Ko a tia ni wareki raoi kaongora man Te Taua-n-Tantani n taai aika tibwa nako? Noria ngkana ko kona ni kaekai titiraki aikai:

Ngkana e roko te toki, baikara bwaai tabeua aika a nang toki?

Bwaai tabeua aika a nang toki bon aia tautaeka aomata aika kabwaka, te buaka ao te ribuaka, Aaro aika kewea te Atua ao aomata, ao aomata ake aki karinea te Atua.—1/5, i. 3-5.

Antai Koka mai Makoka ae taekinaki n te boki ae Etekiera?

N oneani mwin are e kaineti nakon Tatan, n taraana e kaineti Koka mai Makoka nakon aia taanga ni buaka botannaomata, ake a na kataia ni kamaunaia ana aomata te Atua imwini moanakin te rawawata ae korakora.—15/5, i. 29-30.

Baikara bwaai aika onoua aika kona ni buoka te aomata bwa e na kukurei n ana tai ni kara?

E kaungaunga te Baibara bwa ti na bwaina (1) te nanorinano, (2) te iangoraoi, (3) te iango ae raoiroi, (4) te tituaraoi, (5) te iraorao ma aomata, ao (6) te kakaitau. Kaotiotan aroaro akanne a kona ni buoka te aomata bwa e na kukurei n ana tai ni kara.—1/6, i. 8-10.

A kangaa ana kakai Iesu ni kaotia bwa e tituaraoi?

N te mare i Kana ao e onea Iesu tao 100 te kaaran (380 te rita) n ran nakon te wain. N te tai riki teuana ao e kaamwarakeia aomata aika e raka i aon 5,000 n te kakai. (Mat. 14:14-21; Ioa. 2:6-11) E kakairi n tituaraoin Tamana n taai akana uoua akanne.—15/6, i. 4-5.

Ti kangaa ni kakoauaa bwa ti kona ni kakukureia te Atua, e ngae ngkai ti aki kororaoi?

A karaoi kairua mwaane n aron Iobi, Rota, ao Tawita. Ma a tangiria ni beku iroun te Atua, a raraoma n aia bure, ao a bitii aroia. E reke akoaia iroun te Atua, ao e kona naba n reke anne iroura.—1/7, i. 12-13.

Te koaua bwa ni kamaunaakini Baburon ae Kakannato a na bane ni mate iai naake kaain Aaro aika kewe mai mwaina?

N taraana, tiaki ngaia anne. E kaotaki n Tekaria 13:4-6 bwa a na kitan aia koaua tabeman mataniwi n Aaro, ao n taekinna ae a aki irekereke ma Aaro aika kewe.—15/7, i. 15-16.

E aera Baraka ngke e kariaia bwa e na buaka tii ngkana e iria Tebora?

Bon te mwaane ae onimaki Baraka. N oneani mwin are e na butiia Iehova bwaai ni buaka aika bati riki, e tangiria bwa e na iri te aomata ae tei ibukin te Atua ae Tebora, bwa e na kakorakoraa ma ana aomata. (MotiTae. 4:6-8; 5:7)—1/8, i. 13.

Baikara bwaai tabeua ake e kona n iaiangoi te Kristian?

Tabeua mai buakoia bon ana karikibwai Iehova, kakawakin ana Taeka ae kaira koreana, te kakabwaia ae te tataro, ao ana babaire ae tatangira ae te kaboomwi.—15/8, i. 10-13.

E aera ngkai te rawa nakon iraorao aika bubuaka e irekereke naba ma te iraorao ni karekenano?

Ti akoiia aomata aika tiaki kaain te onimaki. Ma boni kaitaraan ana kairiri te Atua te iraorao ni karekenano ma ae e tuai ni katabua maiuna nakoina, ao e aki kakaonimaki nakon ana kaetieti nako. (1Kor. 15:33)—15/8, i. 25.

E kangaa ni bwaka Betero ao e a manga oki korakoran ana onimaki?

Ibukin ana onimaki te abotoro Betero ao e nakonako i aon te ran nakon Iesu. (Mat. 14:24-32) Ma ngke e taraa te angibuaka, ao e a manga maaku. Imwina e a manga kaatuua ana iango i aon Iesu, ao ni butimwaea ana ibuobuoki.—15/9, i. 16- 17.

Ni Mwakuri 28:4 ao a iangoa te abotoro Bauro kaaini Merita bwa te tia tiritiri. E aera ngkai a iango n aron anne?

Ngke e tenaaki Bauro n te naeta ae te baiba, a kairua n iangoia bwa e katuuaaeaki iroun Dike ae te atua n aine ibukin te kaetitaeka ae riai.—1/10, i. 9.

Tera reireiara ae reke n aroni Mareta ni katabetabeaki ni baika bati?

N te taina ao e katabetabeaki Mareta ni katauraoan te amwarake ae bubura. E taekinna Iesu bwa e rinea te tibwanga ae raoiroi riki tarina ngke e ongora n ana reirei. Ti riai n taratara raoi bwa a na aki uruan ara waaki aika irekereke ma te onimaki baika akea manenaia.—15/10, i. 18- 20.