Ana Reirei Iesu Ibukin Ana Tautaeka n Uea te Atua

“E a nako n tataekina te rongorongo ae raoiroi ae taekan ana tautaeka n uea te Atua, ni kaawa nako aika bubura ma aika uarereke.”​—RUKA 8:1.

TI KAN tataekini baika kakawaki iroura, aika a rangi ni mamate nanora iai. N aron are e taekinna Iesu ni kangai: “E taetae te wi man onraken te nano.” (Mataio 12:34) N iangoani baike e taekin Iesu n ana mwakuri ni minita, ti a kakoauaa iai bwa e rangi ni mamate nanona n Ana Tautaeka n Uea te Atua.

Tera Ana Tautaeka n Uea te Atua? Te tautaeka bon te waaki ni kairiri ae kairaki iroun te uea. Ai ngaia are Ana Tautaeka n Uea te Atua bon te waaki ni kairiri ae boni kateaki iroun te Atua. E kabatiaa tataekinan Ana Tautaeka n Uea te Atua Iesu ao e riki bwa te boto n iango n ana rongorongo. E riaon 110 te tai taekinan te Tautaeka n Uea anne n Euangkerio aika aua. E aki angareirei Iesu n tii n te taetaenikawai. Ma e bati ae reiakinaki ibukin Ana Tautaeka n Uea te Atua ma baike e na karaoi, man ana mwakuri.

Antai te Uea iai? E aki rineaki te Uea n Ana Tautaeka n Uea te Atua nakon nakoana, irouia taan rinerine aika aomata. Ma e rineaki te tia Tautaeka aei bon iroun te Atua. E katerea Iesu n ana angareirei bwa boni ngaia ae e rineaki iroun te Atua bwa te Uea.

E ataia Iesu bwa taetae ni burabeti aika n te Baibara a a kaman taekinna ae e na tautaeka te Mesia are e beritanaki, n te Tautaeka n Uea ae teimatoa n aki toki. (2 Tamuera 7:12-14; Taniera 7:13, 14; Mataio 26:63, 64) Uringnga bwa e kaotiotia Iesu bwa boni ngaia te Mesia are e a kaman taekinaki. Ibukin anne e a kakoauaa ae boni ngaia te Uea are e rineaki iroun te Atua. (Ioane 4:25, 26) E tonu raoi ngke e kabongana n taai tabetai te taeka ae “au tautaeka n uea.”​—Ioane 18:36.

E angareirei naba Iesu bwa iai tabeman ake a na tautaeka ma ngaia n te Tautaeka n Uea. (Ruka 22:28-30) E atongia raona n tautaeka aikai Iesu bwa te “nanai ae uarereke,” bwa e bon tianaki mwaitiia. E taku nakoia: “E a tia ni kariaia Tamami bwa e na anganingkami te tautaeka n uea.” (Ruka 12:32) E kaotaki ni kabaneani bokin te Baibara bwa iai te mwaiti ae 144,000 ake a na mwiokoaki bwa a na tautaeka ma Kristo.​—Te Kaotioti 5:9, 10; 14:1.

E tei ia te Tautaeka n Uea? E taku Iesu nakon te tia tautaeka i Rom ae Bontio Birato: “Tiaki ana bwai te aba au tautaeka n uea.” (Ioane 18:36) E na aki tautaeka rinanoia aomata Ana Tautaeka n Uea te Atua are e kairaki irouni Kristo. E okioki Iesu n taekina Ana Tautaeka n Uea te Atua bwa “te tautaeka n uea ae bwaini karawa.” * (Mataio 4:17; 5:3, 10, 19, 20) Ai ngaia are  Ana Tautaeka n Uea te Atua bon te tautaeka ae bwaini karawa.

E boni kakoauaa Iesu bwa e na okira karawa imwini maiuna ae kimototo i aon te aba. E taekinna bwa e na “katauraoa te tabo,” ike e a kauka iai te kawai ibukia ake a na raonna n tautaeka.​—Ioane 14:2, 3.

Tera ae na kakororaoaki n te Tautaeka n Uea? E reireinia taan ongora Iesu bwa a na tataro nakon te Atua ni kangai: “E bia roko am tautaeka n uea. E na kakororaoaki nanom i karawa ao n te aonnaba naba.” (Mataio 6:9, 10) E kakororaoaki nanon te Atua i karawa. E na waakinaki ana kantaninga te Atua i aon te aba rinanon te Tautaeka n Uea aei. Ibukini kakororaoan anne, e na karokoi bitaki aika korakora i aon te aba te Tautaeka n Uea aei.

Tera ae na karaoia te Tautaeka n Uea i aon te aba? E angareirei Iesu bwa e na kamauna te buakaka Ana Tautaeka n Uea te Atua, n arona ni kamwaawaia taani kani kakaraoa ae buakaka. (Mataio 25:31-34, 46) E nanonaki n anne tokin aeka ni mwakuri ni babakanikawai ao te buakaka. E reirei Iesu bwa e na kaonaki te aonnaba irouia akana “nimamannei,” raoiroi, nanoanga, “eti nanoia,” ao taan raoi.​—Mataio 5:5-9.

A na maeka akana kakaonimaki n te buraneti ae kabarekaaki? A na bon aki! E berita Iesu bwa a na riki bitaki aika kamimi n te aonnaba i aan Ana Tautaeka n Uea te Atua. E taku te mwaane are raon Iesu n tiringaki: “Iesu, uringai ngkana ko a roko n am tautaeka n uea.” E kaekaa Iesu ni kangai: “E koaua ae I tuangko n te bong aei, Ko na mena ma ngai n te Bwaretaiti.” (Ruka 23:42, 43) Eng, e na bita te aonnaba aei Ana Tautaeka n Uea te Atua nakon te bwaretaiti ni kabutaa n aron are i Eten ngkoa.

Tera riki ae e na karaoia te Tautaeka n Uea ibukia botannaomata? E bati riki ae e karaoia Iesu nakon ae tii beritanakini baike e na karaoi Ana Tautaeka n Uea te Atua. E kaota naba te bae na karaoia te Tautaeka anne. E karaoi kakai aika  bati ni katoki aoraki, ake a a riki bwa katoto aika uarereke ni kaotiotani baika korakora riki ake e na karaoi n taai aika a na roko, n ana tai ni kairiri n ana Tautaeka n Uea. E koreaki ae kangai ibukin Iesu n te Euangkerio ae kairaki rinanon te taamnei: “E kabutaa Kariraia n angareirei n taian tinakoka, ao n tataekina te rongorongo ae raoiroi ibukin te tautaeka n uea, ma ni katoki aeka n aoraki nako ao mamaara ni kabane aika ituia aomata.”​—Mataio 4:23.

E katoki aeka n aoraki nako. E “kaurei matan ane e bungiaki ni mataki.” (Ioane 9:1-7, 32, 33) E arora baina ma te tangira, ni katoka iai aorakin te mwaane are e karawawataaki n te aoraki ae riribaaki ae te rebera. (Mareko 1:40-42) Ngke e uotaki nakoina “te mwaane ae bonotaninga ao e bae newena,” e kaotia iai Iesu bwa e kona ni “kauki taningaia bonotaninga ao e karaoiia ake a baennewe bwa a na taetae.”​—Mareko 7:31-37.

E aki kona te mate n tuka mwaakan te Uea are e rineia te Atua. E kautiia maate Iesu n taai aika tenua ake a koreaki. E kauta natin te aine ae mate buuna, te teinnaine ae 12 ana ririki ao raoraona ae bati n tangiria ae Rataro.​—Ruka 7:11-15; 8:41-55; Ioane 11:38-44.

Ni kabwarabwaraan taai aika a na roko aika kamimi ake a mena imwaia te koraki ake a aantaeka nakon Ana Tautaeka n Uea te Atua, e a kaman taekinna Iesu rinanon te abotoro Ioane ni kangai: “Noria! E a mena ana umwanrianna te Atua irouia aomata, ao e na maeka ma ngaiia ao a na riki bwa ana aomata. Ao te Atua e na boni memena irouia. Ao e na kaoa te rannimata ni kabane mai mataia, ao e nang akea riki te mate, ke te nanokawaki ke te tang ke te maraki. A a mauna bwaai rimoa.” (Te Kaotioti 1:1; 21:3, 4) Karaua iangoa te aonnaba ae akea iai te tang ibukin te nanokawaki, akea te maraki, ao akea naba te mate! Ngkanne ti nang ota raoi bwa e na boni kakororaoaki nanon te Atua i aon te aba n aroni kakororaoana i karawa.

E na roko n ningai Ana Tautaeka n Uea te Atua? E angareirei Iesu bwa moanakin ana tai n tautaeka e na kaai n riki i nanon te tai ae okoro are e aranna bwa ‘okina ma n tiku.’ E anga te taetae ni burabeti ae bwarabwara raoi Iesu ibukini kaotan okina ma n tiku ao moanakin mwaakana n uea. E na kanikinaeaki te tai ae maan teutana aei ni kangaanga aika taabangaki, n ikotaki naba ma buaka, roongo, mwaeiei, aoraki aika kamamate, ao rikiraken te buakaka. (Mataio 24:3, 7-12; Ruka 21:10, 11) A a tia n noraki baikai ae kanoan te kanikina aika bati riki ake e a kaman taekin Iesu, ni moa man 1914 are riki iai te Moani Buaka Are Kabutaa Aonnaba. Ngaia are e a tautaeka ngkai Iesu bwa te Uea. E a kaan te tai are e na roko iai te Tautaeka n Uea ao ni kakororaoa nanon te Atua i aonnaba. *

Tera rotakim n rokon Ana Tautaeka n Uea te Atua? E boto raoi anne i aon arom nakon ana rongorongo Iesu.

[Kabwarabwara ae nano]