korakora. N te tai anne, ao iai tabeman aika kakaonimaki ake a na manga kabiraki. Ngkana e a moanaki te rawawata ae korakora, ao a na bae ni mimi te koraki ake a nanobaba n noria bwa e a kamaunaaki Baburon ae Kakannato. A a ataia iai bwa a aikoa tauraoi imwain rokon te tia Mare te Mwaane. Tera ae na riki imwina ngkana a bubutii buokaia? Ti karekea te kaeka ae aki karaunano n ana kaikonaki Iesu. A aki tauraoi ataeinnaine aika wanawana n anga bwaan aia taura nakoia naake a nanobaba, man n oneani mwin anne, a tuangia bwa a na kabooi aia bwaa irouia taani kaboonakoa te bwaa. Ma uringnga bwa e a “nukanibong” te tai anne. A na kona ni kuneia taani kaboonakoa te bwaa n te tai anne? A na aki bwa a oimwi.

12. (a) Tera ae na riki nakoia taani kabiraki ake a tia ni kabuaa kakaonimakia ni koaua imwain tokini kanikinaeaia, n tain te rawawata ae korakora? (b) Tera tokia te koraki ake a arona aroia ataeinnaine aika nanobaba?

¹² N aron anne, a nang aki buokaki irouia taani kabiraki te koraki ake a aki kakaonimaki n tain te rawawata ae korakora. Ai bon akea te ibuobuoki ae tauraoi ibukia bwa a a oimwi. Tera tokia te koraki aei? E kabwarabwaraa te bwai are riki Iesu ni mwanangaia ataeinnaine aika nanobaba ae akea uaana ni kangai: ‘E a roko te tia mare te mwaane. A rinnako ma ngaia ataeinnaine ake a tauraoi nakon te baka ni mare, ao e a kainaki te mataroa imwia.’ N rokoni Kristo ma mimitongina ngkana e a uakaan tokin te rawawata ao e na ikotiia taani kabiraki aika rineaki ibukin te nako karawa. (Mat. 24:31; 25:10; Ioa. 14:1-3; 1Tet. 4:17) Ni koauana, e na boni kainaki te mataroa nakoia taan aki kakaonimaki aika kakoauaaki bwa ai aroia ataeinnaine ake a nanobaba. A na bon tatakarua ni kangai: “Te toka, te toka, ti na rin!” Ma a na karekea te kaeka n aron ae taekinaki nakoia koraki ake a taekinaki bwa kooti ae kangai: “I tuangingkami te koaua, Bwa I bon aki kinaingkami.” Ai kananokawakira anne!—Mat. 7:21-23; 25:11, 12.

13. (a) Bukin tera bwa e aki riai n taekinaki bwa a na bati taan rimwini Kristo aika kabiraki aika a na aki kakaonimaki? (b) E kangaa ni kaotaki n ana kaikonaki Iesu bwa e aki nanokokoraki irouia Kristian aika kabiraki? (Nora te taamnei ni moan te kaongora aei.)

¹³ Tera ae ti kona n iangoia ni kaineti ma baike a a tia n taekinaki? E koaua ae taekinna Iesu bwa a na iai mai buakoia ana toro aika kabiraki aika a na aki kakaonimaki ao a na tangiraki oneani mwia? E aki.  Uringnga bwa e a tia ni kauringa te “toro ae kakaonimaki ma ni wanawana” bwa a na aki riki bwa te toro ae buakaka. E aki kantaningaia Iesu bwa e na riki aei. N aron anne, e kaotaki n te kaikonaki taekan te kauring ae rangi ni kakawaki. N aroia ataeinnaine aika niman ake a nanobaba ao aika wanawana, a kona naba taani kabiraki n rineia bwa a na tatauraoi ao n teimatoa n taratara ke n rineia bwa a na nanobaba ao n aki kakaonimaki. E kairaki n te taamnei Bauro bwa e na mwanewea te reirei anne ngke e taetae nakoia raona ni kabiraki. (Wareka Ebera 6:4-9; kabotaua ma Te Tua-Kaua 30:19.) E matoatoa ana kauring Bauro, ma e a manga taekinna ma te aki nanokokoraki bwa a katauraoaki baika “raraoi riki” imwaia taari mwaane ao aine aika Kristian aika kabiraki. N aron naba anne, e taekinaki te kauring n ana kaikonaki Iesu n te aro ae tatangira. E ataia bwa a kona n teimatoa ni kakaonimaki ana toro aika kabiraki ao ni karekea kaniwangaia ae kakukurei!

14. A kangaa ni kakabwaiaaki “tiibu tabemwaang” man te kaikonaki ae taekaia ataeinnaine aika tengaun?

¹⁴ E kaineta ana kaikonaki Iesu nakoia taani kabiraki. Ma a kona “tiibu tabemwaang” ni kakabwaiaaki n ana kaikonaki Iesu? (Ioa. 10:16) Eng! E rangi ni mataata te kaikonaki ae kangai: “Teimatoa n tantani.” E tii kaineti anne nakoia taani kabiraki? E a tia Iesu n taekina ae kangai ‘Baika I tuangingkami, I bon tuangia naba aomata ni kabaneia bwa a na: Teimatoa n tantani.’ (Mareko 13:37) E tangiriia Iesu taan rimwina ni kabane bwa a na katauraoi nanoia ni kateimatoa kakaonimakia ni beku ao n ira nanon te kaetieti ae te teimatoa n tantani. Ngaia are a toua raoi mwin te kairiri are a karaoia taani kabiraki Kristian ni kabane, n aroia ni kakairi n aia katoto aika raraoi ao ni moanibwaia te mwakuri ni minita ni maiuia. Ti riai naba ngaira n iaiangoa aroia ataeinnaine aika nanobaba ake a bubutiia naake a wanawana bwa a na anga teutana man aia bwaa. Ti kauringaki n aia bubutii ae akea uaana, bwa e aki kona temanna ni kakaonimaki ibukira, e aki kona n tei n te koaua ibukira ke n teimatoa n tantani ibukira. Ti na boni kaekaa te tia Motikitaeka ae raoiroi are e a tia n rineia Iehova. Ti riai n tauraoi bwa e na bon roko!

15. Bukin tera bwa bon te bwai ae kakimwareirei nakoia Kristian ni koaua kantaningaan ana mare Kristo?

¹⁵ A kona ni kakabwaiaaki Kristian ni kabane mani baike a riki n ana kaikonaki Iesu. Ni koauana, antai mai buakora aika a aki ingainga nakon te mare ae kantaningaaki anne? A na bane n roko i karawa taani kabiraki imwin te buaka ae Aremaketon, ao n riki bwa buuni Kristo. (TeKao. 19:7-9) A na bane ngkanne ni kakabwaiaaki aomata nako aika i aon te aba man te baka ni mare anne, bwa e beritanaki iai ibukira ni kabane te tautaeka ae kororaoi. N aki ongeia bwa tera ara kantaninga n taai aika na roko, tao te nako karawa ke te tiku i aon te aba, ti riai n iangoa reiakinan te reirei ae kakawaki n te kaikonaki ae taekaia ataeinnaine aika tengaun. Ti riai n iangoa katauraoan nanora n aki kaingingaki ao n teimatoa n taratara raoi n taai nako, bwa ti aonga ni kimwareirei n te kantaninga ae moan te raoiroi ae katauraoia Iehova ibukira!