E RANGI ni kakimwareirei te roko n te bwabwaro ibukini karekean amwarake n taamnei. Ma, e bati riki kimwareireia ana aomata te Atua n tain te baka n amwarake n taamnei ngkana a uaia n itamwaomwao n tain te katawanou.

N Tebetembwa 1919 ao a karaoa aia bwabwaro ae manna wanua te bong Taan Reirei n te Baibara i Cedar Point, Ohio, U.S.A. A riai ni katauraoaki ruu n taian outero ao amwarake ibukia taan roko man aaba tabeua, ma a bon roko aomata aika nga ma nga mwaitiia are e a bon aki kantaningaaki. A aikoa mwakuri taan touati n te tai anne moa ibukini mwaitiia taan roko aika uanao. E rangi n raraoma te manatia iai ngaia are e a tuatua ngkana iai i buakoia taan roko aika a kona n ibuobuoki, ao a bati ake a anganano. Temanna mai buakoia bon Sadie Green. E ururing neiei ni kangai: “Bon au moantai n touati ma e boni kakukurei.”

N ririki ake imwina, a kariaiakaki taari ake anganano mani babaire ibukin te tabo n amwarake n tain te bwabwaro bwa a na touatinia tariia ma mwaneia. Man te babaire aei, ao a buokaki naba iai rooro n rikirake ni katei tiaia ni bwaai n taamnei. E riki bwa te touati Gladys Bolton n te bwabwaro are boo n 1937. E taku neiei: “I kaitiboo ma aomata man taabo tabeua ao n ongoraea aroia n tokanikai i aon aia kangaanga. Mai ikanne are e a reke iai au iango bwa N na bwaiania.”

E taku Beulah Covey are e kaea te bwabwaro: “E rangi ni baitii te waaki imwin aia anganano taani mwakuri. N rokon Angelo Manera n te Dodger Stadium i Los Angeles, California n 1969, ao e a tibwa ataia teuaei are e a tia n rineaki bwa e na touati. E taku: “Ai kubanakora ngai n anganakiu te mwioko aei! E irekereke te katauraoi ibukin te bwabwaro anne ma kenakin te mwanono ae abwakina (0.4km) are e na kaweneaki iai bwaibun te kaeti nakon te tabo ni kuuka!

N 1982 i Sierra Leone, a kaitiaka moa te marae taan anganano aika mwakuri korakora, ao ni katea te tabo n amwarake mani bwaai ni mwakuri ake a kona n reke. I Frankfurt, Tiaman n 1951 ao iai taari tabeman ake a aanga aia ibuobuoki n tangoa te bwai ni mwakuri ae bubura are e kona ni kamanenaaki ibukin 40 taiani bwaata ni kuuka. A kona ngkanne touati ni katauraoa te  amwarake ibukia 30,000 aomata i nanon teuana te aoa. Ibukini kabebetean aia mwakuri taan ni kaitiaki bwai n amwarake aika 576, ao a bon uotii oin aia biti ma aia kainiwaiteke naake a kaea te bwabwaro. A wanawana taani kuuka i Yangon, Myanmar bwa a a anga amwarake aika a aki rangi n tena nakon are a bon taneiai iai taan roko n te bwabwaro man aaba aika kakaokoro.

N te bwabwaro teuana are karaoaki n te United States n 1950 ao e kakabwaiaaki Annie Poggensee ngke e teitei n te rain ae abwabwaki i aan te kabuebue n taningaa rekeni kanana. E taku: “E bon rotai te kukurei n te maroro ae irianaki ma te akoi i marenaia uoman taari aine ake a roko mai Eurobe n te booti ni kaea te bwabwaro.” A kabwarabwaraa aine aikai aron Iehova ni buoka neiei bwa e na roko n te botaki. E taku riki neiei: “Bon akea kabotauani kukureia taari aikai. “Bon akea aia kangaanga ngke a teitei n tataninga n te rain ae abwabwaki ae irianaki ma te kabuebue.”

Ni bwabwaro aika bubura ao a kateaki taabo n amwarake kaanga ai aron umwanrianna, ake a karinanaki iai taibora aika rietata teutana are a kona ni kamanena aomata ni kabaitiia n amwarake bwa a aonga ni manga kamanena tabeman. Tera riki te anga ibukini kaamwarakeaia nga ma nga aomata n tain te katawanou? E taku temanna are tiaki te tia Kakoaua: “E rangi ni kamimi te Aro anne bwa a teitei aomata n amwarake.”

A mimi tautia ao kaain te tautaeka n nora nakoraoin ao bairean raoi te botaki. Imwin tuoan ara tabo n amwarake n te Yankee Stadium i New York City, ao e a kaumakaki Major Faulkner man te British War Department iroun te mataniwi n te United States Army, bwa e na karaoa te tutuo ae aron anne. Ngaia are n 1955 ao e a roko ma buuna ni kaea te Runga ae te “Triumphant Kingdom” i Twickenham i Engiran. E taku bwa e nora nakoraoini bairean te tabo n amwarake man te itangitangiri.

I nanon tatabebubua te ririki ao a tibwatibwai amwarake aika kamarurung ao aika a aki rangi ni bobuaka ibukia naake a kaea te bwabwaro, touati ake a anganano n te mwakuri. Ma a kainnanoaki taan anganano aika bati bwa a na kabanei aoa aika mwaiti ibukini karaoan te mwakuri, ao a kona naba n aki ongoraei kanoan te botaki. N raabanen 1970 ao e a manga baireaki bwa e riai ni kauarerekeaki aroni karaoan te amwarake ibukin te bwabwaro n taabo tabeua. N 1995, ao a tuangaki taan roko n te bwabwaro bwa a na uotii oini kanaia. Aio are a konaa iai naake a katauraoi ao n tibwai amwarake ni karekei kakabwaiaaia n te kaetieti ibukini bwaai n taamnei ao te iraorao ni Kristian. *

Ai kakawakira iroun Iehova te koraki ake a mwakuri korakora ibukia raoia n onimaki! A namakina te nanokawaki tabeman n ururingani boong ake a kukurei ni mwakuri iai n te tabo n amwarake. Ma e kakoauaaki te bwai teuana aei: Te tangira bon te bwai ae kakawaki n ara bwabwaro.—Ioa. 13:34, 35.