“I TAKU bwa a nang toki bwaai ni kabane ngke e a katanoataaki taekan natiu te mwaane are e a kabaneaki man te Ekaretia,” e ururing rikaaki Julian. “Bon au karimoa, ao e rangi ni kaan reitakira ike ti a uaia ni mwamwakuri ni kauoman. E rangi n tamaroa arona, ma imwina ao e a moanna ni maiuakin aroaro aika aki riai. E aki toki n tang kaainnabau ao I a aki ataa arou ni karaua nanona. Ti aki toki n titirakinira bwa tera kabwakara ni karaoa tabera ni karo.”

Bukin tera e taekinaki bwa kabaneakin te Kristian temanna bon te mwakuri n tatangira ngkai e karika te rawawata? Bukin tera ngkai e taekinaki n te Baibara bwa e riai ni karaoaki te babaire ae matoatoa aei? Bukin tera bwa e kabaneaki te aomata?

Bukina aika uoua aika riai n iangoaki ibukini baireani kabaneakin Ana Tia Kakoaua Iehova temanna. Te moan, e karaoa te bure ae kakaiaki te tia Kakoaua ae e a tia ni bwabetitoaki. Te kauoua, e aki raraoma ibukin ana bure.

E ngae ngke e aki kairoroira Iehova ni karaoan ae riaon ara konaa, ma iai te kaetieti ibukin te itiaki ae kantaningaiia ana toro bwa a na kakairi iai. Te katoto, e tua Iehova bwa ti na tannako mani buure aika kakaiaki n aron te wene ni bure, taromauriani boua, te iraa, te nanonrang, te tiritiri ao te tabunea.—1Kor. 6:9, 10; TeKao. 21:8.

Ko aki ngkanne kakoauaa ae ana kaetieti Iehova aika itiaki ao n tamaroa, a katauraoaki ibukini kamanoakira? Antai ae e aki kani maeka i buakoia aomata aika tangira te rau, a tamaroa aroaroia aika a kona n onimakinaki? Ti kunea anne i buakoia tarira ao mwaanera n te onimaki, ao ti kakaitau n ara motinnano are ti karaoia ni katabuan maiura nakon te Atua ao ni kaboraoa maiura ma ana kaetieti aika n te Baibara.

Ma tera aron te Kristian are e a tia ni bwabetitoaki ae karaoa te bure ae kakaiaki ibukin aki kororaoina? A karaoi naba buure aika kakaiaki ana toro Iehova aika kakaonimaki rimoa, ma e aki kabaneia te Atua. Bon te katoto ae rangi n ataaki te baere e karaoia te Uea are Tawita. E karaoa te wene ni kimoa ao n tiritiri, ma e tuangaki iroun te burabeti are Natan ni kangai: “E kabara . . . am bure Iehova.”—2Tam. 12:13, BG.

E kabwaraaki ana bure Tawita iroun Iehova ibukina bwa e raraoma ni koaua. (TaiAre. 32:1-5) N aron naba anne, e kona ni kabaneaki temanna ana toro Iehova ni boong aikai tii ngkana e aki raraoma ke e bon teimatoa ni kakaraoi mwakuri aika buakaka. (Mwa. 3:19; 26:20) E kona ni kabaneaki temanna ngkana arona bwa e aki raraoma ni koaua ao ni kaotia nakoia unimwaane ake kaain te komete ni kaboowi n te ekaretia.

 N te moantai, ti kona n namakinna bwa e aki raoiroi ke n tatangira te babaire ibukini kabanean te tia bure temanna, e moamoa riki ngkana ti rangi ni kaan ma te aomata anne. Ni koauana, ti kakoauaa man ana taeka Iehova bwa te babaire aei bon te mwakuri ae tatangira.

E katerea Iesu ni kangai: “E kakoauaaki wanawanan te aomata man ana mwakuri aika raraoi ake e karaoi.” (Mat. 11:19) Te babaire ae tamaroa ibukini kabanean te tia bure ae aki raira nanona e kona n anga mwina ae raoiroi. Iangoi bwaai aika tenua aikai.

Kabaneakia taani bure e karineaki iai aran Iehova. E kona n rotaki aran Iehova n ara mwakuri ibukina ngkai ti uouota arana. (Ita. 43:10) Ai aron naba ana mwakuri te nati ae kona ni kamoamoaaki ke ni bukinaki iai ana karo, ngaia are e kona naba n rotaki aia namakin aomata ibukin Iehova n aia katoto ae raoiroi ke ae buakaka aomata ake a uouota arana. E kateimatoaaki raoiroin aran te Atua ngkana a kateimatoai naba aroaroia aika itiaki aomata ake a uouota arana. Titeboo raoi te bae riki n ana tai Etekiera ngke a kairekerekea aran Iehova ma Iutaia tabeman.—Etek. 36:19-23.

E kona ni kamatauningaaki aran te Atua ngkana ti kakaraoi mwakuri aika a aki riai. E anga te reirei ni kairiri te abotoro Bauro nakoia Kristian ni kangai: “Katotongia ataei aika ongeaba n aromi n aki manga kariaia kairani maiumi n tangirani baike kam bwarui ngkoa, ngke kam ronnano. Ma kam na itiaki n aroaromi ni kabane, n aron naba Teuare Tabu are weteingkami, bwa e koreaki ae kangai: ‘Kam na itiaki ibukina bwa I itiaki.’” (1 Bet. 1:14-16) E karineaki aran te Atua man aroaro aika a itiaki ao n tabu.

Ngkana e kakaraoa ae buakaka temanna Ana Tia kakoaua Iehova, a kona n ataia raoraona ao naake a aki rangi ni kinaa. E kaotaki n te kababane bwa iai ana aomata Iehova aika itiaki ake a kakairi n ana kaetieti te Baibara bwa a aonga ni kateimatoa katabuan arana. E roko temanna te aomata n taromauri n te tabo ni botaki i Switzerland ao e tuatua bwa e kani kaaina te ekaretia. E a tia ni kabaneaki mwanena ibukini maiuakinan ae buakaka. E taku bwa e kani kaaina te botaki “aika a aki kakaraoi aroaro aika bubuaka.”

E kamanoaki itiakin te ekaretia ni Kristian ni kabaneakin temanna. E kauringia I-Korinto te abotoro Bauro te kangaanga ae kona n riki ngkana ti teimatoa n iangoiia taani bure. E kabotaua aia mwakuri te koraki anne ae buakaka ma te iiti are e kona ni karika te burawa ni kangai: “E karikirakea te bua ni burawa ae bwanin, te iiti ae tii teutana,”. E a manga reireinia riki ni kangai: “Tewea nako teuare buakaka mai buakomi.”—1Kor. 5:6, 11-13.

Ni koauana, e kateretereaki bwa “teuare buakaka” are taekinaki irouni Bauro e boni kakaraoi aroaro aika a aki riai. A kona naba kaain te ekaretia tabemwaang ni kamanoa ana mwakuri. (1Kor. 5:1, 2) Ngkana a aki tabeakinaki buure aika kakaiaki, a na namakinna Kristian tabeman bwa a kona naba ni karaoi mwakuri aika aki riai n aia tabo. Tarariaoani buure aika karaoaki e na kamamaara te nano ni kani kakairi n ana kaetieti Iehova. (TeMin. 8:11) Irarikin anne, a kona n riki bwa kaanga te “rakai ngaiia ae raba i taari” taani bure aika aki rairi nanoia ao n uruana aia onimaki tabemwaang n te ekaretia.—Iuta 4, 12.

E kona ni buokaki te tia bure bwa e na oki ana iango ngkana e kabaneaki. E taekina Iesu te ataeinimwaane temanna are e kitana mwengan tamana ao ni bakataea tibwangana n te maiu ni kaibwabwaru. E reireiaki te nati are bakatae n te aro ae matoatoa bwa te maiu i tinanikun ana auti tamana bon akea uaana ao akea te tangira iai. N tokina e a oki ana iango te nati, e raira nanona ao ni waekoa n okira ana utu. (Ruka 15:11-24) Ti buokaki n ataa ana namakin Iehova ngke e kabwarabwaraa Iesu taekan te karo ae tatangira are e kimwareirei ngke e a bita nanona natina. E berita nakoira ni kangai: “I aki kukurei ni maten te aomata ae buakaka; ma I tangira te aomata ae buakaka ba e na rairaki mani kawaina ma ni maiu.”—Etek. 33:11, BG.

N aron naba anne, a kona te koraki ake a kabaneaki  n namakinna bwa ai akea ngkai aia utu n te onimaki. Uaan aia mwakuri aika a aki raoiroi ma ni kammaraki ao ururingan taai aika kakukurei ngke a reitaki ma ana aomata Iehova, a kona ni buokaki iai bwa e na oki aia iango.

E kainnanoaki te tangira ao te nanomatoa i bukini karekean te nano anne. E taku te tia areru are Tawita: “Ke e oreai te aomata ae raoiroi, bon te bwai n akoi; Ao ke e boaai, bon te bwa ae kabiran atuu.” (TaiAre. 141:5, BG) Te katoto: Iangoa te aomata ae bwabwa i taari are e a aki ikeike. Imwain reken te ibuobuoki man te onnaoraki, e riai moa n ororeaki nukana bwa e aonga n nako te ran mairouna. E kona ni kammaraki oreana ma e buokaki iai bwa e na maiu. N aron naba anne, e ataia Tawita bwa e riai n anganaki te reirei ni kaetieti ae kammaraki iroun te aomata ae raoiroi ibukini kabwaiana.

N itera aika bati, e reke te reirei ni kaetieti ae kainnanoaki iroun te tia bure ngkana e kabaneaki. Imwin tebwi tabun te ririki, e a kaitiaka maiuna natin Julian are taekinaki ni moan te rongorongo aei ao e a beku ngkai bwa te unimwaane. E taku: “I buokaki ni kabaneakiu bwa N na nora uaan maiu arei, I boni kainnanoa raoi te aeka n reirei ni kaetieti anne.”—Ebera 12:7-11.

Ni koauana, e kona ni kananokawaki te kabaneaki n te itera n taamnei, ma e aki riai n riki bwa te kangaanga ae bubura. Ti riai ni bane n taraia bwa e na iraki raoi nanon te kaetieti ae te kabaneaki.

Unimwaane ake a tabena te tabe ae kananokawaki aei, a kekeiaki ni kaotiota ana tangira Iehova ngkana a maroroakina taekan te kabaneaki. Ngkana a kaongoa te aomata mwin aia babaire, a bwaina te akoi ni kabwarabwarai raoi kawai aika e riai ni karaoi ibukini kaokana nakon te ekaretia. A baireia naba unimwaane bwa a na kakawaria koraki ake a karaoi bitaki tabeua nakon maiuia ni kauringia aroia ae a kona ni karaoia bwa a aonga n okira Iehova. *

Kaain te Utu, a kona ni kaota te tangira nakon te ekaretia ao nakoia taani bure n aroia ni karinea te babaire ibukin te kabaneaki. “E bon teimatoa n riki bwa natiu te mwaane,” e kabwarabwaraa Julian, “ma e a kamaenakoira anuani maiuna.”

Kaain te ekaretia, a kona ni kaota te tangira n aroia n aki taetaenikawai ma te aomata are kabaneaki. (1Kor. 5:11; 2 Ioa. 10, 11) A butimwaea ana reirei ni kaetieti Iehova are e anga rinanoia unimwaane. Irarikin anne, e riai ni kaotaki te tangira ao boutokaaia ana utu te aomata are kabaneaki ake a rotaki n te aro ae a na aki iangoia bwa a katinanikuaki mairouia tariia n te onimaki.—IRom 12:13, 15.

E taku Julian: “Te kabaneaki bon te babaire ae ti kainnanoia ibukini buokara bwa ti na maiuakina ana kaetieti Iehova. E ngae ngke e kammaraki ma e kona n anganira mwina ae raoiroi. Ngke arona bwa I karabai ana bure aika bubuaka natiu, e na bon aki kona ni bitaki.”